1. Habwaki tusemeriire kwetekaniriza okuhiganizibwa?

MUKAMA waitu Yesu Kristo obwakaba atakafiire, akagamba ngu abo boona abaakumuhondiire baali nibaija kunobwa. (Yoh. 17:14) Kurugira kimu omu kasumi ka Yesu okuhika na hati, abantu abarukuhakaniza okuramya okw’amananu baikaire nibahiganiza Abakristaayo abesigwa. (2 Tim. 3:12) Kandi nk’oku tuliyo nitwirra haihi n’empero y’ensi enu, nitukigumya ngu okuhiganizibwa nikwija kweyongera.​—Mat. 24:9.

2-3. (a) Habwaki tutasemeriire kutiina? (b) Nitwija kubazaaho ki omu kicweka kinu?

² Kintu ki ekitusemeriire kwerinda omu kasumi kanu kusobora kwetekaniriza okuhiganizibwa? Tusemeriire kwerinda kwikara nitutekerezaho ebintu ebibi ebisobora kutuhikaho omu kasumi ak’okuhiganizibwa. Kakuba twikara nitubitekerezaaho muno, nitusobora kutandika kutiina ekihinguraine n’okwikara tweralikiriire. Kinu nikisobora kutuletera kutiina muno tukamalirra tulekere kuheereza Yahwe n’ebintu ebi bitakatuhikireho. (Nfu. 12:25; 17:22) Omunyanzigwa waitu Sitaani akira kukozesa okutiina nk’eky’okurwanisa eky’amaani. (1 Pet. 5:8, 9) Kiki ekitusobora kukora hati kusobora kwetekaniriza okuhiganizibwa?

³ Omu kicweka kinu, nitwija kurora omulingo tusobora kweyongera kugumya enkoragana yaitu na Yahwe n’ensonga habwaki kikuru kukikora hati. Nitwija n’okubazaaho ebintu ebitusemeriire kukora omu kasumi kanu kusobora kuba bamanzi. Kandi hanyuma nitwija kubazaaho ekitusemeriire kukora abantu obubaratunoba.

4. Kusigikirra omu Abaheburaniya 13:5, 6, kiki ekitusemeriire kugumiza kimu kandi habwaki?

⁴ Kigumize kimu ngu Yahwe nakugonza kandi talikuhemukira. (Soma Abaheburaniya 13:5, 6.) Emu ha Watchtower ey’aturukire omu myaka eya kara muno ekagamba eti: “Omuntu ow’amanyire Ruhanga kurungi amwesigira kimu omu kasumi ak’okuhiganizibwa.” Ago mananu, habwokuba kusobora kugumira okuhiganizibwa tusemeriire kuba nitugonza muno Yahwe, nitumwesigira kimu kandi nitukigumiza kimu ngu n’atugonza muno.​—Mat. 22:36-38; Yak. 5:11.

5. Kiki ekirakukonyera kugumya ngu Yahwe n’akugonza?

⁵ Soma Baibuli buli kiro n’ekigendererwa eky’okweyongera kwirra haihi na Yahwe. (Yak. 4:8) Obworaaba n’osoma Baibuli teeka omutima ha miringo ya Yahwe nk’okugonza, okuganyira hamu n’embabazi ze. Obworaaba nosoma, lengaho kwetegereza omulingo ebintu eby’oliyo n’osomaho n’ebiyakozere birukwoleka nk’oku n’akugonza. (Kurug. 34:6) Abantu abamu kibagumira muno kwikiriza ngu Ruhanga n’abagonza habwokuba omu bwomeezi bw’abo tibakatungaga muntu wena arukubagonza. Naiwe obworaaba n’oyehurra oti, lengaho buli kiro kuhandiika ebintu ebirukwoleka ngu Yahwe n’akugonza. (Zab. 78:38, 39; Bar. 8:32) Obworatekerezaaho ebintu Yahwe akukoliire hamu n’eby’osomere omu Baibuli noija kutunga ebintu biingi eby’okuhandiika ebirukukugumya ngu n’akugonza. Kandi obw’orasiima ebintu Yahwe arukukukorra, enkoragana yaawe nauwe niija kweyongera kuguma.​—Zab. 116:1, 2.

6. Kusigikirra ha Zabuli 94:17-19, okusaba oihire ha mutima nikisobora kukukonyera kita?

⁶ Saba butoosa. Tekerezaaho omwana omuto ow’aikaliire ha bibero bya ise, n’amugambira byona ebibaireho kiro eki ataine kutiina kwona. Kakuba osaba Yahwe buli kiro, naiwe noija kutunga enkoragana enungi nauwe nk’ey’eri hagati y’omwana ogu na ise. (Soma Zabuli 94:17-19.) Obworaaba n’osaba hali Yahwe, “sesa omutima gwawe nkamaizi” omugambire byona eby’orukutiina n’ebirukukweralikiriza. (Emp. 2:19) Kiki ekirarugamu? Noija kutunga “[obusinge] bwa Ruhnaga oburukukira okumanywa kwona” Baibuli obw’ebazaaho. (Baf. 4:6, 7) Obworayeyongera kusaba omu mulingo gunu, noija kweyongera kwehurra oli haihi na Yahwe.​—Bar. 8:38, 39.

7. Habwaki osemeriire kukigumiza kimu ngu Obukama bwa Ruhanga bulihikiriza emirago yoona Ruhanga ey’aturaganiize?

⁷ Kigumize kimu ngu emirago yoona erukukwata ha Obukama bwa Ruhanga niija kuhikirra. (Kubar. 23:19) Obworukuba oine okwikiriza kuceke omu mirago enu, kyanguhire Sitaani hamu n’abantu be kukutiinisiriza. (Nfu. 24:10; Baheb. 2:15) Nosobora ota kugumya okwikiriza kwawe omu Bukama bwa Ruhanga hati? Tunga obwire oburukumara kwesomesaaho emirago ya Ruhanga ey’erukukwata ha Bukama bwe kandi n’ensonga habwaki n’okigumya ngu niija kuhikirra. Kinu nikiija kukukonyera kita? Tekerezaaho ekyokurorraho ky’Ow’oruganda Stanley Jones, ayasibirwe omu nkomo habw’okwikiriza  kwe. * Kiki eky’amukonyire kugumisiriza n’okwikara ali mwesigwa hali Yahwe? Akagamba ati: “Nkaba ninyikiririza muno omu Bukama bwa Ruhanga hamu n’ebintu ebibulikora, tinagurukyagurukyaga nakake. Kandi enu niyo nsonga habwaki omuntu wena akaba atasobora kundetera kuruga hali Yahwe.” Okwikiriza okugumire omu mirago ya Ruhanga nikwija kukukonyera kwirra haihi na Yahwe n’okutatiina.​—Nfu. 3:25, 26.

8. Kugenda omu nsorrokano obutoosa nikyoleka ki? Soborra

⁸ Genda omu nsorrokano obutoosa. Ensorrokano zitukonyera kwirra haihi na Yahwe. Kugenda omu nsorrokano tutarukwosa kyoleka ngu nitusobora kugumira okuhiganizibwa omu busumi obw’omu maiso. (Baheb. 10:24, 25) Habwaki nitugamba tuti? Obuturaaba nitwikiriza ebintu ebitaito kutulemesa kugenda omu nsorrokano omu kasumi kanu, kiki ekiraabaho omu kasumi ak’okuhiganizibwa nambere kugenda omu nsorrokano kisobora kuteka obwomeezi bwaitu omu kabi? Obuturagifoora ngeso yaitu kugendaga omu nsorrokano obutoosa, titurukwija kuleka kuzigendamu abarukutuhiganiza n’obubaratutanga. Kanu nuko akasumi nambere tusemeriire kweyongera kugonza ensorrokano zaitu. Okugonza ensorrokano zaitu nikiija kutukonyera kworobera Ruhanga hatali abantu omu kasumi ak’okuhiganizibwa rundi kuba gavumenti etutanga kusorrokana hamu.​—Eng. 5:29.

9. Kukwata ebyahandiikirwe omu mutwe nikisobora kita kutukonyera kwetekaniriza kara okuhiganizibwa?

⁹ Kwata omu mutwe ebyahandiikirwe eby’orukukira kugonza. (Mat. 13:52) Amananu gali ngu itwena twebwa, baitu Yahwe nasobora kukozesa omwoyo gwe kutukonyera kwijuka ebyahandiikirwe ebitwasomere kara. (Yoh. 14:26) Tekerezaaho ebigambo by’ow’oruganda onu ay’atwairwe omu nkomo kandi bamusiba wenka omu ihanga lya East Germany. Akagamba ati: “Kikansemeza muno ngu omu kasumi nambere bankwatiire nkaba mazire kukwata ebyahandiikirwe biingi muno omu mutwe. N’obundaaba nkaba nsibirwe nyenka, naikaraga nintekerezaaho ebintu eby’embaganiza ebinasomere omu Baibuli.” Ebyahandiikirwe binu bikakonyera ow’oruganda onu kwikara aine enkoragana ey’egumire na Yahwe hamu n’okwikara ali mwesigwa haliwe.

10. Habwaki tusemeriire kukwata omu mutwe ebizina ebirukuhaisaniza Yahwe?

¹⁰ Zina kandi okwate omu mutwe ebizina ebirukuhaisaniza Yahwe. Paulo hamu na Sira obubaali basibirwe omu nkomo y’omu Firipo, bakazina ebizina ebirukuhaisaniza Yahwe ebibakaba bakwasire. (Eng. 16:25) Ekintu kinu kikakonyera ab’oruganda n’abanyaanya itwe kuruga omu  ihanga elyayetwaga Soviet Union kugarukwamu amaani obubabaihire omu maka gaabo babatwara omu ihanga lya Siberia. Munyaanya itwe arukwetwa Mariya Fedun akagamba ati: “Tukazina ebizina byona ebitwali nitwijuka kuruga omu kitabu kyaitu eky’ebizina.” Kandi akongera yagamba ngu ebizina binu bikagarramu buli omu amaani kandi by’abakonyera kwirra haihi na Yahwe. Ogarukwamu amaani obwozina ebizina eby’omwoyo eby’okira kugonza? Nahabweki kanu nuko akasumi ak’okukwata omu mutwe ebizina binu!​—Rora akasanduuko “ Ninsaba Obumanzi.”

11-12. (a) Kusigikirra ha 1 Samuiri 17:37, 45-47, kiki ekyakonyire Daudi kuba mumanzi? (b) Ekyokurorraho kya Daudi nikitwegesa ki?

¹¹ Nikitwetagisa kuba bamanzi kusobora kugumira okuhiganizibwa. Obworaaba n’oyehurra otaine bumanzi, kiki ekisobora kukukonyera kubutunga? Oijuke ngu obumanzi bwonyini tibusigikirra ha bukooto bwaitu, amaani gaitu rundi obusobozi bwaitu. Tekerezaaho ekyokurorraho ky’omwojo omuto Daudi ayarwaine na Goliasi. Kakuba olengesaniza Daudi n’ekisaija kinu ekikooto Daudi akaba ali mutaito, muceke kandi ataine eby’okurwanisa eby’amaani. Akaba ataine n’empirima. Baitu akaba ali mumanzi muno kandi akairuka atarukutiina yagenda kurwanisa ekisaija kinu ekikooto kandi eky’emyehembo.

¹² Kiki ekyakonyire Daudi kuba mumanzi? Akaba nakigumiza kimu ngu Yahwe ali nawe. (Soma 1 Samuiri 17:37, 45-47.) Daudi atateeke omutima ha bukooto bwa Goliasi habwokuba akaba akimanyire ngu Yahwe w’amaani muno kukira Goliasi. Ekyokurorraho kinu nikitwegesa ki? Naitwe nitwija kuba bamanzi obuturakigumiza kimu ngu Yahwe ali naitwe kandi nakira abanyanzigwa baitu amaani habwokuba nuwe Ruhanga Ow’obusobozi bwona. (2 Byom. 20:15; Zab. 16:8) Nitusobora tuta kweyongera kuba bamanzi hati okuhiganizibwa kutakaizire?

13. Nitusobora tuta kweyongera kuba bamanzi? Soborra.

¹³ Nitusobora kweyongera kuba bamanzi kakuba tutebeza omurwijwire amakuru amarungi ag’Obukama tutarukutiina. Habwaki? Habwokuba okutebeza kutukonyera kwesiga Yahwe hamu n’okuleka kutiina abantu. (Nfu. 29:25) Nk’oku emibiri yaitu eyeyongera kuguma obutukora ebisaseizi, nukwo n’obumanzi bwaitu bweyongera obututebeza nju ha nju, omurwijwire, omu butale hamu n’obututebeza hoona hoona nambere tusanga abantu. Obuturatunga obumanzi obw’okutebeza omu kasumi kanu nikiija kutukonyera kwikara nitutebeza, omulimo gwaitu n’obuguratangwa.​—1 Bas. 2:1, 2.

14-15. Bintu ki ebitusobora kwegera hali Nancy Yuen na Valentina Garnovskaya?

 ¹⁴ Ebyokurorraho bya banyaanya itwe banu abayolekere obumanzi nibisobora kutwegesa biingi. Munyaanya itwe arukwetwa Nancy Yuen akaba ali mugufu aine nka fuuti itaano (rundi mita 1.5), baitu n’obwaraaba akaba ali mugufu kandi mutaito, akooleka obumanzi bw’amaani. * Akanga kuleka kutebeza amakuru amarungi agarukukwata ha Bukama bwa Ruhanga. Ekyarugiremu gavumenti ya China ekamusiba kumara emyaka nka 20. Abaserikale abaali nibamukaguliriza bakagamba ngu “nuwe akaba nakirayo kugumangana omu ihanga lyona.”

¹⁵ Munyaanya itwe arukwetwa Valentina Garnovskaya ayaikaraga omu ihanga elyayetwaga Soviet Union bakamusiba emirundi esatu kandi akamara emyaka erukwingana nka 21 omu nkomo. * Habwaki bamusibire? Habwokuba akaba acweriiremu kimu kwikara natebeza, abaserikale bakagamba ngu akaba ali “mucwi w’ebiragiro ow’akabi muno.” Kiki ekyakonyire banyaanya itwe banu abesigwa kuba bamanzi? Baali nibakigumiza kimu ngu Yahwe akaba ali nabo.

16. Kiki ekiratukonyera kuba n’obumanzi bwonyini?

¹⁶ Nk’oku turozere, kutunga obumanzi tikisigikirra ha maani gaitu rundi obusobozi bwaitu. Baitu kisigikirra ha kwesiga ngu Yahwe ali hamu naitwe kandi nuwe naturwanirra. (Bir. 1:29, 30; Zak. 4:6) Kinu nikyo kituletera obumanzi bwonyini.

17-18. Kusigikirra ha Yohana 15:18-21, kiki Yesu ekiyagambire ngu kyali nikigenda kuhika ha Bakristaayo? Soborra.

¹⁷ Kitusemeza abantu obubatutamu ekitiinisa, baitu obubatakitutamu titusemeriire kutekereza ngu titwine mugaso. Yesu akagamba ati: ‘Munyina omugisa abantu obubabanoba, obubabanuga, obubabajuma, obubagadisa ibara lyanyu nka libi, okubatura Omwana w’omuntu.’ (Luk. 6:22) Yesu akaba namanyisa ki?

¹⁸ Yesu akaba atarukumanyisa ngu Abakristaayo bakusemeriirwe habw’okubanoba. Baitu akaba nayoleka kiki kyonyini ekikaba nikigenda kubaho. Habwokuba tituli kicweka ky’ensi, tuhondera enyegesa za Yesu omu bwomeezi  bwaitu kandi tutebeza obutumwa Yesu obuyatebiize. Binu byona biretera ensi kutunoba. (Soma Yohana 15:18-21.) Nitugonza kusemeza Yahwe. Nahabweki kakuba abantu batunoba habwokuba nitugonza Yahwe, ogu musaango gw’abo.

19. Nitusobora tuta kuhondera ekyokurorraho ky’abakwenda?

¹⁹ Otalikiriza ebigambo n’ebikorwa by’abantu kukuletera kwehurra oswaire habwokuba oli omu ha Bakaiso ba Yahwe. (Mik. 4:5) Ekyokurorraho ky’abakwenda abakaba bali omu Yerusalemu hanyuma y’okwitwa kwa Yesu, nikisobora kutukonyera kutatiina abantu. Baali bakimanyiire kimu ngu abebembezi b’ediini Abayudaaya bakaba babanobere. (Eng. 5:17, 18, 27, 28) Baitu nabwo, abakwenda banu bakaikara nibagenda omu yekaru kandi nibagambira abantu omu rwijwire nk’oku bali begeswa ba Yesu. (Eng. 5:42) Bataikirize ekintu kyona kubalemesa. Naitwe nitusobora kuleka kutiina abantu kuraba omu kubamanyisa nk’oku tuli Bakaiso ba Yahwe katube tuli ha isomero, ha mirimo hamu n’omu biikaro nambere twikara.​—Eng. 4:29; Bar. 1:16.

20. Habwaki abakwenda batungire okusemererwa kandi kunu abantu baali babanobere?

²⁰ Kiki ekyaletiire abakwenda banu kusemererwa? Baali bamanyire ensonga habwaki babanobere, kandi bakagurora nk’omugisa gw’amaani kubonabonesebwa habw’okukora Yahwe ebyagonza. (Luk. 6:23; Eng. 5:41) Omukwenda Petero akahandiika nagamba ati: “Baitu nobumuliba nimubonabonesebwa habwokuhikirra munyina omugisa.” (1 Pet. 2:19-21; 3:14) Obuturakyetegereza ngu abantu batunoba habw’okukora ebihikire, titurukwija kuleka okutiina abantu kukatulemesa kuheereza Yahwe.

21-22. (a) Kiki iwe eky’ocwiremu kukora kwetekaniriza okuhiganizibwa? (b) Nitwija kwegaho ki omu kicweka ekirukuhonderaho?

²¹ Titusobora kumanya akasumi ak’abantu balitandikiramu kutuhiganiza rundi nambere gavumenti eritangiramu omulimo gwaitu. Baitu tukimanyire ngu nitusobora kwetekaniriza akasumi ako hati kuraba omu kugumya enkoragana yaitu na Yahwe, kweyongera kuba bamanzi, hamu n’okwega kugumisiriza abantu obubatunoba. Obuturayetekaniza kurungi hati, nikiija kutukonyera kugumizaamu nituheereza Yahwe n’omu kasumi ak’omu maiso.

²² Baitu kiki ekitusemeriire kukora kakuba omulimo gwaitu gutangwa? Omu kicweka ekirahonderaho nitwija kubazaaho emisingi ey’esobora kutukonyera kwikara nituheereza Yahwe omulimo gwaitu obugurukuba gutangirwe.