Ise Rehoboamu arukwetwa Sulemani akamara emyaka 40 nalema Isareri. (1 Ekyabakama 11:42) Hanyuma ya ise kufa, Rehoboamu akaruga Yerusalemu yagenda Sekemu kufooka mukama. (2 Ekyebyomubusinge 10:1) Tugambe akaba atinire kufooka mukama arukwongeraho? Sulemani akaba amanyirwe habw’amagezi ge amaingi muno. Omu bwire obutali bwa hara, Rehoboamu nauwe akaba aine kwoleka obwaraaba aine amagezi g’okugonjoora ekizibu ekigumangaine.

Abaisareri bakahurra bamigiriiziibwe, nahabweki bakatuma abantu hali Rehoboamu kugenda kumugambira ekibakaba nibagonza abakorre: “Sso akafora ekikoligo kyaitu kyobujune: nukwo hati bunu iwe okehye okuhereza okwobujune okwa sso, nekikoligo ekirukulemera ekiyatutaireho, kandi turakorraga iwe.”​—2 Ekyebyomubusinge 10:3, 4.

Enu ekaba ncwamu egumire ei Rehoboamu akaba aine kukora. Kukora eky’abantu bamusabire kikaba nikimanyisa ngu uwe n’eka ye hamu n’abantu abaikaraga omu kikaali bakaba batarukugenda kutunga ebintu ebirungi ebibatungaga. Kandi ha rubaju orundi, kakuba yayangire okusaba kwabo, abantu bakaba nibagenda kwediima. Hati, Rehoboamu akakora ki? Akabanza kubazaaho n’abakuru abakaba bakonyire ise obusumi bwa kara. Bakamuha amagezi g’okuhuliiriza abantu. Baitu Rehoboamu hati akagenda yayehanuzaho na hali abato ab’emyaka ye kandi yacwamu kubonabonesa abantu. Akabagambira ati: “Nyowe ndyongeraho ekikoligo kyanyu: isenyowe yabateraga nenkoba, baitu nyowe ndibatera nomumya.”​—2 Ekyebyomubusinge 10:6-14.

Isomo ki eriturukwega omu kyokurorraho kinu? Biro binu twine ab’oruganda n’abanyaanya itwe abamazire emyaka nyingi muno nibaheereza Yahwe kandi abarukusobora kutukonyera kukora encwamu enungi. Leka tube bantu b’amagezi kandi tubahuliirize.​—Yobu 12:12.

Rehoboamu akacwamu kusorooza ihe lye kugenda kurwanisa enganda ezamujemiire. Baitu Yahwe akatuma nabbi Semaya kugenda kubagambira ati: “Mutaliramaga, kunu mutalirwanisa bene banyu: inywena mugaruke omuntu wena omu njuye; baitu ekigambo kinu  kireserwe nyowe.”​—1 Ekyabakama 12:21-24. *​—Rora obugambo obuli hansi.

Rehoboamu kikamwanguhira kuhondera oburagirizi bwa Yahwe? Abantu bakaba nibagenda kurora bata omukama wabo omuhyaka? Akaba abaraganiize ira ngu akaba nagenda kubafubira nakozesa “omumya,” baitu hati akaba atarukugenda kukoraho ekintu kyona ha bujemu bunu obw’amaani! (Lengesaniza 2 Ekyebyomubusinge 13:7.) Omukama onu omutima atagute ha mulingo abantu bakaba nibagenda kumuroramu baitu akahurra ekigambo kya Yahwe yagaruka omu ka nk’oku Yahwe akaba amuragiire.

Ekintu kinu nikitwegesa ki? Kintu ky’amagezi kworobera Ruhanga abantu n’obubakutusekereza habw’okuba bahulizi. Yahwe naija kutuha emigisa obuturaikara tuli bahulizi.​—Ekyebyomubusinge 28:2.

Haroho emigisa yona ei Rehoboamu yatungire habw’okuhuliiriza Yahwe? Rehoboamu akagumizamu nalema oruganda rwa Yuda na Benyamini, kandi akacwamu kwombeka embuga mpyaka. Kandi embuga ezindi ‘akazifora z’amaani maingi muno.’ (2 Ekyebyomubusinge 11:5-12) Ekirukukira obukuru, akorobera ebiragiro bya Yahwe kumara akasumi. Habw’abantu omu bukama obw’enganda ikumi kuramya ebisisani, baingi bakarugayo baija Yerusalemu kusagika Rehoboamu n’okusagika okuramya okw’amananu. (2 Ekyebyomubusinge 11:16, 17) Nahabweki obukama bwa Rehoboamu bukeyongera kuguma habwokuba akorobera Yahwe.

Obukama bwa Rehoboamu obubwayeyongire kuguma, omukama onu akakora ekintu ekirukuhuniriza. Akalekeraho kuhondera ebiragiro bya Yahwe kandi akatandika kuramya abaruhanga ab’ebisuba! Baitu habwaki yakozere ekintu kinu? Tugambe ngu nyina owakaba ali Mwamoni nuwe yamuletiire kucwamu ati? (1 Ekyabakama 14:21) Eki titukimanyire, baitu ihanga lyona likahondera ekyokurorraho kye ekibi. Nahabweki Yahwe akaikiriza Omukama Sisaki owa Misiri kutwara embuga nyingi eza Yuda. Kinu kikabaho n’obu kiraba ngu Rehoboamu akaba afoire embuga zinu ez’amaani!​—1 Ekyabakama 14:22-24; 2 Ekyebyomubusinge 12:1-4.

Enyikara ekeyongera kusisikara obu Sisaki n’amahege batahiriire Yerusalemu, nambere Rehoboamu yalemeraga. Omu kasumi ako, nabbi Semaya akaha Rehoboamu hamu n’abakuru abandi obutumwa bunu kuruga hali Ruhanga oburukugamba ngu: “Mukanfuruka, nikyo nyowe mbalekiire omu mukono gwa Sisaki.” Yeroboamu aketwaza ata hanyuma y’okutunga obuhabuzi bunu? Aketwaza omu mulingo omurungi muno! Baibuli n’egamba ngu: “Nubwo abakuru ba isareri n’omukama bayebundaza bona; nibagamba ngu [Yahwe] nuwe ahikiriire.’” Nahabweki, Yahwe akacungura Rehoboamu, kandi Yerusalemu etahwerekerezebwe.​—2 Ekyebyomubusinge 12:5-7, 12.

Hanyuma y’ebi, Rehoboamu akeyongera kulema obukama bwa Yuda. Obwaka atakafiire, akahereza abatabani be ebisembo bingi. Nikisobora kuba ngu akaba atarukugonza bajemere mugenzi wabo arukwetwa Abiya, ow’akaba nagenda kuba mukama arukwongeraho. (2 Ekyebyomubusinge 11:21-23) Ekikorwa eki kikoleka ngu Rehoboamu akakozesa amagezi kukira obusumi obwakaba akyali muto.

N’obukiraba ngu haroho ebintu birungi ebi Rehoboamu yakozere, Baibuli ebazaho eti obulemi bwe: “Akakora ekibi.” Habwaki? Habwokuba “atagumye omutimagwe okuse’ra [Yahwe].” Nahabweki Yahwe atamusiime.​—2 Ekyebyomubusinge 12:14.

Kiki ekitusobora kwegera ha bwomeezi bwa Rehoboamu? Haroho obu yayoroberaga Ruhanga. Kandi haroho n’ebintu ebirungi ebiyakoliire abantu ba Ruhanga. Baitu kakaba ataine enkoragana ey’amaani na Yahwe, kandi akaba ataine kihika ky’amaani eky’okusemeza Yahwe. Nahabweki, akaleka kukora ebintu ebihikire kandi yatandika kuramya abaruhanga abebisuba. Nosobora kuba n’oyekaguza: ‘Rehoboamu obu yaikiriize kuhondera obuhabuzi bwa Yahwe, tugambe ngu akakikora habwokuba akaba nayehurra kubi habw’ensobi ezakaba akozere, rundi tugambe ngu akaba nagonza kusemeza Ruhanga? Rundi yakikoraga habwokuba abandi bamugambiraga ngu nikyo kihikire kukora?’ (2 Ekyebyomubusinge 11:3, 4; 12:6) Omu bwire obundi akakora ebintu ebibi. Akaba nayahukana muno kuruga hali isenkuru Omukama Daudi! Ky’amananu Daudi nauwe akakora ensobi. Baitu yayegarukamuga kuruga ha mutima habw’ebibi yabaga akozere. Kandi akaba nagonza Yahwe n’okuramya okw’amananu obwomeezi bwe bwona.​—1 Ekyebyomubusinge 14:8; Zabuli 51:1, 17; 63:1.

 Nitusobora kwega amasomo maingi kuruga omu Byahandikirwe ebirukubazaho Rehoboamu. Kikuru kuhikyaho amaka gaitu ebyetago ebigarukwetaga kandi kikuru kukorra abantu bandi ebirungi. Baitu obuturaaba nitugonza Yahwe atusiime, tusemeriire kumuramya omu mulingo arukwetaga kandi enkoragana yaitu nauwe esemeriire kuba egumire.

Kurora twahika ha kigendererwa eki, tusemeriire kuba nitugonza muno Yahwe. Nk’oku twikara nitwongera enku omu murro nukwo gutazima, tusemeriire kwikara nitwesomesa Ekigambo kya Ruhanga, nitukyecumitirizaaho, kandi nitwekambira kusaba kurora okugonza kwaitu hali Yahwe tikwazima. (Zabuli 1:2; Abarumi 12:12) Kandi okugonza kwaitu hali Yahwe nukwo kuraikara nikutwekambisa kugonza kusemeza Yahwe omu buli kimu ekituraba nitukora. Nikwija n’okutwekambisa kusaba Yahwe kutuganyira obu turakora ensobi. Obu turakora tuti, titurukwija kusisana Rehoboamu baitu nitwija kwikara tuli besigwa hali okuramya okw’amananu.​—Yuda 20, 21.