1-2. (a) Kusigikirra ha Matayo 28:18-20, ekitebe Ekikristaayo kiine kigendererwa ki ekikuru? (b) Bikaguzo ki ebiturukwija kubazaaho omu kicweka kinu?

YESU obuyamazire kuhuumbuka akakora entekaniza ey’okutangatangana abegeswa be ha Rusozi rwa Galiraya. Abegeswa be obubayesoroliize ha rusozi runu, baine kuba baali baine ekihika kiingi. (Mat. 28:16) Kandi nikisobora kuba ngu kanu nuko akasumi ‘yarozerwe bene baitu abakukira bikumi bitaano ha murundi gumu.’ (1 Kol. 15:6) Habwaki Yesu yaragiire abegeswa be kumutangatangana? Nukwo abahe ekiragiro kinu ekikuru: “Mugende, muhindule amahanga gona abegeswa.”​—Soma Matayo 28:18-20.

² Abegeswa ba Yesu abahuliire ebigambo binu nubo bafokere bamu h’Abakristaayo abaali omu kitebe Ekikristaayo eky’omu kyasa eky’okubanza. Ekitebe Ekikristaayo kinu kyali kiine ekigendererwa ekikuru eky’okukonyera abantu kufooka abegeswa ba Kristo. * N’omu kasumi kanu, omu nsi yoona harumu ebitebe biingi eby’Abakristaayo ab’amananu kandi biine ekigendererwa nikyo kimu. Omu kicweka kinu, nitugenda kubazaaho ebikaguzo binu bbina: Habwaki omulimo ogw’okufoora abantu abegeswa mukuru muno? Nigutwarramu ki? Abakristaayo boona bakonyera omu kufoora abantu abegeswa? Kandi habwaki nitwetaaga okugumisiriza obuturukuba nitukora omulimo gunu?

3. Kusigikirra ha Yohana 14:6 na 17:3, habwaki omulimo ogw’okufoora abantu abegeswa mukuru muno?

³ Habwaki omulimo ogw’okufoora abantu abegeswa mukuru muno? Habwokuba abantu kusobora kufooka abanywani ba Ruhanga basemeriire kubanza kufooka begeswa ba Kristo. Ekindi, abo abahondera Kristo batunga obwomeezi oburukukirayo oburungi hati kandi batunga n’okunihira okw’obwomeezi obutahwaho omu kasumi ak’omu maiso. (Soma Yohana 14:6; 17:3.) Nobukiraaba ngu Yesu atuhaire omulimo mukuru muno, titugukora omu maani gaitu itwenka. Omukwenda Paulo obw’akaba n’ayebazaaho hamu n’abayatebezaaga nabo akagamba ati: “Tuli bakozi hamu na Ruhanga.” (1 Kol. 3:9) Nobukiraaba ngu tituhikiriire, Yahwe hamu na Yesu batuhaire omugisa gw’amaani.

4. Ekyokurorraho ekya Ivan na Matilde nikitwegesa ki?

⁴ Omulimo ogw’okufoora abantu abegeswa guleeta okusemererwa kwingi. Tekerezaaho ekyokurorraho eky’Ow’oruganda Ivan na mukazi we Matilde, ab’omu ihanga lya Colombia. Bakatebeza omusigazi ow’arukweta Davier, kandi omusigazi onu akabagambira ati: “Nakugondeze kuhindura omulingo ndukutwazaamu obwomeezi bwange, baitu tindukusobora.” Davier onu akabaali mutezi w’entomi, yanywaga ebitokooza obwongo, mutamiizi kandi yaikaraga n’omukazi ow’akaba atagaisirwe nauwe oubarukweta Erika . Ivan nagamba ati: “Tukatandika kwega nawe Baibuli. Baitu ekyaro ekiyaikaramuga kikaba kiri hara muno nahabweki twamaraga esaaha nyingi nituvuga egaali kandi omuhanda gukaba guli mubi. Erika obuyarozere omulingo Davier akaba atandikire kuhindura engeso ze hamu n’entekereza ye nawe akatandika kwega Baibuli.” Hanyuma y’akasumi, Davier akaleka kunywa ebitokooza bwongo, yaleka obutamiizi, okuteera entomi kandi yaswera Erika omu butongole. Matilde nagamba ati: “Davier na Erika obubabatizibwe omu 2016, tukaijuka nk’oku Davier yagambaga ngu ‘nigonza kuhindura obwomeezi bwange baitu tindukusobora.’ Mali tukasemererwa muno twarra n’okurra.” Busaho kugurukyagurukya obutukonyera abantu kufooka begeswa ba Kristo tutunga okusemererwa kwingi.

5. Kiki ekitusemeriire kubanza kukora kusobora kufoora abantu abegeswa?

⁵ Ekintu eky’okubanza ekitusemeriire kukora omu omulimo gunu ogw’okufoora abantu abegeswa nukwo ‘kuserra’ abo abarukugonza kwega hali Yahwe. (Mat. 10:11) Obutugambira buli omu wena ou tutangaana ebirukukwata hali Yahwe tukyoleka ngu mali tuli Bakaiso ba Yahwe. Kandi tukyoleka ngu tuli Bakristaayo ab’amananu obutworobera ekiragiro kya Kristo eky’okutebeza.

6. Kiki ekiratukonyera kuhikiriza kurungi obuheereza bwaitu?

⁶ N’obukiraaba ngu abantu abamu baba baine ekihika eky’okwega Baibuli obutubatebeza omurundi ogw’okubanza, abarukukira obwingi tibakira kufaayo ha kubanza. Nahabweki nikisobora kutwetagisa kubaletera kugonza kwega Baibuli. Obuturaaba nitugonza kuhikiriza kurungi obuheereza bwaitu tusemeriire kwetekaniza kurungi. Obworaaba n’otekaniza serra ebintu eby’abantu ab’omu kiikaro kyanyu barukugonza kumanya. Kandi otekanize n’omulingo orayanjura ensonga ezi.

7. N’osobora ota kutandika kubaza n’abantu kandi habwaki kikuru kubahuliiriza n’okubatamu ekitiinisa?

⁷ Nk’ekyokurorraho, n’osobora kugambira omuntu oti: “Nakugondeze kumanya entekereza yaawe ha nsonga enu? Ebizibu ebitutunga nibisisana n’eby’abantu abandi omu nsi yoona barukutunga. Notekereza kuba tutunga gavumenti emu omu nsi yoona n’esobora kumaraho  ebizibu byaitu byona?” N’osobora kumwoleka Danieri 2:44. Rundi n’osobora kumukaguza oti: “Notekereza kiki ekisobora kutukonyera kukuza abaana abaine engeso enungi?” Nukwo mubazeeho Ekyebiragiro 6:6, 7. Otakacwiremu eky’orukugenda kubazaaho banza otekerezeeho abantu abosobora kutangaana. Kandi otekerezeeho omulingo baragasirwa obubarayega amananu kuruga omu Baibuli. Obworaaba n’obaza nabo kikuru muno kubahuliiriza n’okutekamu ekitiinisa entekereza zaabo. Kinu nikiija kukukonyera kubetegereza kurungi kandi nikiija n’okubaletera kugonza kukuhuliiriza.

8. Habwaki tusemeriire kwikara nitugarukira abantu abatwatebiize?

⁸ Nikisobora kutwetaagisa kutamu amaani n’obwire nitugarukira omuntu nukwo asobole kwikiriza kwega Baibuli. Habwaki? Habwokuba abantu abamu obutugarukayo tusanga batali omu maka gaabo rundi bataine bwire obw’okubaza naitwe. Ensonga endi eri ngu, abantu abamu kusobora kwikiriza kwega naitwe Baibuli nikyetagisa kubanza kubagarukira emirundi nyingi. Ekimera kusobora kukura kyetaaga kukiseserra amaizi butoosa. Nikyo kimu n’omuntu arukugonza kwega Baibuli, obutwikara nitumwegesa butoosa okugonza kwe hali Yahwe na Yesu kweyongera.

9-10. Habwaki nitusobora kugamba ngu buli Mukristaayo wena akonyera omu kuserra abo abafooka abegeswa?

⁹ Buli mutebezi wena akonyera omu kuserra abantu abarukugonza kumanya amananu. Nitusobora kulengesaniza okufoora abantu abegeswa n’okuserra omwana ow’abuzire. Omu mulingo ki? Tekerezaaho ekyokurorraho kinu eky’abaireho kwo, eky’omwana ow’emyaka esatu ay’abuzire. Abantu nka 500 nubo bayehaireyo kuserra omwana onu. Hanyuma y’okumara esaaha nka 20 nibamuserra haroho omuntu ay’amusangire omu musiri gw’ebicooli. Omuntu  onu akaba atarukugonza abantu bamuhaise habw’okuzoora omwana ogu. Akagamba ati: “Itwena tukwataniize hamu omu kuserra omwana onu.”

¹⁰ Abantu baingi babuzire nk’omwana onu. Tibaine kunihira kwona omu bwomeezi bwabo kandi nibetaaga obukonyezi. (Bef. 2:12) Itwena abarukuhingura omu bukaikuru munaana nitulengaho kukonyera abantu banu. Osobora kulemwa kutunga omuntu ow’osobora kwegesa Baibuli. Baitu omu kiikaro ekimutebezaamu, abatebezi abandi nibasobora kutunga omuntu ow’arukugonza kwega amananu. Ow’oruganda rundi munyaanya itwe obw’akonyera omuntu kufooka mwegeswa wa Kristo, buli omu wena ayayejumbiire omu mulimo gw’okuserra asemeriire kusemererwa.

11. Miringo ki endi ey’osobora kukonyeramu abantu kufooka abageswa n’obworaaba otaine omwegi wa Baibuli?

¹¹ Nobworaaba omu kasumi kanu otaine omuntu ow’orukwegesa Baibuli n’osobora kukonyera abantu kufooka abegeswa omu miringo endi. Ekyokurorraho, n’osobora kutangirra kurungi n’okunywana abantu abahyaka abaija omu nsorrokano. Obw’oboleka okugonza omu mulingo gunu, n’osobora kubakonyera kukirora ngu mali tuli Bakristaayo ab’amananu. (Yoh. 13:34, 35) Kugarukamu omu nsorrokano nakyo nikisobora kubakonyera. N’obukiraaba ngu ebigarukwamu byawe biba bigufu nibisobora kubakonyera kwega kubazaaho ebibarukwikiriza omu mulingo ogw’ekitiinisa. Kandi n’osobora kutebeza n’omutebezi omuhyaka nukwo omwegese omulingo asobora kusoborra kurungi Ebyahandiikirwe. Obw’okora kinu oba n’omwegesa kuhondera ekyokurorraho kya Kristo.​—Luk. 10:25-28.

12. Nikyetagisa kuba bakugu muno omu kwegesa kusobora kukonyera abantu kufooka abegeswa? Soborra.

¹² Titusemeriire kutekereza ngu twine kuba bakugu muno omu kwegesa kusobora kufoora abantu abegeswa ba Yesu. Habwaki? Tekerezaaho ekyokurorraho ekya Faustina ow’arukwikara omu ihanga lya Bolivia. Nambere yatandikire kwega Baibuli n’Abakaiso ba Yahwe akaba atamanyire kusoma. Baitu hati n’asobora kusoma kake. Hati akabatizibwa kandi agonza muno kwegesa abandi. Buli wiiki ayegesa abeegi ba Baibuli bataano. Nobukiraaba ngu abeegi ba Faustina bamanyire kusoma kumukira, asoboire kukonyera abantu mukaaga kuhika ha idaara ly’okubatizibwa.​—Luk. 10:21.

13. Migisa ki ei tusobora kutunga omu mulimo ogw’okufoora abantu abegeswa, n’obuturaaba twine biingi eby’okukora?

¹³ Abakristaayo abarukukira obwingi baine biingi eby’okukora. Baitu nabwo batunga obwire obw’okwegesa abeegi babo Baibuli kandi batunga okusemererwa kwingi omu mulimo gunu. Tekerezaaho ekyokurorraho kya munyaanya itwe Melanie ow’arukwikara omu Alaska. Akaba aine omwana omwisiki ow’emyaka munaana kandi akaba ataine musaija. Ekindi akaba aine omulimo ogukaba nigumwetagisa kukora ebiro  byona kandi akaba aine n’okurolerra ise ow’akaba arwaire ekookoro. Melanie nuwe mutebezi wenka ow’akaba naikara omu rubuga runu orukaba rwesoroire. Habwokuba akaba n’agonza kutunga omuntu ow’arayegesa Baibuli, akasaba Yahwe amuhe amaani ag’okugenda kutebeza n’okugumira embeho enyingi ey’omu kicweka eki. Ekyarugiremu, akatangana omukazi oubarukweta Sara, ayasemeriirwe muno hanyuma y’okukimanya ngu Ruhanga aine ibara. Sara akahika yaikiriza kwega Baibuli. Melanie nagamba ati: “N’obukiraaba ngu nabaga njwahire, nyowe na muhara wange twagendaga buli kyakataano rwebagyo kwegesa Sara Baibuli kandi kikatugasira muno. Twagonzaga muno kuserulirizaho ebigarukwamu eby’ebikaguzo ebiyabaga akagwize kandi kikatusemeza muno obuyafokere munywani wa Yahwe.” Sara akagumisiriza okuhiganizibwa okw’amaani, yaruga omu kanisa ey’akaba arumu kandi yabatizibwa.

14. (a) Habwaki okufoora bantu abegeswa nikisisana n’okusoha? (b) Ebigambo ebiri omu 2 Timoseo 4:1, 2 nibikwekambisa kukora ki?

¹⁴ N’obworaaba otakatungire omuntu ow’okufoora omwegeswa otajwaha, kandi ikara n’oserra. Omulimo gunu Yesu akagulengesaniza n’okusoha. Abasohi nibasobora kumara esaaha nyingi nibasoha baitu batakwasire encu yoona. Obwire oburukukira obwingi basoha ekiro rundi nyenkya kara muno kandi obumu bagenda hara muno nibaserra encu. (Luk. 5:5) Omu mulingo nugwo gumu, abatebezi abamu bamara esaaha nyingi nibasoha omu biikaro eby’embaganiza kandi n’omu bwire oburukwahukana. Habwaki bakora bati? Nukwo basobole kutebeza abantu baingi. Obwire oburukukira obwingi abo boona abekamba omu miringo enu batunga abantu abarukugonza kumanya amakuru amarungi.  Naiwe n’osobora kutebeza omu kasumi nambere orukunihira kutangatangana abantu baingi rundi omu kiikaro nambere orukunihira kubasanga.​—Soma 2 Timoseo 4:1, 2.

15. Habwaki kwegesa abantu Baibuli nikyetaaga okugumisiriza?

¹⁵ Habwaki kwegesa abantu Baibuli nikyetaaga kugumisiriza kwingi? Ensonga emu eri ngu, tusemeriire kukonyera ou turukwegesa kwetegereza n’okugonza Baibuli ebyeyegesa. Ekindi, tusemeriire n’okukonyera omwegi wa Baibuli kumanya n’okugonza Yahwe habwokuba nuwe yahandiikisize Baibuli. Tusemeriire n’okumwegesa ebintu Yesu ebiyaragiire Abakristaayo kandi tumwoleke n’omulingo asobora kubyorobera. Obwaraaba nalengaho kuta omunkora emisingi ya Baibuli leka twikale nitumukonyera kandi tumugumisirize. Abeegi ba Baibuli abamu nikisobora kubatwarra emyezi ntaito kusobora kuhindura ha ntekereza yabo n’engeso zabo baitu abandi nikisobora kubatwarra akasumi.

16. Ekyokurorraho kya Raúl kikwegeseze ki?

¹⁶ Ekyokurorraho eky’omumisaani omu kuruga omu ihanga lya Peru nikyokela habwaki kugumisiriza kikuru. Nagamba ati: “Nkasoma n’omwegi ou barukweta Raúl twamara obutabu bubiri baitu akaba akyaine biingi eby’okuhindura omu bwomeezi bwe. Eka ye ekaba erumu akatabanguko, yabazaga kubi kandi n’abaana be baali batakumutamu ekitiinisa habw’engeso ze embi. Baitu akaikara naija omu nsorrokano obutoosa, nahabweki nkagumizaamu nimubungira kumukonyera n’okukonyera ab’omu ka ye. Hanyuma y’emyaka esatu kuruga tutangatagana, akabatizibwa.”

17. Nitwija kubazaaho ki omu kicweka ekirukuhonderaho?

¹⁷ Yesu akaturagira ati: “Mugende, muhindule amahanga gona abegeswa.” Omu kuhikiriza obujunanizibwa bunu, tubaza n’abantu abaine entekereza ezirukwahukana n’ezaitu, otwaliremu n’abo abataine diini rundi abatarukwikiriza ngu Ruhanga aroho. Omu kicweka ekirukuhonderaho nitwija kubazaaho omulingo tusobora kutebeza abantu nka banu.