1. Kusigikirra ha 3 Yohana 3, 4, kiki ekituletera okusemererwa?

TEKEREZAAHO okusemererwa omukwenda Yohana yatungire obuyahuliire ngu abantu abayakonyire kwega amananu baali nibakyaheereza Yahwe n’obwesigwa. Bakaba nibaraba omu bizibu bingi, kandi Yohana akaba nayekamba muno kugumya okwikiriza kw’Abakristaayo abo abayaroraga nk’abaana be omu by’omwoyo. Omu mulingo nugwo gumu, naitwe tusemererwa abaana baitu omu mubiri rundi omu by’omwoyo obubehayo hali Yahwe kandi bakagumizaamu nibamuheereza.​—Soma 3 Yohana 3, 4.

2. Ebbaruha za Yohana zikaba ziiine kigendererwa ki?

² Omu 98 C.E., Yohana nasobora kuba akaba naikara omu Efeso rundi haihi nayo. Nasobora kuba yagenzereyo hanyuma y’okulekerwa kuruga omu nkomo ey’ekaba eri ha kizinga kya Patimo. Nikizooka omu kasumi ako, omwoyo gwa Yahwe gukamuterekereza kuhandiika ebbaruha isatu. Ekigendererwa ky’ebbaruha ezi kyali ky’okwekambisa Abakristaayo abesigwa kwikara baine okwikiriza okugumire omuli Yesu kandi n’okwikara nibagendera omu mananu.

3. Bikaguzo ki ebiturukugenda kugarukamu?

³ Yohana nuwe mukwenda akaba asigaireho, kandi akaba akwasirweho muno omulingo abegesa ab’ebisuba bakaba nibahabisa ebitebe. * (1 Yoh. 2:18, 19, 26) Abantu banu abakaba becwireho ekitebe bagambaga ngu bamanyire Ruhanga, baitu bakaba batarukworobera ebiragiro bye. Leka tubazeeho obuhabuzi Yohana yahaire obwarugire hali Ruhanga. Omu kicweka kinu nitwija kugarukamu ebikaguzo bisatu: Nikimanyisa ki kugendera omu mananu? Bintu ki ebisobora kutulemesa? Kandi nitusobora  tuta kukonyerangana kwikara omu mananu?

4. Kusigikirra ha 1 Yohana 2:3-6 hamu na 2 Yohana 4, 6, kugendera omu mananu nikitwarramu ki?

⁴ Kusobora kugendera omu mananu, tusemeriire kumanya amananu agali omu Kigambo kya Ruhanga. Ekindi, tusemeriire ‘kukwata ebiragiro’ bya Yahwe, ekirukumanyisa kubyorobera. (Soma 1 Yohana 2:3-6; 2 Yohana 4, 6.) Yesu akatuteraho ekyokurorraho ekirukukirrayo kimu oburungi eky’okworobera Yahwe. Nahabweki omulingo omukuru nk’oku tusobora kworobera Yahwe nugwo ogw’okuhondera ekyokurorraho kya Yesu nk’oku turukusobora.​—Yoh. 8:29; 1 Pet. 2:21.

5. Bintu ki ebitusemeriire kugumiza kimu?

⁵ Kusobora kugendera omu mananu tusemeriire kukigumya ngu Yahwe nuwe Ruhanga ow’amananu, kandi byona ebyatugambira omu Kigambo kye Baibuli by’amananu. Kandi tusemeriire kuba nitukigumya ngu Yesu nuwe Masiya ayaraganiziibwe. Abantu baingi nibagurukyagurukya Yesu obwaraaba nuwe akomerwe kuba Omukama ow’Obukama bwa Ruhanga. Yohana akaranga ngu hali nihagenda kubaho “abagobya baingi,” abakaba nibagenda kuhabisa abo abakaba bataine okwikiriza okugumire omuli Yahwe na Yesu. (2 Yoh. 7-11) Yohana akahandiika ati: “Noha omubihi? [Nuwe] ogu arukwehakana ngu Yesu tali Kristo?” (1 Yoh. 2:22) Kwesomesa Baibuli nugwo omulingo gwonka ogusobora kutukonyera kwerinda kuhabisibwa. Obuturakora eki, nubwo turamanya Yahwe hamu na Yesu. (Yoh. 17:3) Kandi obu nubwo turakigumiza kimu ngu twine amananu.

6. Kiki ekisobora kulemesa Abakristaayo abato kurubatira omu mananu?

⁶ Abakristaayo boona basemeriire kwerinda kuhabisibwa enyegesa z’abantu. (1 Yoh. 2:26) Kukira muno Abakristaayo abato basemeriire kwerinda omutego gunu. Munyaanya itwe Omufaransa ow’aine emyaka 25 arukwetwa Alexia, * nagamba ati: “Obunkaba nkyali muto, nkatalibanizibwa muno enyegesa ez’ensi, nk’enyegesa erukugamba ngu ebintu bitahangwe. Obwire obumu, enyegesa zinu zansemezaaga. Baitu nkarora ngu tikiri kirungi kuleka kutaho omutima Baibuli eby’eyegesa kandi nk’aikiriza buli kimu kyona abegesa bange barukugamba.” Alexia akasoma akatabu Life​—How Did It Get Here? By Evolution or by Creation?  Hanyuma ya wiiki nke, kugurukyagurukya kwe kwona kukahwaho. Alexia nagamba ati: “Nkakigumiza kimu ngu Baibuli erumu amananu. Kandi nk’akyetegereza ngu obundagendera ha misingi yayo, ninyija kutunga okusemererwa hamu n’obusinge.”

7. Kiki ekitusemeriire kwerinda kukora, kandi habwaki?

⁷ Abakristaayo boona, abakuru n’abato, basemeriire kwerinda kwefoora ngu nibaheereza Yahwe kandi kunu nibakora ebintu ebitahikire. Yohana akakyoleka ngu titusobora kugendera omu mananu kandi akaire nuko kamu nitukora ebikorwa ebibi. (1 Yoh. 1:6) Obuturaaba tuli bokusemeza Yahwe tusemeriire kwikara tukimanyire ngu n’arora buli kimu kyona ekiturukukora. Abantu n’obubaraaba batarukurora ebiturukukora omunsita, tukimanye ngu Yahwe n’arora buli kimu kyona ekitukora.​—Baheb. 4:13.

8. Kiki ekitusemeriire kwangira kimu?

⁸ Tusemeriire kwangira kimu omulingo ensi eroramu ebibi. Omukwenda Yohana akahandiika ati: “Obutugamba ngu titunyina bibi twebihabiha.” (1 Yoh. 1:8) Omu kasumi ka Yohana, abakaba becwireho ekitebe bagambaga ngu omuntu nasobora kukora ebibi akigenderiire kandi akaikara aine enkoragana enungi na Ruhanga. N’omu kasumi kanu, nitwikara n’abantu abaine entekereza nk’egi. Baingi bagamba ngu nibaikiririza omuli Ruhanga baitu tibaikiriza eky’arukugamba ha bibi kukira muno obukirukuhika ha nsonga y’okuterana. Engeso ez’obusihani Yahwe arukutanga abantu abo bagamba ngu omuntu aine obugabe kuzejumbiramu obw’arukuba nagonza.

9. Abato bagasirwa bata obubagumira ha misingi ya Baibuli?

⁹ Abakristaayo abato kukira muno, nibasobora kusindikirizibwa kwikiriza entekereza etahikire ey’abeegi rundi abakozi bagenzi babo erukukwata ha kuterana. Kinu nikyo kyahikire hali Aleksandar. Nagamba ati: “Abaisiki abamu ha  isomero bakansindikiriza kuterana nabo. Bakagamba ngu nk’oku ntaine mwisiki wena kandi mbangire, nyine kuba ndi muli w’ebisiyaga.” Obworaaba noraba omu kulengwa nk’oku, ijuka ngu obw’oraikara ogumiire ha misingi ya Baibuli, noija kulinda ekitiinisa kyawe, obwomeezi bwawe, entekereza yaawe, hamu n’enkoragana yaawe na Yahwe. Kandi buli murundi orayanga kugwa omu kwohebwa, nikiija kukwanguhira kukora ekihikire. Oijuke ngu entekereza y’ensi enu ey’etahikire ey’erukukwata ha kuterana n’eruga hali Sitaani. Nahabweki obw’orayanga entekereza enu, noija kuba ‘osingwire omubi.’​—1 Yoh. 2:14.

10. 1 Yohana 1:9 n’etukonyera eta kuheereza Yahwe twine omuntu ow’omunda omurungi?

¹⁰ Tukimanyire ngu Yahwe nuwe aine obusobozi obw’okutugambira ekihikire. Kandi twekamba kutakora ebibi. Baitu obutusiisa, tusemeriire kusaba Yahwe nitumugambira ebibi ebitukozere. (Soma 1 Yohana 1:9.) Kandi obutukora ekibi eky’amaani, tuserre obukonyezi kuruga hali abagurusi b’ekitebe habwokuba Yahwe nubo akomere kuturolerra. (Yak. 5:14-16) Baitu titusemeriire kwikara nitwecwera omusango habw’ensobi ezitwakozere kara. Habwaki? Habwokuba Isiitwe ow’okugonza atuhaire ekicunguro eky’Omwana we nukwo tusobole kuganyirwa ebibi byaitu. Yahwe obw’agamba ngu naija kuganyira abo abegarukamu, aba n’akimanyisa kwo. Nahabweki busaho kintu kyona ekisemeriire kututanga kuheereza Yahwe twine omuntu ow’omunda omurungi.​—1 Yoh. 2:1, 2, 12; 3:19, 20.

11. Nitusobora tuta kwerinda enyegesa ezisobora kucekya okwikiriza kwaitu?

¹¹ Tusemeriire kwangira kimu enyegesa ez’abantu abecwireho ekitebe. Kurugira kimu ha kutandika kw’ekitebe Ekikristaayo, Sitaani aikaire n’akozesa abantu ab’ebisuba kulengaho kuletera abaheereza ba Ruhanga abesigwa kugurukyagurukya. Kinu nikimanyisa ngu  tusemeriire kumanya omulingo tusobora kwahukaniza ebisuba n’amananu. * Abanyanzigwa baitu nibasobora kukozesa intaneti rundi emikura ey’okubalizaaho kulengaho kutuletera kuleka kwesiga Yahwe rundi kuleka kugonza Abakristaayo bagenzi baitu. Oijuke ngu Sitaani nuwe ndugirro ey’ebisuba ebi, nahabweki obyange!​—1 Yoh. 4:1, 6; Kus. 12:9.

12. Habwaki tusemeriire kwongera kugumya okwikiriza kwaitu omu mananu agatwayegere?

¹² Kusobora kwerinda kuhabisibwa Sitaani, tusemeriire kwesigira kimu Yesu kandi n’okumanya omulingo Yahwe amukozesa kuhikiriza ekigendererwa kye. Kandi n’okwesiga omuhanda gwonka Yahwe arukukozesa omu kasumi kanu kuterekereza ekitebe kye. (Mat. 24:45-47) Nitusobora kugumya obwesigwa bwaitu kuraba omu kwesomesa Baibuli buli kiro. Nubwo okwikiriza kwaitu kurasisana nk’omuti ogwine emihama ey’erukugendera kimu hansi omu itaka. Paulo na uwe akabazaaho ensonga niyo emu obwakaba n’ahandiikira ekitebe ky’Abakolosai. Akagamba ati: “Nkokumwahairwe Kristo Yesu Mukama waitu, mugenderege muti omuluwe, muhamire, kandi mwombekerwe omuluwe, kandi mugumire omu kuikiriza.” (Bak. 2:6, 7) Busaho kintu kyona Sitaani rundi abarukumusagika ekibasobora kukora kulemesa Omukristaayo ow’aine okwikiriza okugumire.​—2 Yoh. 8, 9.

13. Kiki kitusemeriire kwikara nitumanya, kandi habwaki?

¹³ Tusemeriire kwikara nitukimanya ngu ensi niija kugumizaamu n’etunoba. (1 Yoh. 3:13) Yohana natwijukya ngu “ensi yoona eri omu busobozi bw’omubi.” (1 Yoh. 5:19, NW) Nk’oku ensi ya Sitaani nirirra empero yayo, ekiniga kya Sitaani nikiikara nikyeyongera. (Kus. 12:12) Takozesa emiringo ey’etanguhire kumanya yonka, nk’okutwohya kwejumbira omu busihani rundi ebisuba by’abantu abecwireho ekitebe, baitu akozesa n’okuhiganizibwa okw’amaani. Sitaani akimanyire ngu aine akasumi kake kulengaho kutulemesa kutebeza rundi kuhwerekereza okwikiriza kwaitu. Nahabweki tikirukutuhuniriza kurora ngu emirimo yaitu emu rundi yoona etangirwe omu mahanga agamu. Eki n’obukiraaba nukwo kiri, ab’oruganda na banyaanya itwe nibagumiisiriza. Niboleka ngu busaho kintu kyona Sitaani asobora kukora kulemesa abantu ba Yahwe kwikara bali besigwa.

14. Mulingo ki ogumu ogutusobora kukonyera ab’oruganda na banyaanya itwe kwikara omu mananu?

¹⁴ Kusobora kukonyera ab’oruganda na banyaanya itwe kwikara omu mananu, tusemeriire kuboleka embabazi. (1 Yoh. 3:10, 11, 16-18) Tusemeriire kugonzangana omu bwire oburungi n’omu bwire obw’ebizibu. Ekyokurorraho, haroho omuntu ow’aferiirwe kandi arukwetaaga kuhumuzibwa rundi kukonyerwa? Obundi ohuliire ngu Abakristaayo bagenzi baawe bahikirweho ebigwererezi kandi nibetaaga obukonyezi kwongera kwombeka Ekyombeko ky’abo eky’Obukama rundi amaju gaabo? Twoleka ngu nitugonza muno kandi nitukwatirwa embabazi ab’oruganda na banyaanya itwe kuraba omu bikorwa byaitu hatali omu bigambo byonka.

15. Nk’oku kyolekerwe omu 1 Yohana 4:7, 8, kiki ekitusemeriire kukora?

¹⁵ Tuhondera ekyokurorraho kya Isiitwe ow’omu iguru kandi ow’okugonza obutwolekangana okugonza. (Soma 1 Yohana 4:7, 8.) Omulingo omukuru ogutwolekamu okugonza nugwo ogw’okuganyirangana. Ekyokurorraho, omuntu nasobora kutubiihiza baitu akatusaba ekiganyiro. Twoleka okugonza kuraba omu kumuganyira kandi n’okwebwa ekiyatukozere. (Bak. 3:13) Ow’oruganda arukwetwa Aldo akalengwa omu mulingo gunu obuyahuliire ow’oruganda ouyatekamuga ekitiinisa n’abazaaho  kubi abantu ab’omu ruganda rwa Aldo. Aldo nagamba ati, “Naikaraga ninsaba hali Yahwe kunkonyera nukwo ndeke kwikara nimutekerezaaho kubi.” Baitu Aldo aine ekintu ekindi ekiyakozere. Akacwamu kusaba ow’oruganda bakole hamu omu buheereza. Obu bakaba nibakora hamu, Aldo akasoborra ow’oruganda omulingo yakwasirweho habw’ebigambo yabalize. Aldo nagamba ngu: “Ow’oruganda obuyahuliire omulingo ebigambo bye byantwaizeemu, akansaba ekiganyiro. Omulingo akaba nabazaamu gukanyoleka ngu akeyijukya habw’ebigambo ebiyabalize. Hanyuma y’eki tukongera twafooka banywani.”

16-17. Kiki ekitusemeriire kucweramu kimu kukora?

¹⁶ Omukwenda Yohana akaba nagonza muno Abakristaayo bagenzi be kandi akaba nagonza babe n’okwikiriza okugumire. Okugonza n’okufaayo okuyabolekere nukweyoleka omu buhabuzi yabahaire kurabira omu bbaruha isatu eziyabahandikiire. Kakirungi kukimanya ngu abasaija n’abakazi abarukwija kulema hamu na Yesu omu iguru n’abo baine okugonza n’okufaayo nk’okwa Yohana!​—1 Yoh. 2:27.

¹⁷ Nahabweki, leka tuhondere obuhabuzi obutubalizeeho n’omutima gwaitu gwona. Leka itwena tucweremu kimu kugendera omu mananu obu nitworobera Yahwe omu nyikara zoona. Wesomese Baibuli kandi ogiikiririzeemu. Yombeka okwikiriza okugumira omuli Yesu. Yangira kimu enyegesa z’abantu hamu n’ezaabo abayecwireho ekitebe. Yangira kimu engeso ey’okwefoora ngu noheereza Yahwe kandi kunu nokora ebintu ebitahikire kandi otahuliiriza abo abarukulengaho kukusindikiriza kukora ebibi. Hondera emisingi ya Yahwe erukukwata ha ngeso. Kandi katukonyere ab’oruganda bagenzi baitu kwikara bagumire kuraba omu kubaganyira obubatusobeza kandi n’okubakonyera obubarukuba bali omu bwetaago. Nukwo, n’obuturatunga ebizibu nitwija kugumizaamu nitugendera omu mananu.