1. Habwaki tusemeriire kuhuliiriza obuhabuzi bwa Yesu?

YESU, obwakaba n’abazaaho obunabbi oburukukwata ha biro ebya hampero akagamba ati: “Mwerindege inywenka, emitima yanyu etalemerwa . . . nokutabana [rundi kwetuntura] okwobwomeezi bunu.” (Luk. 21:34) Habwaki tusemeriire kuhondera obuhabuzi bunu? Habwokuba naitwe tutunga ebizibu ebituletera kwetuntura nk’abantu abandi.

2. Bizibu ki eby’ab’oruganda n’abanyaanya itwe barukurabamu?

² Obwire obumu haroho obutuhikwaho ebizibu ebihonderaine. Tekerezaaho ebizibu ebyahikire ha b’oruganda n’abanyaanya itwe banu. Ow’oruganda arukwetwa John, * ow’aine oburwaire obw’amaani, kikamuhinguranaho mukazi we ou baali bamazire hamu emyaka 19 obuyamunagireho y’ayegendera. Hanyuma abahara be babiri bakaleka kuheereza Yahwe. Ow’oruganda Bob na mukazi we Linda ubo bakatunga ebizibu eby’omulingo gundi. Boona emirimo yabo ekahwaho kandi bakaba batakyasobora kusasurra enju ei baikaramuga. Oihireho ebi, dakitaali akagambira Linda ngu akaba aine oburwaire obw’omutima obukaba nibusobora kumwita kandi omu kasumi ako akarwara n’oburwaire obundi obw’amaani.

3. Kusigikirra ha Abafiripi 4:6, 7, kiki ekiturukugumya?

³ Nitukigumya ngu Omuhangi waitu ow’engonzi Yahwe amanyire kurungi omulingo twehurramu obutuba twetuntwire. Kandi n’agonza kutukonyera nukwo tusobole kuraba omu bizibu ebitutunga. (Soma Abafiripi 4:6, 7.) Baibuli erumu ebyokurorraho biingi eby’abaheereza ba Ruhanga abarabire omu bizibu. Kandi n’esoborra n’omulingo Yahwe y’abakonyire kuraba omu  nyikara ezi ezabaletiire kwetuntura muno. Leka tubazeho bimu ha by’okurorraho binu.

4. Eriya akatunga bizibu ki kandi kiki eky’akaba nagumya hali Yahwe?

⁴ Eriya akaheereza Yahwe omu kasumi akaali kagumangaine kandi akaraba omu bizibu biingi. Omukama Ahabu, akaba ali omu ha bakama ababi abalemere Isareri, kandi akaswera Yezeberi omukazi omubi muno ayaramyaga Baali. Ahabu na mukazi we bakaletera Isareri yoona kuramya Baali kandi baita ba nabbi ba Yahwe baingi. Baitu Eriya batasobole kumwita. Kandi n’enjara y’amaani obuyagwire, Eriya habw’okwesiga Yahwe atafe. (1 Bakam. 17:2-4, 14-16) Ekindi, Eriya akesiga Yahwe obuyahakaniize abaheereza na ba nabbi ba Baali. Kandi akekambisa Abaisareri kuheereza Yahwe wenka. (1 Bakam. 18:21-24, 36-38) Mali Eriya akaba aine obwakaiso oburukumara obwali nibwoleka ngu Yahwe akaba na mukonyera kandi na mulinda omu busumi bunu obwali butanguhire.

5-6. Kusigikirra ha 1 Ekyabakama 19:1-4, Eriya akaba nayehurra ata, kandi Yahwe akamwoleka ata ngu akaba n’amugonza?

⁵ Soma 1 Ekyabakama 19:1-4. Baitu Eriya akatiina muno Omugo Yezeberi obuyamutiinisiriize kumwita. Akacwamu kwiruka kugenda omu kicweka ekirukwetwa Beeriseba. Kandi akahurra ahoirwemu muno amaani “yayesabira wenka okufa.” Kiki ekyamuletiire kwehurra ati? Eriya nauwe akaba atahikiriire, habwokuba “akaba ali muntu nkaitwe.” (Yak. 5:17, NW) Kwetuntura muno hamu n’obujwahi habw’orugendo nibisobora kuba nibyo byamuletiire kugonza kufa. Ekintu ekindi, Eriya n’asobora kuba yatekeriize ngu amaani ag’akaba atairemu  kukonyera abantu kuramya Yahwe gaali gafiire busa kandi akatekereza ngu nuwe muheereza wa Yahwe wenka ow’akaba asigaireho. (1 Bakam. 18:3, 4, 13; 19:10, 14) Nikisobora kutuhuniriza kumanya ngu nabbi onu omwesigwa nauwe akehurra ati. Baitu Yahwe aketegereza omulingo Eriya akaba nayehurramu.

⁶ Yahwe atatabukire Eriya habw’omulingo akaba nayehurramu. Oihireho, akamugarramu amaani. (1 Bakam. 19:5-7) Hanyuma, omu mulingo gw’embabazi, Yahwe akamwoleka amaani ge amaingi ekyakonyire Eriya kuhindura ha ntekereza ye. Yahwe akongera yamugambira nk’oku omu Isareri hakaba hakyaliyo abantu abandi 7,000 abaayangire kuramya Baali. (1 Bakam. 19:11-18) Kuraba omu kukora ebintu binu, Yahwe akakonyera Eriya kukimanya ngu akaba n’amugonza.

7. Omulingo Yahwe y’akonyiremu Eriya nigutwegesa ki?

⁷ Oli munyikara ey’ekutuntwize muno? Kumanya ngu Yahwe aketegereza omulingo Eriya akaba n’ayehurramu nikisobora kutuhuumuza. Nikitugumya ngu mali Yahwe amanyire ebizibu byona ebiturukurabamu. Kandi amanyiire kimu obuceke bwaitu, omulingo turukwehurra hamu n’entekereza yaitu. (Zab. 103:14; 139:3, 4) Obuturahondera ekyokurorraho ekya Eriya tukesiga Yahwe, naija kutukonyera kugumira ebizibu byaitu ebituletera kwetuntura.​—Zab. 55:22.

8. Yahwe naija kukukonyera ata kugumira okwetuntura?

⁸ Kwetuntura muno nikisobora kukuletera kutekereza ngu ebizibu byawe tibirihwaho, kandi kinu nikisobora kukumara amaani. Kakuba oyehurra oyetuntwire muno, ikara noijuka ngu Yahwe naija kukukonyera kuguma. Naija kukukonyera ata? Yahwe nagonza omugambire ebizibu byawe byona kandi ayetegekere kuhurra esaara zaawe. Obw’oramukunga naija kukukonyera. (Zab. 5:3; 1 Pet. 5:7) Nahabweki saba Yahwe butoosa, omugambire ebizibu byawe byona. Nobukiraaba ngu tarukwija kubaza naiwe maiso ha maiso nk’oku y’abalize na Eriya, naija kubaza naiwe n’akozesa Ekigambo kye hamu n’ekitebe kye. Obworasoma Baibuli noija kusangamu ebyokurorraho eby’abaheereza ba Yahwe ebirakukonyera kuhuumura kandi bikuhe okunihira. Ab’oruganda n’abanyaanya itwe nabo nibasobora kukugarramu amaani.​—Bar. 15:4; Baheb. 10:24, 25.

9. Omunywani ou turukwesiga n’asobora ata kutukonyera obuturukuba twetuntwire?

⁹ Yahwe akagambira Eriya obujunanizibwa bwe obumu kubuha Erisa. Akaha Eriya omunywani omurungi ow’akaba nagenda kumukonyera obuyakuhwoirwemu amaani. Naitwe obutugambira omunywani ou turukwesiga omulingo turukwehurra, nasobora kutukonyera kugumira ebizibu byaitu. (2 Bakam. 2:2; Nfu. 17:17) Kakuba oyehurra ngu toine muntu wena ow’osobora kugambira ebizibu byawe, saba Yahwe akukonyere osobole kutunga Omukristaayo anyakukuzire omu by’omwoyo ow’asobora kukugarramu amaani.

10. Ekyokurorraho ekya Eriya nikituha kita okunihira, kandi omurago gwa Yahwe oguli omu Isaya 40:28, 29 nigutukonyera guta?

¹⁰ Yahwe akakonyera Eriya kugumira okwetuntura kandi Eriya akagumizaamu namuheereza n’obwesigwa kumara emyaka nyingi. Ekyokurorraho kya Eriya nikitukonyera kutunga okunihira. Naitwe nitusobora kwetuntura muno tukahika n’okwehurra tutakyaine amaani ag’okukora ekintu kyona. Baitu obuturayesiga Yahwe naija kutuha amaani agaturukwetaaga kusobora kwikara nitumuheereza.​—Soma Isaya 40:28, 29.

11-13. Abaheereza ba Yahwe basatu bakehurra bata habw’okwetuntura?

¹¹ N’abaheeraza ba Yahwe abandi abarukubazibwaho omu Baibuli baketuntura muno. Nk’ekyokurorraho, Hana aketuntura muno habwokuba  akaba ataine baana kandi kunu muka iba ow’akaba aine abaana yaikaraga n’amusekereza. (1 Sam. 1:2, 6) Habw’okwetuntura, Hana akasalirwa muno yalemwa n’okulya.​—1 Sam. 1:7, 10.

¹² Omukama Daudi nauwe haroho obuyayetuntwire muno. Tekerezaaho ebizibu ebiyarabiremu. Akaikara n’ayecwera omusango habw’ensobi nyingi eziyakozere. (Zab. 40:12) Mutabani we Abusalomu ou y’agonzaaga muno akamujeemera, kandi Abusalomu akamalirra aisirwe. (2 Sam. 15:13, 14; 18:33) Ekindi munywani wa Daudi ou yayesigaga muno akamugobeza. (2 Sam. 16:23–17:2; Zab. 55:12-14) Zabuli nyingi Daudi eziyahandiikire nizooleka nk’oku akaba ahoirwemu amaani kandi n’omulingo akaba n’ayesigira kimu Yahwe.​—Zab. 38:5-10; 94:17-19.

¹³ Omuhandiki wa Zabuli ondi akahika yatandika kwegomba obwomeezi bw’abantu ababi. N’asobora kuba akaba ali mwijukuru ow’Omulevi ow’akaba nayetwa Asafu ayaheheerezaga omu kiikaro kya Ruhanga ekirukwera. Omuhandiiki wa Zabuli onu aketuntura muno eky’amumazireho okusemererwa kandi n’okutandika kwegomba. Akatandika n’okutekereza ngu emigisa Ruhanga akaba n’amuha habw’okumuheereza ekaba etarukumara.​—Zab. 73:2-5, 7, 12-14, 16, 17, 21.

14-15. Ebyokurorraho bisatu ebitubalizeeho nitwegesa ki ha kwesiga Yahwe?

¹⁴ Abaheereza ba Yahwe banu boona abatubalizeeho bakesiga Yahwe kubakonyera. Kandi bakamusaba nibamugambira ebikaba biberalikiriize. Batatiine kumugambira ebizibu byabo byona ebyali biberalikiriize. Kandi bakagumizaamu nibagenda omu Yekaru kuramya.​—1 Sam. 1:9, 10; Zab. 55:22; 73:17; 122:1.

¹⁵ Yahwe akabakonyera boona omu omulingo ogw’embabazi. Hana akaleka kwetuntura  yatunga obusinge omu bitekereezo. (1 Sam. 1:18) Daudi akahandiika n’agamba ati: “Emihito yowokuhikirra ka mingi! Baitu Mukama amujuna omu egi yona.” (Zab. 34:19) Omuhandiiki owa Zabuli uwe akehurra ngu Yahwe ‘amukwasire omukono gwe ogw’obulyo’ kandi n’amuhabura omu mulingo ogw’okugonza. Kandi akazina nagamba ati: “Kisemeriire nyowe okuirra haihi Ruhanga. [Yahwe] Ruhanga mmufoire ekyokwebingamu kyange.” (Zab. 73:23, 24, 28) Ebyokurorraho eby’abantu banu nibitwegesa ki? Obwire obumu tutunga ebizibu eby’amaani ebituletera kwetuntura muno. Baitu obutwecumitirizaaho omulingo Yahwe y’akonyiremu abaheereza be abakara, obutumusaba kandi tukorobera ebyarukutugambira kitukonyera kuguma.​—Zab. 143:1, 4-8.

16-17. (a) Habwaki tutasemeriire kwecwaho Yahwe n’abantu be n’obuturukuba twine ebizibu? (b) Nitusobora tuta kugarurwamu amaani?

¹⁶ Ebyokurorraho ebi nibitwegesa ekintu ekindi ekikuru. N’obutuba twine ebizibu titusemeriire kwecwaho Yahwe rundi abantu be. (Nfu. 18:1) Munyaanya itwe arukwetwa Nancy, ay’ayetuntwire muno habwokuba iba akaba amulekere, nagamba ati: “Haroho obunayehurraga ntarukugonza kurora rundi kubaza n’omuntu wena. Ekyarugiremu nk’eyongerra kimu  kwenuuba habw’okwecwaho abantu.” Baitu ebintu bikahinduka Nancy obuyacwiremu kukonyera abantu abandi abaali baine ebizibu. Nagamba ati: “Nabahuliirizaaga obubabaga nibangambira ebizibu by’abo. Kandi nk’akyetegereza ngu omutima gwange obunagutekaga ha kukonyera abantu abandi abaine ebizibu, kyankonyeraga kuleka kutekerezaaho muno ebyange.”

¹⁷ Obutugenda omu nsorrokano ez’ekitebe tugarurwamu amaani. Obutugenda omu nsorrokano tuba nitwikiriza Yahwe atukonyere kandi atuhuumuze. (Zab. 86:17) Obutuba tuli omu nsorrokano Yahwe akozesa omwoyo gwe ogurukwera, Ekigambo kye, hamu n’abantu be kutugarramu amaani. Mali ensorrokano zituha omugisa ogw’okuhuumuzangana. (Bar. 1:11, 12) Munyaanya itwe arukwetwa Sophia nagamba ati: “Yahwe atuhaire ab’oruganda bagenzi baitu batukonyere kugumiisiriza. Kandi ekintu ekikuru ekikizire kunkonyera kuguma nizo ensorrokano ez’ekitebe. Nkyetegeriize ngu obunyekamba muno omu buheeraza hamu n’omu kitebe, kinkonyera muno kuleka kwetuntura n’okweralikirra.”

18. Kiki Yahwe ekyatuha obutuba tuhoirwemu amaani?

¹⁸ Obuturayehurra tuhoirwemu amaani, leka twijuke ngu Yahwe ayetegekere kutukonyera omu kasumi kanu kandi aturaganiize ngu naija kwihiraho kimu kwetuntura kwona omu kasumi ak’omu maiso. Ayetegekere kutuha “amaani n’okugonza” ebiturukwetaaga kusobora kusingura enyehurra yoona ey’okwetuntura hamu n’okuhurra tutaine okunihira kwona.​—Baf. 2:13, NW.

19. Murago ki oguli Abarumi 8:37-39?

¹⁹ Soma Abarumi 8:37-39. Omukwenda Paulo natugumya ngu busaho kintu kyona ekisobora kutubaganizaaho okugonza kwa Ruhanga. Nitusobora tuta kukonyera ab’oruganda n’abanyaanya itwe abetuntwire? Omu kicweka ekirukuhonderaho nitwija kwega omulingo tusobora kuhondera ekyokurorraho kya Yahwe, kuraba omu kwoleka embabazi n’okusagika ab’oruganda n’abanyaanya itwe abetuntwire.