1. Kiki Yahwe eky’arukugonza omu kasumi kanu?

 KASUMI kanu Ruhanga nagonza amakuru amarungi ag’Obukama gatebezebwe omu nsi yoona. (Mar. 13:10; 1 Tim. 2:3, 4) Omulimo gunu gwa Yahwe, kandi habwokuba mukuru, niyo ensonga habwaki agutaire hansi y’oburoleerezi bw’Omwana we omugonzebwa. Habwokuba nitwebemberwa Yesu, omulimo gw’okutebeza nigwija kukorwa kuhika ha rulengo Yahwe orw’arukugonza, empero etakahikire.​—Mat. 24:14.

2. Nitwija kubazaaho ki omu kicweka kinu?

² Omu kicweka kinu, nitwija kurora omulingo Yesu arukukozesa “omwiru omwesigwa kandi ow’amagezi” kutuha ebyokulya eby’omwoyo n’okutekaniza abahondezi be kukora omulimo gw’okutebeza ogurukukirrayo kimu omu byafaayo. (Mat. 24:45, NWT) Nitwija n’okurora kiki buli omu muli itwe eky’asobora kukora kusagika Yesu hamu n’omwiru omwesigwa.

3. Busobozi ki Yesu obuyahairwe?

³ Yesu nayebembera omulimo gw’okutebeza. Eki nitusobora kukigumya tuta? Yesu obwakaba ali haihi kugaruka omu iguru, akatangatangana n’abamu h’abahondezi be abesigwa ha rusozi omu Galiraya. Akabagambira ati: “Mpairwe obusobozi bwona omu iguru na hansi.” Wetegereze ekiyayongiireho: “Mugende, muhindule amahanga gona abegeswa.” (Mat. 28:18, 19) Nahabweki, obusobozi bwona Yesu obwahairwe nibutwarramu n’okwebembera omulimo gw’okutebeza.

4. Habwaki nitusobora kukigumya ngu, nahati Yesu nakyayebembera omulimo gw’okutebeza?

⁴ Yesu akagamba ngu omulimo gw’okutebeza n’okufoora  abantu abegeswa gwakukozerwe omu ‘mahanga goona’ kandi ngu yakubaire n’abahondezi be “ebiro byona, okuhikya obusinge bunu obubulihwaho.” (Mat. 28:20) Ebigambo ebi nibikyolekera kimu ngu omulimo gw’okutebeza gwakugumizeemu nigwebemberwa Yesu kuhikira kimu omu kasumi kaitu.

5. Tukonyera tuta omu kuhikiiriza obunabbi obuli omu Zabuli 110:3?

⁵ Yesu akaba nakigumya ngu hakubaireho abakozi abarukumara omu kasumi aka ha mpero. Akaba amanyire ngu ebigambo eby’obunabbi eby’omuhandiiki wa Zabuli byali nibigenda kuhikirra ebirukugamba biti: ‘Abantu baawe balyehonga bonka nibagonza omu kiro eky’obusobozi bwawe.’ (Zab. 110:3) Obworaaba oyejumbira omu mulimo gw’okutebeza, n’osagika Yesu hamu n’omwiru omwesigwa kandi n’okonyera omu kuhikiiriza obunabbi obu. N’obuharaaba haroho ebizibu, omulimo nigugumizaamu.

6. Kizibu ki ekimu abatebezi b’Obukama ekibatangatangana omu kasumi kanu?

⁶ Kimu ha bizibu abatebezi b’Obukama batunga nukwo okuhakanizibwa. Abecwireho ekitebe, abebembezi b’amadiini, hamu n’ab’eby’obulemi bagambira abantu baingi ebisuba ebirukukwata ha mulimo gwaitu. Kakuba abanyabuzaale baitu, abantu abandi abatumanyire, hamu n’abakozi bagenzi baitu bahabisibwa ebisuba binu, nibasobora kutusindikiriza kuleka kuheereza Yahwe n’okuleka kutebeza. Omu mahanga agamu, abanyanzigwa baitu batutinisiriza, batutahirra, bakwata ab’oruganda na banyaanya itwe, kandi n’abandi babateeka omu nkomo. Tikirukutuhuniriza abantu obubatutwaza omu mulingo gunu. Yesu akaranga ati: “Mulinobwa amahanga gona okubajunana ibara lyange.” (Mat. 24:9) Amananu gali, habw’okuhikwaho enobi nka zinu, bwakaiso oburukwoleka ngu nituhondera ekyokurorraho kya Yesu kandi nitusiimwa Yahwe. (Mat. 5:11, 12) Sitaani nuwe ali enyuma y’okuhiganizibwa kunu. Baitu Yesu w’amaani muno kukira Sitaani! Habw’obusagiki bwa Yesu, amakuru amarungi galiyo nigatebezebwa omu mahanga goona. Tekerezaaho obwakaiso bunu.

7. Bwakaiso ki obw’orukurora oburukwoleka ngu obunabbi obuli omu Okusuku’rwa 14:6, 7 nibuhikirra?

⁷ Ekizibu ekindi ekitutangatangana nk’abatebezi b’Obukama nikyo eky’abantu kubaza endimi nyingi ezirukwahukana. Omu kusukurwa omukwenda Yohana okuyatungire, Yesu akaranga ngu amakuru marungi gakusoboire kutebezebwa omu kasumi kaitu n’obukiraaba ngu hakubaireho ekizibu kinu. (Soma Okusuku’rwa 14:6, 7.) Omu mulingo ki? Nitukonyera abantu baingi nk’oku turukusobora kumanya amakuru amarungi ag’Obukama. Kasumi kanu, abantu kwetoroora ensi nibasobora kusoma ebintu ebirukusigikirra ha Baibuli ebiri ha mukura gwa jw.org habwokuba obutumwa bunu buli omu ndimi ezirukuhingura omu 1,000! Akatebe Akalemi kakaikiriza ngu ekitabu Wegondeze omu Bwomeezi Ebiro n’Ebiro! kihindurwe omu ndimi ezirukuhingura omu 700, kandi ekitabu kinu nikyo kikwato ekikuru ekiturukukozesa hati omu kufoora abantu abegeswa! Ebyokulya eby’omwoyo hati biteekaniziibwe n’omu mulingo gwa vidiyo kukonyera abafu b’amatu, n’ebitabu ebiri omu mulingo gwa braille habw’abafu b’amaiso. Niturora obunabbi bwa Baibuli nibuhikirra. Abantu “abomu ndimi zona ezamahanga” nibeega kubaza “orulimi orusemiire” orw’amananu kuruga omu Baibuli. (Zek. 8:23; Zef. 3:9) Binu byona nibihikirra habw’obwebembezi oburungi obwa Yesu Kristo.

8. Birungi ki ebirugire omu mulimo gwaitu ogw’okutebeza?

⁸ Kasumi kanu, abantu abarukuhingura omu 8,000,000 omu mahanga 240 bali omu kitebe  kya Yahwe, kandi buli mwaka enkumi n’enkumi z’abantu babatizibwa! Omuhendo gw’abantu banu tikiri kikuru muno, baitu ekikuru muno, niyo emiringo ey’Ekikristaayo abegeswa abahyaka banu eibakurakuraniza hanyuma ‘y’okujwara omuntu omuhyaka.’ (Bak. 3:8-10) Baingi bakaleka obusihani, kurwana, kusoroora, hamu n’omwoyo gw’ihanga. Obunabbi obuli omu Isaya 2:4 buli mukuhikirra oburukugamba ngu: ‘Tibakyayega kurwana.’ Habwokuba twekamba kujwara omuntu omuhyaka, tusikiiriza abantu kwija omu kitebe kya Yahwe, kandi twoleka ngu nituhondera omuroleerezi waitu Yesu Kristo. (Yoh. 13:35; 1 Pet. 2:12) Binu byona tibibaho bubaho byonka. Yesu natuha obukonyezi obuturukwetaaga.

9. Kusigikirra ha Matayo 24:45-47, kiki Yesu ekiyagambire ngu kyakubaireho omu kasumi ka ha mpero?

⁹ Soma Matayo 24:45-47. Yesu akaranga ngu omu kasumi aka ha mpero, akaba nagenda kukoma omwiru omwesigwa kandi ow’amagezi kutuha ebyokulya eby’omwoyo. Omwiru omwesigwa ogu, mwekambi muno omu kuhikiriza omulimo gunu omu kasumi kaitu. Yesu akozeseze guruupu entaito ey’abasaija abaseserweho amagita kuha abantu be hamu n’abo abarukugonza amananu ebyokulya eby’omwoyo omu kasumi akahikire. Abasaija banu tibeerora nk’abarukulema okwikiriza okw’abantu abandi. (2 Kol. 1:24) Oihireho, bakyetegereza ngu Yesu Kristo nuwe “mwebembezi kandi omulemi” w’abantu be.​—Is. 55:4, NWT.

10. Kitabu ki ekyolekerwe omu kisisani ekyakukonyiire kutandika kuheereza Yahwe?

¹⁰ Kuruga omu 1919, omwiru omwesigwa aikaire natekaniza ebitabu eby’embaganiza ebikonyiire abantu abahyaka kutunga omugisa ogw’okwega amananu kuruga omu Kigambo kya Ruhanga. Omu 1921, omwiru omwesigwa  akatekaniza akatabu akarukwetwa The Harp of God kukonyera abarukugonza amananu kwega enyegesa za Baibuli ezirukubandizibwaho. Enyikara obuyahindukire, ebitabu ebindi bikaturukibwa. Kitabu ki ekyakukonyire kumanya n’okugonza Isiitwe ow’omu iguru? Kikaba “Let God Be True,” The Truth That Leads to Eternal Life, You Can Live Forever in Paradise on Earth, Knowledge That Leads to Everlasting Life, Baibuli Mali Eyegesa Ki?, Baibuli Etwegesa Ki?, rundi Wegondeze omu Bwomeezi Ebiro n’Ebiro! ekitabu kyaitu ekihyaka. Ebitabu binu byona bikatekanizibwa kusigikirra habwetaago obukaba buloho omu kasumi nambere byaturukiibwe.

11. Habwaki kikuru itwena kutunga ebyokulya eby’omwoyo?

¹¹ Abahyaka tibali nubo bonka abarukwetaaga ebyokulya ebigumire. Itwena nitubyetaaga. Omukwenda Paulo akahandiika ati: “Ebyokulya ebigumire nibisemerra abakuzire.” Kandi akongera yagamba ngu kuteeka omu nkora ebiturukwega kuruga omu Baibuli kyakutukonyiire “okubaganizamu ebirungi nebibi.” (Baheb. 5:14) Omu kasumi kanu akagumangaine nambere engeso zeyongeriire kimu kusiisikara, nikisobora kutugumira kworobera endengo za Yahwe. Baitu Yesu akigumya ngu twatunga ebyokulya eby’omwoyo ebiturukwetaaga kwikaza okwikiriza kwaitu kugumire. Ekigambo kya Ruhanga Baibuli, niyo endugirro y’ebyokulya binu eby’omwoyo. Hansi y’oburagirizi bwa Yesu, omwiru omwesigwa ateekaniza kandi agaba ebyokulya eby’omwoyo.

12. Nka Yesu, tuheisize tuta ibara lya Ruhanga ekitiinisa?

¹² Nka Yesu, naitwe tuheisize ibara lya Ruhanga ekitiinisa ekirisemeriire. (Yoh. 17:6, 26) Ekyokurorraho, omu 1931 tukatandika kukozesa ibara erirukusigikirra ha byahandikirwe Abakaiso ba Yahwe, kandi habw’okukora eki, tukakyoleka ngu ibara lya Ruhanga likuru muno haliitwe, kandi nitugonza kumanywa nk’abantu b’ibara lye. (Is. 43:10-12) Kandi  kuruga omu Okitobba y’omwaka ogu, ibara lya Yahwe likaire niriteekwa ha kyesweko ky’Omunaara gw’Omulinzi. Okwongerezaaho, Baibuli eya New World Translation of the Holy Scriptures egarwire ibara lya Ruhanga omu biikaro nambere lisemeriire kuba omu Baibuli. Kinu nikyahukanira kimu n’amadiini agarukweyeta ag’Ekikristaayo agaihire ibara lya Ruhanga omu mpindura zaabo enyingi za Baibuli!

13. Kiki ekirukukugumya ngu Yesu n’akozesa “omwiru omwesigwa kandi ow’amagezi” omu kasumi kanu? (Yoh. 6:68)

¹³ Kuraba omu “mwiru omwesigwa kandi ow’amagezi,” Yesu ayombekere ekitebe ky’amaani omu nsi kukurakuraniza okuramya okw’amananu. Oyehurra ota ha kitebe eki? Obundi n’oyehurra nk’omukwenda Petero ayagambiire Yesu ati: “Turagenda hali oha? Oyina ebigambo ebyobwomezi obutahwaho.” (Yoh. 6:68) Twakubaire nkaha kakuba tutaramanyire ekitebe kya Yahwe? Kuraba omu kitebe kya Yahwe, Kristo akigumya ngu twaliisibwa omu by’omwoyo. Ekindi, atutendeka kuhikiiriza obuheereza bwaitu kurungi. Kandi atukonyera kujwara “omuntu omuhyaka,” nukwo tusobole kusemeza Yahwe.​—Bef. 4:24.

14. Ogasiirwe ota habwokuba omu kitebe kya Yahwe omu kasumi k’oburwaire bwa COVID-19?

¹⁴ Yesu atuha oburagirizi oburungi omu busumi obugumangaine. Tukarora omugaso gw’oburagirizi bunu oburwaire bwa COVID-19 obubwatandikireho. Abantu baingi obubaali batamanyire eky’okukora, Yesu akakigumya ngu itwe twatunga oburagirizi oburungi obw’okutulinda. Tukekambisibwa kujwara masiki obuturukuba tugenzere omu bantu baingi n’okwirra hara abandi. Abagurusi bakaijukibwa kwikara nibabaza na b’oruganda na banyaanya itwe boona omu kitebe nukwo basobole kumanya ebyetaago byabo eby’omwoyo  hamu neby’omubiri. (Is. 32:1, 2) Tukatunga oburagirizi obundi hamu n’okugarurwamu amaani kuruga omu ripooti ez’Akatebe Akalemi.

15. Buragirizi ki obwatuhairwe oburukukwata ha kutunga ensorrokano hamu n’okuhikiriza omulimo gw’okutebeza omu kasumi ka COVID-19, kandi biki ebyarugiremu?

¹⁵ Ekindi, omu kasumi ak’oburwaire bwa COVID-19, tukatunga oburagirizi oburungi oburukukwata ha mulingo tusemeriire kusorrokanamu n’omulingo tusobora kwejumbira omu mulimo gw’okutebeza. Omu kaire kake, tukatandika kutunga ensorrokano zaitu z’ekitebe, hamu n’ensorrokano enkooto omu mulingo gwa vidiyo. Kandi tukatandika kutebeza kurabira omu kuhandiika amabbaruha n’okuteera esimu. Yahwe akaha omugisa amaani agatwateiremu. Omu mataagi maingi, habaireyo okweyongera kw’amaani okw’abatebezi. Amananu gali, baingi batungire ebyokurorraho bingi ebirungi ebibagarwiremu amaani omu kasumi kanu.​—Rora akasanduuko “ Yahwe Aha Omugisa Okutebeza Kwaitu.”

16. Kiki ekiturukugumya?

¹⁶ Abamu nibasobora kuba bateekeriize ngu ekitebe kikatiina muno ekihinguraine omu kasumi ka COVID-19. Baitu emirundi erukukira obwingi, kikeyolekera kimu ngu oburagirizi obutwatungire bwali bw’amagezi. (Mat. 11:19) Kandi obuturukwecumitirizaaho omulingo gw’okugonza Yesu arukwebemberamu abantu be, nitukigumiza kimu ngu n’obuharaabaho ki omu kasumi k’omu maiso, Yahwe hamu n’Omwana we omugonzebwa nibaija kuba hamu naitwe.​—Soma Abaheburaniya 13:5, 6.

17. Oyehurra ota kukorra hansi y’oburoleerezi bwa Yesu?

¹⁷ Kamugisa gw’amaani okukorra hansi y’oburoleerezi bwa Yesu! Tuli omu kitebe ekiteecwiremu kusigikirra ha nganda, amahanga, hamu n’endimi. Tuliisiibwe kurungi omu by’omwoyo kandi tutungire okutendekwa okuturukwetaaga kusobora kuhikiiriza kurungi omulimo gw’okutebeza. Buli omu muliitwe, nayegesebwa omulingo asemeriire kujwaramu omuntu omuhyaka, hamu n’okugonzangana. Twine ensonga nyingi ez’okwenyumiriza omu muroleerezi waitu Yesu!