Ebikaguzo Kuruga omu Basomi Baitu
Kakuba omusaija n’omukazi abatali omu buswere baraara hamu hataroho nsonga ey’amaani ey’ebaletiire kuraara hamu, bunu bwakaiso oburukwoleka ngu baine ekibi ekibakozere kandi ngu akatebe ak’abagurusi akarukucwa omusango kasemeriire kutekwaho?
Nahabweki kakuba haba hataroho ensonga ey’amaani habwaki baraire babiri, akatebe akarukucwa omusango kasemeriire kutekwaho.—1 Abakolinso 6:18.
Akatebe ak’abagurusi kasemeriire kwekebiija kurungi buli kintu ekibaireho nukwo betegereza obukiraaba nikyetagisa kutaho akatebe akarukucwa omusango. Ekyokurorraho, basemeriire kwekaguza: Abantu banu ababiri nibajumbirangana? Abagurusi bakaba babahabwireho ha mulingo basemeriire kutwazamungana? Habwaki baraire hamu? Baali bakitekaniize kara kuraara hamu? Hakaba haroho ekintu ekindi kyona ekibakaba nibasobora kukora kurora tibaraara hamu, rundi haroho ekintu ekyabwango bwango ekyabaireho ekibakaba batasobora kwetantara kandi bamalirra bahambiriziibwe kuraara hamu? (Omugambizi 9:11) Bakaraara nkaha? Buli nyikara neyahukana, nahabweki nihasobora kuba haroho ebintu ebindi eby’abagurusi basemeriire kumanya nukwo basigikirreho kukora encwamu.
Hanyuma y’akatebe ak’abagurusi kumanya ensonga zoona, abagurusi nibaija kucwamu obukiraaba nikyetagisa kutaho akatebe ak’okucwa omusango.
