Enkarra ezi nizibazaaho emiringo mwenda ey’Ekikristaayo, nizigamba ziti: “Ekyana eky’omwoyo kirumu, okugonza, okusemererwa, obusinge, okugumisiriza, oburungi, embabazi, okwikiriza, obuculeezi, okwetanga.” Baitu enu teri niyo miringo yonka ekyana eky’omwoyo kisobora kutukonyera kukurakuraniza.

Wetegereze ebigambo omukwenda Paulo yahandikire omu nkarra ez’enyumaho: ‘Baitu engeso ez’omubiri . . . nzinu, obusihani, okutasemera, orwanju, okuramya ebisisani, okuroga, obunyanzigwa, okukungana, ihali, ekiniga, empaka, okubaganizibwamu, eby’okuhabisa, itima, obutamizi, okuzana okubi, n’ebirukusisa biti.’ (Bag. 5:19-21) Ekirukumanyisa ngu Paulo akaba nasobora kubazaaho ebintu ebindi ebiri “engeso ezomubiri,” nk’ezo ezirukubazibwaho omu Abakolosai 3:5. Omu mulingo nugwo gumu, obuyamazire kuhandiikaho emiringo mwenda enungi akagamba ati: ‘Hali ebirukusisa biti busaho kiragiro.’ Nahabweki Paulo akaba atarukulengaho kuhandiika emiringo yoona enungi omwoyo ogurukwera gusobora kutukonyera kukurakuraniza.

Kinu nitukyetegereza kurungi obutukulengesaniza ekyana eky’omwoyo n’ekyana eky’omusana Paulo yahandiikireho omu bbaruha hali ekitebe ekya Efeso ati: “Ekyana eky’omusana kirumu oburungi okuhikirra n’amazima ebya buli mulingo.” (Bef. 5: 8, 9, NW) Ego, “oburungi” hamu n’okuhikirra kandi n’amazima biretwa ekyana eky’omusana, ha murundi nugwo gumu “oburungi” buletwa ekyana eky’omwoyo ogurukwera.

Kandi Paulo akatererra Timoseo kukurakuraniza emiringo enungi mukaaga ati: “Ohonderege okuhikirra, nokutina Ruhanga, nokuikiriza, nokugonza, nokugumisiriza, [n’obuculeezi, NW].” (1 Tim. 6:11) Ha miringo enu mukaaga, esatu yonka (okwikiriza, okugonza, hamu n’obuculeezi) niyo eretwa eky’ekyana eky’omwoyo. Baitu Timoseo akaba nagenda kwetaaga obukonyezi obw’omwoyo ogurukwera kusobora kukurakuraniza emiringo endi eyabaziibweho, nk’okuhikirra, kutiina Ruhanga, hamu n’okugumisiriza.​—Lengesaniza na Abakolosai 3:12; 2 Petero 1:5-7.

Nahabweki, Abagaratiya 5:22, 23 tizirukubazaaho emiringo yoona Omukristaayo asemeriire kukurakuraniza. Omwoyo gwa Ruhanga nigusobora kutukonyera kukurakuraniza emiringo mwenda ‘ey’ekyana eky’omwoyo.’ Baitu haroho n’emiringo endi eitusemeriire kukurakuraniza kusobora kufooka Abakristaayo abakuzire omu by’omwoyo kandi “nokujwara omuntu omuhyaka, arukuhangwa Ruhanga omu kuhikirra nokwera okwamazima.”​—Bef. 4:24.