1. Kusigikirra ha Abakolosai 2:4, 8, Sitaani alengaho ata kutufoora bairu be omu ntekereza?

SITAANI nagonza kutwahukaniza na Yahwe. Kinu alengaho kukikora kuraba omu kuhindura entekereza yaitu nukwo atufoole bairu be kandi tutandike kutekereza nkauwe. Akozesa okwegomba kwaitu kutusonasona n’okutubihabiha.​—Soma Abakolosai 2:4, 8.

2-3. (a) Habwaki tusemeriire kutekerezaaho muno okuterererwa okuli omu Abakolosai 2:8? (b) Nitwija kubazaaho ki omu kicweka kinu?

² Tugambe ngu naitwe Sitaani nasobora kutuhabisa? Ego! Twijuke ngu Paulo obuyahandiikire ebigambo ebiri omu Abakolosai 2:8, akaba atarukubihandiikira abantu abakaba bali aheeru y’ekitebe. Baitu akabihandiikira Abakristaayo abakaba baseserweho amagita. (Bak. 1:2, 5) Abakristaayo abo bakaba bali omu kabi ak’okubiihabiihibwa Sitaani, kandi itwe omu kasumi kanu tuli omu kabi n’okubakira. (1 Kol. 10:12) Habwaki nitugamba tuti? Sitaani akanagwa omu nsi kandi acweriiremu kimu kuhabisa abaheereza ba Ruhanga abesigwa. (Kus. 12:9, 12, 17) Kwongerezaaho, tuli omu kasumi nambere abantu ababi n’abetulikirra barukweyongera ‘kuhingurana omu bubi.’​—2 Tim. 3:1, 13.

³ Omu kicweka kinu, nitwija kurora omulingo Sitaani akozesa “obudupe” rundi ebisuba bye kuhindura entekereza yaitu. Kandi nitwija kwegaho emitego esatu ey’akozesa. (Bef. 6:11) Hanyuma, omu kicweka ekirahonderaho nitwija kurora omulingo tusobora kweihamu entekereza yona embi ey’asobora kuba yatutahizemu. Baitu, katubanze turole omulingo Sitaani y’abihabihiremu Abaisaleri obubataahire omu Nsi ey’Ekaba Eraganiziibwe, kandi nitwija kurora ekitusobora kukyegeraho.

4-6. Kusigikirra ha Ekyebiragiro 11:10-15, mulingo ki omuhyaka ogw’okulima Abaisaleri ogu baali baine kwega obubatahire omu Nsi ey’Ekaba Eraganiziibwe?

⁴ Sitaani akoohya Abaisaleri kuramya ebisisani. Akakikora ata? Akaba akimanyire ngu nibetaaga eby’okulya, nahabweki nibyo yakozeseze kuboohya kukora eby’agonza. Abaisaleri obubataahire omu Nsi ey’Ekaba Eraganiziibwe, bakaba baine kwega omulingo omuhyaka ogw’okulima eby’okulya. Abaisaleri obubakaba bakyali omu ihanga lya Misiri, baitirraga eby’okulya nibakozesa amaizi agabaihaga omu Kyambu Niro. Baitu omu Nsi ey’Ekaba Eraganiziibwe, hakaba hataliyo ekisaaru ekikooto, nahabweki kusobora kulima emisiri, bakaba basemeriire kulinda enjura n’orume. (Soma Ekyebiragiro 11:10-15; Is. 18:4, 5) Kinu nikimanyisa ngu Abaisaleri bakaba baine kwega emiringo emihyaka ey’okulima eby’okulya. Ekintu kinu kikaba kitarukugenda kubanguhira habwokuba baingi hali abo abakaba baine obukugu bw’okulima baali baferiire omu irungu.

⁵ Yahwe akasoborra abantu be yabagambira ngu enyikara yabo ekaba ehindukire. Hanyuma akabaha obuhabuzi obusobora kuzooka nk’obutaine akakwate n’eby’okulima. Akabagambira ati: “Mwerinde inywenka, omutima gwanyu guleke okubihwa, kandi mutahunguka nokukorra abacwezi nokubaramya.” (Bir. 11:16, 17) Habwaki Yahwe yabatangire kuramya abaruhanga ab’ebisuba kandi kunu akaba nabazaaho emiringo emihyaka ey’okulima?

⁶ Yahwe akaba akimanyire ngu Abaisaleri bakaba nibasobora kwohebwa kugenda hali abantu abaramyaga abaruhanga ab’ebisuba nukwo babegereho emiringo emihyaka ey’okulima. Ky’amananu ngu abataahi babo bakaba bamanyire kulima kubakira, kandi Abaisaleri bakaba nibasobora kubegeraho ebintu ebimu ebikaba nibisobora kubakonyera, baitu ha kaire nuko  kamu, abatahi banu bakaba nibasobora kubahabisa. Abalimi ba Kanaani baramyaga ruhanga ow’ebisuba arukwetwa Baali, nahabweki entekereza yabo ekaba n’esigikirra ha ndamya yabo. Baikirizaaga ngu Baali nuwe yali mukama w’iguru, kandi ngu nuwe yaletaga enjura. Yahwe akaba atarukugonza abantu be kuhabisibwa enyikiriza ez’ebisuba nk’ezi. Baitu emirundi nyingi, Abaisaleri bacwamuga kuramya Baali. (Kubar. 25:3, 5; Bac. 2:13; 1 Bakam. 18:18) Hati leka twetegereze omulingo Abaisaleri bafokere bairu ba Sitaani.

7. Okwikiriza kw’Abaisaleri kukalengwa kuta obubahikire omu Nsi ey’Ekaba Eraganiziibwe?

⁷ Omulingo gw’okubanza, Sitaani oguyakozeseze nugwo ogw’okwegomba ekihunguraine ekintu ekyali kitali kibi. Akaletera Abaisaleri kwegomba muno enjura. Buli mwaka, hagati y’okwezi kwa Apuli n’okwa Sebutemba, Ensi ey’Ekaba Eraganiziibwe yatungaga enjura nke muno. Enjura eyagwaga omu kwezi kwa Okitobba niyo yakonyeraga muno Abaisaleri, kandi yabasobozesaga kulima eby’okulya. Sitaani akabihabiha Abaisaleri batandika kutekereza ngu, kusobora kubaho, bakaba baine kwega emigenzo y’abantu abakaba babetoroire. Abatahi babo baikirizaaga ngu abaruhanga babo kusobora kubaha enjura, hali haroho emigenzo eyibayetagisibwaga kukora. Abaisaleri abaali batarukwikiriza omuli Yahwe bakatandika kutekereza ngu gunu nugwo gwali omulingo gwonka ogw’okwerinda ekyanda ekiraihire kandi nabo bakatandika kukora emigenzo erukuhaisa ekitiinisa Baali, ruhanga ow’ebisuba.

8. Mulingo ki ogwakabiri Sitaani oguyakozeseze kubiihabiiha Abaisaleri? Soborra.

⁸ Haroho omulingo gwakabiri ogu Sitaani yakozeseze kubiihabiiha Abaisaleri. Akabohya n’akozesa okwegomba obusiihana. Amahanga agaali gabetoroire obugabaga nigaramya abaruhanga bago ab’ebisuba, gayetabaga omu bikorwa eby’obusiihani ebirukuswaza muno. Omu ndamya enu ey’ekaba erumu obusiihani, abakazi n’abasaija bakoraga obwamalaaya ha yekaro zabo. Obukuhya hamu n’emiringo endi ey’obusiihani yaikirizibwaga kandi ekaba eri kintu kya buli kiro! (Bir. 23:17, 18; 1 Bakam. 14:24) Abantu banu baikirizaaga ngu emigenzo enu yaleteraga baruhanga babo kuha itaka lyabo orwezo. Abaisaleri baingi bakasikirizibwa emigenzo enu ey’obusiihani kandi bahabisibwa batandika kuramya baruhanga ab’ebisuba. Omu mulingo gunu, bakafooka bairu ba Sitaani.

9. Kusigikirra ha Hoseya 2:16, 17, Sitaani akaletera ata Abaisaleri kurora Yahwe omu mulingo ogutahikire?

⁹ Haroho omulingo gwakasatu Sitaani oguyakozeseze. Akaletera Abaisaleri kurora Yahwe omu mulingo ogutahikire. Omu busumi bwa nabbi Yeremiya, Yahwe akagamba ngu ba nabbi ab’ebisuba bakaletera abantu be kwebwa ibara lye “habwa Baali.” (Yer. 23:27) Abantu ba Ruhanga bakaleka kukozesa ibara lya Ruhanga kandi omu kiikaro kyalyo bakatandika kukozesa Baali, ekirukumanyisa “Mukama” rundi “Mukuru.” Ekikorwa kinu kyali ky’okuletera Abaisaleri kulemwa kurora enyahukana eri hagati ya Yahwe na Baali, n’okubaletera kwanguhirwa kuteraniza emigenzo y’okuramya Baali hamu n’okuramya Yahwe.​—Soma Hoseya 2:16, 17 hamu n’obugambo obuli hansi.

10. Sitaani akozesa miringo ki kubiihabiiha abantu omu kasumi kanu?

¹⁰ Na hati, Sitaani n’akozesa emiringo niyo emu kubiihabiiha abantu. Ahabisa abantu kuraba omu kubaletera kwegomba muno ebintu ebirukuzooka nk’ebitali bibi, akurakuraniza obusiihani, kandi aletera abantu kurora Yahwe omu mulingo ogutahikire. Katubanze tubazeeho omulingo aletera abantu kurora Yahwe omu mulingo ogutahikire.

11. Sitaani aletiire ata abantu kurora Yahwe omu mulingo ogutahikire?

 ¹¹ Sitaani aletera abantu kurora Yahwe omu mulingo ogutahikire. Hanyuma y’abakwenda ba Yesu kufa, abamu h’abantu abayeforaga kuba Bakristaayo bakatandika kurarangya enyegesa ez’ebisuba. (Eng. 20:29, 30; 2 Bas. 2:3) Abahakani banu bakatandika kuletera abantu kulemwa kumanya Ruhanga ow’amananu. Nk’ekyokurorraho, bakaiha ibara lya Ruhanga omu Baibuli zabo kandi omu kiikaro kyalyo bakacwamu kukozesa ebigambo nka “Mukama.” Habw’okwihamu ibara lya Ruhanga kandi omu kiikaro kyalyo bakatekamu “Mukama,” bakaletera abasomi ba Baibuli kutanguhirwa kumanya omulingo Yahwe arukwahukanaho “n’abakama” abandi abarukubazibwaho omu Byahandiikirwe. (1 Kol. 8:5) Bakakozesa ekigambo “Mukama” hali Yahwe na Yesu, kandi kinu kikaletera abantu kugumirwa kumanya enyahukana enyakuli hagati ya Yahwe n’Omwana we. Kinu kiretiire abantu kulemwa kwetegereza ngu Yahwe na Yesu tibali muntu omu. (Yoh. 17:3) Enu niyo emu ha nsonga ezaletiire abantu kutandika kwikiririza omu Busatu, baitu enyikiriza enu terukwegesebwa omu Baibuli. Kinu kiretiire abantu baingi kulemwa kwetegereza Ruhanga n’okutandika kutekereza ngu titusobora kumumanya. Mali kinu kisuba ky’amaani muno!​—Eng. 17:27.

12. Ediini ez’ebisuba zikurakuraniza ki, kandi kusigikirra ha Abarumi 1:28-31, biki ebirugiremu?

¹² Sitaani ayohya abantu n’akozesa okwegomba obusiihani. Omu busumi bwa Isaleri eya kara, Sitaani akakozesa ediini y’ebisuba kukurakuraniza obusiihani. N’akora ekintu nikyo kimu n’omu kasumi kanu. Ediini z’ebisuba ziikiriza kandi zikurakuraniza obusiihani. Kinu kiretiire abantu baingi abefoora ngu nibaramya Ruhanga kuleka kuhondera endengo ze ezirukukwata ha ngeso. Omu bbaruha ye hali Abarumi, omukwenda Paulo nasoborra ebirugiremu habw’ediini ez’ebisuba kukurakuraniza obusiihani. (Soma Abarumi 1:28-31.) “Ebi ebitarukusemera” nibitwarramu obusiihani bwa buli mulingo, otwaliremu n’obukuhya. (Bar. 1:24-27, 32; Kus. 2:20) Kikuru muno tworobere byona Baibuli eby’etwegesa.

13. Mulingo ki ogundi Sitaani ogw’akozesa kuhabisa abantu?

¹³ Sitaani aletera abantu kwegomba ekihunguraine ebintu ebitali bibi. Ky’obuhangwa kugonza kwega kukora emirimo eratukonyera kwerolerra n’okurolerra ab’omu maka gaitu. (1 Tim. 5:8) Emirundi erukukira obwingi kyetagisa kugenda  omu masomero n’okuba abeegi abekambi kusobora kwega emirimo enu. Baitu tusemeriire kwegendereza muno. Omu mahanga maingi, amasomero tigagarukira ha kwegesa abeegi emirimo y’okukora yonka baitu gabegesa n’amagezi ag’ensi. Amasomero agamu galetera abeegi kugurukyagurukya Ruhanga obwaraaba aroho n’okutatekamu Baibuli ekitiinisa. Kandi gabegesa ngu ebintu bitahangwe baitu bikaruga omu bintu ebindi. (Bar. 1:21-23) Enyegesa eza mulingo gunu zihakaniza ‘amagezi ga Ruhanga.’​—1 Kol. 1:19-21; 3:18-20.

14. Amagezi g’ensi galetera abantu kwetwaza bata?

¹⁴ Abantu abahondera enyegesa z’ensi barora endengo za Ruhanga ez’okuhikirra nk’ezitaine mugaso kandi bazihakaniza. Enyegesa zinu zibaletera kuba ‘n’engeso ez’omubiri’ omu kiikaro ky’okuba n’emiringo ey’eretwa omwoyo gwa Ruhanga. (Bag. 5:19-23) Zibaletera kuba n’emyehembo kandi bamalirra bafookere “abegonza bonka.” (2 Tim. 3:2-4) Emiringo enu n’eyahukanira kimu n’egi Ruhanga arukugonza abaheereza be kuba nayo nk’obuculeezi n’obwebundaazi. (2 Sam. 22:28) Abamu ha Bakristaayo abagenzere kusomera ha yunivasite bamaliriire bahondiire entekereza ey’ensi baleka eya Ruhanga. Katurole ekyokurorraho ekirukugumya ensonga enu.

15-16. Ekyokurorraho kya munyaanya itwe onu nikikwegesa ki?

¹⁵ Munyaanya itwe anyakumazire emyaka erukuhingura omu 15 omu buheereza bw’akasumi koona nagamba ati: “Nk’omu ha Bakaiso ba Yahwe, nkaba nsomereho kandi mpuliire obuhabuzi bwingi oburukwoleka akabi akali omu kugenda ha yunivasite baitu ntabuhondere. Natekerezaga ngu obuhabuzi bunu tiburukunkwataho.” Bizibu ki ebiyatungire? Nagamba  ati: “Habw’emisomo yange kunyetagisa kutamu obwire n’amaani maingi, nkatandika kuburwa obwire oburukumara obw’okusaba, kandi nkaleka kwegondeza omu kutebeza n’okwetekaniriza ensorrokano habw’obujwahi. Eky’omugisa, obunakyetegeriize ngu yunivasite ekaba etandikire kuletera enkoragana yange na Yahwe kusisikara, nkakyetegereza ngu nkaba nyine kurugayo. Kandi nkarugayo.”

¹⁶ Kusomera ha yunivasite kikaletera munyaanya itwe onu kutunga ntekereza ki? Nagamba ati: “Nikinswaza kwikiriza nk’oku ebinayegere ha yunivasite bikandetera kutandika kurolerra muno ensobi z’abandi kukira muno ez’ab’oruganda n’abanyaanya itwe, kubanihirramu kukora ebintu ebibatarukusobora kukora, hamu n’okubesorooraho. Kikantwarra obwire bwingi kuleka kwetwaza omu mulingo gunu. Ekintu kinu kikanyegesa ngu kibi muno kugaya obuhabuzi Yahwe obw’atuha kurabira omu kitebe kye. Kandi kikanyoleka ngu Yahwe akaba ammanyire kukira omulingo kaba nyemanyiremu. Nakubaire nyetantaire ebizibu biingi kuba namuhuliirize kara!”

17. (a) Kiki ekitusemeriire kucweramu kimu kukora? (b) Kiki ekiturukwija kubazaaho omu kicweka ekirukuhonderaho?

¹⁷ Otaikiriza n’akake “ebifirosofo nebyebisuba” bya Sitaani kukufoora mwiru. Kandi oyerindire kimu emiringo yoona Sitaani ey’akozesa kubiihabiiha abantu. (1 Kol. 3:18; 2 Kol. 2:11) Otaliikiriza Sitaani kukuletera kwebwa Yahwe n’omulingo osemeriire kumuramyamu. Hondera endengo za Yahwe ezirukukwata ha ngeso. Kandi otaikiriza Sitaani kukuletera kugaya obuhabuzi bwa Yahwe. Baitu kiki eky’osobora kukora kakuba okimanya ngu entekereza y’ensi emazire kukutahamu? Ekicweka ekirukuhonderaho nikiija kutwoleka omulingo Ekigambo kya Ruhanga kisobora kutukonyera kuhindura entekereza n’engeso ezigumire kuleka.​—2 Kol. 10:4, 5.