1, 2. Kimanyisa ki kwesiga Yahwe?

EBIRO binu “ebyakabi kaingi” tibyanguhire. (2 Timoseo 3:1) Kandi obwomeezi nibwija kweyongera kuguma Yahwe obwaraaba atakahwerekeriize ensi enu embi kandi akaleta obusinge omu nsi. Enu niyo ensonga habwaki tusemeriire kwekaguza, ‘Noha ou nyesiga kunkonyera n’okumpa oburagirizi?’ Nikisobora kutwanguhira kugamba ngu “Yahwe,” kandi egi niyo nsonga erukukirayo obukuru.

² Nikimanyisa ki amaiso gaitu kugaikaza hali Yahwe? Kandi nitusobora kukora ki kurora ngu titwaleka kwesiga Yahwe n’omu bwire bw’ebizibu? Obusumi bwaira muno, haroho omuhandiiki wa Baibuli ayasoboroliire obukuru bw’okwikaza amaiso gaitu hali Yahwe obuturukuba nitwetaga obukonyezi. (Soma Zabuli 123:1-4.) Akagamba ngu obutwikaza amaiso gaitu hali Yahwe, tuba nitusisana nk’omwiru arukwikaza amaiso ge hali mukama we. Omu mulingo ki? Omwiru ayesiga mukama we kumuha eby’okulya n’obulinzi. Baitu nauwe  asemeriire kwikara narora muno nukwo asobole kumanya ekya mukama we arukugonza amukorre nukwo akikole. Nikyo kimu naitwe, tusemeriire kwesomesa Baibuli buli kiro nukwo tumanye ekya Yahwe arukugonza tukole kandi tukikole. Obu nubwo turagumya ngu Yahwe naija kutukonyera obuturamusaba obukonyezi.​—Abefeso 5:17.

3. Kiki ekisobora kutuhugura tukesanga amaiso tugaihire hali Yahwe?

³ Nobuturaaba tumanyire ngu obwire bwona tusemeriire kwikara nitwesiga Yahwe, obwire obumu nitusobora kwesanga tuhugukire. Kinu nikyo kyonyini ekyahikire hali enganjani ya Yesu arukwetwa Maliza. “Akaba natalibana obwokuhereza okwingi.” (Luka 10:40-42) Omuntu omwesigwa nka Maliza obwaraaba yasoboire kuhuguka kandi kunu akaba ali haihi na Yesu, tikisemeriire kutuhuniriza ngu naitwe nitusobora kuhuguka. Hati, kiki ekisobora kutuhugura tukesanga amaiso gaitu tugaihire hali Yahwe? Omu kicweka kinu, nitwija kurora omulingo ebintu abantu bandi bakora bisobora kutuhugura. Kandi nitwija kurora omulingo tusobora kwikaza amaiso gaitu hali Yahwe.

4. Habwaki nikihuniriza kumanya ngu Musa akaferwa omugisa gw’okutaaha omu Nsi Ekaba Eraganiziibwe?

⁴ Musa akaba ali muntu ayahonderaga obuhabuzi kuruga hali Yahwe. Baibuli egamba ngu “akagumisiriza narora [Ogu] atarukuboneka.” (Soma Abaheburaniya 11:24-27.) Kandi Baibuli eyongera egamba ngu “tihakaimukaga nabi omu Isareri okuruga aho arukusisana Musa, [Yahwe] ouyamanyire maiso namaiso.” (Ekyebiragiro 34:10) Baitu Musa nobwaraaba yali nganjani ya Yahwe eya maani, akaferwa omugisa gwe ogw’okutaaha omu Nsi ey’Ekaba Eraganiziibwe. (Okubara 20:12) Kiki ekyabaireho?

5-7. Kiki ekyabaireho Abaisareri obu baali bakaruga omu ihanga lya Misiri, kandi Musa akakora ki?

⁵ Hatakahoireho emyezi ebiri Abaisereri barugire omu Misiri, kandi batakahikire ha Rusozi Sinai, haroho ekintu eky’amaani ekyabaireho. Abantu bakatandika kuhyema habwokuba bakaba bataine amaizi. Bakatandika kuhyemera Musa kandi bakungana, ekyarugiremu, “Musa yakunga Mukama nagamba ati Ndakora ki abantu banu? [Balihaihi] okuntera amabale.” (Okuruga 17:4) Yahwe akaha Musa oburagirizi oburukwetegerezebwa kurungi. Akamugabira ngu atwale omwigo gwe kandi agutere ha mwandara oguli Holebu. Baibuli negamba ngu: “Musa yakora ati omu maiso gabakuru ba Isareri.” Amaizi gakaruga omu mwandara, Abaisareri batunga amaizi maingi ag’okunywa, kandi ekizibu ky’amaizi kyahwaho.​—Okuruga 17:5, 6.

⁶ Baibuli etugambira ngu Musa akaruka ekiikaro eki ibara Masa, ekirukumanyisa “Okulenga,” kandi Meriba, ekirukumanyisa “Okukungana.” Habwaki? “Habwokukungana kwabana ba Isareri, nahabwo kulenga Mukama, nibagamba ngu Mukama ali hagati yaitu, nandiki taloho?’”​—Okuruga 17:7.

⁷ Yahwe akehurra ata habw’ekintu ekyabaire Meriba? Akehurra ngu Abaisareri bakaba bajemiire uwe hamu n’obulemi bwe, hatali Musa wenka. (Soma Zabuli 95:8, 9.) Ekintu Abaisareri bakozere kikaba kitahikire nakake. Baitu Musa akakora ekintu ekihikire. Akekaguzaaho Yahwe kandi yahondera obuhabuzi bwona obuyamuhaire.

8. Kiki ekyabaireho Abaisareri obubakaba bali haihi kumaliriza orugendo rwabo kuruga omu irungu?

 ⁸ Baitu kiki ekyabaireho ekizibu kinu obukyayongiire kyabaho hanyuma y’emyaka 40? Abaisareri bakaba bali haihi kumaliriza orugendo rwabo kuruga omu irungu. Bakahika omu kiikaro ekirukwetwa Kadesi, haihi n’omutaano gw’Ensi ey’Ekaba Eraganiziibwe. Ekicweka kinu nakyo bakahika bakyeta Meriba. * (Rora obugambo obuli hansi.) Habwaki? Habwokuba Abaisareri bakongera bahyema habwokutaba n’amaizi. (Okubara 20:1-5) Baitu ha murundi gunu Musa akakora ensobi ey’amaani.

9. Buragirizi ki Yahwe obuyahaire Musa, baitu uwe Musa akakora ki? (Rora ekisisani ekiri ha rupapura 9.)

⁹ Musa akakora ki abantu obu bajemere? Omurundi gunu nabwo, Musa akasaba Yahwe kumuha oburagirizi. Baitu omurundi gunu Yahwe atagambire Musa kuteera omwandara. Akagambira Musa kutwara omwigo gwe, asoroleze abantu haihi n’omwandara, kandi hanyuma abalize omwandara. (Okubara 20:6-8) Eki nikyo Musa yakozere? Nangwa. Akatabuka kandi yabihirwa kyamuletera n’okucomera abantu ngamba ngu: “Muhurre nnu, inywe abemi; itwe turabaletera amaizi kuruga omu mwandara gunu?” Hanyuma akateera omwandara emirundi ebiri hatali gumu.​—Okubara 20:10, 11.

10. Yahwe akehurra ata habw’ekintu Musa yakozere?

¹⁰ Yahwe akabihirirwa muno Musa. (Ekyebiragiro 1:37; 3:26) Habwaki Yahwe yabihiirwe? Emu ha nsonga nesobora kuba habwokuba Musa atahondere oburagirizi obukaba bumuhairwe.

11. Habwaki Abaisareri basobora kuba bataratekeriize ngu Yahwe akozere eky’amahano Musa obuyatiire ha mwandara?

¹¹ Nihasobora kuba haroho ensonga endi habwaki Yahwe yabihiriirwe Musa. Emyandara ey’omu Meriba ey’okubanza ekaba egumire muno. Omuntu n’obwakutera ata omwandara gunu, busaho n’omu asobora kunihira amaizi kurugamu. Baitu emyandara ey’omu Meriba eyakabiri ekaba neyahukanaho n’eyomu Meriba ey’Okubanza. Emyendara erikukira obwingi ey’omu Meriba ey’akabiri ekaba ekozerwe omu mabaale agarukwetwa Limestone. Kusigikirra nk’oku emyandara ya mulingo gunu eba neyoroba, amaizi gakira kugirabamu nigesoroleza hansi yayo. Amaizi ganu omuntu nasobora kugalegya kakuba alima ekiina omu mwandara gwa mulingo gunu. Nahabweki Musa obu yatiire ha mwandara omu kiikaro ky’okugubaliza, nikisoboka kuba ngu Abaisareri bakatekereza ngu amaizi geresere gonka hatali Yahwe kukora ekyamahano? * (Rora obugambo obuli hansi.) Titumanyire.

12. Nsonga ki endi ey’esobora kuba yaletiire Yahwe kubihirirwa Musa na Aroni?

¹² Nihasobora kuba haroho ensonga endi habwaki Yahwe yabihiriirwe Musa na Aroni. Musa akagambira abantu ngu: ‘Itwe turabaletera amaizi kuruga omu mwandara gunu?’ Musa obu yagambire “itwe,” aine kuba yali namanyisa uwe na Aroni. Musa eki yabalize kikaba kitahikire habwokuba atooleke ngu Yahwe nuwe akozere ekyamahano eki. Zabuli 106:32, 33 nihagamba ngu: “Kandi bakamubihiza ha maizi ga Meriba, nukwo Musa yabona akabi habwabu. Baitu bakaba bemeriire omu mwoyo gwe, yagamba ebitali byamagezi neminwa ye (Rora obugambo obuli hansi.) (Okubara 27:14) Musa atahe Yahwe ekitinisa ekimusemeriire. Yahwe akagambira Musa na Aroni ati: “Mukemera ekigambo kyange.” (Okubara 20:24) Eki kikaba kibi ky’amaani! *

13. Habwaki omulingo Yahwe yafubiiremu Musa gwali guhikire kandi gw’obwinganiza?

¹³ Musa na Aroni bakaba nibajunanizibwa hali Yahwe kukira abantu abandi boona habwokuba bakaba nibebembera abantu be. (Luka 12:48) Ebintu binu bitakabaireho, emyaka y’enyuma, haroho obusinge bwona obw’Abaisareri obu Yahwe yayangire kutaaha omu Nsi ey’Ekaba Eraganiziibwe habwokuba bakamujemera. (Okubara 14:26-30, 34) Nahabweki kikaba kihikire kandi ky’obwinganiza Yahwe kufubira Musa omu mulingo nugwo gumu habwokuba nauwe akaba amujemiire. Okusisanaho n’abajeemu abandi, Musa nauwe ataikirizibwe kuhika omu Nsi Ekaba Eraganizibwe.

14, 15. Kiki ekyaletiire Musa kujemera Yahwe?

¹⁴ Kiki ekyaletiire Musa kujemera Yahwe? Yongera oyetegereze ngu Zabuli 106:32, 33 negamba: “Kandi bakamubihiza ha maizi ga Meriba, nukwo Musa yabona akabi habwabu. Baitu bakaba bemeriire omu mwoyo gwe, yagamba ebitali byamagezi neminwa ye.” N’obukiraaba ngu Abaisareri nubo bajemiire Yahwe, Musa nuwe yakwasirwe ekiniga. Atabe n’okwetanga baitu akabaza atabandize kutekereza ebirarugamu.

¹⁵ Musa akaiha amaiso ge hali Yahwe habwokuba akaikiriza ebikorwa by’abantu abandi kumuhugura. Abantu obubatontorromere habw’amaizi omurundi ogw’okubanza, Musa akakora ekihikire. (Okuruga 7:6) Baitu hati nasobora kuba yali ajwahire obujemu bwabo habwokuba emyaka ey’enyuma yoona bakaikara nibajeema. Nikisisana ngu ekintu kimu kyonka Musa ekyakaba natekerezaho ekaba nyehurra ye hatali omulingo arahaisa Yahwe ekitiinisa.

16. Habwaki tusemeriire kutekerezaho ensobi ei Musa yakozere?

¹⁶ Nabbi omwesigwa nka Musa obwaraaba yasoboire kuhuguka kandi yasiisa, naitwe ekintu nka kinu nikisobora kutuhikaho. Musa akaba ali haihi kutaaha omu Nsi ey’Ekaba Eraganiziibwe, naitwe tuli haihi  kutaaha omu nsi empyaka. (2 Petero 3:13) Titwakugondeze kufeerwa omugisa ogu ogw’embaganiza. Baitu obuturaaba nitugonza kutaaha ensi empyaka, tusemeriire kwikaza amaiso gaitu hali Yahwe kandi tumworoberege. (1 Yohana 2:17) Kiki ekitusobora kwegera ha nsobi Musa yakozere?

17. Kakuba tuba tukwasirwe ekiniga, tusemeriire kukora ki kurora twaikara nitwetanga?

¹⁷ Wetange obworaaba obihiirwe. Nitusobora kuba nitutunga ebizibu nibyo bimu obwire bwona. Baibuli negamba ngu: “Baitu omu kukora kurungi tuleke okujwaha, baitu ebiro obu birihika tuligesa obu tutagwa ensazi.” (Abagaratiya 6:9; 2 Abasesalonika 3:13) Kakuba habaho omuntu rundi ekintu ekirukwikara nikitubihiza, tubanza kutekereza tutakabalize? Tulema ekiniga kyaitu? (Enfumo 10:19; 17:27; Matayo 5:22) Abandi obubatutabaijura, tulengaho kukora kyona “kuhigiza ekiniga,” rundi tuleke Yahwe nuwe ayoleke ekiniga kye. (Soma Abarumi 12:17-21.) Eki nikimanyisa ki? Omu kiikaro ky’okukwatwa ekiniga, leka tulindirre Yahwe kugira ekiyakoraho kakuba arora ngu haroho ekisemeriire kukorwa. Kakuba tulengaho kuhoora enzigu omu kiikaro ky’okwesiga Yahwe, nituba tutarukumutamu ekitIinisa.

18. Kiki ekitusemeriire kwijuka obukirukuhika ha kuhondera oburagirizi?

 ¹⁸ Hondera obuhabuzi obuhyaka n’obwegendereza. Tuhondera n’obwesigwa obuhabuzi obuhyaka Yahwe obwatuha? Titusemeriire kwikara nitukora ebintu omu mulingo nugwo gumu habwokuba ngu nukwo twikaire nitubikora. Oihireho, tusemeriire kuhondera oburagirizi bwona obuhyaka Yahwe obwarukuba atuhaire kurabira omu kitebe kye. (Abaheburaniya 13:17) Kandi, tusemeriire kwegendereza “okutahinguraho ebyahandikirwe.” (1 Abakolinso 4:6) Obutuhondera oburagirizi bwa Yahwe n’obwegendereza, twikara tumutaireho amaiso.

19. Nitusobora kukora ki kurora ngu ensobi ez’abantu abandi tizasiisa enkoragana yaitu na Yahwe?

¹⁹ Otaikiriza ensobi ez’abantu abandi kusiisa enkoragana yaawe na Yahwe. Obu turayeyongera kwikaza amaiso gaitu hali Yahwe, titurukwija kusiisa enkoragana yaitu nauwe rundi kukwatwa ekiniga habw’ebintu eby’abantu abandi barukukora. Kinu kikuru kukira muno obu turukuba twine obujunanizibwa omu kitebe kya Yahwe nka Musa. Ky’amananu ngu turaaba tuli b’okujunwa, twine kutamu amaani omu kworobera Yahwe. (Abafiripi 2:12) Baitu, nambere turagarukira kuba n’obujunanizibwa omu kitebe nuho turagarukira kujunanizibwa omu maiso ga Yahwe. (Luka 12:48) Baitu obuturaaba mali nitugonza Yahwe, busaho ekiratutabaijura rundi ekiratwahukaniza hali okugonza kwe.​—Zabuli 119:165; Abarumi 8:37-39.

20. Kiki ekitusemeriire kwekamba kukora?

²⁰ Tuli omu bwire obugumire kandi oburumu emitalibaine nyingi. Nahabweki kikuru kurora ngu twaikaza amaiso gaitu hali Yahwe “anyakuikaliire omu iguru,” kusobora kumanya ebyarukutwetagisa. Titusemeriire kuleka ensobi ez’abantu abandi kusiisa enkoragana yaitu na Yahwe. Ekyahikire hali Musa nikitwegesa isomo linu erikuru. Omu kiikaro ky’okutabuka habw’ensobi ez’abantu abandi bakozere, leka ‘amaiso gaitu garolerre gati Yahwe Ruhanga waitu, okuhikya obwalituganyira.’​—Zabuli 123:1, 2.