EKICWEKA KY’OKWEGA 31
Okusaba Kutwale nk’Ekintu eky’Omuhendo
“Okusaba kwange kutebwe omu maiso gawe nkomugaju.”—ZAB. 141:2.
EKIZINA 47 Saba Yahwe Butoosa
EBITURAYEGA *
1. Omugisa gw’okusaba Yahwe, tusemeriire kugurora tuta?
TUHAIRWE omugisa ogw’amaani ogw’okuhikirra Omuhangi w’iguru n’ensi omu kusaba. Kitekerezeeho: Nitusobora kugambira Yahwe ekiri ha mitima yaitu obwire bwona, n’omu rulimi rwona tutabandize n’okukora na uwe entekaniza. Nitusobora kumusaba tuli ha kitabu omwirwarro rundi omu nkomo, nitukigumiza kimu ngu Isiitwe ow’okugonza naija kutuhurra. Kinu kisembo ky’amaani ekitutasemeriire kuzaanisa.
2. Omukama Daudi akakyoleka ata ngu yatwaraga ekisembo ky’okusaba nk’eky’omuhendo?
2 Omukama Daudi akatwara omugisa gw’okusaba nk’ekintu eky’omuhendo. Akazinira Yahwe ati: “Okusaba kwange kutebwe omu maiso gawe nkomugaju.” (Zab. 141:1, 2) Omu kasumi ka Daudi, emigaju erukwera eyakozesebwaga abanyakatagara omu kuramya okw’amananu, yateekanizibwaga n’obwegendereza bwingi. (Kurug. 30:34, 35) Daudi kubazaaho emigaju, kikooleka ngu akaba nagonza kutekerezaaho n’obwegendereza ebyarukugenda kugambira Ise ow’omu iguru. Kandi eki naitwe nikyo twakugondeze kukora. Nitugonza esaara zaitu zisemeze Yahwe.
3. Tusemeriire kwetwaza tuta obutuhikirra Yahwe omu kusaba, kandi habwaki?
3 Obutusaba hali Yahwe, tusemeriire kumutekamu ekitiinisa eky’amaani. Tekerezaaho okwolekwa okurukuhuniriza Isaya, Ezekyeri, Danieri, hamu na Yohana okubatungire. Okwolekwa oku nikwahukana, baitu kwona haroho ekintu kurukusisaniza. Boona nibabazaaho Yahwe nk’Omukama w’ekitiinisa ekingi. Isaya ‘akarora Yahwe aikaliire ha kitebe ekiraihire, kandi ekinyumiziibwe.’ (Is. 6:1-3) Ezekyeri akarora Yahwe aikaliire ha kigaali ky’omu iguru, ayehinguliriziibwe “okwangasana . . . Nkokusisana okwomuhangazima.” (Ez. 1:26-28) Danieri akarora “omukuru anyakuhikize ebiro bingi” ajwaire ebijwaro ebirukwera, kandi endimi ez’omurro niziruga omu kitebe kye. (Dan. 7:9, 10) Kandi Yohana akarora Yahwe aikaliire ha kitebe ekyehinguliriziibwe ekintu ekirukusisana omuhangaizima omurungi ogurukusisana zumalidi. (Kus. 4:2-4) Kuteekerezaaho ekitiinisa kya Yahwe ekitarukulengesanizibwa, nikitwijukya omugisa gw’amaani ogutwine ogw’okumuhikirra omu kusaba hamu n’obukuru bw’okukikora omu mulingo gw’ekitiinisa eky’amaani. Baitu hati, tusemeriire kusaba tuta?
“NUKWO MUSABEGE MUTI”
4. Kiki ekiturukwega kuruga omu bigambo ebirukubanza ebiri omu saara ey’ekyokurorraho ey’eri omu Matayo 6:9, 10?
4 Soma Matayo 6:9, 10. Omu Kwegesa kwe okwa ha Rusozi, Yesu akeegesa abeegeswa be omulingo gw’okusaba ogurukusemeza Ruhanga. Hanyuma y’okugamba ngu “nukwo musabege muti,” Yesu akabanza kubazaaho ebintu ebikuru ebiine akakwate n’ekigendererwa kya Yahwe: nk’okweza ibara lye; okwija kw’Obukama bwe oburahwerekereza abo boona abahakaniza Ruhanga; kandi oburaleeta emigisa yoona eyateekaniriize ensi hamu n’abantu. Obutubazaaho ensonga nk’ezi omu saara zaitu, twoleka ngu ebigendererwa bya Ruhanga bikuru muno haliitwe.
5. Kihikire kusaba Yahwe ebintu ebirukutukwataho?
5 Omu kicweka ekirukwongeraho eky’esaara egi, Yesu akakyoleka ngu kihikire n’okusaba ebintu ebirukutukwataho. Nitusobora kusaba Yahwe kutuha ebyokulya by’ekiro eki, kutuganyira ebibi byaitu, kutulinda okutagwa omu kwohebwa, hamu n’okutujuna hali omubi. (Mat. 6:11-13) Obutusaba Yahwe ebintu binu, twoleka ngu nitwetaaga obukonyezi bwe kandi nitugonza kumusemeza.
Biki nyineeka eby’asobora kusaba obwarukuba ali na mukazi we? (Rora akacweka 6) *
6. Tusemeriire kusaba ebintu ebibaziibweho omu saara ey’ekyokurorraho byonka? Soborra.
6 Yesu akaba atarukugonza abahondezi be kukopa ebigambo byonyini ebiri omu saara ye ey’ekyokurorraho. Omu saara ezindi Yesu eziyasabire, akabazaaho ebintu ebindi ebikaba bimweralikiriize omu kasumi ako. (Mat. 26:39, 42; Yoh. 17:1-26) Omu mulingo nugwo gumu, naitwe nitusobora kugambira Yahwe ekintu kyona ekitweralikiriize. Obutuba twine encwamu ey’okukora, nitusobora kumusaba atuhe amagezi n’okwetegereza. (Zab. 119:33, 34) Obuturukuba tutakatandikire obujunanizibwa obugumire, nitusobora kusaba Yahwe okumanya n’okwetegereza. (Nfu. 2:6) Abazaire nibasobora kusabira abaana baabo, abaana nibasobora kusabira abazaire baabo, kandi naitwe itwena nitusobora kandi tusemeriire kusabira abeegi baitu ba Baibuli hamu n’abantu tutebeza. Baitu esaara zaitu tizisemeriire kubamu ebintu ebiturukwetaaga byonka.
Biki ebitusobora kusiimira Yahwe n’okumukugiza omu saara zaitu? (Rora akacweka 7-9) *
7. Habwaki tusemeriire kukugiza Yahwe omu kusaba?
7 Tusemeriire kwijuka kukugiza Yahwe omu saara zaitu. Ruhanga waitu nuwe asemeriire kukugizibwa kukira omuntu ondi wena. ‘Murungi, arahuka okuganyira.’ Ekindi, “aijuire okuganyira, kandi owembabazi, atanguha okubihirwa, anyakuina [okugonza okutalekera] namananu amaingi.” (Zab. 86:5, 15) Twine ensonga enungi ez’okukugiza Yahwe habw’emiringo ye hamu n’eby’akora.
8. Bintu ki ebimu ebitusobora kusiimira Yahwe? (Zabuli 104:12-15, 24)
8 Kwongerereza ha kukugiza Yahwe omu saara zaitu, tusemeriire n’okumusiima habw’ebintu ebirungi eby’atuha. Nk’ekyokurorraho, nitusobora kumusiima habw’erangi enungi eziturora omu byakyo, ebyokulya eby’embaganiza ebirukunura, hamu n’omu kwegondeza omu kuba n’abanywani abarungi. Isiitwe ow’okugonza atuha binu byona hamu n’ebirukukiraho, habw’okugonza kutusemeza. (Soma Zabuli 104:12-15, 24.) Kandi ekirukukira obukuru, tusiima Yahwe habw’okutuha ebyokulya eby’omwoyo omu bwingi hamu n’okunihira okurungi okw’akasumi ak’omu maiso.
9. Kiki ekisobora kutukonyera kwijuka kusiima Yahwe? (1 Abasesalonika 5:17, 18)
9 Kyanguhire muno kwebwa kusiima Yahwe habw’ebintu byona eby’atukorra. Kiki ekisobora kukukonyera kubiijuka? N’osobora kuhandiika orukarra rw’ebintu eby’osabire Yahwe kandi buli hanyuma y’akaire okakebera kurora omulingo agarukiremu esaara zaawe. Hanyuma omusabe n’omusiima habw’okukukonyera. (Soma 1 Abasesalonika 5:17, 18.) Tekerezaaho kinu: Tuhurra tusemeriirwe kandi nitugonzebwa abandi obubatusiima. Omu mulingo nugwo gumu, naitwe obutwijuka kusiima Yahwe habw’okugarukamu esaara zaitu, kimusemeza. (Bak. 3:15) Baitu nsonga ki endi enkuru, ey’esemeriire kutuletera kusiima Ruhanga?
SIIMA YAHWE HABW’OMWANA WE OMUGONZEBWA
10. Kusigikirra ha 1 Petero 2:21, habwaki tusemeriire kusiima Yahwe habw’okusindiika Yesu omu nsi?
10 Soma 1 Petero 2:21. Tusemeriire kusiima Yahwe habw’okusindika Omwana we omugonzebwa kutwegesa. Obutwega ebirukukwata hali Yesu, twega bingi ebirukukwata hali Yahwe n’omulingo tusobora kumusemeza. Kakuba twoleka ngu nitwikiririza omu kihongwa kya Kristo, nitusobora kutunga enkoragana enungi na Yahwe n’okwegondeza omu businge nauwe.—Bar. 5:1.
11. Habwaki tusaba omu ibara lya Yesu?
11 Nitusiima Yahwe habwokuba nitusobora kumusaba kuraba omu Mwana we. Yahwe akozesa Yesu kutuha ebituba tumusabire. Yahwe ahuliiriza kandi agarukamu esaara ezitusabire kuraba omu ibara lya Yesu. Yesu akasoborra ati: “Ekimurasaba kyona omu ibara lyange ndikikora, Isenyowe anyumizibwe omu Mwana.”—Yoh. 14:13, 14.
12. Nsonga ki, endi ey’esemeriire kutuletera kusiima Yahwe habw’Omwana we?
12 Yahwe aganyira ebibi byaitu nasigikirra ha kicunguro kya Yesu. Ebyahandiikirwe nibyoleka Yesu nka “nyakatagara [waitu] omukuru. . ., [aikaliire] ha mukono ogwobulyo gwekitebe ekyobukuru obwomu iguru.” (Baheb. 8:1) Yesu nuwe “omukonyezi waitu hali Isiitwe.” (1 Yoh. 2:1, NWT) Nitusiima muno Yahwe habw’okutuha Nyakatagara Omukuru ow’ayetegereza obuceke bwaitu kandi ‘ow’atutonganira’! (Bar. 8:34; Baheb. 4:15) Habwokuba tituhikiriire, titwakusoboire kuhikirra Yahwe omu kusaba kakuba haali hataroho ekihongwa kya Yesu. Hataroho kugurukyagurukya titusobora kusiima Yahwe ekirukumara habw’ekisembo eky’omuhendo ekiyatuhaire eky’Omwana we omugonzebwa!
SABIRA ABAKRISTAAYO BAGENZI BAAWE
13. Omu bwire bwekiro Yesu atakafiire, akooleka ata ngu akaba nagonza abahondezi be?
13 Omu bwire bw’ekiro Yesu atakafiire, akamara obwire bwingi n’asabira abageswa be hali Ise ‘kubalinda hali omubi.’ (Yoh. 17:15) Eki kikooleka omulingo Yesu yabagonzaaga muno! N’obukiraaba ngu akaba akimanyire alihaihi kubonabonesebwa muno, akaba akyayeralikiriire habw’enyikara y’abakwenda be.
Biki ebitusobora kusabira ab’oruganda na banyaanya itwe? (Rora akacweka 14-16) *
14. Nitusobora kwoleka tuta ngu nitugonza ab’oruganda na banyaanya itwe?
14 Nka Yesu, naitwe omutima titusemeriire kuguteeka ha byetaago byaitu byonka. Oihireho, tusemeriire kusabira ab’oruganda na banyaanya itwe butoosa. Obutukora eki, tuba nitworobera ekiragiro kya Yesu eky’okugonzangana kandi twoleka Yahwe omulingo turukugonza ab’oruganda na banyaanya itwe. (Yoh. 13:34) Kusabira ab’oruganda na banyaanya itwe tikiri ky’okusiisa obwire. Ekigambo kya Ruhanga nikitugambira ngu “okusaba kwomuntu ahikiriire nukusobora muno omu kukora kwakwo.”—Yak. 5:16.
15. Habwaki Abakristaayo bagenzi baitu nibetaaga esaara zaitu?
15 Abakristaayo bagenzi baitu nibetaaga esaara zaitu habwokuba nibaraba omu bizibu bingi. Nitusobora kusaba Yahwe kubakonyera kugumira oburwaire, ebigwererezi, obulemu, okuhiganizibwa, hamu n’ebizibu ebindi. Nitusobora n’okusabira ab’oruganda na banyaanya itwe abehayo kukonyera abo abali omu bwetaago. N’osobora kuba omanyire ab’oruganda na banyaanya itwe abarukuraba omu ebizibu nk’ebi. Habwaki otabasabira n’okozesa amabara gaabo? Twoleka okugonza kwonyini okw’Ekikristaayo, obutusaba Yahwe kubakonyera kugumisiriza.
16. Habwaki tusemeriire kusabira abo abatwebembera?
16 Abo abanyakwine obujunanizibwa obw’amaani omu kitebe, basiima muno abandi obubabasabira kandi esaara ezi zibagasira. Omukwenda Paulo akaba akimanyire ngu nauwe nayetaaga abandi kumusabira. Akahandiika ati: “Nanyowe munsabire, mpeebwe ebigambo obundayasamya akanwa kange, nukwo nsobole kubaza n’obumanzi obundaaba nindangirra eky’ensita ekirukwera eky’amakuru amarungi.” (Bef. 6:19, NWT) N’omu kasumi kanu, twine ab’oruganda baingi abatwebembera abakora n’amaani. Twoleka ngu nitubagonza, obutusaba Yahwe kuha emigisa emirimo yabo.
OBUTUBA NITWEBEMBERA ABANDI OMU KUSABA
17-18. Nidi obutusobora kusabwa kwebembera abandi omu saara, kandi kiki ekitusemeriire kwijuka?
17 Obwire obumu, tusabwa kwebembera abandi omu kusaba. Ekyokurorraho, munyaanya itwe ow’aine omwegi we, nasobora kusaba munyaanya itwe ondi ow’amusendekeriize, kwebembera omu kusaba. Munyaanya itwe ow’asendekeriize nasobora kuba atarukumanya omwegi kurungi, nahabweki n’asobora kucwamu kusaba ha kumalirra kw’okwega. Omu mulingo ogu, nikiija kumwanguhira kumanya ky’okubaza obwaraaba nasabira omwegi.
18 Ow’oruganda nasobora kusabwa kwebembera esaara omu rusorrokano orw’okugenda omu buheereza rundi orw’ekitebe. Ab’oruganda abatunga omugisa gunu basemeriire kwijuka ekigendererwa ky’orusorrokano oru. Okusaba tikusemeriire kukozesebwa kuhana ekitebe rundi kuranga ebirango. Ensorrokano z’ekitebe ezirukukira obwingi ziheebwa edakiika 5 kusaba hamu n’okuziina ekiziina, nahabweki ow’oruganda ow’arukwebembera esaara tarukwetaaga kukozesa ebigambo bingi kukira muno ha kutandika kw’orusorrokano.—Mat. 6:7.
OKUSABA KUTWALE NK’EKINTU EKIKURU OMU BWOMEEZI BWAWE
19. Kiki ekiratukonyera kwetekaniriiza ekiro kya Yahwe eky’omusango?
19 Kanu nuko akasumi ak’okweyongerra kimu kutwara okusaba nk’ekintu ekikuru omu bwomeezi bwaitu habwokuba ekiro kya Yahwe eky’okucwa omusango kiriire haihi. Ha nsonga enu, Yesu akagamba ati: “Murolege bwona, musabege, musobole okukira ebi byona ebirihikirra.” (Luk. 21:36) Ego, kwikara nitusaba nikiija kutukonyera kwikara niturora omu by’omwoyo nukwo ekiro kya Ruhanga kitusange twetekaniize.
20. Esaara zaitu nizisobora zita kuba nk’emigaju ey’erukuboya kurungi?
20 Biki ebitubalizeeho? Nitusiima muno habw’ekisembo eky’okusaba. Ebintu ebirukukira obukuru omu saara zaitu bisemeriire kuba ebi ebiine akakwate n’ekigendererwa kya Yahwe. Nitusiima Ruhanga habw’Omwana we Obukama bwe, kandi tusabira Abakristaayo bagenzi baitu. Nitusobora n’okusaba ebyetaago byaitu eby’omubiri hamu n’eby’omwoyo. Obututekerezaaho n’obwegendereza ebigambo ebiturakozesa omu saara zaitu, twoleka ngu nitusiima habw’ekisembo kinu eky’omuhendo. Ebigambo byaitu nibiija kuba nk’emigaju ey’erukuboya kurungi hali Yahwe, ‘ey’erukumusemeza.’ Nfu. 15:8.
EKIZINA 45 Okwecumitiriza okw’Omutima Gwange
^ Nitusiima muno Yahwe habw’ekisembo eky’atuhaire eky’okumuhikirra omu kusaba. Nitugonza esaara zaitu zibe nk’emigaju ey’erukuboya kurungi kandi ezirukusemeza Yahwe. Omu kicweka kinu, nitwija kurora ebintu ebitusobora kubazaaho omu saara zaitu. Kandi nitwija n’okurora ebintu ebimu ebitusemeriire kwijuka obutusabwa kwebembera abandi omu kusaba.
^ KUSOBORRA EBISISANI: Ow’oruganda na mukazi we nibasabira omwana wabo kutunga obulinzi ha isomero, omuzaire ow’akuzire omu myaka ow’arwaire, hamu n’omwegi wabo wa Baibuli kukurakurana.
^ KUSOBORRA EBISISANI: Ow’oruganda omuto nasiima Yahwe habw’ekicunguro, ensi yaitu enungi, hamu n’ebyokulya ebirungi ebirumu ekiriisa.
^ KUSOBORRA EBISISANI: Munyaanya itwe nasaba Yahwe kuha omwoyo gwe Akatebe Akalemi n’okukonyera abo abarukubonabona habw’ebigwererezi n’okuhiganizibwa.
