BAIBULI ijwiremu ebigambo eby’abaheereza ba Yahwe abesigwa abaali baine enyehurra nk’ezaitu. (Yak. 5:17) Ekyokurorraho, nikisobora kutwanguhira kwetegereza ebigambo by’omukwenda Paulo ebirukusangwa omu Abarumi 7:21-24. Akagamba ati: “Nyowe obungonza okukora ekirungi, ekibi kindi haihi. . . . Nyowe ndi muntu wobujune!” Mali nikigarramu amaani kumanya ngu omusaija omwesigwa nka Paulo nauwe akaba nayehurra ati.

Haroho n’ebigambo ebindi Paulo ebiyabalize ebirukwoleka omulingo yayehurramuga. Omu Abagaratiya 2:20 akagamba ati: ‘Omwana wa Ruhanga, akangonza, yayehayo wenka habwange.’ Paulo akaba nagumiza kimu ekintu kinu. Naiwe nukwo orukwehurra oti? Rundi haroho obwogurukyagurukya ebigambo binu?

Obworaaba n’oyehurra nk’ataine mugaso habw’ebibi ebiwakozere kara, nikisobora kukugumira kwikiriza ngu Yahwe akakuganyire, nakugonza, n’okwikiriza ngu akahayo ekicunguro ky’Omwana we habwawe. Mali Yesu n’agonza okimanye ngu akahayo ekicunguro habwawe? Obukiraaba nukwo kiri, kiki ekisobora kutukonyera kukigumya? Leka tubazeeho ebikaguzo binu.

Amananu gali ngu, Yesu nagonza okimanye ngu naiwe akakufeera. Kinu nitukigumya tuta? Tekerezaho eky’abaireho omu Luka 23:39-43, NW. Omusaija anyakuhanikirwe ha muti haihi na Yesu, aikiriza ngu akakora ebintu ebibi. Omusango oguyakozere gwine kuba gwali gw’amaani muno habwokuba abantu abahanikwaga babaga bakozere emisango ey’amaani. Habw’omusaija onu kweralikirra muno, ayesengereza Yesu n’amugambira ati: “Onyijuke obwolihika omu Bukama bwawe.”

Yesu akamugarukamu ata? Tekerezaaho obusaasi bwingi Yesu obuyahuliire obwakaba n’ahinduka kurora omusaija onu ha maiso. Nobwaraaba akaba ali omu busaasi bwingi, akasobora kutaho akaseko ha matama kandi yagarramu omusaija onu amaani nagamba ati: “Mananukwo ninkugambira hati, oliba na nyowe omu rugonjo rwa Ruhanga.” Yesu akaba nasobora kumugambira ati: ‘Omwana w’omuntu akaija . . . okuhayo obwomeezi bwe okucungura baingi.’ (Mat. 20:28) Baitu Yesu akozesa ebigambo eby’embabazi kugumya omusaija onu ngu ekicunguro kye kyali nikigenda kumugasira nk’omuntu. Yesu akamwoleka okugonza obuyakozeseze ebigambo “oliba na nyowe.” Kandi akooleka ngu namufaaho obuyamugambire ngu naija kwikara omu rugonjo rwa Ruhanga orurungi oruliba omu nsi.

Busaho kugurukyagurukya kwona Yesu akaba n’agonza omusaija onu aikirize ngu ekicunguro kye kyali nikigenda kumugasira nk’omuntu. Yesu obwaraaba yatwaize ati omucwi w’ebiragiro onu ow’akaba atakatungire omugisa ogw’okuheereza Ruhanga, busaho kugurukyagurukya, naija kwoleka embabazi Omukristaayo anyakubatiziibwe kandi ow’ayegarukiremu habw’ebibi bye. Kiki ekisobora kukukonyera kukigumya ngu ekicunguro kya Yesu nikikugasira nk’omuntu n’obworaaba wakozere ebibi eby’amaani omu busumi obwa kara?

Paulo akakigumya ngu Yesu akamufeera habwokuba akamuha omulimo ogw’okutebeza.  Kikamukonyera kita? Paulo akagamba ati: “Ninsima ogu ayampaire amani, nuwe Kristo Yesu Mukama waitu, baitu akantekereza okuba wokwesiga obuyanteriireho okuherezakwe, nobunkaba ndi kara omujumi, nomuhiganizi, nomwekuniki.” (1 Tim. 1:12-14) Habwokuba Yesu akaba ahaire Paulo omulimo gunu nobwaraaba akaba akozere ebintu bingi ebibi omu busumi obwakara, kikamugumya ngu Yesu w’embabazi, n’amugonza kandi n’amwesiga. Naitwe Yesu atuhaire omulimo ogw’okutebeza amakuru amarungi. (Mat. 28:19, 20) Omulimo gunu nigusobora kutukonyera kukigumya ngu akatufeera.

Albert, ow’akaba amazire emyaka 34 abingirwe omu kitebe baitu hati harabireho obwire buke agarukire. Nagamba ati: “Nyikara ninyijuka ebibi ebinakozere. Baitu obumba ndi omu buheereza kinkonyera kwehurra nk’omukwenda Paulo ow’akaba nakigumya ngu Yesu nuwe y’amuhaire omulimo gunu. Kinu kinkonyera kutunga okusemerwa, kwehurra kurungi, kutamu obwomeezi bwange ekitiniisa hamu n’okutunga okunihira okw’okutunga obwomeezi oburungi omu kasumi ak’omu maiso.”​—Zab. 51:3.

Allan obw’akaba atakegere amananu, akakora emisaango nyingi kandi y’agonzaga muno kurwana. Nagamba ati: “Na hati ntekerezaaho ebintu ebibi ebinakozere abantu kandi kinu obumu kindetera kwenuuba. Baitu ninsiima muno Yahwe habw’okwikiriza omusiisi nka nyowe kugenda kutebeza abantu amakuru amarungi. Obundora omulingo abantu abandi bakwatwaho amakuru amarungi kinkonyera kwijuka omulingo Yahwe ali murungi kandi ali w’okugonza. Kandi kinkonyera kukimanya ngu nankozesa kukonyera abandi abarukukora ebintu ebibi nk’ebi nakoraga.”

Obutugenda kutebeza tuba nitukora ekintu ekirungi kandi kitukonyera n’okutekerezaaho ebintu ebirungi. Kandi kinu kyongera kutugumya ngu Yesu w’embabazi, n’atugonza kandi n’atwesiga.

Emitima yaitu niija kugumizaamu netujunaana habw’ebibi ebitwakozere kara, kuhikya Yahwe obw’alihwerekereza ensi enu embi eya Sitaani. Kiki ekiratukonyera kurwanisa enyehurra zinu?

Munyaanya itwe oubarukweta Jean kandi owaikara nayehurra kubi habw’ebibi ebiyakoraga omunsiita kandi kunu yayefooraga kuba mwesigwa hali Yahwe obuyabaga omu ka rundi ha Ekyombeko ky’Obukama. Nagamba ati: “Kingumya muno kukimanya ngu ‘Ruhanga nakira obukuru omutima gwaitu.’” (1 Yoh. 3:19, 20) Nka Jean naitwe nikisobora kutukonyera kwehurra kurungi habw’okukimanya ngu Yahwe hamu na Yesu nibakyetegereza ngu tituhikiriire. Kandi tusemeriire kwikara nitwijuka ngu habw’okugonza bakahayo ekicunguro habw’abasiisi abegarukamu hatali habw’abahikiriire.​—1 Tim. 1:15.

Nosobora kukigumya ngu ekicunguro nikikugasira nk’omuntu kakuba oyecumitirizaho omulingo Yesu yatwaizeemu abasiisi kandi okakora kyona ekirukusoboka kukora omulimo gw’okutebeza oguyatuhaire. Obworakora binu naiwe noija kwikiranganiza n’omukwenda Paulo ayagambire ati: Yesu ‘akangoza, yayehayo wenka habwange.’