Obwakaiso nibwoleka ngu Yesu akafooka Nyakatagara Omukuru obuyabatiziibwe omu 29 C.E. Obwakaiso obu nibuha? Ha kubatizibwa kwe, Yesu akehayo nk’ekihongwa ha kyoto kya Ruhanga eky’okukora ‘eby’agonza.’ (Bag. 1:4; Baheb. 10: 5-10) Nk’oku ekyoto kikuru muno omu yekaru, yekaru ey’omwoyo n’esobora kuba ekatandika kubaho Yesu obuyabatiziibwe. Yekaru ya Yahwe enkooto ey’omwoyo n’emanyisa ebintu byona ebitusobozesa kuramya Yahwe omu mulingo oguhikire nitusigikirra ha kihongwa kya Yesu.​—Mat. 3:16, 17; Baheb. 5:4-6.

Nk’oku Yekaru enkooto ey’omwoyo ekaba etandikirweho, ekaba n’eyetaaga nyakatagara omukuru. Kusobora kuhikiriza ekyetaago eki, Yahwe akakoma Yesu kuba nyakatagara omukuru obuyamusesereho “omwoyo ogurukwera namani.” (Eng. 10:37, 38; Mar. 1:9-11) Hati nitusobora kukigumya tuta ngu Yesu akakomwa kuba Nyakatagara Omukuru atakafiire kandi atakahumbukire? Ekyokurorraho ekya Aroni hamu na banyakatagara abakuru abamugarukire omu bigere nikiija kutukonyera kugarukamu ekikaguzo eki.

Nk’oku kyali kyolekerwe omu Biragiro bya Musa nyakatagara omukuru wenka nuwe akaba asemeriire kutaaha omu kiikaro Ekirukukira Okwera. Ekiikaro kinu kikaba kiri enyuma y’orutimbi orukaba ruli aharukwera. Nyakatagara omukuru yarabaga ha rutumbi nagenda omunda ha Kiro eky’Okulihirra kyonka. (Baheb. 9:1-3, 6, 7) Nk’oku Aroni hamu n’abamugarukire omu bigere baaseserweho amagita kuba banyakatagara abakuru batakatahire “omu nyigamo [orutimbi rwonyini]” orwa eheema ey’okutangatanganiramu, Yesu na uwe aine kuba yakomerwe kuba Nyakatagara Omukuru owa yekaru ya Yahwe enkooto ey’omwoyo obw’akaba atakafiire kandi atakarabire “omu nyigamo, nugwo mubirigwe” kugenda omu iguru. (Baheb. 10:20) Habw’ensonga enu, omukwenda Paulo akabazaaho Yesu nk’arukwija nka “nyakatagara omukuru” kandi hanyuma arabe “omu hema erukukira obukuru nokuhikirra, etakozirwe nemikono,” kandi n’omu “iguru honyini.”​—Baheb. 9:11, 24.

Tiharoho embaganiza hagati y’akasumi ekiragaano ekihyaka ky’agumiibwe n’akasumi kyatandikirweho. Habwaki? Yesu obuyagenzere omu iguru kandi yahayo obwomeezi bwe obuhikiriire habwaitu, akakora ekintu eky’okubanza omu bintu bisatu eby’ali nibyetaagwa kusobora kugumya ekiragaano ekihyaka. Ebintu binu bisatu bikatandikaho ekiragaano ekihyaka rundi bikakiteeka omu nkora. Ebintu binu bisatu nibiha?

Eky’okubanza, Yesu akaija omu maiso ga Yahwe, ekyakabiri yahayo omuhendo ogw’ekihongwa kye hali uwe; kandi eky’akasatu, Yahwe akaikiriza omuhendo ogw’esagama ya Yesu. Ebintu binu bisatu byali biine kukorwa nukwo ekiragaano ekihyaka kitandike kukora.

Baibuli tetugambira akasumi konyini Yahwe obuyaikirize ekihongwa kya Yesu. Nahabweki, titusobora kumanya obwire bwonyini ekiragaano ekihyaka obukyagumiibwe kandi kyateekwa omu nkora. Eki n’obukiraaba nukwo kiri, tumanyire ngu Yesu akatemba omu iguru nihaburayo ebiro ikumi kuhika ha kiro kya Pentekote. (Eng. 1:3) Omu biro binu ikumi, nubwo yahaireyo ekihongwa kye hali Yahwe kandi kyaikirizibwa. (Baheb. 9:12) Kinu nitukigumya habw’ekintu eky’abaireho ha Pentekote eya 33 C.E. (Eng. 2:1-4, 32, 33) Kinu kikoleeka ngu ekiragaano ekihyaka kyali kigumiibwe kandi kitekerwe omu nkora.

Omu bigufu, ekiragaano ekihyaka kikagumibwa kandi kyatandikwaho hanyuma ya Yahwe kwikiriza omuhendo ogw’esagama ya Yesu eyasesekere. Obu nubwo ekiragaano kinu kyatandikire kukora, Yesu naheereza nka Nyakatagara Omukuru kandi Omuteraniza wakyo.​—Baheb. 7:25; 8:1-3, 6; 9:13-15.