Kwatirwa Embabazi “Abantu Bona”
YESU obwakaba nayegesa abegeswa be omulingo ogw’okutebeza amakuru amarungi, akabagambira ngu abantu abamu bakaba batarukugenda kubahuliriza. (Luka 10:3, 5, 6) Nikyo kimu n’omu buheereza bwaitu. Abantu abamu abatutangaana nibasobora kutubaliza kubi rundi kututabukira. Kandi obubetwaza omu mulingo nka gunu, nikisobora kutugumira kuboleka embabazi n’okugonza kubatebeza.
Omuntu ow’embabazi arora ebyetaago by’abandi n’ebizibu ebi barukurabamu, akwatwaho abusaasi bwabo kandi agonza kubakonyera. Baitu kiki ekiraabaho kakuba embabazi ezitwiniire abantu abatutangaana omu buheereza zihwaho? Obwekambi baitu nibwija kuhwaho, ekirarugamu, titurukwija kuba n’ekihika eky’okutebeza abantu kandi titurukwija kubakonyera. Obwekambi bwaitu nitusobora kubulengesaniza n’omurro. Kurora omurro gwaikara nigwaka kurungi, nikyetagisa kuba haloho oryoya orukwetwa oxygen orurukumara. Nikyo kimu naitwe, kurora obwekambi bwaitu bwaikara bugumire, nitwetagisa kuba n’embabazi!—1 Abasesalonika 5:19.
Nitusobora tuta kwega kuba b’embabazi, n’obukiraaba ngu tikyanguhire? Leka tubazeho ebyokurorraho bisatu ebitusobora kwegeraho: Ekyokurorraho kya Yahwe, Yesu, hamu na Paulo.
BA N’EMBABAZI NK’EZA YAHWE
Kumara emyaka nyingi, abantu baikaire nibabazaho Yahwe ebisuba. Baitu uwe aikara ali wembabazi hali abatasiima n’ababi. (Luka 6:35) Embabazi ze azoleka ata? Agumisiriza abantu boona. Yahwe nagonza “abantu bona” bajunwe. (1 Timoseo 2:3, 4) N’obukiraaba ngu Ruhanga anoba obubi, abantu abatwara kuba b’omuhendo kandi tarukugonza bafe.—2 Petero 3:9.
Yahwe akimanyire kurungi ngu Setani mukugu obukirukuhika ha kuletera abantu kwikiriza ebisuba. (2 Abakolinso 4:3, 4) Baingi babegeseze ebisuba ebirukukwata hali Ruhanga kurugira kimu omu buto bwabo. Nahabweki entekereza yabo n’enyehurra yabo nibisobora kubaletera kutaikiriza amananu bwangu. Baitu Yahwe nagonza kubakonyera. Nitukimanya tuta?
Ekyokurorraho, tekerezaho omulingo Yahwe yayehuliremu ha bantu abakaba bali omu rubuga rwa Nineve. N’obu baraaba baali bantu abaagonzaga kurwana, Yahwe akagambira Yona ati: “Nanyowe tinsemeriire okuganyira Nineve orubuga oru orukoto; nambere harumu abantu abarukukira kasirira mu bukumi bubiri abatasobora okubaganizamu emikono yabu, ogwobulyo nogwemoso?” (Yona 4:11) Yahwe akakwatirwa embabazi abantu banu n’obubaraaba baali batamanyire amananu agarukumukwataho. Nahabweki akabasindikira Yona kubahabura.
Naitwe abantu tubarora nk’oku Yahwe abarora. Bali bantu b’omuhendo. Nka Yahwe, naitwe twine ekihika ky’okubakonyera kwega hali Yahwe n’obubaraaba nibazooka nkabatarukusobora kwikiriza amananu.
BA N’EMBABAZI NK’EZA YESU
Yesu akaba ali nka Ise, nahabweki akakwatirwa abantu embabazi habwokuba “bakaba bajwahire nibararanga nkentama ezitanyina mulisa.” (Matayo 9:36) Yesu aketegereza habwaki abantu bakaba bali omu nyikara enu. Ensonga eri ngu abebembezi babo ab’amadiini babatwazaaga kubi kandi babegesaaga ebisuba. Kandi n’obukiraaba ngu Yesu yali akimanyire ngu baing hali abo abaijaga kumuhuliriza baali baine ebigendererwa ebitali bimu na bimu hatali kufooka bahondezi be, nabwo akabeegesa ebintu bingi.—Marako 4:1-9.
Otahwamu amaani kakuba omuntu atahuliiriza ha murundi ogw’okubanza
Kakuba enyikara ehinduka, abantu nibasobora kutandika kurora amananu omu mulingo ogundi
Kakuba abantu batagonza obutumwa baitu, tusemeriire kulengaho kwetegereza habwaki nibetwaza omu mulingo gunu. Obundi nibasobora kuba baine entekereza embi hali Baibuli rundi habwokuba baboine abantu abandi abarukweyeta Abakristaayo nibakora ebintu ebibi. Abandi nibasobora kuba bahuliireho ebisuba ebitugambwaho. Kandi abandi nibasobora kwanga kubaza naitwe habwokuba nibatiina abanyabuzaale babo rundi abantu abandi ha kyaro kubasekereza kakuba babarora nibabaza naitwe.
Abantu abamu abatutangaana nibasobora kuba bahikirweho ebintu bibi muno byabakwataho. Omumisaani arukwetwa Kim nagamba ngu abantu abarukukira obwingi omu kicweka ekyarukwikaramu, bakakira obulemu kandi bakaferwa ebintu byabo byona. Tibaine kunihira kwonyini okw’omu busumi bw’omu maiso. Baketamwa ensi kandi tibarukwesiga muntu weena. Abantu ab’omu kiikaro kinu bakira kutanga Abakaiso ba Yahwe kubatebeza. Kiro kimu Kim obwakaba ali omu buheereza bakaija kumurwanisa.
Kiki ekikonyera Kim kwikara nayoleka embabazi abantu n’obubamutwaza kubi? Alengaho kwikara naijuka ebigambo ebiri omu Enfumo 19:11, ebirukugamba ngu: “Okwekenga okwomuntu kumuikazaho okubihirwa.” Munyaanya itwe onu obwatekerezaaho ebintu eby’abantu abali omu kiikaro eki baarabiremu, kimuletera kubakwatirwa embabazi. Kandi tikiri ngu buli muntu ow’atangaana aba atarukugonza kuhuliiriza. Omu kiikaro eki kyonyini, aine abantu abaagarukira kandi barungi mali.
Nitusobora kwekaguza: ‘Kakuba nali ntamanyire amananu, kandi Abakaiso ba Yahwe bakaija kuntebeza nakwetwaize nta?’ Ekyokurorraho, kakuba twali tuhuliireho ebisuba bingi ebirukukwata h’Abakaiso ba Yahwe? Obundi naitwe twakwetwaize kubi kandi twakugondeze batutwaze omu mulingo gw’embabazi. Nahabweki tusemeriire kulengaho kwetegereza omulingo abandi barukwehurra kandi tubagumisirize, n’obu kirukuba kitanguhire.—Matayo 7:12.
BA N’EMBABAZI NK’EZA PAULO
Omukwenda Paulo akoleka embabazi abantu boona otwaliiremu naabo abakaba batarukugonza kumuhuliiriza. Habwaki? Habwokuba akaijuka omulingo yayetwazamuga atakegere amananu. Akagamba ngu: “Nobunkaba ndi kara omujumi, omuhiganiza, nomwekuniki: baitu nkaganyirwa obwokukora ntamanyire nomu kutaikiriza.” (1 Timoseo 1:13) Paulo akaba amanyire ngu Yahwe na Yesu bakamugirra embabazi. Aketegereza habwaki abantu abamu bagonzaaga kumutanga kutebeza, habwokuba nauwe akaba akikozereho kara.
Obwire obumu, Paulo yatangaanaga abantu abarukwikiririza muno omu nyegesa ez’ebisuba. Kinu kikamuletera kwehurra ata? Engeso Ezabakwenda 17:16, niholeka ngu Paulo obwakaba ali omu Asene “omutima gwe gukamusarra obuyaboine orubuga ruijwire ebisisani.” Baitu Paulo akakozesa ekintu kyonyini ekyamutabwire kwegesa abantu. (Engeso Ezabakwenda 17:22, 23) Akahindura ha mulingo yatebezaga kandi akabaza omu mulingo ogw’embaganiza ha bantu abarukuruga omu nyikara ez’embaganiza nukwo akole kyona ekirukusoboka kujuna abamu.—1 Abakolinso 9:20-23.
Kakuba tuba nitutebeza omuntu arukwikiririza omu bintu ebitahikire rundi kakuba ayetwaza kubi, leka tukole Paulo ekiyakozere. Tukozese ebitumumanyireho kandi tumukonyere kumanya “amakuru amarungi ag’ekintu ekirukukira oburungi.” (Isaya 52:7, NW) Munyaanya itwe arukwetwa Dorothy nagamba: “Omu kicweka kyaitu, abantu baingi begesiibwe ngu Ruhanga agumangaine rundi aikara narora ensobi omu bantu. Abantu nk’abo mbasiima habw’okwikiriza kwabo omuli Ruhanga kandi hanyuma mboleka omulingo Baibuli ebazaaho emiringo emirungi eya Yahwe hamu n’emirago eyaturaganiize.”
IKARA N’OSINGURA EBINTU EBIBI OBU N’OKORA EBIRUNGI
Nk’oku turayeyongera kwirra haihi n’empero, nukwo n’entekereza y’abantu erayeyongera “kuhingurana omu bubi.” (2 Timoseo 3:1, 13) Baitu omulingo abantu barukwetwaramu tigusemeriire kutulemesa kutunga okusemererwa rundi kuba bantu ab’embabazi. Yahwe nasobora kutuha amaani agaratukonyera ‘kwikara nitusingura obubi obu nitukora ebirungi.’ (Abarumi 12:21) Munyaanya itwe arukwetwa Jessica kandi arukuheereza nka payoniya nagamba ngu akira kutangaana abantu ab’emyehembo abatusekereza kandi abasekereza obutumwa bwaitu. Kandi nayongera nagamba ngu: “Ekintu kinu nikisaliza. Obumba ntakatandikire kubaza n’omuntu, omu mutima gwange nsaba Yahwe kunkonyera kurora omuntu ogu nk’oku Yahwe amurora.” Ekintu kinu kikonyera Jessica kutateka omutima ha nyehurra ye baitu kutekerezaho omulingo ogw’asobora kukonyeramu omuntu ogu.
Twikara nituserra abo abarukugonza kumanya amananu
Obwire nibwija kuhika, abantu abamu baikirize obukonyezi bwaitu kandi beege amananu
Obuturukuba nitutebeza n’aboruganda hamu n’abanyaanya itwe, nabo tubagarremu amaani. Jessica nagamba ngu obwaba ali omu buheereza kandi omu habarukutebeza nabo akahikwaho ekintu ekitali kirungi, alengaho kutakitaho omutima. Oihireho, abazaaho ebintu ebirukugarramu amaani nk’ebirungi ebirugire omu kutebeza kwaitu n’obukiraaba ngu abamu tibagonza kutuhuliriza.
Yahwe nauwe akimanyire ngu obwire obumu kitugumira kutebeza. Baitu kimusemeza muno obu twegera ha mbabazi ze! (Luka 6:36) Baitu Yahwe taliikara n’agumisiriza kandi n’akwatirwa embabazi abantu ab’omu nsi enu. Nitukigumya ngu nammanya obwire bwonyini obw’okuleteramu empero. Akaire ako katakahikire, omulimo gwaitu ogw’okutebeza gusemeriire kukorwa omu bwangu. (2 Timoseo 4:2) Nahabweki leka tugumizeemu nitutebeza n’obwekambi kandi nitukwatirwa “abantu bona” embabazi.
