ITWENA nitwikiriza ngu Yahwe nayebembera kandi n’arolerra abantu be omu by’omwoyo omu kasumi kanu aka ha mpero. (2 Tim. 3:1) Baitu itwena tusemeriire kumworobera. Nitusobora kulengesaniza enyikara yaitu n’ey’Abasaleri obubakaba bali omu irungu. Bakaba baine kworobera iraka ery’engwara.

Yahwe akaragira Musa kukora engwara ibiri ezikozerwe omu feeza nukwo asikozese “okweta ekitebe, kandi okuimukyaga orugendo.” (Kubar. 10:2) Banyakatagara bakaba basemeriire kuteera engwara zinu omu miringo erukwahukana nukwo abantu bamanye ekibasemeriire kukora. (Kubar. 10:3-8) N’omu kasumi kanu, abantu ba Yahwe batunga oburagirizi omu miringo erukwahukana. Tekerezaaho emiringo esatu eitutungamu oburagirizi erukusisana n’engwara ezaterwaga omu Isaleri eya kara. Abantu ba Ruhanga omu kasumi kanu baralizibwa kugenda omu nsorrokano enkooto, abagurusi b’ebitebe batendekwa, kandi n’oburagirizi hali ebitebe byona bwikara nibugarurwabuhyaka rundi buhindurwa.

Yahwe obuyagonzaaga “ekitebe kyona” kwesorolereza Burugaizooba obw’eheema ey’okutangatanganiramu, banyakatagara bateraga engwara zoona ibiri. (Kubar. 10:3) Enganda zoona ezabaaga zikozere enkambi kwehinguliriza eheema ey’okutangatanganiramu, zikaba ziri omu bicweka bbina, kandi zoona zahurraga engwara zinu. Nikizooka ngu abo ababaga haihi n’omulyago gw’eheema barahukaga kwija. Abandi abaikaraga hara y’eheema nikisobora kuba kyabetagisaaga obwire bwingi n’amaani kurora ngu baija. Yahwe akaba n’agonza abantu boona abahara naba haihi besorooze kandi bagasirwe.

Omu kasumi kanu, titugenda ha heema ey’okutangatanganiramu, baitu naitwe turalizibwa kugenda omu nsorrokano ez’abantu ba Ruhanga. Zinu nizitwarramu ensorrokano enkooto, hamu n’emikoro endi enkuru nambere twegesebwa kandi tutunga oburagirizi. Omu mahanga goona omu nsi, abantu ba Yahwe begesebwa ebintu ebirukusisana. Abo abaikiriza kwija omu nsorrokano zinu, baba kicweka ky’ekitebe ekikooto eky’abantu abasemeriirwe. Abamu bagenda engendo eziraihire kukira abandi. Baitu abo boona ababaho bakirora ngu amaani batairemu tigafiire busa.

Abo abali omu guurupu eza hara nabo nibasobora kugasirwa omu nsorrokano enkooto? Ego, nabo bagasirwa omu nsorrokano zinu kandi behurra bali kicweka eky’ensorrokano enkooto habw’enkurakurana omu bya tekinoloje. Ekyokurorraho, ow’oruganda obuyasindikirwe ekitebe ekikuru eky’ensi yoona, itaagi erya Benin likakorra ab’oruganda omu ihanga lya Niger omu tawuni ya Arlit, nambere bahaiga eby’obuguuda omu kicweka kya Sahara Desert entekaniza kurora orusorrokano runu. Abantu abiri n’omu otwaliiremu ab’oruganda, banyaanya  itwe, hamu n’abarukugonza amananu bakesorooza hamu. N’obukiraaba ngu bakaba bali omu kiikaro ekya hara, bakehurra bali hamu n’ab’oruganda 44,131 abakaba bali ha rusorrokano oru orukooto. Ow’oruganda omu akahandiika nagamba ati: “Nitubasiima muno kuruga ha mitima yaitu habw’okutukorra entekaniza tukarora puroguraamu egi. Kinu kikatwoleka ngu mali nimututekerezaaho muno.”

Banyakatagara omu Isaleri obu bateraga engwara emu yonka, “abakuru, emitwe eyenkumi,” bayesorozaaga ha heema ey’okutangatanganiramu. (Kubar. 10:4) Kunu nuho Musa y’abegesezaaga kandi abatendeka. Kinu ky’abakonyeraga kuhikiriza obujunabinzibwa bw’abo omu nganda ezirukwahukana. Kakuba okaba oli omu ha bakuru abo tiwakukozere kyona ekirukusoboka kusobora kubaho kandi n’okugasirwa?

Omu kasumi kanu, abagurusi b’ebitebe tibali “abakuru” kandi tibalema igana Ruhanga abahaire kurolerra. (1 Pet. 5:1-3) Baitu bakora ekibarukusobora kyona kuliisa igana. Nahabweki baikiriza n’ekihika obubaralizibwa kugenda kutendekwa, nk’omu Isomero ery’Obuheereza bw’Obukama. Omu kutendekwa kunu, abagurusi beega omulingo basobora kuhikiriza kurungi obujunaanizibwa obubaine omu kitebe. Kinu kiretera abagurusi hamu n’abandi omu kitebe kukurakurana omu by’omwoyo. N’obworaaba otakangezere omu masomero nka ganu, naiwe n’osobora kuba n’ogasirwa kuruga hali abo abangezereyo.

Banyakatagara ba Isaleri obwire obumu bateraga engwara nibaryaihya iraka lyayo. Kinu kyamanyisaga ngu Yahwe n’agonza enkambi yoona kugenda. (Kubar. 10:5, 6) Enkambi obuyaimukyaga kugenda, kyakorwaga omu mulingo ogutekaniziibwe kurungi baitu kyayetagisaaga buli omu kukora n’amaani. Nikisoboka kuba ngu obwire obumu Abaisaleri abamu tibagonzaaga kugenda. Habwaki?

Obundi abandi batekerezaaga ngu baragiirwe kugenda emirundi nyingi rundi batakyetekaniriize. ‘Obundi n’obundi ekicu kyaikarahoga kuruga akairirizi okukiisa obuire.’ Obwire obundi kyamaraga “ebiro bibiri, rundi okwezi, rundi omwaka” nukwo baimukya orugendo. (Kubar. 9:21, 22) Enkambi ekaimukya emirundi ingaha kugenda? Okubara esuura 33 n’ebazaaho ebiikaro nka 40 nambere Abaisaleri bakozere enkambi.

Nikisoboka kuba ngu obwire obumu abamu nibasobora kuba batungaga ekiikaro nambere hali ekiituuru. Eki kiine kuba kyabasemezaaga muno “omu irungu eri erikoto kandi eryokutinisa.” (Bir. 1:19) Nahabweki, kinu nikisobora kuba kyabaleteraga kutekereza ngu ekiikaro nambere barukugenda tikirukwija kuba kirungi nk’eki barumu.

Enganda obuzaimukyaga kugenda, abantu abamu nikisobora kuba kyabagumiraga muno kugumisiriza kuhikya obu baraikirizibwa kugenda. Boona bahurraga iraka ly’engwara, baitu tibaikirizibwaga kugenda ha murundi gumu. Obu bateraga engwara nibaraihya iraka lyayo kyamanyisaga ngu enganda ezabaga zitiire enkambi omu burugaizooba ezi nizo oruganda orwa Yuda, Isakara, na Zeburuni zisemeriire kutandika orugendo. (Kubar. 2:3-7; 10:5, 6) Obu bamaraga kugenda, banyakatagara bateeraga engwara nibaraihya iraka omurundi ogwakabiri, ekyamanyisaga ngu enganda ezindi isatu ezaabaga zitiire enkambi omu masirimuka zisemeriire kutandika kugenda. Banyakatagara bagumizaamuga nibakora bati kuhikya abantu boona obubagendaga.

Obundi naiwe kikugumiire kwikiriza empindahinduka ezimu ekitebe ekizikozere. Obundi okehurra ngu zibaire nyingi muno. Obundi entekaniza ezimu wazigonzaaga kandi okaba otarukugonza zihinduke. Nikisobora kuba kikakugumira kumanyira empindahinduka empyaka. Baitu kakuba twekamba kworobera empindahinduka zinu, Yahwe naija kutuha emigisa.

Omu kasumi ka Musa, Yahwe akebembera obukaikuru n’obukaikuru obw’abasaija, abakazi, hamu nabaana kuraba omu irungu. Kakuba akaba atarukubarolerra kandi atarukubebembera, bakaba nibagenda kuhwerekerra. Omu kasumi kanu, naitwe nitwomera omu by’omwoyo habw’oburagirizi bwa Yahwe. Kandi twikara twine okwikiriza okugumire. Nahabweki, leka itwena tucweremu kimu kuba besigwa nk’Abaisaleri abayoroberaga amaraka ag’engwara ag’embaganiza.