EKICWEKA KY’OKWEGA 30
Wenyongere Kukurakuraniza Okugonza
“Omu kugonzangana, [tukule] omu byona.”—BEF. 4:15.
EKIZINA 2 Ibara Lyawe Niryo Yahwe
EBITURAYEGA a
1. Mananu ki agawayegere obuwatandikire kwega Baibuli?
NOIJUKA akasumi obuwatandikire kwega Baibuli? Nikisobora kuba kyakuhuniriize kukimanya ngu Ruhanga aine ibara. Obundi okahurra ohuumwire kukimanya ngu Ruhanga tabonabonesa abantu omu murro. Kandi nikisobora kuba kyakusemiize kukimanya ngu olyongera orole abantu baawe abafiire, oikale nabo omu rugonjo orurungi hanu omu nsi.
2. Oihireho kwega amananu ag’omu Baibuli, kukurakurana ki okundi okuwakozere? (Abefeso 5:1, 2)
2 Obuwayeyongiire kwega Baibuli, okeyongera kugonza Yahwe. Okugonza oku kukakwekambisa kuteeka omu nkora ebyokaba n’oyega. Okakora encwamu enungi nosigikirra ha misingi ya Baibuli. Okahinduramu entekereza yaawe, waleka engeso embi habwokuba okaba n’ogonza kusemeza Ruhanga. Okatandika kwegera hali Yahwe nk’omwana omuto okwayegera ha muzaire ow’okugonza.—Soma Abefeso 5:1, 2.
3. Bikaguzo ki ebitusobora kwekaguza?
3 Nitusobora kwekaguza tuti: ‘Okugonza okunyiniire Yahwe kweyongiire kukira obunkaba nkyabatiziibwe? Nyeyongiire kwegera hali Yahwe omu kwoleka ab’oruganda na banyaanya itwe okugonza?’ “Okugonza kwawe okwokubanza” obukuraaba kukeehere, otahwamu amaani. N’Abakristaayo ab’okubanza bakahikwaho ekintu nikyo kimu. Baitu Yesu atabange kandi naitwe tarukwija kutwanga. (Kus. 2:4, 7) Akimanyire ngu nitusobora kwongera kutunga okugonza okutwali twine obutwayegere amananu.
4. Omu kicweka kinu nitwija kubazaaho ki?
4 Omu kicweka kinu nitwija kubazaaho omulingo tusobora kweyongera kugonza Yahwe n’abandi. Kandi hanyuma nitwija kubazaaho emu ha migisa eitutunga obutweyongera kugonza Yahwe n’abantu abandi.
WEYONGERE KUGONZA YAHWE
5-6. Mitalibaine ki omukwenda Paulo yatungire omu buheereza bwe kandi kiki ekyamwekambisize kugumizaamu n’aheereza Yahwe?
5 N’obukiraaba ngu omukwenda Paulo akatunga ebizibu bingi, akegondeza omu kuheereza Yahwe. Paulo yakiraga kugenda engendo eziraihire n’obukiraaba ngu eby’endubata bikaba bitanguhire kasumi ako. Omu ngendo ezo, obwire obumu Paulo yayesangaga “omu kabi kebyambu” n’omu “kabi kabazinzi.” Kandi obwire obumu abarukumuhakaniza baamuteraga. (2 Kol. 11:23-27) N’ab’oruganda abamu tibaasiimaga amaani yateekamuga kubakonyera.—2 Kol. 10:10; Baf. 4:15.
6 Kiki ekyakonyiire Paulo kugumizaamu n’aheereza Yahwe? Akeega bingi hali Yahwe kuruga omu Byahandiikirwe n’omu bintu ebiyarabiremu. Akaba nakigumya ngu Yahwe Ruhanga namugonza. (Bar. 8:38, 39; Bef. 2:4, 5) Kandi akeyongera kugonza muno Yahwe. Paulo akooleka ngu akaba n’agonza Yahwe ‘obuyaheriize abarukwera’ kandi yagumizaamu naheereza.—Baheb. 6:10.
7. Gumu ha mulingo tusobora kweyongera kugonza Yahwe nugwo guha?
7 Nitusobora kweyongera kugonza Ruhanga kuraba omu kwesomesa Ekigambo kye. Obworaaba n’osoma Baibuli, lengaho kwetegereza eby’orukusoma ekibirukukwegesa hali Yahwe. Wekaguze, Ebindukusoma nibyoleka bita ngu Yahwe nangonza? Nibinyekambisa bita kugonza Yahwe?’
8. Okusaba kutukonyera kuta kweyongera kugonza Yahwe?
8 Omulingo ogundi ogutukonyera kweyongera kugonza Yahwe, nukwo kumusaba buli kiro kuruga ha mutima. (Zab. 25:4, 5) Kandi naija kugarukamu esaara zaitu. (1 Yoh. 3:21, 22) Munyaanya itwe Khanh, kuruga Asia, n’agamba ati: “Ha kubanza ebintu ebinayegere hali Yahwe nibyo byandetiire kumugonza, baitu nyeyongiire kumugonza habw’okurora omulingo agarukamu esaara zange. Kinu kinyekambisa kugonza kukora ebintu ebirukumusemeza.” b
WEYONGERE KUGONZA ABANDI
9. Timoseo akooleka ata ngu nakurakurana omu kwoleka abandi okugonza?
9 Hanyuma y’emyaka nke Paulo amazire kufooka Omukristaayo, akatangatangana omusigazi arukwetwa Timoseo. Timoseo yagonzaga Yahwe n’abantu abandi. Paulo akagambira Abafiripi ati: “Tinyina ondi nomu anyina omutima okuingana [n’ogwa Timoseo], alitaho omutima ebigambo byanyu.” (Baf. 2:20) Paulo atabazeeho Timoseo nk’omuntu ow’amanyire kuha embazo enungi rundi kutekaniza kurungi ebintu, baitu akakwatwaho muno okugonza Timoseo okuyayolekaga Abakristaayo bagenzi be. Hataroho kugurukyagurukya, Abakristaayo ab’omu bitebe Timoseo ebiyabungiraga baikaraga bamulindiriire n’ekihika.—1 Kol. 4:17.
10. Anna na musaija we bakooleka bata ab’oruganda na banyaanya itwe okugonza?
10 Naitwe tuserra emiringo ey’okukonyeramu ab’oruganda n’abanyaanya itwe. (Baheb. 13:16) Tekerezaaho ekyokurorraho kya Anna, outwabalizeeho omu kicweka ekihoire. Hanyuma y’ihunga kuteera, uwe na iba bakabungira eka ey’Abakaiso ba Yahwe kandi bakyetegereza ngu orusu rw’enju yabo rusiisirwe ihunga kandi engoye zaabo zoona zaali ziiragwire. Anna n’agamba ati: “Tukatwara engoye zaabo, twazogya, twazigorra kandi twazibaleetera zikubire kurungi. Ekitwakozere kitatuzokere kuba ky’amaani, baitu kikarugamu obunywani bw’amaani hagati yaitu n’eka enu kuhikya na hati.” Okugonza okubaali bainiire ab’oruganda n’abanyaanya itwe kukabekambisa kubakonyera.—1 Yoh. 3:17, 18.
11. (a) Kwoleka abandi okugonza nikisobora kubaleetera kwehurra bata? (b) Kusigikirra ha Enfumo 19:17, Yahwe arora ata ebikorwa byaitu eby’okugonza?
11 Obutwoleka abandi okugonza nibasobora kukirora ngu nituhondera ekyokurorraho kya Yahwe. Kandi nibasobora kusiima habw’ebitubakoliire kukira nk’oku turukutekereza. Khanh outubalizeehoga, aikara naijuka abo boona abaamukonyiire. N’agamba ati: “Ninsiima muno banyaanya itwe abantwaraga omu buheereza obunkaba nkyali muto. Baijaga muka nibantabarra, nibangurra ebyokulya kandi hanyuma bongera nibantahya muka. Eki baakikoraga habw’okugonza.” Ky’amananu ngu abantu abamu nibasobora kutatusiima obutubakorra ebirungi. Khanh akabazaaho ati abo abaamukonyiire: “Nakugondeze kubasiima habw’okugonza kubaanyolekere, baitu timmanyire nambere barukwikara. Baitu Yahwe amanyireyo kandi nyikara nimusaba abampere emigisa.” Khanh ahikire. Yahwe arora n’ebikorwa ebitaito eby’embabazi ebitukorra abandi. Abirora nk’ekihongwa eky’omuhendo kandi nk’ibanja eryarukwija kusasura.—Soma Enfumo 19:17.
Omuntu obwakurakurana omu by’omwoyo, aserra emiringo ey’okukonyeramu abandi (Rora akacweka 12)
12. Ab’oruganda nibasobora kwoleka bata okugonza okubainiire ekitebe? (Rora ebisisani.)
12 Obworaaba oli w’oruganda n’osobora ota kwoleka abandi okugonza kandi okehayo kubakonyera? Ow’oruganda omuto arukwetwa Jordan akakaguza omugurusi w’ekitebe omulingo asobora kukonyera omu kitebe. Omugurusi akamusiima habw’okukurakurana okw’akaba ahikireho kandi yamwoleka omulingo asobora kweyongera kukurakurana. Ekyokurorraho, akagambira Jordan kuhikaga kara ha Kyombeko ky’Obukama nukwo aramukye abandi, kugarukamu omu nsorrokano, kutebeza butoosa na guruupu ye ey’obuheereza n’okuserra emiringo asobora kukonyera abandi. Jordan obuyataire omu nkora amagezi ganu, akeega emiringo emihyaka ey’okukoramu ebintu kandi yayeyongera kwoleka ab’oruganda na banyaanya itwe okugonza. Akakyetegereza ngu ow’oruganda obw’afooka omuheereza omu kitebe tunubwo atandika kukonyera abandi baitu agumizaamu n’abakonyera.—1 Tim. 3:8-10, 13.
13. Okugonza kukekambisa kuta ow’oruganda Christian kwongera kuheereza nk’omugurusi?
13 Obworaaba waheerizeho nk’omuheereza rundi omugurusi omu kitebe, Yahwe naijuka emirimo yoona eiwakozere n’omulingo okugonza kwakwekambisize kugikora. (1 Kol. 15:58) Narora n’omulingo oliyo n’ogumizaamu kwoleka abandi okugonza. Ow’oruganda arukwetwa Christian akasaalirwa muno obuyaihirweho obugurusi. Baitu n’agamba ati: “Nkacwamu kuheereza Yahwe nk’okundukusobora, nkambe nyine obujunaanizibwa rundi ntabwine.” Hanyuma y’akasumi akongera yakomwa kuheereza nk’omugurusi. N’agamba ati: “Nkeraliikirramu kake, baitu nkacwamu ngu Yahwe obwaraaba anyolekere embabazi yanyikiriza kwongera kuheereza nk’omugurusi, ninyija kukikora habwokuba nimugonza kandi ningonza ab’oruganda na banyaanya itwe.”
14. Kiki ekyorukwega omu bigambo bya munyaanya itwe kuruga Georgia?
14 Abaheereza ba Yahwe booleka bataahi baabo okugonza. (Mat. 22:37-39) Munyaanya itwe Elena, kuruga omu ihanga lya Georgia, n’agamba ati: “Ha kubanza ekintu kyonka ekyanyekambisaaga kutebeza nukwo kugonza Yahwe. Baitu obunayeyongiire kugonza Ise nyowe ow’omu iguru, nkeyongera n’okugonza abantu. Nkalengaho kutekerezaho ebizibu ebibarukurabamu n’ebintu ebinsobora kubazaaho bikabahika ha mutima. Obunayeyongiire kubatekerezaaho omu mulingo gunu, nukwo nayeyongiire kugonza kubakonyera.”—Bar. 10:13-15.
EBIRUNGI EBIRUGA OMU KWOLEKA ABANDI OKUGONZA
Ekikorwa kimu eky’okugonza nikisobora kuleetera abandi baingi kutunga ebirungi (Rora akacweka 15-16)
15-16. Nk’oku kyolekerwe omu bisisani, birungi ki ebiruga omu kwoleka abandi okugonza?
15 Obutwoleka ab’oruganda na banyaanya itwe okugonza, tali nubo bonka abagasirwa. Hanyuma y’oburwaire bwa Korona kucwekaho, ow’oruganda arukwetwa Paolo na mukazi we bakakonyera banyaanya itwe abakuzire omu myaka kwega kutebeza nibakozesa ebyoma byabo ebyakalimagezi. Munyaanya itwe omu ow’akaba nagumirwa kukozesa ekyoma kye akahika yayega kukikozesa. Akasobora kukikozesa kuraaliza abanyabuzaale kwija ha Kiijukyo. Nkaaga halibo bakasobora kubaho kuraba ha vidiyo. Munyaanya itwe n’abanyabuzaale be bakagasirwa habw’amaani Paolo na mukazi we baatairemu. Hanyuma munyaanya itwe akahandiikira Paolo ati: “Webale muno kwegesa itwe abakaikuru. Tindyebwa omulingo Yahwe atufaaho n’amaani agawatairemu.”
16 Kinu kikeegesa Paolo isomo erikuru. Kwoleka okugonza nikikira obukugu obutwine rundi ebisembo ebitwazairwe nabyo. N’agamba ati: “Naheerezaga nk’omuroleerezi w’ekicweka. Baitu hati nkyetegeriize ngu abatebezi nibasobora kuba baayeberwe embazo ezinahaga baitu nibakyaijuka ebintu ebinakozere kubakonyera.”
17. Nibaha abandi abaragasirwa obutwoleka okugonza?
17 Obutwoleka abandi okugonza naitwe tugasirwa omu miringo tubaire tutarukunihira. Jonathan, kuruga New Zealand, kinu akakyerorra. Kyamukaaga kimu akarora payoniya ali wenka natebeza ha rubaju rw’oruguudo omu musana ogw’amaani. Jonathan akacwamu kutebezaaga na payoniya onu buli Kyamukaaga nyamusana. Kasumi ako akaba atarukunihira ngu ekikorwa eki eky’embabazi nikisobora kurugamu ebirungi. N’agamba ati: “Kasumi ako, tinayegondezaaga omu buheereza, baitu obunahuliirizaaga omulingo payoniya onu yayegesaaga n’ebirungi ebiyatungaga omu buheereza, nkatandika kugonza omulimo gunu. Ekindi, nkatunga omunywani omurungi ayankonyiire kukura omu by’omwoyo, kwegondeza omu buheereza, n’okwirra haihi na Yahwe.”
18. Yahwe nagonza tukole ki?
18 Yahwe nagonza tweyongere kumugonza n’okugonza abandi. Nk’oku twegere, nitusobora kweyongera kumugonza kakuba twesomesa Ekigambo kye, twecumiitirizeeho ebitusomere kandi tubaze nauwe buli kiro kuraba omu kusaba. Nitusobora kweyongera kugonza ab’oruganda na banyaanya itwe kuraba omu kubakonyera. Obuturayeyongera kukurakuraniza okugonza, nitwija kweyongera kwirra haihi na Yahwe hamu n’ab’oruganda na banyaanya itwe. Kandi nitwija kwegondeza omu bunywani obu ebiro n’ebiro!
EKIZINA 109 Tugonzangane Kuruga ha Mutima
a Katube tuli bahyaka omu mananu rundi tumazire emyaka nyingi nituheereza Yahwe, itwena tusemeriire kugumizaamu nitukurakurana. Omu kicweka kinu nitwija kubazaaho omulingo tusobora kweyongera kukurakurana omu kugonza Yahwe n’abandi. Obworaaba n’oyecumiitirizaaho ebiturayega, tekerezaaho omulingo okurakuraine n’omulingo osobora kweyongera kukurakurana.
b Amabara agamu gahindwirwe.