1. Mpinduka ki enyakubaireho omu myaka ey’erabireho?

ENKUMI n’enku z’emyaka enyuma, abantu baingi baali baine ediini. Baitu omu myaka ey’erabireho habaireho empinduka y’amaani. Abantu baingi hati tibaine diini. Kandi omu mahanga agamu abantu abarukukira obwingi bagamba ngu tibaine ediini. *​—Mat. 24:12.

2. Habwaki abantu abamu bataine ediini?

² Habwaki omuhendo gw’abantu abataine diini nigweyongera? * Abamu nibasobora kuba bamaliire omutima ha by’okwesemeza rundi ha bizibu byabo. (Luk. 8:14) Abamu abaali baine ediini hati nibaikiriza ngu Ruhanga taroho. Abandi nibaikiriza ngu aroho baitu batekereza ngu ediini zikahwa ha mulembe, tizikyaine mugaso kandi ngu tizirukwikiraniza na sayansi hamu n’amagezi agaroho hati. Abantu banu nibasobora kuba nibaikiriza ngu Ruhanga taroho habwokuba bakahurra banywani babo, abanyamakuru rundi abegesa nibakigamba kandi nibasobora kuba batakahurrahoga ensonga ezirukugumya ngu Ruhanga aroho. Abandi batamwa ediini habw’engeso embi ez’abebembezi b’ediini, nk’okugonza muno sente n’obusobozi. Omu bicweka ebimu gavumenti tiziha ediini ezimu obugabe oburukumara.

3. Kiki ekiturukugenda kwega omu kicweka kinu?

³ Yesu akaturagira kuhindura abantu ab’omu mahanga goona abegeswa. (Mat. 28:19) Nitusobora tuta kukonyera abantu abataine ediini kwega kugonza Ruhanga n’okufooka abegeswa ba Kristo? Tusemeriire kukimanya ngu omulingo abantu betwazamu  obutubatebeza gukira kusigikirra ha mulingo bakuziibwemu rundi n’ebikaro nambere bakuliire. Ekyokurorraho, omulingo abantu abakuliire omu bicweka bya Bulaaya betwaza obutubatebeza nigwahukana n’omulingo abantu kuruga omu bicweka bya Asia betwaza. Habwaki? Habwokuba abantu abarukukira obwingi kuruga omu Bulaaya baine ekibamanyire ha Baibuli kandi bakira kuhurra ngu Ruhanga nuwe y’ahangire ebintu byona. Baitu omu bicweka bya Asia, abantu abarukukira obwingi tibaine ekibamanyire ha Baibuli rundi bagimanyireho bike muno kandi baingi tibaikiriza ngu haroho Omuhangi. Ekicweka kinu kitekaniziibwe kutukonyera kumanya omulingo tusobora kuhika ha mitima y’abantu boona abaturukutebeza tutafireyo nambere barukuruga rundi enyikiriza zabo.

4. Habwaki tusemeriire kwikara twine entekereza enungi?

⁴ Kimanye ngu Nabo Nibasobora Kwega Amananu. Buli mwaka abantu abaali bataine diini bafooka Bakaiso ba Yahwe. Baingi baali baine engeso nungi kandi bakaba batamirwe obugobya bw’amadiini. Abandi baali baine engeso embi muno ezi baali baine kubanza kuleka. Nitukigumiza kimu ngu Yahwe naija kutukonyera kuzoora ‘abo boona abaine entekereza enungi ey’esobora kubaletera kutunga obwomeezi obutahwaho.’​—Eng. 13:48, NW; 1 Tim. 2:3, 4.

5. Kiki ekiretera abantu kugonza kutuhuliiriza?

⁵ Ba n’Embabazi kandi Okozese Amagezi. Emirundi nyingi, abantu batuhuliiriza habw’omulingo tuba tubalizemu nabo hatali habw’ebigambo ebitubagambiire. Kibakwataho muno obutubooleka embabazi, obutubaza nabo omu mulingo ogw’amagezi kandi obutubooleka ngu mali nitubafaaho. Titubahambiriza kutuhuliiriza, oihireho tulengaho kwetegereza entekereza yabo obukirukuhika ha diini. Ekyokurorraho, nitukimanya ngu abantu abamu tibagonza kubazaaho ediini n’omuntu oubatamanyire. Abandi batekereza ngu tikiri kirungi kukaguza omuntu ebirukukwata hali Ruhanga. Baitu kandi abandi batiina kubarora nibasoma Baibuli, kukira muno n’Abakaiso ba Yahwe. N’obubaraaba baine ensonga ya mulingo ki, itwe tulengaho kwetegereza enyehurra yabo.​—2 Tim. 2:24.

6. Omukwenda Paulo akoleka ata amagezi obwaka natebeza kandi naitwe nitusobora tuta kuhondera ekyokurorraho kye?

⁶ Kiki ekitusobora kukora kakuba tusanga omuntu atarukugonza tukozese ebigambo nka “Baibuli,” “ebihangwa,” “Ruhanga,” rundi “ediini”? Nitusobora kwegera ha kyokurorraho kya Paulo obu nituhindahinduramu omulingo tubazaamu n’abantu. Paulo obuyabaga n’abaza n’Abayudaaya, yakozesaaga Ebyahandiikirwe. Baitu obwakaba natebeza Abayonaani ab’omu Aleopago abakaba begesiibwe muno, atabazeeho Ebyahandiikirwe. (Eng. 17:2, 3, 22-31) Nitusobora tuta kuhondera ekyokurorraho kya Paulo? Obworaaba n’obaza n’omuntu ow’atarukwikiriza omu Baibuli, tikyakubaire kirungi kumwoleka ngu eby’orukumusoborra nibiruga omu Baibuli. Kakuba tukyetegereza ngu omuntu tarukugonza abandi kumurora nitumusomera Baibuli, nitusobora kumwoleka ebyahandiikirwe omu mulingo ogw’amagezi, nk’ekyokurorraho nitukozesa esimu.

7. Kusigikirra ha 1 Abakolinso 9:20-23, kiki ekitusemeriire kukora kusobora kwegera ha kyokurorraho kya Paulo?

⁷ Tulengeho Kubetegereza kandi Tubahuliirize. Tusemeriire kulengaho kwetegereza ebintu ebiretera abantu kutekereza n’okwehurra omulingo baba nibehurramu. (Nfu. 20:5) Leka twongere tubazeho ekyokurorraho ky’omukwenda Paulo. Akakura ayetoroirwe Abayudaaya. Busaho kugurukyagurukya ngu akaba aine kuhinduramu obuyagiire kutebeza ab’Amahanga abaali batamanyire ekintu kyona rundi abaali bamanyire bike muno ebirukukwata hali Yahwe rundi Ebyahandiikirwe. Nikisobora kutwetagisa kukora okuseruliriza rundi kwekaguzaho abatebezi abamazire akasumi kaingi nibatebeza nukwo batukonyere kumanya nk’oku tusobora kwetegereza  entekereza n’enyehurra y’abantu ab’omu kiikaro kyaitu.​—Soma 1 Abakolinso 9:20-23.

8. Magezi ki agatusobora kukozesa kutandika kubaza n’omuntu ebirukukwata ha Baibuli?

⁸ Ekigendererwa kyaitu nikyo eky’okuserra abo abarukugonza kumanya amananu. (Mat. 10:11) Kandi kusobora kukora ekintu kinu, twine kukaguza abantu entekereza yabo kandi obubaraaba nibatugambira tubahuliirize kurungi. Ow’oruganda kuruga omu ihanga lya Bungereza obw’aba natebeza akaguza abantu ebikaguzo nka binu: Kiki ekisobora kuletera amaka kubamu okusemererwa, kiki ekisobora kukonyera abazaire kukuza abaana abaine engeso enungi, rundi kiki ekyosobora kukora kugumira obutali bwinganiza. Hanyuma y’okuhuliiriza kurungi agamba ati: “Notekereza obuhabuzi bunu obwahandiikirwe emyaka nka 2,000 enyuma nibusobora kutukonyera?” Obwamara akozesa esimu kumusomera ekyahandiikirwe eky’akomeremu baitu tamugambira ngu nikiruga omu Baibuli.

9. Nitusobora tuta kukonyera abantu abatarukugonza kubazaaho Ruhanga?

⁹ Nitusobora kuhika ha mitima y’abantu abatagonza kubazaaho Ruhanga kuraba omu kubazaho ebintu ebibagonza. Ekyokurorraho, abantu baingi bahunirra obubarora ebintu ebitwetoroire. Nahabweki nitusobora kubagambira tuti: “Naiwe n’osobora kuba okimanyire ngu abakugu omu sayansi bakira kukora ebintu ebihyaka nibasigikirra ha bintu ebiroho. Ekyokurorraho, abakora emizindaaro babanza kwetegereza omulingo amatu gakoramu, kandi abakora kamera basigikirra ha mulingo amaiso gakoramu. Obworora ebintu ebitwetoroire bikuletera kutekereza ki? Notekereza ebintu binu, bikaijaho byonka, bikahangwa rundi haroho omulingo gundi nk’oku byaizireho?” Hanyuma y’okuhuliiriza kurungi nitusobora kugamba ngu: “Abakugu banu obubaraaba basigikirra ha bintu ebiroho nk’amatu, n’amaiso kukora ebintu ebihyaka, n’oha ayakozere ebintu binu? Ebigambo binu eby’omuhandiiki wa kara bikampuniriza. Akagamba ati: “Ayataireho okutu talihurra? Ogu ayakozire eriso talibona? . . . Ogu anyakwegesa abantu amagezi?” Abanyasayansi abamu nibaikiraniza n’ebigambo binu. (Zab. 94:9, 10) Nukwo hanyuma tumwoleke emu ha vidiyo kuruga omu kicweka “Viewpoints on the Origin of Life” hansi y’ekicweka Interviews and Experiences ekiri ha mukura ogwa jw.org^®. (Rora nambere hali PUBLICATIONS > VIDEOS.) Rundi nitusobora kumuha burocuwa enyakwine omutwe Was Life Created? rundi The Origin of Life​—Five Questions Worth Asking.

10. Nitusobora tuta kutandika kubaza n’omuntu atarukugonza kubazaaho Ruhanga?

¹⁰ Abantu abarukukira obwingi nibagonza kutunga obwomeezi oburungi omu kasumi ak’omu maiso. Baitu kandi baingi beralikirra ngu ensi niija kuhwerekerra rundi kusisikarra kimu eremwe  n’okwikarwamu. Omuroleerezi w’ekicweka kuruga omu ihanga lya Norway n’agamba ngu abantu nobubaraaba batarukugonza kubazaaho Ruhanga bakira kugonza kubazaaho ebintu ebirukubaho omu nsi. Obwamara kuramukya omuntu, agamba ati: “Notekereza kiki ekiratuletera obwomeezi oburungi omu kasumi ak’omu maiso? Notekereza n’oha aratukonyera, abalemi, abanyasayansi rundi omuntu ondi?” Hanyuma y’okumuhuliiriza kurungi, amusomera rundi abazaaho ekyahandiikirwe ekibazaaho obusumi obw’omu maiso oburungi. Abandi obubakimanya ngu ensi erikaraho ebiro n’ebiro rundi ngu abahikiriire balitunga obwomeezi obutahwaho omu nsi kibaletera kugonza kumanya ebirukukiraho.​—Zab. 37:29; Mug. 1:4.

11. Habwaki tusemeriire kukozesa emiringo erukwahukana obuturukuba nitubaza n’abantu kandi nitusobora tuta kuhondera ekyokurorraho kya Paulo ekiri omu Abarumi 1:14-16?

¹¹ Kirungi kukozesa emiringo erukwahukana kubaza n’abantu. Habwaki? Habwokuba abantu tibarukusisana. Omulingo ogusobora kuletera omuntu omu kugonza kumanya ebirukukiraho nigusobora kubiihiza omuntu ondi. Abamu bagonza kubazaaho Ruhanga rundi Baibuli kandi abandi bo kibanguhira obutubanza kubazaaho ebintu ebindi. Baitu ekirukukira obukuru nukwo kukozesa buli mugisa gwona oguturatunga kutebeza abantu aba buli mulingo. (Soma Abarumi 1:14-16.) Kandi twikale tukimanyire ngu Yahwe nuwe aletera amananu kukura omu mutima gw’omuntu ow’arukugonza kukora ekihikire.​—1 Kol. 3:6, 7.

12. Nitusobora tuta kutebeza abantu kuruga omu Asia abatakatekerezahoga ngu haroho Omuhangi?

¹² Omu nsi yoona, abatebezi baingi bakira kutangaana abantu abarukuruga omu mahanga ag’omu Asia, otwaliremu n’abo abarukuruga omu mahanga nambere gavumenti zitarukuha abantu obugabe bw’okuramya nk’oku barukugonza. Omu mahanga maingi ag’omu Asia abantu baingi tibakira kufaayo kumanya obuharaaba haliyo Ruhanga. Abamu baikiriza kwega Baibuli aho naaho habwokuba baba baine ekihika ky’amaani eky’okwega ekintu ekihyaka, baitu kandi abandi tibaine ekihika eki. Kiki ekisobora kutukonyera kubahika ha mutima? Abatebezi abamu abamazire akasumi kaingi nibatebeza abantu banu nibagamba ngu kirungi kutandika n’obazaaho ebintu ebindi, booleke ngu n’obafaaho, kandi omu kasumi akasemeriire n’osobora kubagambiraho omulingo wagasiirwe obuwahondiire obuhabuzi kuruga omu Baibuli.

13. Kiki ekisobora kuleetera abantu kugonza kumanya ebiri omu Baibuli? (Rora ekisisani ekiri ha kyesweko.)

¹³ Abantu abarukukira obwingi, obubakyetegereza ngu Baibuli erumu obuhabuzi oburungi kibaletera kugonza kumanya ebirukukiraho. (Mug. 7:12) Munyaanya itwe arukwikara omu rubuga rwa New York, kandi ow’akira kutebeza abantu abarukubaza Orucaina nagamba ati: “Ndengaho muno kubooleka ngu nimbafaaho kandi mbahuliriza kurungi. Obunkimanya ngu omuntu akyali muhyaka, mukaguza nti: ‘Ebintu nibikugendera bita? Osoboire kutunga omulimo? Abantu nibakutwaza bata?’” Obumu omulingo gunu gumukonyera kutandika kubegesaho Baibuli. Obukiba kyetagisize, munyaanya itwe onu akaguza ati: “Notekereza kiki ekisobora kutukonyera kwikara twine enkoragana enungi n’abantu abandi? Nukwo abooleka orufumu kuruga omu Baibuli orukugamba ngu: “Kutandika obulemu nikisisana nk’okukingurra amaizi. Hatakabaireho enkungani rugaho bukyali kara.” (Nfu. 17:14, NW) Kandi hanyuma akaguza ati, notekereza obuhabuzi bunu nibusobora kutukonyera kwikara twine enkoragana enungi n’abantu abandi?” Kubaza n’abantu omu miringo enu nikisobora kutukonyera kumanya abo abarukugonza kumanya ebirukukiraho.

14. Ow’oruganda kuruga omu ihanga lya mahanga ag’Oburugaizoba bwa Asia akonyera ata abantu abagamba ngu tibarukwikiririza omuli Ruhanga?

¹⁴ Nitusobora tuta kukonyera abo abatarukwiririza omuli Ruhanga? Ow’oruganda kuruga omu  Burugaizoba bwa Asia kandi ow’amazire emyaka nyingi n’atebeza abantu abataine diini n’agamba ati: “Emirundi erukukira obwingi omuntu obw’agamba tarukwikiririza omu Ruhanga aba namanyisa ngu tarukwikiririza omu baruhanga abarukuramibwa abantu b’ekikaro eki. Nahabweki nyowe nyikiranganiza nawe nti baruhanga abo b’ebisuba kandi bakakorwa abantu. Kandi nkira kumusomera Yeremiya 16:20: ‘Omuntu alyekorra wenka abacwezi, kunu tibali [baruhanga]?’ Nukwo mukaguza nti: ‘Nitusobora tuta kwahukaniza Ruhanga ow’amananu hali abo abakozerwe abantu?’ Muhuliiriza kurungi nukwo hanyuma musomera Isaya 41:23: ‘Mutebeze ebigambo ebiriija hanyuma, itwe tubamanye muli [baruhanga].’ Hanyuma mwoleka ekyokurorraho kimu eky’ekintu Yahwe yarangire kara kyahikirra.”

15. Ekyokurorraho ky’ow’oruganda kuruga omu kicweka ky’Oburrugaizoba bwa Asia nikitwegesa ki?

¹⁵ Ow’oruganda kuruga omu kicweka ky’Oburugaizoba bwa Asia akozesa amagezi ganu obw’aba agarukireyo kurora abantu abayatebiize. Nagamba ati: “Nyoleka abantu obuhabuzi obuli omu Baibuli, obunnabi obwahikiriziibwe hamu n’omulingo ebazaaho ebintu ebirukukwata ha buhangwa. Hanyuma mbakonyera kwetegereza nk’oku ebintu binu byona nibyoleka ngu haroho Omuhangi omwomeezi kandi w’amagezi. Omuntu obw’akikiriza ngu Ruhanga n’asobora kuba aroho, nubwo ntandika kumwoleka Baibuli eky’eyegesa hali Yahwe.”

16. Kusigikira ha Abaheburaniya 11:6, habwaki abeegi ba Baibuli basemeriire kuba kwikiririza omuli Ruhanga n’omu Baibuli, kandi nitusobora tuta kubakonyera kuba n’okwikiriza kunu?

¹⁶ Obuturaaba nitwegesa Baibuli abantu abakuliire omu biikaro nambere abantu bataine ediini, tusemeriire kuba n’ekigendererwa ky’okubakonyera kukigumya ngu Ruhanga aroho. (Soma Abaheburaniya 11:6.) Kandi tusemeriire kubakonyera kwikiririza omu Baibuli. Kinu nikisobora kutwetaagisa kubasoborra ensonga ezimu emirundi nyingi. Nikisobora n’okutwetagisa kwikara nituboleka obwakaiso oburukugumya ngu Baibuli kigambo kya Ruhanga buli murundi tusoma n’abo. Kinu nikisobora kutwetagisa kubasoborra omu bugufu obunabbi bwa Baibuli obuhikirizibwe, ebintu ebirukwoleka ngu Baibuli eby’erukubaza ha sayansi n’ebyafaayo bihikire rundi kuboleka obuhabuzi oburungi oburumu.

17. Kiki ekisobora kurugamu kuba twoleka abantu okugonza?

¹⁷ Tukonyera abantu kufooka begeswa ba Kristo kuraba omu kubooleka okugonza, kababe baine ediini rundi bataine. (1 Kol. 13:1) Obuturukuba nitubegesa, tusemeriire kuba n’ekigendererwa eky’okubooleka ngu Ruhanga natugonza kandi nagonza naitwe tumugonze. Buli mwaka enkumi n’ekumi z’abantu abaali bataine diini rundi eby’ediini nibabigendaho mpora babatizibwa hanyuma y’okwega kugonza Ruhanga. Nahabweki ikara okimanyire ngu abantu ababuli mulingo nibasobora kwega amananu kandi obooleke ngu n’obafaaho. Kuraba omu bikorwa byawe bakonyere kufooka begeswa ba Kristo.