Nkazaalirwa omu kicweka ekya St. Paul, Minnesota, omu Amerika, omu 1954, kandi bazaire bange bakaba batali baguuda rundi banaku kandi tukaba tuli Bakatuliki. Tukazaarwa tuli baana bataano kandi nyowe ndi mwana wakabiri. Obunkaba kyali muto, nkasomera omu isomero lya Bakatuliki kandi nkaba ndi muheereza ha rutaali. Baitu nkaba manyire bike muno ha Baibuli. Nobundaaba nkaba ninyikiriza ngu haroho Ruhanga ayahangire buli kimu kyona, nkaleka kwikiriza ngu Ekeleziya n’esobora kunkonyera kumuramya.

Omu mwaka gwange ogw’okubanza ha isomero ly’ebiragiro erya William Mitchell, Abakaiso ba Yahwe bakambungira omu ka yange. Nkaba ndi bize ninyogya engoye zange, baitu ow’oruganda na mukazi we habw’embabazi bakaikiriza kugaruka. Obubagarukire, nkaba mbainiire ebikaguzo bibiri: “Habwaki abantu ababi bakurakurana muno kukira abantu abarungi?” kandi “Kiki abantu ekibasobora kukora kutunga okusemererwa kwonyini?” Nkaikiriza akatabu The Truth That Leads to Eternal Life hamu na Baibuli eya New World Translation of the  Holy Scriptures, ey’ekaba n’esikiriza habw’ekyesweko kyayo eky’eraangi eya kibabi. Kandi nkaikiriza kwegesebwa Baibuli. Okwega kunu kukanyigura amaiso. Kikansemeza muno kukimanya ngu Obukama bwa Ruhanga niyo gavumenti erukwija kulema ensi kandi emaleho ebizibu by’abantu. Nkaba ninkirorra kimu ngu obulemi bw’abantu bulemerwe kandi bukaba buletiire ensi kubamu obusaasi, kubonabona, hamu n’obutalibwinganiza.

Nkahayo obwomeezi bwange hali Yahwe ha kutandika kw’omwaka gwa 1982 kandi nabatizibwa omu mwaka ogu ha rusorrokano orukooto orwali rwine omutwe “Amananu ag’Obukama” omu kyombeko nambere bakorra emikoro ekirukwetwa St. Paul Civic Center. Nkagaruka omu kyombeko kinu wiiki eyahondiireho kukora ebirengeso eby’okunyikiriza kufooka looya. Ha kutandika kwa Okitobba nk’amanyisibwa ngu nkaba mpikire ebirengeso ebi kandi nyikiriziibwe kufooka looya.

Ha rusorrokano orukooto orwa “Amananu ag’Obukama,” nkatangatangana Mike Richardson kuruga ha Beseeri eya Brooklyn, kandi ankasobororra ati hali hatandikirweho ofiisi ey’ebiragiro ha kitebe ekikuru. Nkaijuka ebigambo by’Omunyaisiyopiya omukonwa ebiri omu Engeso Ezabakwenda 8:36 kandi nayekaguza nti ‘Kiki ekirukuntanga kusaba kuheereza ha Ofiisi ey’Ebiragiro?’ Nahabweki nkahayo foomu ninsaba kuheereza ha Beseeri.

Bazaire bange batasemererwe habw’okufooka omu h’Abakaiso ba Yahwe. Ise nyowe akankaguza ngu kukora ha Beseeri kyali nikigenda kunkonyera kita kukurakuraniza obukugu bwange nka looya. Nkamusobororra ngu nkaba ningenda kukora omulimo ogw’okukonyera kwonka. Nkamugambira ngu bakaba nibagenda kumpaga akasente kake buli kwezi ak’okunkonyera nk’Ababeseeri abandi.

Ntagende ha Beseeri aho naaho, habwokuba nkaba nyikiriize kubanza kukora omu kooti, baitu omu 1984 nkagenda ha Beseeri eya Brooklyn, omu New York. Nkasindikwa kuheereza omu Ofiisi ey’Ebiragiro. Obukugu obunatungire obunkaba ninkora omu kooti bukantekaniriza obujunanizibwa obwayongireho.

Ekyombeko ekya Stanley Hall omu rubuga rwa Jersey City, omu New Jersey, kikagurwa omu Novemba 1983. Ab’oruganda bakasaba kwikirizibwa kudabiriza amasanyarazi n’amaizi ag’ekyombeko eki. Ab’oruganda obubatangatangaine n’abakuru b’orubuga, bakabasobororra ngu bakaba nibagonza kukozesa ekyombeko kinu habw’ensorrokano enkooto ez’Abakaiso ba Yahwe. Eki kakaletaho ekizibu. Ebiragiro eby’orubuga oru byaragiraga ngu ebyombeko eby’okuramizaamu bisemeriire kuba omu biikaro nambere abantu baraara honka. Baitu ekyombeko kinu kikaba kiri omu kicweka ky’etawuni  eky’eby’obusubuzi, nahabweki abakuru b’orubuga bakanga kutwikiriza kukidabiriza. Ab’oruganda bakasaba abakuru abo kuhindura encwamu egi, baitu bakanga.

Omu wiiki yange ey’okubanza ha Beseeri, ekitebe kikatwara ensonga enu omu kooti eya disitrikiti, kuhakaniza encwamu egi. Habwokuba nubwo nkaba mazire emyaka ebiri ninkora omu kooti enu eya disitrikiti eya St. Paul omu Minnesota, nkaba nimanya kurungi omulingo batonganamu emisango nk’enu. Omu ha ba looya baitu akatongana nagamba ngu ekyombeko kinu ekya Stanley Hall baikaire nibakikorramu emikoro nyingi, nk’okurorramu filimu n’amazina. Hati, habwaki kitahikire kukorramu emikoro ey’ediini? Kooti ekaroramu ensonga enu hanyuma yacwamu ngu orubuga rwa Jersey City rukaba rutatairemu ekitiinisa obugabe bwaitu obw’okuramya. Kooti ekaragira ngu abakuru b’orubuga baikirize ab’oruganda kudabiriza ekyombeko kinu, kandi obu nubwo natandikire kurora omulingo Yahwe akaba naha entekaniza ey’okukozesa embuga z’ebiragiro kutwara omu maiso omulimo gwe. Nkasemererwa muno kuba omu hali abo abakonyire omu musango gunu.

Ab’oruganda bakatandika omulimo mukooto ogw’okudabiriza ekyombeko eki, kandi Sebutemba 8 1985 obu hakaba hatakarabireho omwaka gumu, abeegi ba kilaasi eya 79 eya Gilead bakajagulizaamu omukoro ogw’okumara emisomo yabo. Nkasemererwa kukora omulimo gunu gwa Yahwe. Kandi gukandetera kusemererwa kwingi kukira okusemererwa okunatungaga omu mirimo ey’okutongana emisango ntakaizire ha Beseeri. Obwire obu nkaba ntamanyire ngu Yahwe akaba nagenda kunkozesa omu misango endi nyingi.

Omu myaka ya 1980, badakitaali n’amarwarro maingi, tabakiraga kutekamu ekitinisa encwamu ey’omu h’Abakaiso ba Yahwe omukuru ey’okwanga kujanjabwa n’esagama. Abakazi abaine enda baali baine ekizibu eky’amaani habwokuba abaramuzi bakiraga kugamba ngu abakazi abaine enda tibaine obugabe obw’okwanga kutekwamu esagama. Abaramuzi bagambaga ngu kakuba omukazi aine enda ataikiriza kutekebwamu esagama nasobora kufa kandi omwana akule ataine nyina.

Omu Desemba 29, 1988, Munyaanya itwe Denise Nicoleau akahwamu esagama nyingi hanyuma y’okuzaara omwana ow’obwojo. Dakitaali we akamugambira kwikiriza kutekebwamu esagama habwokuba obwomeezi bwe bukaba buli omu kabi. Baitu Munyaanya itwe Nicoleau akanga. Ekiro ekyahondiireho, irwarro likasaba omuramuzi kubaha ekiragiro kuruga omu kooti kubaikiriza kumuteekamu esagama. Omuramuzi ataikirize Munyaanya itwe Nicoleau kwetonganaho kandi atamumanyise nk’oku aikiriize irwarro kumutekamu esagama.

Kyakataano, Desemba 30, abakozi b’irwarro bakatekamu Munyaanya itwe Nicoleau esagama n’obukiraaba ngu iba hamu n’abanyabuzaale be abandi bakaba bangire. Rwebagyo oru, abanyabuzaale  be baingi n’abagurusi abamu ab’ekitebe bakakwatwa nibabajunaana omusango ogw’okulengaho kulemesa abakozi b’irwarro kutekamu Nicoleau esagama. Ekiro ekyahondiireho, empapura z’amakuru, tivi, hamu na rediyo kwetoroora orubuga rwa New York zikaba nizibazaaho amakuru ag’okukwatwa kw’abantu banu.

Bbalaza nyenkyakara, nkabaza n’omuramuzi omukuru omu kiikaro eki arukwetwa Milton Mollen. Nkamusobororra kurungi ebirukukwata ha musango gunu kandi namugambira ngu omuramuzi ow’okubanza akaragira ngu munyaanya itwe bamutekemu esagama atabandize kwetonganaho. Omuramuzi Mollen akangambira kugaruka nyamusana tubazeeho omusango gunu hamu n’ebiragiro ebirukugukwataho. Rwebagyo oru ow’oruganda, Philip Brumley, ow’akaba nanyebembera, akagenda na nyowe omu ofiisi ey’Omuramuzi Mollen. Omuramuzi akeeta na looya w’irwarro kutweteranizaaho. Obutwali nitubaza, hakabaho empaka nyingi. Haroho ow’Oruganda Brumley obuyampandikiire ha katabu ke ati: “Kehyaho iraka lyawe.” Obuhabuzi obu bukaba burungi habwokuba nkaba nkwasirwe ekiniga obunkaba nindengaho kwoleka ngu looya w’irwarro tahikire.

Hanyuma y’esaaha emu, Omuramuzi Mollen akagamba ngu omusango gunu nugwo gurabanza kuhulirwa ekiro ekirahonderaho. Obutukaba nituruga omu ofiisi ye, Omuramuzi Mollen akagamba ngu nyenkya looya w’irwarro aine “omulimo ogw’amaani.” Eki kikaba nikimanyisa ngu looya ogu kikaba kitarukwija kumwanguhira kutonganirra irwarro. Kinu kikanyoleka ngu Yahwe akaba nangumya ngu nitusobora kusinga omusango gunu. Kikampuniriza kurora omulingo Yahwe akaba natukozesa kuhikiiriza ebigendererwa bye.

Ekiro kyona tukaraara nitutekaniza ebiturabaza omu kooti nyenkyakara. Ekyombeko kya kooti kiri haihi na Beseeri ya Brooklyn, nahabweki, ab’oruganda abakoraga omu Ofiisi ey’Eby’ebiragiro bakarubata kugenda ha kooti. Hanyuma y’abaramuzi bbana kuhurra ensonga zaitu, bakagamba ngu munyaanya itwe akaba atasemeriire kutekebwamu esagama. Kooti enkuru ekasingisa irwarro omusango kandi yagamba ngu nikirubatirra obugabe bw’omurwaire kooti kuragira ngu omuntu ajanjabwe etabandize kumuha omugisa ogw’okwesoborraho.

Hanyuma y’obwire buke, kooti erukukirayo eya New York ekakigumya ngu Munyaanya itwe Nicoleau aine obugabe obw’okujanjabwa batarukukozesa esagama. Enu ekaba eri ncwamu ey’okubanza ha ncwamu ina ezakozerwe kooti enkuru omu bicweka ebirukwahukana omu Amerika kandi nambere  natungire omugisa ogw’okukonyera omu misango egi. (Rora akasanduuko “ Emisango Eyitwasingire omu Kooti Ezirukukira Obukuru.”) Kandi nkozere n’abalooya abandi abaha Beseeri omu misango ey’okurolerra abaana, kugaitururwa, hamu n’okumanya ebiragiro ebirukukwata ha kukozesa itaka n’ebyombeko.

Omurundi ogw’okubanza kurora Dawn, akaba ali mukazi ow’agaiturwirwe na iba kandi aine abaana basatu. Akaba nayerolerra kandi naheereza nka payoniya. Akaba arabire omu bwomeezi obugumangaine, kandi kinkansemeza muno kurora omulingo akaba ayehaireyo kuheereza Yahwe. Omu 1992, tukagenda ha rusorrokano orukooto omu New York City orukaba rwine omutwe “Abaine Ekyererezi,” kandi nkamugambira ngu ningonza kumumanya kukiraho. Omwaka ogwahondiireho tukataaha obuswere. Omukazi wange kisembo kuruga hali Yahwe habwokuba ayebembeza ebintu eby’omwoyo kandi agonza kusandaara. Mali Dawn ampaire ebirungi byonka obwire bwona obumazire na uwe.​—Nfu. 31:12.

Obutwatahire obuswere abaana be bakaba baine emyaka 11, 13, hamu na 16. Nkaba ningonza kuba taata wabo omurungi, nahabweki nkasoma kandi nateeka omu nkora obuhabuzi kuruga omu bitabu byaitu oburukukwata ha kurolerra abaana ab’ogu owoli na uwe omu buswere. N’obukiraaba ngu tukatangatangana ebizibu, nikinsemeza habw’okurora ngu abaana abo nibandora nka munywani wabo, kandi isebo ow’okugonza. Twatangirraga omu ka yaitu banywani ba baana baitu kandi twagonzaaga ensinganto zinu abarukusemeza.

Omu 2013, nyowe na Dawn tukagenda omu kicweka kya Wisconsin kurolerra abazaire baitu abakuzire omu myaka. Ekyampuniriize, bakanyikiriza kugumizaamu nimpereza ha Beseeri dimu na dimu. Nkaikirizibwa kugumizaamu ninkonyera omu misango ey’ekitebe.

Omu Sebutemba 2018, nkakyetegereza ngu n’abanzaaga kukorra nukwo mbaze. Dakitaali akankebera baitu akalemwa kumanya ekyali nikindetera ekizibu eki. Hanyuma, dakitaali ondi akandagira kurora dakitaali ow’obwongo. Omu Janwali 2019, dakitaali obwongo akangambira ngu nikizooka nyine oburwaire butakira kuzooka kandi oburukugenda kucekya omubiri gwange gwona.

Hanyuma y’ebiro bisatu, nkagwa nahenda ekiganja kyange eky’omukono ogw’obulyo obunkaba ninzaana omuzaano ogunkira kugonza. Nyikaire ninzaana omuzaano gunu obwomeezi bwange bwona kandi nkaba ngumanyire kurungi. Nahabweki obunagwire nkakyetegereza ngu omubiri gwange gutandikire kuceka. Mpuniriire muno omulingo oburwaire bunu bwanguhire kukura. Hati nikingumira muno kubaza, kurubata, hamu n’okumira.

Kinsemiize muno kurora ngu nsoboire kukozesa obukugu bwange nka looya kukonyera ekitebe kya Yahwe. Kandi ntungire n’omugisa ogw’okuhandiika ebicweka ebiturukira omu magaziini ez’abadakitaali, balooya, hamu n’abaramuzi ebibasoma. Kandi nkaha n’embazo omu nsi yoona omu semina ezirukukwata ha by’obujanjabi nimbazaaho obugabe obw’Abakaiso ba Yahwe obw’okwanga esagama. Baitu nabwo ningamba nk’omuhandiiki wa Baibuli ayahandiikire omu Luka 17:10 ati: ‘Ndi mwiru rubaale atarukugasa; ebinkozere nibyo bimpikiriire kukora.’