Yahwe n’agonza abantu babiri abataaha obuswere kutunga okusemererwa kandi n’okwegondeza omu nkoragana enungi. (Mat. 19:4-6) Obworaaba n’ogonza kutaaha obuswere, n’osobora ota kutunga omuntu omurungi ow’okutaaha na uwe obuswere? Yahwe habwokuba Muhangi waitu, amanyire ekitusemeriire kukora kusobora kutunga obuswere oburumu okusemererwa. Nahabweki, obw’orahondera emisingi ey’atuhaire, noija kutunga okusemererwa kwonyini. Tekerezaaho emu ha misingi enu.

Eky’okubanza, tusemeriire kwetegereza ekintu kinu ekirukutukwataho: “Omutima gwobugobya okukira ebintu byona.” (Yer. 17:9) Abantu babiri abarukugonza kutaaha obuswere obubatangatangana kandi bakatandika kumanyangana, omu kasumi kake nibasobora kutunga enyehurra z’amaani hagati yabo. Kinu obukibaho kibagumira kukora encwamu ez’amagezi. Abantu obubacwamu kutaaha obuswere nibasigikirra ha nyehurra zaabo, emirundi erukukira obwingi bamalirra beyijukize. (Nfu. 28:26) Egi niyo ensonga habwaki kitali kirungi abantu abo kutandika kugambirangana enyehurra zaabo ez’amaani rundi kuraganizangana batakemanyire kurungi.

Enfumo 22:3 n’egamba eti: “Omuntu omwekengi arora akabi, ayesereka: baitu abatanyina magezi bahinguraho, baferwa.” Kabi ki akali omu kukozesa emikura ey’okuserra abagonzebwa? Eky’obusaasi, abantu abamu bakatandika kumanyangana n’abantu ababatamanyire ha mikura nk’enu, baitu hanyuma bakyetegereza ngu abantu abo bakaba nibababiiha ebisuba. Ekindi abantu abagobya bakozesa amabara agatali gaabo kubiihabiiha abantu abataine ekibamanyire kandi n’okubaibaho sente zaabo. Obwire obumu, abagobya abo bayefooraga kuba Abakaiso ba Yahwe.

Tekerezaaho akabi akandi akali omu kukozesa emikura egi. Emikura enu ekozesa ebibaro kucwamu noha asemeriire kumanyangana n’amutaahi we. Baitu busaho bwakaiso oburukugumya ngu kuhondera ebibaro ebyo kirugamu ebirungi. Tikiri ky’amagezi kwesiga puroguraamu ya kompyuta ey’ekozerwe abantu, kukora encwamu enkuru muno nk’egi ey’okumanya omuntu ow’osemeriire kutaaha na uwe obuswere. Puroguraamu za kompyuta tizisobora kwesigwa nk’emisingi ya Baibuli.​—Nfu. 1:7; 3:5-7.

Omusingi ogurukusangwa omu Enfumo 14:15 nigugamba ngu: “Atanyina magezi aikiriza ekigambo  kyona: baitu omuntu omwekengi arora muno omuhandagwe.” Osemeriire kubanza kumanya kurungi omuntu, otakacwiremu ngu nuwe ahikire kutaaha na uwe obuswere. Baitu kigumire kukikora kakuba omuntu omusanga ha mikura. N’obumwakuba nimusobora kumanya ebirukubakwataho kandi n’okumara obwire bwingi nimusindikirangana obutumwa, mali nosobora kugamba ngu omuntu ogu omu manyire kurungi? Abamu abaali nibateekereza ngu batungire omugonzebwa omurungi ou baali nibaserra, bakaterwa ibumba kanwa obu batangatangaine n’omuntu ogu maiso ha maiso.

Omuhandiiki wa Zabuli akahandiika ati: “Tinkaikarraga nabantu abatarumu; kunu tinditahamu hamu nabagobya.” (Zab. 26:4) Baingi abakozesa emikura ey’okuserra abagonzebwa bateekereza ngu tikiri kibi kubiiha ebisuba ha bintu ebirukubakwataho kusobora kuleetera abandi kubagonza. Nibasobora kusereka emiringo yabo embi rundi nikisobora kuguma kumanya nk’oku baine emiringo embi obubarukuba nibasindikira abandi obutumwa ha mikura. Nobukiraaba ngu abamu bagamba ngu Bakaiso ba Yahwe, mali bali Bakristaayo ababatiziibwe? Bakuzire omu by’omwoyo? Baine enkoragana enungi na Yahwe? Nibatekwamu ekitiinisa omu kitebe? Bakora encwamu ezitali z’amagezi kandi bali nganjani embi? (1 Kol. 15:33; 2 Tim. 2:20, 21) Kandi kusigikirra ha misingi ya Baibuli nibaikirizibwa kutaaha obuswere? Noyetaaga kumanya ebintu binu, baitu kigumire kubimanya kakuba otabaza n’Abakaiso ba Yahwe abandi abamanyire kurungi omuntu ogu. (Nfu. 15:22) Kandi omuheereza wa Yahwe omwesigwa tasemeriire n’okutekerezaaho kutaaha obuswere n’omuntu atarukuheereza Yahwe.​—2 Kol. 6:14; 1 Kol. 7:39.

Nk’oku kiri ky’akabi kukozesa emikura ey’okuserra abagonzebwa, haroho emiringo endi enungi ey’osobora kuserramu kandi okamanya kurungi omuntu ow’osobora kutaaha na uwe obuswere. Ninkaha nambere osobora kusanga omuntu ow’asobora kuba murungi ow’okutaaha na uwe obuswere? Kusorrokana hamu obukuba nikwikirizibwa nitusobora kumanya abantu abandi kuraba omu kugenda omu nsorrokano ez’ekitebe, ensorrokano enkooto ez’ekiro kimu, ez’ebiro bisatu, hamu n’ensorrokano ezindi.

Obukiba kitarukusoboka kusorrokana hamu, ekyokurorraho nk’omu busumi obwa COVID-19, tukozesa ebyoma ebyakalimagezi kutunga ensorrokano zaitu ez’ekitebe, nambere tusobora kutungira omugisa ogw’okumanya Abakaiso ba Yahwe abandi abatali omu buswere. Nosobora kurora omulingo barukwejumbira omu nsorrokano, kandi n’okumanya okwikiriza kwabo kuraba omu by’okugarukamu byabo. (1 Tim. 6:11, 12) Kandi nimusobora n’okubaza hamu omu breakout room hanyuma y’ensorrokano. Kurabira omu nsorrokano ezitutungira ha mikura, nosobora kurora omulingo omuntu ogu abazaamu n’abandi ekisobora kukukonyera kumanya emiringo yonyini ey’aine. (1 Pet. 3:4) Hanyuma y’akasumi, obumweyongera kumanyangana kurungi, nimusobora kumanya obumuraaba mwine ebigendererwa nibyo bimu kandi obumuraaba musemeriire kutaaha obuswere.

Abantu abatali omu buswere obubaserra omuntu ow’okutaaha na uwe obuswere, omu miringo erukwikiranganiza n’emisingi ya Baibuli, baine emigisa nyingi ey’okwerorra amananu agali omu rufumo orukugamba ngu: “Aboine omukazi [rundi omusaija] okumuswera buli aboine ekirungi, kandi atungire embabazi eza [Yahwe].”​—Nfu. 18:22.