Isenyowe akaba ali mwebembezi omu kanisa eya United Church of Canada, nahabweki, buli wiiki yatusindikaga omu Sande sukuru, kandi hanyuma twamweteranizaahoga omu misa eya saaha 5:00 eza nyekyakara. Nyamusana, twagendaga na nyina itwe ha Kyombeko ky’Obukama. Twaroraga embaganiza hagati y’amadiini ganu abiri.

Nyina itwe akagambiraho banywani be Bob Hutcheson na mukazi we Marion eby’akaba ayegere, kandi nabo bakafooka Bakaiso ba Yahwe. Omu 1958 Ow’oruganda Hutcheson na mukazi we bakantwara hamu na batani baabo omu rusorrokano orw’ensi yoona orw’ebiro munaana orukaba rwine omutwe Divine Will omu rubuga rwa New York. Hati nubwo nkyetegeriize ngu kyali kitanguhire kuntwara, baitu orusorrokano oru rukahindura obwomeezi bwange.

Obunahikire omu myaka y’obusigazi, twali twine ebisoro ebinagonzaga muno kurolerra. Nkatandika kutekerezaaho kusoma nfooke dakitaali w’ebisoro. Nyina nyowe akakigambiraho omu h’abagurusi omu kitebe. Omugurusi ogu akanyijukya ngu tuli “omu biro bya hanyuma” kandi akankaguza mulingo kugenda ha yunivasite nkamarayo emyaka kisobora kukwataho enkoragana yange na Yahwe. (2 Tim.  3:1) Ekyarugiremu, nkacwamu kutagenda ha yunivasite.

Baitu nkaba ntamanyire ekindakora obundamara siniya. N’obukiraaba ngu natebezaaga buli wiikendi, tinayegondezaaga omu buheereza kandi tinatekerezaaga ngu ninsobora kufooka payoniya. Omu kasumi ako, ise nyowe na isento nyowe abakaba batali Bakaiso ba Yahwe banyekambisaga kukorra kampuni emu ey’amaani omu Toronto. Isento nyowe akaba aine ekiikaro eky’amaani omu kampuni egi, nahabweki nkaikiriza omulimo ogu.

Omu Toronto, buli kiro nakoraga kuhinguza obwire kandi namaraga obwire bwingi n’abantu abatarukuheereza Yahwe ekyandemeseze kwejumbira omu bintu eby’omwoyo omu bwijwire. Hakubanza, naikaraga na isenkuru nyowe ow’akaba atali omu h’Abakaiso ba Yahwe, baitu obuyafiire nkaba ninyetaaga ah’okwikara.

Eka ya Hutcheson, abakaba bantwaire omu rusorrokano orukooto omu 1958 baali nk’abazaire nambere ndi. Bakanyeta kwikara nabo kandi bakankoyera kukura omu by’omwoyo. Omu 1960, nyowe na mutabani wabo John, tukabatizibwa. John akatandika kuheereza nka payoniya ekyanyekambisize kwongera ha buheereza bwange. Ab’oruganda omu kitebe bakarora okukurakurana okunkaba nkozere kandi bakankoma kuheereza nk’omuroleerezi wa Theocratic Ministry School. a

Omu 1966, nkataaha obuswere na Randi Berge, payoniya omwekambi ow’akaba aine ekihika eky’okuheereza nambere hali obwetaago. Omuroleerezi w’ekicweka akatwoleka okugonza kandi yatwekambisa kukonyera ekitebe omu Orillia, Ontario. Nahabweki nuho twagenzere.

Obutwahikireyo, nketeranizaaho Randi omu kuheereza nka payoniya ow’akasumi koona. Nanyowe nkatunga obwekambi nk’obwe! Obunatandikire kuheereza nka payoniya, nkatunga okusemererwa okuruga omu kukozesa Baibuli n’okurora omulingo abantu bayetegerezaaga amananu. Mali gukaba  mugisa gw’amaani kukonyera omusaija na mukazi we ab’omu Orillia kukora empindahinduka omu bwomeezi bwabo bakatandika kuheereza Yahwe.

Obutwali twabungire omu Toronto, nkatangana Arnold MacNamara, ow’akaba ali omu h’ab’oruganda abaine obujunanizibwa ha Bbeseeri. Akankaguza obundaaba nakugondeze kuheereza nka payoniya ow’embaganiza. Ahonaaho nkamugarukamu nti: “Ego! Baitu hatali omu Quebec!” Nkaba nyine entekereza etahikire ey’abantu aba Canada abarukubaza Orungereeza eibaali baine h’abantu abarukubaza Orufaransa omu kicweka kya Quebec. Kasumi ako, abantu bakaba nibesalinga nibagonza Quebec eyecweho Canada.

Arnold kangarukamu ati: “Quebec nikyo kicweka kyonka nambere itaagi lirukusindika bapayoniya abembaganiza kasumi kanu.” Ahonaaho nkaikiriza kugenda. Nkaba nkimanyire ngu Randi nagonza kuheerezayo. Hanyuma nkakyetegereza ngu enu eri emu ha ncwamu ezirukukirayo oburungi ezitwakozere omu bwomeezi bwaitu!

Hanyuma y’okumara wiiki itaano nitwega Orufaransa, nyowe, Randi n’ow’oruganda ondi na mukazi we tukagenda omu Rimouski, haihi nka kilomita 540 (mairo 336) omu matemba ga Montreal. Obunkaba nisoma ebirango omu nsorrokano, nkasoma kubi ebigambo ekyatwolekere ngu tukaba twine kweyongera kwega orulimi. Omu kiikaro ky’okugamba ngu nitwija kuba n’abagenyi baingi kuruga Austria, nkagamba ngu nitwija kuba n’abagenyi baingi kuruga “ostrich” ekirukumanyisa ekinyonyi.

Omu Rimouski, banyaanya itwe bbana abekambi abatali omu buswere hamu n’ow’oruganda Huberdeaus na mukazi we na bahara baabo babiri bakatweteranizaaho. Ow’oruganda Huberdeaus na mukazi we bakatunga enju y’ebisiika musanju nambere bapayoniya bapangisaga kandi tukagyeta White House habwokuba ekaba esiigirwe erangi erukwera. Twakiraga kwikaramu abantu 12 rundi 14. Habwokuba nyowe na Randi twali bapayoniya abembaganiza, twakiraga kutebeza ekiro kyona kandi kyatusemezaaga kuba n’omuntu ow’okukora nauwe n’obubwabaga bwire bwa rwebagyo omu kasumi k’obufuki.

Tukeyongera kugonza bapayoniya banu abesigwa kandi tukafooka nk’eka emu. Obwire obumu rwebagyo twayesoroozaga hamu nitwota omurro kandi twabaga n’ekiro obutwacumbiraga hamu. Omu h’ab’oruganda akaba amanyire kuzina, nahabweki Kyamukaaga rwebagyo twazinaga kandi nitwecanga.

Abantu baingi omu Rimouski baagonzaaga kwega Baibuli. Omu myaka etaano, tukasemererwa kurora abeegi ba Baibuli nibakurakurana kuhika ha kubatizibwa. Abatebezi omu kitebe bakeyongera kuhika nka 35.

Omu Quebec, tukatendekwa kutebeza. Tukarora omulingo Yahwe yatukonyiire omu buheereza n’okutuhikyaho ebyetaago byaitu. Ekindi, tukagonza orulimi Orufaransa, abantu abarukurubaza, n’omulingo barukwetwazaamu kandi eki kikatuleetera kugonza abantu ab’enganda ezindi.​—2 Kol. 6:13.

Itaagi likatusaba kugenda omu tawuni erukwetwa Tracadie enyakuli ha mwaro gwa burugaizooba bwa New Brunswick, kandi eki tukaba tutarukukinihira. Kinu kitatwanguhire habwokuba nubwo twali tusaswire enju kandi nkaba nkozere endagaano n’isomero kwegesayoga obwire buke. Ekindi, bamu ha beegi baitu ba Baibuli nubwo baali bafookere batebezi kandi n’Ekyombeko ky’Obukama kyali nikikyayombekwa.

 Tukasaba muno ha ncwamu egi, hanyuma twagenda kubunga omu Tracadie, hakaba nihahukanira kimu na Rimouski. Baitu tukagendayo habwokuba Yahwe nuho akaba nagonza tugende. Tukakora Yahwe ekiyatugambiire kandi yamaraho ebyali nibitulemesa. (Mara. 3:10) Habwokuba Randi akaba ali muntu w’eby’omwoyo kandi aine omutima ogw’okwefeereza, kikatwanguhira kufuruka.

Robert Ross nuwe mugurusi wenka ow’akaba ali omu kitebe kyaitu ekihyaka. Uwe na mukazi we Linda, bakaba baheeriize omu kicweka eki nka bayoniya kandi bakacwamu kwikarayo na hanyuma y’okuzaara omwana wabo ow’okubanza. N’obukiraaba ngu bakaba nibarolerra omwana wabo, bakatugarramu muno amaani habw’omulingo baatutangiriiremu n’obwekambi bwabo omu mulimo ogw’okutebeza.

Hanyuma y’okuheereza nka bapayoniya kumara emyaka ebiri omu Tracadie, tukatunga omugisa ogundi ogw’atuhuniriize muno, nukwo kuheereza nk’omuroleerezi w’ekicweka. Tukabungira ebitebe ebirukubaza Orungereeza kumara emyaka musanju, kandi hanyuma bakatusaba kubungira ebitebe by’Orufaransa omu Quebec. Omuroleerezi wa disitrikiti omu Quebec, Léonce Crépeault, yansiimaga habw’embazo zange. Baitu hanyuma yankaguzaaga ati: “N’osobora kwongera kusemezaamu?” b Eki kikankonyera kweyongera kuteeka omutima ha kusemezaamu omulingo nahamuga embazo.

Obujunanizibwa obundiikara ninyjuka nubwo obunatungire omu 1978 ha rusorrokano orukooto orw’ensi yoona orukaba rwine omutwe “Victorious Faith” omu Montreal. Nkakora omu kucumba ebyokulya. Twali nitunihira abantu 80,000, kandi ekaba eri ntekaniza empyaka ey’okubaliisa. Buli kimu kyali kihyaka hali nyowe, nk’ebyoma byokucumbisa, ebituracumba n’omulingo gw’okucumba. Hakaba haroho furiiji enkooto ezirukuhika nka 20 kandi ezimu zikaba zitarukukora kurungi. Tutakatandikire ekiro kyokubanza, twali tutasobora kutaaha omu kizaaniro kutekaniza bukyali kuhikira kimu saaha mukaaga gw’ekiro habwokuba ekizaaniro kyali nikikozesebwa. Kandi twali twine kutandika kucumba ekyanyenkyakara obwire butakakiire. Tukajwaha muno baitu nkeega bingi habw’amaani abanakoraga nabo agabatairemu n’omulingo baakoraga emirimo basemeriirwe. Tukafooka banywani kuhikya na  kasumi kanu. Mali tukasemererwa muno kubaho ha rusorrokano runu orukuru omu Quebec, ekiikaro ekikaba kirumu okuhiiganizibwa hagati y’omwaka 1940 na 1960!

Nkeega bingi ha baroleerezi omu nsorrokano enkooto omu Montreal. Haroho omwaka gumu, David Splane, hati ow’arukuheereza h’Akatebe Akalemi nuwe akaba ali muroleerezi w’orusorrokano. Orusorrokano orwahondireho, nkaheebwa obujunanizibwa obu, kandi David akankonyera muno.

Omu 2011, hanyuma y’okwegondeza omu mulimo gw’okubungira ebitebe kumara emyaka 36, nkaraalizibwa kuheereza nk’omwegesa omu Isomero lya Bagurusi b’Ekitebe. Omu myaka ebiri, tukabyama omu bitabu 75 ebirukwahukana baitu tukegonza muno. Hakumalirra kwa buli wiiki, abagurusi baasiimaga muno habwokurora omulingo Akatebe Akalemi karukufaaho abagurusi omu by’omwoyo.

Hanyuma, nkegesaho omu Isomero ly’Abatebezi b’Obukama. Obwire oburukukira obwingi abeegi bayehurraga bajwahire habw’okuba na bingi ebyokukora, otwaliiremu kuba omu kilaasi kumara esaaha haihi musanju, nibakora ebibahairwe kumara esaaha isatu buli rwebagyo, n’okutekaniza eby’okurorraho nkabbina rundi bitaano buli wiiki. Nyowe n’ow’oruganda ondi tukabagambira ngu tibasobora kukora ebi byona bataine bukonyezi bwa Yahwe. Ninkyaijuka omulingo abeegi baahuniriire kukirora ngu kwesiga Yahwe kikabakonyera kuhikiiriza n’ebibaali batarukunihira ngu nibisoboka.

Okugonza nyina nyowe yayolekere abeegi be aba Baibuli, kukabakonyera kukurakurana kandi kwaleetera isiitwe kuleka kuhakaniza amananu. Hanyuma y’ebiro bisatu nyina nyowe amazire kufa, isiitwe akatuhuniiriza obuyagenzere ha kyombeko ky’Obukama kuhuliiriza orubazo kandi akagumizaamu nagenda omu nsorrokano kumara emyaka 26 eyahondireho. N’obukiraaba ngu atabatizibwe, abagurusi bakangambira ngu nuwe yabanzaaga ha kyombeko ky’Obukama buli wiiki.

Nyina itwe akatuteraho ekyokurorraho ekirungi. Banyaanya nyowe boona basatu n’abasaija baabo nibaheereza Yahwe n’obwesigwa. Omu n’aheereza ha itaagi lya Portugal kandi ondi n’aheereza ha itaagi lya Haiti.

Nyowe na Randi hati nituheereza nka bapayoniya ab’embaganiza omu Hamilton, Ontario. Obutukaba nitukyabungira ebitebe twayegondezaaga omu kusendekereza abandi h’abeegi baabo. Baitu hati kitusemeza kurora abeegi baitu nibakurakurana omu by’omwoyo. Kandi obutweyongera kunywana ab’oruganda na banyaanya itwe omu kitebe kyaitu ekihyaka, tugarurwamu amaani kurora omulingo Yahwe abasagika omu bwire oburungi n’obubi.

Obutwijuka eby’enyuma, nitusiima muno okugonza abantu baingi okubaatwolekere. Kandi naitwe nitulengaho ‘kuhuumuza’ abandi n’okubekambisa kuhika ha bigendererwa byabo eby’omwoyo. (2 Kol. 7:6, 7) Ekyokurorraho, haroho eka emu, nambere munyaanya itwe, mutabani we na muhara we boona bakaba bali omu buheereza obw’akasumi koona, nkakaguza iba obwaraaba yakalengahoga kuheereza nka payoniya. Akagamba ngu uwe akaba nalengaho kusagika bapayoniya abo basatu. Nahabweki nkamukaguza nti: “Mali n’osobora kubarolerra kukira Yahwe?” Nauwe nkamwekambisa kuheereza nka payoniya, kandi hanyuma y’emyezi mukaaga, akatandika kuheereza nka payoniya.

Nyowe na Randi nitwija kugumizaamu ‘kutebeza amaani ga Yahwe hali obusinge oburukugarukaho’ hamu ‘n’emirimo ye eyamahano,’ kandi nitunihira ngu nabo nibaija kwegondeza omu buheereza nkaitwe.​—Zab. 71:17, 18.