1. Mulingo ki Abakristaayo basemeriire kuba nk’omuti? (Rora ekisisani.)

 “OMUTI ogurukusobora kwegema tigusobora kunagwa omuyaga.” Orufumu runu nirwoleka ngu emiti enyakwegema omuyaga obuguteera ehangara. Kusobora kwikara nituheereza Yahwe n’okusemererwa enyikara obw’ehinduka, tusemeriire kuba bantu abarukwegema, ekirukumanyisa kuhindahinduramu. Omu mulingo ki? Tusemeriire kwoleka okwetegereza kuraba omu kuhinduramu enyikara obuzihinduka, kandi tuteekemu ekitiinisa entekereza n’encwamu ez’abantu abandi.

2. Miringo ki ey’eratukonyera kuhinduramu kakuba enyikara zihinduka kandi kiki ekiturayega omu kicweka kinu?

² Nk’abaheereza ba Yahwe, nitugonza kuba bantu abarukwetegereza. Ekindi, nitugonza kuba bantu abebundaazi kandi ab’embabazi. Omu kicweka kinu nitwija kurora omulingo emiringo enu yakonyiire Abakristaayo abamu kwikara nibaheereza Yahwe enyikara yabo obuyahindukire. Ekindi, nitwija kurora omulingo naitwe esobora kutukonyera. Baitu leka tubanze turole omulingo Yahwe na Yesu batuterireho ekyokurorraho ekyokwoleka okwetegereza.

3. Nitukigumya tuta ngu Yahwe ayetegereza?

³ Yahwe ayetwa “Mwandara” habwokuba tahinduka. (Bir. 32:4) Baitu ayoleka okwetegereza. Enyikara omu nsi obw’ehinduka, Ruhanga waitu nauwe ahinduramu nukwo asobole kuhikiiriza ekigendererwa kye. Yahwe akahanga abantu omu kisisani kye kandi yabaha obusobozi obw’okuhindahinduramu. Akatuha emisingi ya Baibuli ey’etukonyera kukora encwamu ez’amagezi  n’obutuba omu nyikara ya mulingo ki. Ekyokurorraho kya Yahwe n’emisingi ey’atuhaire bwakaiso oburukwoleka ngu n’obwaraaba ali “Mwandara” ali muntu arukwetegereza.

4. Bazaaho ekyokurorraho ekirukwoleka ngu Yahwe n’ayetegereza. (Ebyabalevi 5:7, 11)

⁴ Emihanda ya Yahwe ehikiriire kandi y’okwetegereza. Obwaba n’akoragana n’abantu, talemera ha nsonga. Tekerezaaho omulingo Yahwe yayolekere ngu n’ayetegereza enyikara y’Abaisaleri. Akaba atarukunihirramu abaguuda n’abanaku boona kuhayo ebihongwa ebirukusisana. Obwire obumu yaikirizaaga omuntu kuhayo ebihongwa ebyarukusobora kusigikirra ha nyikara ye.​—Soma Ebyabalevi 5:7, 11.

5. Bazaaho ekyokurorraho ekirukwoleka ngu Yahwe mwebundaazi kandi w’embabazi.

⁵ Obwebundaazi n’embabazi za Yahwe bimuleetera kwoleka okwetegereza. Ekyokurorraho, Yahwe akooleka obwebundaazi obwakaba nagenda kuhwerekereza abantu ababi aba Sodomu. Yahwe akakozesa bamalaika be kugambira Loti kwirukira omu kicweka ky’ensozi. Baitu Loti akatiinayo. Nahabweki akasaba bamalaika bamwikirize n’eka ye bairukire Zoara, orubuga orutaito narwo orukaba ruli rw’okuhwerekerezebwa. Yahwe yakulemiireho ngu Loti ayorobere oburagirizi obwakaba amuhaire baitu akamwikiriza kwirukira Zoara kandi tiyagihwerekereza. Hanyuma y’emyaka nyingi kurabaho, Yahwe akooleka abantu ba Nineve embabazi. (Kub. 19:18-22) Akasindika nabbi Yona kugambira abantu ababi aba Nineve ngu akaba naija kubahwerekereza n’orubuga rwabo. Baitu obubayegarukiremu, Yahwe akabakwatirwa embabazi kandi tiyahwerekereza orubuga.​—Yon. 3:1, 10; 4:10, 11.

6. Bazaaho omulingo Yesu yayegiire ha kyokurorraho kya Yahwe eky’okwetegereza.

⁶ Yesu akegera ha kyokurorraho kya Yahwe eky’okwetegereza. Akasindikwa omu nsi kutebeza “entama ezabuzire ezomu nju ya Isareri.” Baitu omu buheereza bwe akooleka okwetegereza. Ekyokurorraho, omukazi ow’akaba atali Omunyaisaleri akamwesengereza kukiza muhara we ow’akaba “akwasirwe muno [daimoni].” Yesu akamwoleka embabazi yakiza muhara we. (Mat. 15:21-28) Tekerezaaho ekyokurorraho ekindi. Yesu obw’akaba akyatandikire obuheereza bwe, akagamba ati: “Wena alinyehakana . . . , ndimwehakana.” (Mat. 10:33) Baitu akehakana Petero ayamwehakaine emirundi esatu? Nangwa. Yesu akakimanya ngu Petero ayegarukiremu kandi ngu mwesigwa. Hanyuma ya Yesu kuhumbuuka, akabonekera Petero kandi aine kuba yamugumize ngu amuganyiire kandi namugonza.​—Luk. 24:33, 34.

7. Kusigikirra ha Abafiripi 4:5, nitugonza tumanywe nk’abantu aba mulingo ki?

⁷ Turozere ngu Yahwe na Yesu booleka okwetegereza. Naitwe, Yahwe natunihirramu kuba bantu abarukwoleka okwetegereza. (Soma Abafiripi 4:5.) b Empindura emu eya Baibuli  ehindura orukarra runu eti: “Mumanywe nk’abantu abooleka okwetegereza.” Nitusobora kwekaguza tuti: ‘Abantu bammanyire nk’omuntu ow’ayoleka okwetegereza, owatalemeraho, kandi owahindahinduramu? Rundi bammanyire nk’omuntu owalemeraho, kandi omukaali? Mpambiriza abantu kukora ebintu omu mulingo ogundukutekereza ngu nugwo guhikire? Mpuliiriza abantu abandi kandi mpinduramu nambere kirukwetaagisa?’ Obutweyongera kwoleka okwetegereza, tweyongera kwegera hali Yahwe na Yesu. Leka tubazeeho enyikara ez’emiringo ebiri nambere kitwetaagisa kwoleka okwetegereza. Enyikara yaitu obw’ehinduka, kandi abandi obubaba n’entekereza rundi obubakora encwamu ezirukwahukana n’ezaitu.

8. Kiki ekisobora kutukonyera kwoleka okwetegereza enyikara yaitu obw’ehinduka? (Rora obugambo obwa hansi.)

⁸ Kwoleka okwetegereza nikitwarramu kuhinduramu enyikara yaitu obw’ehinduka. Empindahinduka nizisobora kutuleetera emitalibaine tubaire tutarukunihira. Ekyokurorraho, ahonaaho nitusobora kutunga oburwaire obw’amaani. Rundi enyikara ey’eby’obulemi nambere turukwikara n’esobora kutalibaniza obwomeezi bwaitu. (Mug. 9:11; 1 Kol. 7:31) Nikisobora n’okutugumira kakuba habaho empindahinduka omu buheereza bwaitu. N’obutwakwesanga omu nyikara ya mulingo ki, nitusobora kugigumira kakuba tukora ebintu binu bbina: (1) ikiriza enyikara nk’oku eri, (2) teeka omutima ha ky’osobora kukora hati, (3) teeka omutima ha birungi, kandi (4) okonyere abandi. c Leka turole omulingo bamu h’ab’oruganda na banyaanya itwe bagasiirwe habw’okukora ebintu binu.

9. Abamiisani bakagumira bata ekirengo ekibaali batarukunihira?

⁹ Ikiriza enyikara nk’oku eri. Emanuele na Francesca bakasindikwa kuheereza nk’abamiisani omu ihanga erindi. Obubaali bakyatandikire kwega orulimi n’okumanyiira ekitebe ekihyaka, oburwaire bwa Korona bukatandika kandi baali baine kwikara omu ka. Hanyuma, Francesca akafeerwa nyina. Akaba n’agonza kuba n’ab’omu ka y’owabu baitu akaba atarukusobora kugenda. Kiki ekyamukonyiire kugumira enyikara enu? Uwe na iba bakasaba Yahwe amagezi agarabakonyera kuteralikirra ha bya nyenkya. Yahwe akagarukamu esaara zaabo kuraba omu kubaha ebyokulya eby’omwoyo omu kasumi akahikire nakozesa ekitebe kye. Ekyokurorraho, bakagarurwamu amaani vidiyo eyekaba erumu ow’oruganda ayagambire ati: “Obutwanguha kwikiriza enyikara yaitu empyaka, twanguha kwongera kutunga okusemererwa kwaitu kandi tutunga n’omugisa ogw’okukozesa kurungi enyikara empyaka eziturumu.” d Ekyakabiri, bakacwamu kwongera amaani omu kutebeza nibakozesa esimu kandi bakatunga omwegi wa Baibuli. Ekyakasatu, bakaikiriza kandi baasiima obukonyezi obw’ab’oruganda na banyaanya itwe ab’omu kiikaro eki. Munyaanya itwe omu, buli kiro yabasindikiraga obutumwa oburumu ekyahandiikirwe kumara omwaka. Naitwe obuturayanguha kwikiriza enyikara eiturumu, nitwija kutunga okusemererwa habw’ebitusobora kukora.

10. Munyaanya itwe Christina akahinduramu ata obuyahikirweho empindahinduka ey’amaani?

¹⁰ Teeka omutima ha ky’osobora kukora hati,  n’ebirungi ebirarugamu. Munyaanya itwe Christina, ow’arukuruga Romania baitu ow’arukwikara Japan, akasaasa muno ekitebe eky’Orungereeza ekyakaba arumu obukyaihirweho. Baitu atateeke omutima ha by’enyuma. Oihireho, akakora ekyarukusobora kusagika ekitebe eky’orulimi Orujapani kandi yaikara nayekamba omu buheereza. Akasaba omukazi ow’akaba nakora nauwe kumukonyera kumwegesa Orujapani. Omukazi onu akaikiriza kukozesa Baibuli n’ekitabu Wegondeze omu Bwomeezi Ebiro n’Ebiro! kumwegesa. Hanyuma Christina akeega kubaza kurungi Orujapani baitu ekirukukirayo obukuru omukazi onu akagonza kwega ebirukukwata ha Baibuli. Obututeeka omutima ha kitusobora kukora n’ebirungi ebirarugamu, empindahinduka nizisobora kurugamu ebirungi ebitubaire tutarukunihira.

11. Kiki ekyakonyiire ow’oruganda na mukazi we abaatungire ebizibu omu bya sente kugumiisiriza?

¹¹ Konyera abandi. Ow’oruganda na mukazi we abarukwikara omu ihanga nambere omulimo gwaitu gutangirwe bakatandika kutunga ebizibu omu bya sente ihanga obulyatungire ebizibu omu byentahya. Mpindahinduka ki ezibaakozere? Ey’okubanza, bakorobyamu obwomeezi bwabo. Ekindi, omu kiikaro ky’okuteeka omutima ha bizibu byabo bakaguteeka ha kukonyera abandi n’okwekamba omu kutebeza. (Eng. 20:35) Iba akagamba ati: “Kwekamba omu kutebeza kikatukonyera kutatunga obwire obw’okutekerezaho ebizibu byaitu habw’okuba omutima tukaba tugutaire ha kukora Ruhanga ebyagonza.” Enyikara yaitu obwehinduka, tusemeriire kwijuka ngu kikuru kwikara nitukonyera abandi kukira muno kuraba omu kutebeza.

12. Ekyokurorraho ky’omukwenda Paulo nikitukonyera kita kuhindahinduramu obuturukuba nitutebeza?

¹² Omu buheereza bwaitu tusemeriire kuhindahinduramu. Tutangatangana abantu abaine enyikiriza ezitarukusisana kandi abarukuruga omu biikaro ebirukwahukana. Omukwenda Paulo yahindahinduramuga kandi nitusobora kumwegeraho. Yesu akakoma Paulo kuba “omukwenda hali abamahanga.” (Bar. 11:13) Paulo akatebeza Abayudaaya, Abayonaani, abasomere muno, abatasomere, abalemi hamu n’abakama. Kusobora kuhika ha mitima y’abantu banu abarukwahukana, “hali bona” akafooka “byona.” (1 Kol. 9:19-23) Yatekerezaahoga muno enyetwaza, enyikiriza hamu n’endugirro y’abantu abayatebezaaga kandi nahinduramu nambere kirukwetaagisa. Naitwe nitusobora kweyongera kuhika ha mitima y’abantu turukutebeza kakuba tutekerezaaho muno enyikara yabo kandi tukahinduramu kusigikirra ha byetaago byabo.

13. Kusigikirra ha 1 Abakolinso 8:9 kiki ekitusemeriire kwetantara?

¹³ Kuba bantu abarukwetegereza kitukonyera kuteekamu ekitiinisa encwamu n’entekereza z’abandi. Ekyokurorraho, banyaanya itwe abamu bagonza kwekoraho muno baitu abandi tibakigonza. Abakristaayo abamu tibaine kizibu n’okunywa amaarwa omu mulingo ogusemeriire, baitu abandi tibaganywera kimu. Ekindi, Abakristaayo boona bagonza kuba n’obwomeezi oburungi baitu bakomamu obujanjabi oburukwahukana. Kakuba twehurra ngu encwamu zaitu nizo zirukukira oburungi ez’abandi kandi tukatandika kuzikurakuraniza omu kitebe, nitusobora kutabaijura abandi kandi kireteho kwebaganizaamu. Mali titwakugondeze kinu kubaho! (Soma 1 Abakolinso 8:9; 10:23, 24) Leka tubazeeho ebyokurorraho bibiri ebirukwoleka omulingo kuteeka omu nkora emisingi ya Baibuli kisobora kutukonyera  kwetantara kwebembeza entekereza zaitu kandi tukalinda obusinge.

14. Misingi ki eitusemeriire kuhondera obukirukuhika ha kujwara n’okwekoraho?

¹⁴ Okujwara n’okwekoraho. Omu kiikaro ky’okututeraho ebiragiro ebirukwoleka omulingo tusemeriire kujwara, Yahwe atuteriireho emisingi eitusemeriire kuhondera. Tusemeriire kujwara omu mulingo ogurukuhaisa Ruhanga ekitiinisa, ogurukwoleka okwetegereza, obuculeezi, n’okwerinda. (1 Tim. 2:9, 10; 1 Pet. 3:3) Nahabweki titusemeriire kujwara omu mulingo oguraleetera abandi kututeekaho omutima. Ekindi, emisingi ya Baibuli n’esobora kukonyera abagurusi kwetantara kweteraho ebiragiro ebyabo habwabo ebirukukwata ha kujwara n’okwekoraho. Ekyokurorraho, abagurusi omu kitebe kimu baali nibagonza kukonyera ab’oruganda abasigazi abaasaraga isoke nibasigaho like baitu batarukuliteera. Abagurusi baakukonyiire bata abasigazi banu batataireho ebiragiro ebyabo habwabo? Omuroleerezi w’ekicweka akaha abagurusi amagezi kugambira abasigazi banu ngu obwoba n’oheereza ekicweka baitu abantu bakateeka omutima ha mulingo orukuzookamu hatali eby’orukubaza, enjwara yaawe n’eba ine ekizibu. Abagurusi obubaakozeseze ebigambo binu ekizibu kikahwaho hatatairweho ekiragiro. e

15. Biragiro ki n’emisingi kuruga omu Baibuli ebisemeriire kutwebembera obutuba nitukora encwamu ez’eby’obujanjabi? (Abarumi 14:5)

¹⁵ Eby’obujanjabi. Buli Mukristaayo aine obugabe kucwamu ha mulingo ararolerramu obwomeezi bwe. (Bag. 6:5) Baitu haroho ebiragiro bike ebirukukwata ha bujanjabi Abakristaayo ebibasemeriire kuhondera. (Eng. 15:20; Bag. 5:19, 20) Ekyokurorraho, kwetantara esagama n’eby’oburaguzi. Baitu obukirukuhika  ha by’obujanjabi eby’emiringo endi, buli muntu aine obugabe obw’okwekorra encwamu, abamu bagonza emibazi ey’ekijungu baitu abamu bagonza obujanjabi obw’emiringo endi. N’obukiraaba ngu twine obujanjabi obuturukukirayo kugonza, tusemeriire kuteekamu ekitiinisa encwamu z’ab’oruganda na banyaanya itwe obukirukuhika ha bujanjabi. Nahabweki tusemeriire kwikara nitwijuka ensonga zinu: (1) Obukama bwa Ruhanga nubwo bwonka bulimarraho kimu endwaire zoona. (Is. 33:24) (2) Buli Mukristaayo asemeriire kwecweramu ekyarukurora ngu nikyo kirukukirayo oburungi. (Soma Abarumi 14:5.) (3) Titusemeriire kucwera abandi omusango rundi kubatabaijura. (Bar. 14:13) (4) Abakristaayo booleka okugonza obubebembeza obumu omu kitebe hatali obugabe bwabo obw’okwecweramu. (Bar. 14:15, 19, 20) Obuturaikara nitwijuka ebintu binu nitwija kwikara twine enkoragana enungi n’ab’oruganda na banyaanya itwe kandi kireteho obusinge omu kitebe.

16. Abagurusi nibasobora bata kwoleka okwetegereza obubaba nibakorra hamu n’abagurusi abandi? (Rora ekisisani.)

¹⁶ Abagurusi basemeriire kuteekaho ekyokurorraho obukirukuhika ha kwoleka okwetegereza. (1 Tim. 3:2, 3) Ekyokurorraho, omugurusi tasemeriire kunihira ngu obwire bwona abagurusi abandi nibaija kwikiriza entekereza ye ngu habwokuba nabakira omu myaka. Yahwe n’asobora kukozesa omwoyo gwe ogurukwera kuleetera omugurusi ondi wena h’akatebe kubaza ekintu ekirabakonyera kukora encwamu enungi. Kandi kakuba abagurusi abaingi basagika encwamu, kandi hataroho omusingi gwa Baibuli ogucwirwe, omugurusi ayoleka okwetegereza obwagisagika n’obukiraaba ngu tarukwikiranganiza nayo.

17. Obutwoleka okwetegereza, tutunga migisa ki?

¹⁷ Abakristaayo obubooleka okwetegereza harugamu ebirungi bingi. Twikara twine enkoragana enungi n’ab’oruganda na banyaanya itwe kandi n’ekitebe kibamu obusinge. Twegondeza omu kuheereza Yahwe omu bumu n’obukiraaba ngu nitwetwaza omu miringo erukwahukana kandi turuga omu biikaro ebirukwahukana. Ekirukukira obukuru, kitusemeza kukimanya ngu nitwegera hali Yahwe, Ruhanga ow’ayoleka okwetegereza.