1. Kintu ki ekirukutwahukaniza ha bisoro?

YAHWE akaha abantu ekintu eky’embaganiza. Ekintu kinu nuwe omuntu ow’omunda. Kinu nikyo kitwahukaniza ha bisoro. Nitumanya tuta ngu Adamu na Hawa bakaba baine omuntu ow’omunda? Hanyuma y’okujemera Ruhanga, bakamwesereka. Omuntu wabo ow’omunda akabajunana.

2. Habwaki nitusobora kulengesaniza omuntu waitu ow’omunda na siteriingi y’elyato? (Rora ekisisani ekiri ha rupapura 15.)

² Omuntu waitu ow’omunda niyo enyehurra ey’etuletera kumanya ekibi n’ekirungi kandi etuhabura omu bwomeezi bwaitu. Omuntu anyakwine omuntu w’omunda atatendekerwe kurungi nitusosobora kumulengesaniza n’elyato eriine siteriingi enyakucwekere. Kugendera omu lyato elya mulingo gunu nikisobora kuba ky’akabi. Kakuba omuyaga n’ebigonzi bitera, elyato nibisobora kuhaba. Baitu siteriingi erukukora kurungi nesobora kukonyera arukuvuga elyato kulitwara nambere lisemeriire kugenda. Omuntu waitu ow’omunda nauwe nitusobora kumulengesaniza na siteriingi. Omuntu w’omunda eri nyehurra eituba nayo omu nda eyetugambira ekintu obukiraaba kihikire rundi kigwire kandi  eyesobora kuturagirra omuhanda oguhikire ogw’okukwata. Baitu omuntu waitu w’omunda kusobora kutwebembera omu mulingo oguhikire, asemeriire kuba atendekerwe kurungi.

3. Kiki ekisobora kubaho kakuba tutatendeka kurungi omuntu waitu ow’omunda?

³ Omuntu waitu ow’omunda obwarukuba atatendekerwe kurungi, tarukwija kututanga kukora ekibi. (1 Timoseo 4:1, 2) Nasobora n’okutuletera kweta “ekibi ekirungi.” (Isaya 5:20) Yesu akagambira abegeswa be ngu: “Akasumi nikaija, anyakubaita wena alitekereza [ngu] naheereza Ruhanga.” (Yohana 16:2) Eki nikyo abaisire omwegeswa Sitefano batekeriize. (Engeso Ezabakwenda 6:8, 12; 7:54-60) Ebyafaayo nibyoleka ngu abanyadiini baingi bakozere ebikorwa ebibi muno nk’obwisi nibagamba ngu nibabikorra Ruhanga. Baitu amananu gali, ebintu ebibakora biba nibicwa ebiragiro bya Ruhanga. (Okuruga 20:13) Eki nikyoleka ngu omuntu wabo ow’omunda tabahabwire omu mulingo oguhikire!

4. Kiki ekitusobora kukora kurora ngu omuntu waitu ow’omunda yakora kurungi?

⁴ Hati nitusobora kukora ki kurora ngu omuntu waitu ow’omunda yakora kurungi? Ebiragiro n’emisingi enyakuli omu Baibuli “nibigasa obwokwegesa, nobwokuhana, nobwokusoborra, nobwokugambirra okuli omu kuhikirra.” (2 Timoseo 3:16) Tusemeriire kwesomesa Baibuli buli kiro, twecumitirizeho muno ebitusomere, kandi tubite omu nkora omu bwomeezi bwaitu. Omu mulingo gunu, nitwija kutandika kuba n’entekereza nk’eya Yahwe. Obu nubwo turakigumya ngu omuntu waitu ow’omuntu natuhabura kurungi. Leka tubazeeho omulingo tusobora kukozesa ebiragiro hamu n’emisingi ya Yahwe kutendeka omuntu waitu ow’omunda.

5, 6. Ebiragiro bya Ruhanga bitukonyera bita?

⁵ Obuturaaba nitugonza ebiragiro bya Ruhanga kutukonyera, titusemeriire kugarukira ha kubisoma rundi kubimanya kwonka. Tusemeriire kubigonza kandi tubitemu ekitinisa. Baibuli n’etugmbira ngu: “Munobe ebibi, mugonze ebirungi.” (Amosi 5:15) Baitu nitusobora kukikora tuta? Tusemeriire kurora ebintu omu mulingo Yahwe abirora. Katukirengesanize tuti. Teramu akasisani ngu torukubyama kurungi, kandi dakitali akugambire ngu oine kulya eby’okulya ebiine ekiriisa, okole ebisasaizi, kandi ohindule ha mulingo orukutwazaamu obwomeezi bwawe. Ohondera obuhabuzi akuhaire kandi bukukonyera! Obuhabuzi bwa dakitaali nosobora kuborora ota?

⁶ Omu mulingo nugwo gumu, Omuhangi waitu atuhaire ebiragiro kutulinda tutahikwaho ebizibu ebiruga omu kukora ekibi nukwo tweyengere kuba n’obwomeezi oburungi. Ekyokurorraho, Baibuli etwegesa ngu titusemeriire kubaza ebisuba, kwiba, kusihana, kurwana, rundi kuba nakakwate n’eby’oburaguzi. (Soma Enfumo 6:16-19; Okusuku’rwa 21:8) Obututunga ebirungi ebiruga omu kworobera Yahwe, tweyongera kumugonza n’okugonza ebiragiro bye.

7. Ebyokurorraho by’omu Baibuli nibitukonyera bita?  

⁷ Titusemeriire kubanza kuhikwaho ebizibu ebiruga omu kucwa ebiragiro bya Ruhanga nukwo twege ekirungi n’ekibi. Nitusobora kwegera ha nsobi ez’abandi bakozere omu busumi bwa kara. Ebyokurorraho binu bihandikirwe omu Baibuli. Enfumo 1:5 nirugamba ngu: “Owamagezi ahurre, ayeyongere okwega.” Okwegesebwa kunu kuruga hali Ruhanga  kandi nukwo okurukukirayo. Ekyokurorraho, tekerezaho omulingo Daudi yabonaboine obu yajemiire Yahwe kandi yasihana na Basiseba. (2 Samuiri 12:7-14) Obworasomaga ha bintu binu, oyekaguzege: ‘Daudi yakwetantaire ata ebizibu binu? Nyowe nakukozere ki omu nyikara nk’egi? Kakuba ntunga ekyohyo ky’okusihana, ninsobora kwetwaza nka Daudi rundi nka Yusufu?’ (Okubanza 39:11-15) Kakuba tutekereza ha bizibu ebiruga omu kukora ekibi, nitwija kweyongera ‘kunoba ebibi.’

8, 9. (a) Omuntu waitu ow’omunda atukonyera ata? (b) Omuntu waitu ow’omunda akorra ata ha misingi ya Yahwe?

⁸ Titugonza kwesembereza ebintu Ruhanga anoba. Baitu tusemeriire kukora ki kakuba twesanga omu nyikara nambere hataroho kiragiro kyona ekirukugibazaaho? Turamanya tuta Ruhanga ekyarukugonza tukole? Omuntu waitu ow’omunda obwaraba atendekerwe Baibuli, nitwija kukora encwamu ey’amagezi.

⁹ Habwokuba Yahwe natugonza, atuteriireho emisingi ey’eratukonyera kuhabura omuntu waitu ow’omunda. Natugambira ngu: “Ninyowe Mukama Ruhanga wawe, arukukwegesa okugasa, arukukuterekereza omu muhanda ogwoliba nogendamu.” (Isaya 48:17, 18) Obu twecumitirizaaho emisingi ya Baibuli kandi tukagireka kuhika ha mutima, nitusobora kuhana kandi tukahabura omuntu waitu ow’omunda. Kinu nikiija kutukonyera kukora encwamu ez’amagezi.

10. Emisingi nikyo kiki, kandi Yesu akagikozesa ata omu kwegesa kwe?

¹⁰ Emisingi nugo mananu agasigikirwaho kuterekereza entekereza yaitu n’okutukonyera kukora encwamu enungi. Kumanya emisingi ya Yahwe kitukonyera kwetegereza entekereza ye n’ensonga habwaki atuha ebiragiro ebimu. Yesu obwakaba nayegesa abegeswa be akakozesa emisingi kuboleka ngu haroho ebiruga omu ntekereza zaitu n’omu bikorwa byaitu. Ekyokurorraho, akabegesa ngu ekiniga nikisobora kirugamu okurwana kandi ngu ebitekerezo ebirukukwata ha kuterana nibisobora kurugamu obusihani. (Matayo 5:21, 22, 27, 28) Obuturaikiriza kwebemberwa emisingi ya Yahwe, omuntu waitu ow’omunda naija kutendekwa kurungi, kandi nitwija kukora encwamu ezirukuhaisa Ruhanga ekitinisa.​—1 Abakolinso 10:31.

11. Omuntu waitu ow’omunda ayahukana ata?

¹¹ Abakristaayo n’obu bakozesa Baibuli kutendeka omuntu wabo ow’omunda, nibasobora kurora ebintu ebimu omu miringo erukwahukana. Ekyokurorraho, obu kirukuhika ha kunywa rundi kutanywa amarwa. Baibuli tegamba ngu kibi kunywa amarwa, baitu n’etuhabura ngu titusemeriire kunywa amarwa maingi kandi titusemeriire kutamiira. (Enfumo 20:1; 1 Timoseo 3:8) Baitu kinu nikimanyisa ngu Omukristaayo nobwaraba nanywa marwa make, tasemeriire kutekerezaho ekintu ekindi kyona obwarukuba nakora encwamu ey’okunywa? Nangwa. Omuntu we ow’omunda n’obwakumwikiriza kunywa amarwa, asemeriire kutekerezaaho omuntu ow’omunda ow’abantu abandi.

12. Abarumi 4:21 nirusobora kutukonyera ruta kutamu ekitiinisa omuntu ow’omunda ow’abantu abandi?

¹² Paulo akoleka ngu nikitwetagisa kutekamu omuntu ow’omunda ow’abantu abandi ekitinisa obu yagambire ngu: “Tikiri kirungi okulya enyama, nobukwakuba okunywa amarwa, nobukwakuba okugira ekigambo kyona ekirukutabaijura mugenzi wawe.” (Abarumi 14:21) N’obuturaaba twine obugabe okunywa amarwa, tusemeriire kwerekesa obugabe obu kakuba tumanya ngu nikiija kutabaijura omuntu ow’omunda ow’Omukristaayo ondi. Ow’oruganda nasobora kuba yali mutamiizi obwakaba atakegere amananu baitu hanyuma y’okugeega yacwamu kulekera kimu amaarwa. Titwakugondeze kukora ekintu kyona ekiramuletereza kugarukira engeso ze ezaira. (1 Abakolinso 6:9, 10) Kakuba ow’oruganda nk’ogu aba abungire omu ka yaitu, mali nikiba kihikire kumusonasona kunywa n’obwarukuba ayangire? Nangwa titusobora kukikora.

13. Timoseo akoleka ata ngu natamu ekitinisa omuntu ow’omunda aw’abantu abandi nukwo abakonyere kwikiriza amananu?

¹³ Timoseo obwakaba akyali musigazi, akaikiriza kuraba omu burumi habw’okusarwa. Akaba amanyire ngu okusarwa kikaba kiri kintu kikuru hali Abayudaaya nambere akaba nagenda kutebeza. Okusisanaho na Paulo, Timoseo nauwe akaba atarukugonza kutabaijura omuntu wena. (Engeso Ezabakwenda 16:3; 1 Abakolinso 9:19-23) Naiwe oyetegekere kugira ekiwayefereza nukwo okonyere abantu abandi?

14, 15. (a) Tufoka tuta bantu abakuzire omu by’omwoyo? (b) Abakristaayo abakuzire omu by’omwoyo batwaza bata abandi?

¹⁴ Itwena tusemeriire kuba n’omutima gw’okugonza kukurakurana kuruga ha “byokubandizaho ebya Kristo” nukwo tweyongere kukura omu by’omwoyo. (Abaheburaniya 6:1) Okumara emyaka nyingi omu mananu tikiri nikyo ekitufoora Bakristaayo abakuzire omu by’omwoyo. Kusobora kukura omu byomwoyo nikyetagisa tutemu amaani. Tusemeriire kwikara nitukurakurana omu kumanya n’okwetegereza kwaitu. Nahabweki tusemeriire kusoma Baibuli buli kiro. (Zabuli 1:1-3) Obworaaba n’osoma Baibuli buli kiro, noija kwetegeeza kurungi ebiragiro n’emisingi ya Yahwe.

¹⁵ Kiragiro ki ekirukukirayo obukuru hali Abakristaayo? Eki nikyo ekiragiro eky’okugonza. Yesu akagambira abegeswa be ngu: “Nukwo bona balimanya muli begeswa bange, obu murabaga nokugonzangana inywenka.” (Yohana 13:35) Okugonza nikwetwa “ekiragiro ekyomukama” kandi ‘kuhikiriza ebiragiro.’ (Yakobo 2:8; Abarumi 13:10) Tikirukutuhuniriza kumanya ngu okugonza kintu kikuru, habwokuba Baibuli egamba ngu “Ruhanga nukwo kugonza.” (1 Yohana 4:8) Hali Ruhanga, okugonza teri nyehurra kwonka. Ayoleka okugonza kwe omu bikorwa. Yohana akahandika ngu: “Numwo hamanyisiibwemu okugonza kwa Ruhanga nambere tuli, ngu Ruhanga akatuma Omwana we ayazairwe omu wenka omu nsi, tube abomezi habwe.” (1 Yohana 4:9) Obu twoleka okugonza kwaitu hali Yahwe, Yesu, ab’oruganda hamu n’abantu abandi twoleka ngu tuli Bakristaayo abakuzire omu by’omwoyo.​—Matayo 22:37-39.

16. Obutuba Abakristaayo abakuzire omu by’omwoyo, habwaki tweyongera kutwara emisingi nk’ekintu eky’omuhendo?

¹⁶ Obutufooka Abakristaayo abakuzire omu  by’omwoyo, tweyongera kurora obukuru bw’emisingi ya Baibuli. Ebiragiro bikora omu nyikara emu yonka, baitu emisingi ekora omu nyikara ezirukwahukana. Ekyokurorraho, omwana omuto nasobora kutetegereza akabi akali omu kuba n’abanywani ababi, nahabweki nikyetagisa abazaire kumuteraho ebiragiro ebiramulinda. (1 Abakolinso 15:33) Baitu omwana obwagenda nakura, ayega kuteka omu nkora emisingi ya Baibuli. Emisingi enu niija kumukonyera kutunga abanywani abarungi. (Soma 1 Abakolinso 13:11; 14:20.) Nambere turagarukira kuteka omu nkora emisingi ya Baibuli, n’omuntu waitu ow’omunda nuho aragarukira kwesigwa. Tweyongera kwetegereza kurungi eki Yahwe arukugonza tukole omu buli nyikara yoona.

17. Habwaki nitusobora kugamba ngu twine buli kimu ekisobora kutukonyera kukora encwamu ey’amagezi?

¹⁷ Twine buli kimu ekirukwetagisa kutukonyera kukora encwamu ezirukusemeza Yahwe. Baibuli erumu ebiragiro n’emisingi ebirakonyera omuntu kweyongera kukura nukwo aleke “okuburwaho kyona kyona, abe nabyona ebyegomberwa omumulimo gwona omurungi.” (2 Timoseo 3:16, 17) Emisingi ya Baibuli etukonyera kumanya entekereza ya Yahwe. Baitu nikyetagisa kutekamu amaani kuzoora emisingi enu. (Abefeso 5:17) Twine ebintu ebisobora kutukonyera nka, Watch Tower Publications Index, Research Guide for Jehovah’s Witnesses, Watchtower Library, LAIBURALE EYA HAMUKURA, hamu na JW Library eya ha simu na tabuleti. Obuturakozesa ebintu binu omu kwesomesa n’omu kuramya kwaitu okw’eka, nitwija kugasirwa.

18. Kiki ekibaho obututa omu nkora ebiragiro n’emisingi ya Yahwe omu bwomeezi bwaitu?

¹⁸ Tuba n’obwomeezi oburungi obututa omu nkora ebiragiro n’emisingi ya Yahwe. Zabuli 119:97-100 nirugamba: “Ebiragiro byawe nimbigonza muno. Nibyo ntekereza obwire okuira. Ebiwaragiire bimpaisa amagezi okukira abamyanzigwa bange; baitu bikara nanyowe obutosa. Nyetegeriize muno okukira bona abanyegesa; Baitu ebiragiro byawe nibyo ntekereza. Manyire okukira abagurusi, obwokukwata ebyoyegesa.” Obuturataho obwire kutekereza ha ebiragiro n’emisingi ya Yahwe, nitwija kukora ebintu omu mulingo ogw’amagezi n’okumanya. Kandi obu turakozesa ebiragiro n’emisingi ye omu kutendeka omuntu waitu ow’omunda, nitwija “okuhika ha rulengo orwobukuru obwokuhikirra kwa Kristo.”​—Abefeso 4:13.