1-2. Omukristaayo n’asobora kulengesanizibwa ata n’ekyombeko ekiraihire muno? (1 Abakolinso 15:58)

 OMU mwaka ogwa 1978 ekyombeko ekiraihire muno kikombekwa omu Tokyo, Japan. Abakiroraga bakekaguza omulingo kyakwikaire kigumire kandi kunu orubuga oru rukira kuteerwa emisisa. Abombeki bakakora ki kurora ekyombeko kinu kyagumira emisisa? Bakakyombeka kisigikire baitu nikisobora n’okwegema kakuba haija omusisa. Abakristaayo bali nk’ekyombeko eki ekiraihire muno. Omu mulingo ki?

² Omukristaayo asemeriire kwikara agumire baitu ha murundi nugwo gumu ayetekaniize kuhinduramu. Asemeriire kwikara acweriiremu kimu kworobera ebiragiro bya Yahwe n’endengo ze. (Soma 1 Abakolinso 15:58.) Asemeriire kwikara ‘ayetekaniize kworobera’ Yahwe, kandi ‘ahindahinduramu,’ nambere kirukwetaagisa. (Yak. 3:17, NWT) Omukristaayo ayegere kwetwaza omu mulingo gunu tarukwija kulemera ha nsonga rundi kuba muntu atarukufaayo. Omu kicweka kinu, nitwija kubazaaho omulingo tusemeriire kugumira ha kihikire, hamu n’emitego etaano Sitaani eyakozesa kucekya encwamu yaitu ey’okworobera Yahwe.

3. Biragiro ki kuruga hali Yahwe ebiturukusanga omu Engeso Ezabakwenda 15:28, 29?

³ Nk’omuhi w’ebiragiro arukukirayo, Yahwe aikaire nakonyera abantu be kwetegereza ebiragiro bye. (Is. 33:22) Ekyokurorraho, akatebe akalemi ak’omu kyasa eky’okubanza kakabazaaho emiringo esatu Abakristaayo baali basemeriire  kwikara niborobera Yahwe: (1) kwetantara kuramya ebisisani, baitu baramye Yahwe wenka, (2) kworobera Yahwe obukirukuhika ha kukozesa esagama, (3) n’okuhondera endengo za Baibuli ezirukukwata ha ngeso. (Soma Engeso Ezabakwenda 15:28, 29.) Abakristaayo kasumi kanu nibasobora bata kworobera Yahwe omu miringo enu esatu?

4. Twoleka tuta ngu nituramya Yahwe wenka? (Okusuku’rwa 4:11)

⁴ Twetantara kuramya ebisisani, nituramya Yahwe wenka. Yahwe akaragira Abaisaleri kuramya uwe wenka. (Bir. 5:6-10) Kandi Sitaani obuyayoheze Yesu, Yesu akagamba ngu tusemeriire kuramya Yahwe wenka. (Mat. 4:8-10) Nahabweki, tituramya bisisani. Ekindi, tituramya abantu, kababe bebembezi b’amadiini, ab’eby’obulemi rundi abantu ruranganwa oti rundi baruhanga. Twikara nituramya Yahwe Ruhanga ‘ayahangire byona.’​—Soma Okusuku’rwa 4:11.

5. Habwaki tworobera ekiragiro kya Ruhanga ekirukwoleka ngu obwomeezi n’esagama by’omuhendo?

⁵ Tworobera ekiragiro kya Yahwe ekirukwoleka ngu obwomeezi n’esagama by’omuhendo. Habwaki? Habwokuba Yahwe agamba ngu esagama ekikirra obwomeezi, ekisembo eky’omuhendo kuruga haluwe. (Lev. 17:14) Yahwe obuyaikiriize abantu kulya enyama habw’omurundi gw’okubanza, akabagambira kutalya esagama. (Kub. 9:4) Akongera yagarukamu ekiragiro kinu obuyahaire Abaisaleri Ebiragiro bya Musa. (Lev. 17:10) Kandi akaragira akatebe ak’omu kyasa eky’okubanza kutererra Abakristaayo ‘kulekerayo kimu . . . esagama.’ (Eng. 15:28, 29) Tworobera ekiragiro kinu obutucwamu kara obujanjabi obuturaikiriza. b

6. Kiki ekitusobora kukora kworobera endengo za Yahwe ezirukukwata ha ngeso?

⁶ Tworobera endengo za Yahwe ezirukukwata ha ngeso. (Baheb. 13:4) Omukwenda Paulo akakozesa ekyokurorraho ekirukwetegerezebwa kurungi obwakaba natutererra ‘kufiisa’ ebicweka byaitu eby’omubiri. Eki nikimanyisa ngu tusemeriire kukora kyona ekiturukusobora kweyihamu okwegomba okubi. Twetantara kurora rundi kukora ekintu kyona ekisobora kutuleetera kusiihana. (Bak. 3:5; Yob. 31:1) Obutwohebwa, ahonaaho twangirra ekitekerezo rundi ekikorwa kyona ekisobora kusiisa enkoragana yaitu na Ruhanga.

7. Kiki ekitusemeriire kucweramu kimu kukora kandi habwaki?

⁷ Yahwe natunihirramu kumworobera kuruga ha mutima. (Bar. 6:17) Ebyatugambira kukora bigasira itwe kandi titusobora kuhindura ebiragiro bye. (Is. 48:17, 18; 1 Kol. 6:9, 10) Leka tucweremu kimu kumusemeza n’okuba n’entekereza nk’ey’omuhandiiki wa Zabuli ayagambire ati: “Ntaire omutima gwange habiragiro byawe okubikoraga ebiro byona nokuhikya empero.” (Zab. 119:112) Baitu, Sitaani alengaho kutulemesa kworobera Yahwe. Mitego ki eyakozesa?

8. Sitaani akozesa ata okuhiiganizibwa kulengaho kutulemesa kworobera Yahwe?

⁸ Okuhiiganizibwa. Sitaani alengaho kucekya encwamu yaitu ey’okworobera Yahwe kuraba omu kutumara amaani n’okutukora kubi. Ekigendererwa kye ‘ky’okutulya,’ obu nasiisa enkoragana yaitu na Yahwe. (1 Pet. 5:8) Abakristaayo ab’omu kyasa eky’okubanza bakatiinisirizibwa, baateerwa, kandi abandi baitwa habwokuba bakacwamu kworobera Yahwe. (Eng. 5:27, 28, 40; 7:54-60) N’omu kasumi kanu, Sitaani n’akyakozesa omutego  ogw’okuhiiganizibwa. Kinu nitukirorra ha mulingo ab’oruganda na banyaanya itwe ab’omu Russia n’omu biikaro ebindi barukutwazibwamu kubi, n’omulingo abantu abandi batuhakaniza.

9. Bazaaho ekyokurorraho ekirukwoleka omulingo tusobora kwerinda emitego etanguhire kurorwa.

⁹ Emitego etanguhire kurorwa. Oihireho kututahirra bwerrebwerre, Sitaani akozesa “obudupe.” (Bef. 6:11) Tekerezaaho ekyokurorraho ky’ow’oruganda arukwetwa Bob ow’akaba nagenda kusemezebwa. Akagambira badakitaali nk’okwatarukwija kwikiriza kuteekwamu esagama. Dakitaali ow’akaba nagenda kumusemeza akaikiriza kutamuteekamu esagama. Baitu rwebagyo oru batakamusemiize, dakitaali ondi akaija kubungira Bob obwakaba ali wenka. Akagambira Bob ngu tibarukwija kumuteekamu esagama oihireho nibaija kugiikaza haihi nukwo bagimuteekemu obukirayetaagisa. Obundi dakitaali onu akatekereza ngu obwarabaza nauwe ab’omu ka ye bataroho naija kwikiriza. Baitu Bob akagumira ha ncwamu ye kandi yamugambira ngu tarukwija kwikiriza kuteekwamu esagama n’obuharaabaho ki.

10. Habwaki amagezi g’abantu mutego? (1 Abakolinso 3:19, 20)

¹⁰ Amagezi g’abantu. Kakuba tuhondera entekereza z’abantu, nitusobora kuleka kuhondera endengo za Yahwe. (Soma 1 Abakolinso 3:19, 20.) “Amagezi agobusinge bunu” gatwekambisa kukurakuraniza okwegomba okw’omubiri. Bamu h’Abakristaayo ab’omu rubuga rwa Peregamo na Suatira bakatunga entekereza y’abantu abaali babetoroire, abaaramyaga ebisisani kandi abasiihani. Yesu akaha obuhabuzi Abakristaayo ab’omu bitebe binu bibiri habwokuba bakasagika engeso ezo ez’obusiihani. (Kus. 2:14, 20) Kasumi kanu, abantu balengaho kutusindikiriza kusagika entekereza zaabo. Abanyabuzaale rundi abanywani nibasobora kukozesa enyikara eiturumu kutusindikiriza kucwa endengo za Yahwe. Ekyokurorraho, nibasobora kugamba ngu tikiri kibi kukora ebiturukugonza n’obukirukuba nikicwa endengo za Ruhanga kandi ngu Baibuli ekahwa ha mulembe.

11. Obuturaaba tuli b’okwikara nitworobera Yahwe, kiki ekitusemeriire kwetantara?

¹¹ Obwire obumu nitusobora kutekereza ngu oburagirizi obututunga kuruga hali Yahwe tiburukwetegerezebwa kurungi. Nitusobora n’okwohebwa ‘kuhinguraho ebyahandiikirwe.’ (1 Kol. 4:6) Abebembezi b’amadiini omu kasumi ka Yesu nikyo baakozere. Baketeraho ebiragiro ebitali omu Biragiro bya Musa ekyaletiire abantu kugumirwa kubyorobera. (Mat. 23:4) Yahwe atuha oburagirizi oburukwetegerezebwa kurungi nakozesa Ekigambo kye n’ekitebe kye. Titusemeriire kugira ekitwayongeraho ha buragirizi obwarukutuha. (Nfu. 3:5-7) Nahabweki, titweteraho ebiragiro ebitali omu Baibuli kandi tituteekaho ebiragiro ha nsonga buli omu ez’asemeriire kwecweramu.

12. Sitaani akozesa ata ‘ebisuba ebitarumu’?

¹² Ebisuba. Sitaani akozesa ‘ebisuba ebitarumu’ hamu ‘n’eby’okubanza eby’ensi’ kuhabisa n’okubaganizaamu abantu. (Bak. 2:8) Omu kyasa eky’okubanza binu byatwarramuga ebifirosofo ebirukusigikirra ha ntekereza z’abantu, enyegesa z’ekiyudaaya ezitarukusigikirra ha Baibuli, n’enyegesa erukugamba ngu Abakristaayo basemeriire kuhondera Ebiragiro bya Musa. Ebi bikaba biri bisuba habwokuba bikahugura abantu, byabaiha hali Yahwe Endugirro y’amagezi. Kasumi kanu, Sitaani akozesa amakuru rundi emikura ey’okubalizaaho kurarangya amakuru agataine bwakaiso n’entekereza ezindi ezikurakuranizibwa  ab’eby’obulemi. Kinu tukakirora omu kasumi ak’oburwaire bwa Korona. c Abakaiso ba Yahwe abahondiire oburagirizi obutwatungire kuruga omu kitebe kya Yahwe, baketantara okwetuntura okurukuleetwa amakuru ag’ebisuba.​—Mat. 24:45.

13. Habwaki tusemeriire kwerinda ebintu ebisobora kutuhugura?

¹³ Ebintu ebirukuhugura. Titusemeriire kunagiiriza ebintu “ebirukukira obukuru.” (Baf. 1:9, 10, NWT) Ebintu ebitali bikuru nibisobora kutuhugura nibitwara obwire n’amaani gaitu ebitwakukozeseze kukora ebintu ebindi ebikuru. Ebintu ebya buli kiro nk’okulya, okunywa, eby’okwesemeza n’emirimo nibisobora kutuhugura kakuba nibyo twebembeza omu bwomeezi bwaitu. (Luk. 21:34, 35) Ekindi, buli kiro tuhurra rundi tusoma amakuru agarukukwata ha by’obulemi rundi ha bintu ebindi. Titusemeriire kwikiriza ebintu binu kutuhugura. Kitali eki nitusobora kutandika kugwera orubaju omu bitekerezo n’omu mitima yaitu. Sitaani akozesa emitego enu yoona eitubalizeeho kutulemesa kukora ebihikire. Leka turole omulingo tusobora kwangirra emitego egi nukwo twikale tuli besigwa hali Yahwe.

14. Kiki ekiratukonyera kwikara nitworobera Yahwe?

¹⁴ Tekerezaaho ensonga habwaki wayehaireyo hali Yahwe wabatizibwa. Okakora encwamu egi habwokuba okaba n’ogonza kworobera Yahwe. Tekerezaaho ekyakukonyiire kukigumya ngu ozoire amananu. Okeega hali Yahwe kandi watandika kumuteekamu ekitiinisa n’okumugonza nka Sso ow’omu iguru. Okombeka okwikiriza kwawe ekyakwekambisize kwegarukamu. Kandi okehurra osemeriirwe kukimanya ngu Ruhanga akaba akuganyiire. (Zab. 32:1, 2) Okatandika kugenda omu nsorrokano kandi watandika kugambiraho abandi ebintu ebirungi ebiwayegere. Hati nk’Omukristaayo ow’abatiziibwe, nogendera omu muhanda ogw’obwomeezi kandi ocweriiremu kimu kutagurugamu.​—Mat. 7:13, 14.

15. Habwaki kwesomesa n’okwecumiitiriza bikuru?

 ¹⁵ Wesomese Ekigambo kya Ruhanga kandi okyecumiitirizeeho. Nk’omuti ogunyakwine emihama ey’ehamire gusobora kwemerra kurungi, naitwe kakuba tuba n’okwikiriza okugumire, nikiija kutukonyera kwesiga Yahwe. Omuti obugweyongera kukura, n’emihama eyeyongera kuhama. Obuturayesomesa kandi tukecumiitirizaaho ebitusomere, nitwija kugumya okwikiriza kwaitu kandi tukigumye ngu emihanda ya Ruhanga niyo erukukirayo oburungi. (Bak. 2:6, 7) Tekerezaaho omulingo obuhabuzi, oburagirizi n’obulinzi bwa Yahwe byakonyiire abaheereza be ab’omu kasumi akaakara. Ekyokurorraho, Ezekyeri akateeka omutima ha bipimo bya yekaru eyiyarozere omu kwolekwa. Okwolekwa kunu kukamugumya kandi nikutwoleka omulingo tusobora kuhondera endengo za Yahwe obukirukuhika ha kuramya okw’amananu. d (Ez. 40:1-4; 43:10-12) Naitwe tugasirwa kakuba tutunga obwire bwokesomesa n’okwecumiitirizaaho ebintu ebihamire ebirukusangwa omu Kigambo kya Ruhanga.

16. Kucweramu kimu kworobera Yahwe, kikakonyera kita Bob? (Zabuli 112:7)

¹⁶ Cweramu kimu kworobera Yahwe. Omukama Daudi akooleka ngu talireka kugonza Yahwe obuyagambire ati: “Omutima gwange gugumire, ai Ruhanga.” (Zab. 57:7) Naitwe nitusobora kuba n’omutima ogugumire kandi twesigire kimu Yahwe. (Soma Zabuli 112:7.) Tekerezaaho omulingo eki kyakonyiire Bob outusangirwe tubalizeeho. Obubamugambiire ngu nibaija kwikaza haihi esagama kakuba kyetaagisa kugimutamu, akabagambira ngu obubaraaba nibakyatekerezaaho ebyokumuteekamu esagama, akaba naija kuruga omu irwarro eri ahonaaho. Hanyuma y’ebi, Bob akagamba ati: “Nkaba ntarukugurukyagurukya encwamu yange kandi nkaba ntarukutiina ekyakumpikireho.”

17. Kiki ekiturukwegera ha kyokurorraho kya Bob? (Rora ekisisani.)

¹⁷ Bob akaikara agumire habwokuba akaba amazire ira kukora encwamu ey’okworobera  Yahwe atakagenzere omu irwarro. Eky’okubanza, akaba n’agonza kusemeza Yahwe. Ekyakabiri, akesomesaaho omulingo Baibuli n’ebitabu byaitu ekibirukugamba ha kutwara obwomeezi n’esagama kuba by’omuhendo. Ekyakasatu, akaba nakigumya ngu Yahwe yakumuhaire emigisa habw’okumworobera. Naitwe nitusobora kucweramu kimu kwikara nitworobera Yahwe n’obuturatunga ebizibu bya mulingo ki.

18. Ekyokurorraho kya Baraka nikitwegesa ki ha kwesiga Yahwe? (Rora ekisisani ekya ha kyesweko.)

¹⁸ Wesige Yahwe. Tekerezaaho obusinguzi Baraka yatungire habw’okwesiga Yahwe. N’obukiraaba ngu hali taharoho icumu lyona rundi engabu omu Isaleri, Yahwe akagambira Baraka kugenda kurwana na Sisera omukuru w’ihe ly’Abakanaani erikaba riine ebyokurwanisa bingi. (Bac. 5:8) Nabbi omukazi Debora akagambira Baraka kuruga omu nsozi agende ahaterekeriire kutangatangana Sisera hamu n’ebigaali bye 900. N’obukiraaba ngu Baraka akaba akimanyire ngu ebigaali binu byakubaire nibigenda kurungi, akoorobera oburagirizi bwa Yahwe. Abaserikale ba Baraka obubaali nibasirimuka Orusozi Tabora, Yahwe akanaga enjura ey’amaani. Ebigaali bya Sisera bikakwatira omu bisaabu kandi Yahwe yaha Baraka obusinguzi. (Bac. 4:1-7, 10, 13-16) Omu mulingo nugwo gumu, Yahwe naija kutukonyera kusingura obuturamwesiga kandi tukesiga oburagirizi obwarukutuha kuraba omu kitebe kye.​—Bir. 31:6.

19. Habwaki n’ogonza kwikara n’oyorobera Yahwe?

¹⁹ Obuturaaba tukyali omu nsi enu embi, tusemeriire kugumizaamu niturwana kwikara tuli besigwa hali Yahwe. (1 Tim. 6:11, 12; 2 Pet. 3:17) Leka tucweremu kimu kutatiina kuhiiganizibwa, twetantale emitego etanguhire kurorwa, amagezi g’abantu, ebisuba, n’ebintu ebisobora kutuhugura. (Bef. 4:14) Leka twikale tucweriiremu kimu kwikara nitwesiga Yahwe, kwikara nitumugonza kandi tworobere ebiragiro bye. Kandi tube bantu abarukuhindahinduramu. Omu kicweka ekirukuhonderaho, nitwija kubazaaho omulingo Yahwe na Yesu batuterireho ekyokurorraho ekirungi obukirukuhika ha kwoleka okwetegereza.