1. Kiki ekiturukugumya, kandi habwaki?

 OBWORORA ebizibu ebiroho omu nsi kasumi kanu, kikugumira kwikiriza ngu ebintu nibiija kusemera? Abanyabuzaale tibakyagonzangana nk’oku baagonzanganaga kara. Abantu abarukukira obwingi nibeyongera kuba bakaali kandi abarukwegonza bonka. Baingi kibagumira kwesiga ab’obusobozi. Baitu enyikara zinu nizisobora kukugumya. Habwaki? Habwokuba abantu nibetwaza omu mulingo gwonyini Baibuli oguyabalizeeho omu bunabbi oburukukwata ha “biro bya hanyuma.” (2 Tim. 3:1-5) Busaho muntu ow’aine entekereza enungi asobora kuhakaniza ngu obunabbi bunu tiburukuhikirra. Kandi kuhikirra kw’obunabbi bunu, bwakaiso oburukugumya ngu Yesu Kristo akatandika kulema nk’Omukama w’Obukama bwa Ruhanga. Baitu bunu buli bumu ha bunabbi obwingi oburukukwata ha Bukama. Nikiija kugumya okwikiriza kwaitu obuturabazaaho obunabbi obundi obwizire nibuhikirra omu myaka ey’enyumaho.

2. Biki ebiturabazaaho omu kicweka kinu, kandi habwaki? (Bazaaho ekisisani ekiri ha kyesweko.)

² Omu kicweka kinu, nitugenda kubazaaho (1) obunabbi oburukutukonyera kumanya nidi Obukama bwatandikire kulema, (2) obunabbi oburukutukonyera kwetegereza ngu Yesu akafooka Mukama w’Obukama bwa Ruhanga omu iguru (3) obunabbi oburukwoleka omulingo abanyanzigwa b’Obukama bwa Ruhanga barukwija kuhwerekerra. Kandi nitwija kurora nk’oku obunabbi bunu burukukwatagana nk’obucweka bw’ekisisani obuteeranizibwa hamu kukora ekisisani ekihikiriire ekirukwoleka ngu empero eri haihi kuhika nk’oku Yahwe yaraganiize.

3. Obunabbi oburukusangwa omu Danieri 7:13, 14, nibutugumya ki ha Mukama w’Obukama bwa Ruhanga?

³ Obunabbi oburukusangwa omu Danieri 7:13, 14 nibutugumya ngu Yesu yakubaire Omulemi omurungi ow’Obukama bwa Ruhanga. Abantu kuruga omu mahanga goona bakwehaireyo ‘kumukorra,’ kandi ngu busaho omulemi ondi wena ayakugarukire omu bigere bye. Obunabbi obundi omu kitabu kya Danieri bukaranga ngu Yesu yakutungire Obukama bwe hakumalirra kw’akasumi akarukwetwa emirundi musanju. Mali nikisoboka kumanya akasumi konyini Yesu akayafokiiremu Omukama?

4. Soborra omulingo Danieri 4:10-17 etukonyera kumanya omwaka Yesu oguyatandikiiremu kulema. (Rora obugambo obwa hansi.)

⁴ Soma Danieri 4:10-17. “Emirundi musanju” n’ekiikirra akasumi ak’emyaka 2,520. Akasumi ako kakatandika omu mwaka 607 B.C.E. Abababuroni obubaihireho omukama w’okumalirra ha kitebe ky’obukama bwa Yahwe omu Yerusalemu. Akasumi ako kakagarukira omu 1914 C.E. Yahwe obuyafoire Yesu anyakuli “Mukama wakyo” kuba Omukama w’Obukama bwa Ruhanga. *​—Ez. 21:25-27.

5. Mulingo ki ogumu ogutusobora kugasirwa omu bunabbi oburukukwata ha ‘mirundi musanju’?

⁵ Obunabbi bunu nibusobora kutugasira buta? Kumanya ebirukukwata ha ‘mirundi musanju’ nikitugumya ngu Yahwe ahikiriiza emirago ye omu bwire. Nk’okuyataireho obwire nambere Obukama bwe bwakutandikiire kulema kandi kyahikirra, naija kukigumiza kimu ngu n’obunabbi obundi bwona bwahikirizibwa omu kasumi akayataireho. Ego, ekiro kya Yahwe ‘tikiriikaraho!’​—Hab. 2:3.

6. (a) Biki ebiturukurora omu nsi kasumi kanu, ebirukugumya ngu Kristo nalema omu iguru? (b) Obunabbi oburukusangwa omu Okusuku’rwa 6:2-8 nibugumya buta obwakaiso bunu?

⁶ Yesu obw’akaba ali haihi kumalirra obuheereza bwe obw’omu nsi, akaranga ebintu eby’akukonyire abahondezi be kumanya ngu atandikire kulema omu iguru. Bimu ha bintu ebiyabalizeeho bikaba obulemu, enjara, hamu n’emisisa. Akongera yaranga ngu hakubaireho endwaire, “ahandi nahandi”​—kandi oburwaire bwa COVID-19 kyokurorraho ekirungi. Ebintu binu biri bimu ha bintu Baibuli ebyeyeta ‘obwokurorraho’ oburukwoleka okubaho kwa Kristo. (Mat. 24:3, 7; Luk. 21:7, 10, 11) Obuhaali harabireho emyaka 60 Yesu amazire kufa kandi agarukire omu iguru, akongera yagumya omukwenda Yohana ngu ebintu binu byakubaireho kwo. (Soma Okusuku’rwa 6:2-8.) Ebintu binu byona bihikiriire kuruga omu kasumi Yesu yafookere Omukama omu 1914.

7. Habwaki ebintu ebibi bingi bibaireho omu nsi kuruga Yesu obuyafookere Omukama?

⁷ Habwaki enyikara omu nsi zayeyongiire kusisikara Yesu obuyafookere Omukama? Okusuku’rwa 6:2 nirutuha ensonga enkuru muno, ekintu eky’okubanza Yesu ekiyakozere obuyamazire kufooka Mukama w’Obukama bwa Ruhanga nikyo eky’okurwana obulemu. Akarwanisa oha? Sitaani hamu n’abadaimoni be. Kusigikirra ha Okusuku’rwa suura 12, Sitaani akasingurwa kandi yanagwa omu nsi hamu n’abadaimoni be. Ekiniga kye ekingi, akatandika kukimarra h’abantu, kandi kinu  kyarugamu ebizibu eby’amaani muno omu nsi.​—Kus. 12:7-12.

8. Tugasirwa tuta kurora obunabbi oburukukwata ha Bukama nibuhikirizibwa?

⁸ Obunabbi bunu nibusobora kutugasira buta? Ebintu ebirukubaho omu nsi hamu n’empindahinduka omu enyetwaza z’abantu zakutukonyire kwetegereza ngu Yesu akafooka Omukama. Nahabweki omu kikaro ky’okubihirwa obuturora abantu nibetwaza omu mulingo gw’obukaali kandi nibegonza bonka, twijuke ngu ebikorwa byabo nibihikiiriza obunabbi obw’omu Baibuli. Obukama hati nibulema! (Zab. 37:1) Kandi nk’oku Haramagedoni eriyo nirra haihi twikale tukimanyire ngu ebizibu nibiija kweyongera omu nsi. (Mar. 13:8; 2 Tim. 3:13) Nitusiima muno Isiitwe ow’okugonza ow’omu iguru habw’okutukonyera kwetegereza habwaki haroho ebizibu bingi omu nsi?

9. Obunabbi obuli omu Danieri 2:28, 31-35, nibusoborraho buta obulemi kirimaani obw’okumalirra, kandi bukatandika di?

⁹ Soma Danieri 2:28, 31-35. Niturora omulingo obunabbi bunu nibuhikirra omu kasumi kanu. Ekirooto kya Nebukadeneza kikooleka ebintu ebiraabaho omu “omu biro ebyahanyuma,” Kristo atandikire kulema. Abanyanzigwa ba Yesu ab’omu nsi nibatwarramu obulemi kirimaani obw’okumalirra obwarangirwe omu Baibuli, oburukukikirirwa “ebigere . . . byebyoma [niibumba].” Obulemi bunu kirimaani buliyo nibulema. Bukatandika kulema omu kasumi k’Obulemu obw’Ensi Yoona obw’Okubanza Bungereza n’Amerika obubatandikire kukorra hamu. Ekisisani eky’omu kirooto kya Nebukadineza kikongera kyayoleka ebintu bibiri ebirukukwata  ha bulemi bunu kirimaani ebyakubwahukaniize ha bulemi obundi kirimaani obw’enyuma.

10. (a) Kiki ekiturukurora nikihikirizibwa omu bulemi kirimaani obwa Bungereza n’Amerika Danieri ekiyarangire omu bunabbi? (b) Kabi ki akatusemeriire kwetantara? (Rora akasanduuko “ Wegendereze Ibumba!”)

¹⁰ Eky’okubanza, kwahukanaho n’obulemi kirimaani obw’enyuma oburukubazibwaho omu kwolekwa, obulemi bwa Bungereza n’Amerika tiburukukikirirwa ekintu kimu nk’ezaabu yonka rundi efeeza, baitu nibukikirirwa ekyoma ekitabwirwemu ibumba. Ibumba nirikikirra ‘oruzaaro rw’abantu,’ rundi abantu ababulikiro. (Dan. 2:43) Kasumi kanu nitukirorra kimu ngu, abantu kwejumbira omu by’obulemi, okwesalinga, ebitebe ebirukurwanirra obugabe bw’abantu hamu n’obwabakozi, biretiire abalemi ab’obulemi bunu kirimaani kugumanganirwa kihikiiriza ebigendererwa byabo.

11. Kubaho kw’obulemi kirimaani obwa Bungereza n’Amerika nikitugumya kita ngu tuli omu biro ebya ha mpero?

¹¹ Ekyakabiri, obulemi kirimaani obwa Bungereza n’Amerika oburukukikirirwa ebigere ha kisisani ekikooto, nubwo bw’okumalirra nk’oku kyarangirwe omu Baibuli. Busaho gavumenti endi yoona ey’abantu ey’eribugaruka omu bigere. Oihireho Obukama bwa Ruhanga nibwija kubuhwerekereza hamu na gavumenti zoona ez’abantu ha bulemu obwa Haramagedoni. *​—Kus. 16:13, 14, 16; 19:19, 20. 

12. Bwakaiso ki obundi oburukisangwa omu bunabbi bwa Danieri oburukutuhuumuza kandi bukatuha okunihira?

¹² Obunabbi bunu nibusobora kutugasira buta? Obunabbi bwa Danieri nibutuha obwakaiso obundi oburukwoleka ngu tuli omu biro ebya ha mpero. Emyaka erukuhingura omu 2,500 enyuma, Danieri akaranga ngu hanyuma ya Baburoni, obulemi kirimaani obw’emiringo ena bwakukwasireho muno abantu ba Ruhanga. Ekindi, akooleka ngu obulemi kirimaani obwa Bungereza n’Amerika, bwakubaire bw’okumalirra. Kinu nikituhuumuza kandi nikituha okunihira ngu omu kasumi akatali kahara Obukama bwa Ruhanga nibwija kuhwerekereza gavumenti z’abantu zoona kandi buleme ensi yoona.​—Dan. 2:44.

13. “Omukama owa munaana” hamu ‘n’abakama ikumi,’ ebarukubazibwaho omu Okusuku’rwa 17:9-12, nibakikirra ki, kandi obunabbi bunu buhikiriziibwe buta?

¹³ Soma Okusuku’rwa 17:9-12. * Okuhwerekerra okw’amaani okwaleserweho Obulemu bw’Ensi Yoona obw’Okubanza kukahikiiriza obunabbi obundi obw’omu Baibuli oburukukwata ha biro ebya ha mpero. Abebembezi b’ensi bakaba nibagonza kuleetaho obusinge omu nsi. Nahabweki omu Janwali 1920, bakatandikaho ekitongole ekya League of Nations, kandi hanyuma omu Okitobba 1945 omu kiikaro kyakyo hakagarukamu ekitongole eky’Amahanga Ageteraine. Ekitongole kinu nikyetwa “omukama owa munaana.” Baitu tikiri bulemi kirimaani. Obusobozi bwakyo nibusigikirra ha busagiki obwa gavumenti ezindi. Baibuli eyeta gavumenti ezo ‘abakama ikumi.’

14-15. (a) Ekyahandiikirwe ekiri omu Okusuku’rwa 17:3-5 nikitwoleka ki ha “Baburoni Orukuru”? (b) Kiki ekirukuhika h’abantu abarukusagika ediini ez’ebisuba?

¹⁴ Soma Okusuku’rwa 17:3-5. Omu kwolekwa Yohana okuyatungire okurukuruga hali Ruhanga, akarora omukazi omusihani, “Baburoni Orukuru,” arukukikirra ediini zoona  ez’ebisuba ez’omu nsi. Kwolekwa kunu kuhikiriziibwe kuta? Kumara akasumi kaingi ediini ez’ebisuba ziikaire nizikwataniza na gavumenti ez’ensi kandi nizizisagika. Baitu omu kasumi akatali kahara, Yahwe naija kukiteeka omu bebembezi ba gavumenti “okukora ebiyahanuire.” Kiki ekirarugamu? Gavumenti ezi, abo nubo, “bakama ikumi,” nibaija kutahirra ediini ez’ebisuba kandi bazihwerekereze.​—Kus. 17:1, 2, 16, 17.

¹⁵ Nitumanya tuta ngu okuhwerekerezebwa kwa Baburoni orukuru kuli haihi kuhika? Kugarukamu ekikaguzo eki, kikuru kukiijuka ngu, kimu ha bintu ebyalindaga orubuga rwa Baburoni orwakara, gakaba maizi g’Ekyambu Furati. Ekitabu kya Okusuku’rwa kirengesaniza abantu abasagika Baburoni orukuru ‘n’amaizi’ ag’obulinzi. (Kus. 17:15) Baitu kikongera kyayoleka ngu amaizi ‘gaali nigagenda kwoma,’ ekirukwoleka ngu ediini ez’ebisuba omu nsi yoona zakuferiirwe abantu bazo abarukukira obwingi. (Kus. 16:12) Kasumi kanu obunabbi bunu nibuhikirra habwokuba abantu baingi tibakyali banyadiini kandi batandikire kuserra obukonyezi kuruga omu biikaro ebindi kusobora kuraba omu bizibu byabo.

16. Kwetegereza obunabbi oburukukwata ha kubaho okw’ekitongole eky”Amahanga Ageteraine hamu n’okuhwerekerezebwa kwa Baburoni Orukuru nikitugasira kita?

 ¹⁶ Obunabbi bunu nibusobora kutugasira buta? Kubaho kw’ekitongole eky’Amahanga Ageteraine hamu n’okukeeha kw’obusagiki bw’abantu hali ediini z’ebisuba, bwakaiso oburukwoleka ngu tuli omu biro ebya ha mpero. N’obukiraaba ngu abantu baingi tibakyasagika Baburoni Orukuru, eki tikirukumanyisa ngu nikyo kirukwija kuleetera ediini ez’ebisuba zoona kuhwerekerezebwa. Nk’oku tusangirwege tukibalizeeho, Yahwe nuwe arukugenda kukiteeka omu mitima ‘y’abakama ikumi,’ ezi nizo gavumenti ezirukusagika ekitongole eky’Amahanga Ageteraine, “okukora ebiyahanuire.” Amahanga ago nigaija kuhwerekereza Baburoni orukuru ahonaaho, ekirukwija kuhuniriiza ensi yoona. * (Kus. 18:8-10) Okuhwerekerezebwa kwa Baburoni Orukuru nikwija kukwataho ensi yoona kandi kirugemu ebizibu eby’amaani, baitu abantu ba Ruhanga nibaija kusemererwa habw’ensonga ibiri. Omunyanzigwa wa Yahwe Ruhanga onu ow’amazire akasumi kaingi, naija kuhwerekerezebwa ebiro n’ebiro, kandi okujunwa kwaitu hali ensi enu embi nikwija kuba kwiriire haihi!​—Luk. 21:28.

17-18. (a) Nitusobora tuta kweyongera kugumya okwikiriza kwaitu? (b) Kiki ekiturabazaaho omu kicweka ekirayongeraho?

¹⁷ Danieri akaranga ngu ‘okumanya’ okw’amananu kwali nikugenda ‘kweyongera.’ Kandi amananu gali, okumanya oku kweyongiire! Hati nitumanya kurungi obunabbi oburukukwata h’akasumi akaturumu. (Dan. 12:4, 9, 10) Obunabbi bunu kuhikirra omu mulingo gwonyini bwarangirwe, kituleetiire kweyongera kuteekamu Yahwe n’Ekigambo kye ekitiinisa. (Is. 46:10; 55:11) Nahabweki gumizaamu nogumya okwikiriza kwawe kuraba omu kwekamba kwesomesa Ebyahandiikirwe n’okukonyera abandi kuba n’enkoragana enungi na Yahwe. Naija kulinda abo abamwesiga kandi abahe ‘obusinge obutahwaho.’​—Is. 26:3.

¹⁸ Omu kicweka ekirahonderaho, nitwija kubazaaho obunabbi oburukukwata ha ekitebe Ekikristaayo omu kasumi aka ha mpero. Obunabbi bunu nibugumiza kimu ngu tuli omu biro ebya ha mpero. Nitwija kurora obwakaiso oburukwoleka ngu Yesu hati ow’arukulema nk’Omukama waitu nayebembera abahondezi be abesigwa.