1. Abegeswa ba Yesu bakagambira ki ekitebe ekikooto eky’abantu?

EKITEBE ekikooto ekikaba kirumu abasaija hamu n’abakazi kuruga omu mahanga maingi kandi abarukubaza endimi ezirukwahukana kikaba kyesoroize. Kiro eki, ekintu ekirukuhuniriza kikabaho. Aho naaho, Abayudaaya abamu bakasobora kubaza endimi ez’embaganiza ez’abantu abakaba babungire omu Yerusalemu! Kinu kikahuniriza muno ekitebe eki eky’abantu. Baitu Abayudaaya abo ebibabagambiire, hamu n’ebyo omukwenda Petero ebiyabagambiire bikabahuniriza n’okukiraho. Abantu abo, bakeega ngu nibasobora kujunwa kuraba omu kwikiririza omuli Yesu Kristo. Obutumwa bunu bukabakwataho muno. Abantu bakakwatwaho muno bahika n’okukaguza ngu: “Turagira tuta?” Petero akabagarukamu ati: “Mubatizibwe inywe inywena.”​—Eng. 2:37, 38.

2. Kiki ekiturukwija kubazaaho omu kicweka kinu? (Rora ekisisani ekya ha kyesweko.)

² Ekintu ekyahondiireho, kikaba nikihuniriza muno. Abantu nke 3,000 bakabatizibwa ha kiro eki bafooka abegeswa ba Kristo. Enu ekaba ntandikwa ey’omulimo omukooto ogw’okufoora abantu abegeswa Yesu ogw’akaba aragiire abahondezi be kukora. N’akasumi kanu, abahondezi be nibakyakora omulimo ogu. Kasumi kanu, titusobora kubaza n’omuntu kumara esaaha nke kandi akahika ha idaara ery’okubatizibwa. Nikisobora kutwara emyezi, rundi omwaka, rundi n’okukiraho omwegi kuhika ha kigendererwa eki. Kufoora abantu abegeswa mulimo gw’amaani, kinu okimanyire kurungi obworaaba oine omuntu ow’orukwega na uwe Baibuli omu kasumi kanu. Omu kicweka kinu, nitwija kwetegereza eky’osobora kukora kukonyera omwegi wawe owa Baibuli kufooka omwegeswa ow’abatiziibwe.

3. Nk’oku kyolekerwe omu Matayo 28:19, 20, kiki omwegi eky’asemeriire kukora kukurakurana akahika ha kubatizibwa?

³ Omwegi wa Baibuli atakabatiziibwe, asemeriire kubanza kuteeka omu nkora Baibuli eby’erukwegesa. (Soma Matayo 28:19, 20.) Omwegi obwateeka omu nkora ebyarukwega, afooka ‘nk’omuntu arukwetegereza’ omu kyokurorraho kya Yesu ayalimire yahika hansi muno nukwo asobole kwombeka enju ye ha mwandara. (Mat. 7:24, 25; Luk. 6:47, 48) Nitusobora kukonyera tuta omwegi kuteeka omu nkora eby’arukwega? Katubazeeho ebintu bisatu ebitusobora kukora.

4. Nitusobora tuta kukonyera omwegi, kwikara n’ayekamba kuhika ha kubatizibwa? (Rora n’akasunduuko “ Konyera Omwegi Wawe Kweteraho Ebigendererwa Hamu n’Okubihikaho.”)

⁴ Konyera omwegi wawe kweteraho ebigendererwa. Habwaki osemeriire kukora eki? Tekerezaaho ekyokurorraho kinu: Kakuba oba nogenda ha rugendo oruraihire, nosobora kucwamu ngu noija kwemerra ha biikaro ebimu ebirukukusemeza. Obu nubwo, otarukwija kwehurra ohoirwemu amaani habwokuba orugendo ruraihire muno. Omu mulingo nugwo gumu, omwegi wa Baibuli kakuba ayeteraho ebigendererwa eby’asobora kuhikaho bwangu naija kukyetegereza ngu nikisoboka kuhika ha kigendererwa kye eky’okubatizibwa. Kozesa ekicweka “Lengaho Kinu” ekiri omu kitabu Wegondeze omu Bwomeezi Ebiro n’Ebiro! kukonyera omwegi wawe kukurakurana. Ha kumalirra okwa buli isomo, bazaaho n’omwegi wawe omulingo ebiri omu kicweka kinu birukukwatagana n’eby’ayegere. Obworaaba oiniire omwegi wawe ekigendererwa ekindi, akihandiike hansi y’ekicweka ekiroho “Ekindi.” Butoosa, kozesa ekicweka kinu kwijukya omwegi wawe ebigendererwa eby’asobora kuhikaho omu kasumi kake hamu n’ebi eby’asobora kuhikaho omu kasumi akaraihireho.

5. Nk’oku kyolekerwe omu Marako 10:17-22, kiki Yesu ekiyagambiire omusaija omuguuda kukora, kandi habwaki?

 ⁵ Konyera omwegi wawe kukora empindahinduka. (Soma Marako 10:17-22.) Yesu akaba akimanyire ngu kyakugumiire omusaija omuguuda kutunda ebintu bye byona. (Marako 10:23) Baitu Yesu akagambira omusaija onu kukora empindahinduka enu ey’amaani omu bwomeezi bwe. Habwaki? Habwokuba Yesu akaba namugonza. Obwire obumu, nitusobora kutekambisa omwegi kuteeka omu nkora eby’arukwega habwokuba nitutekereza ngu takahikire kukora empindahinduka ey’esemeriire. Nikisobora kutwarra abantu obwire kujuura engeso ezaira kandi bakajwara omuntu omuhyaka. (Bak. 3:9, 10) Baitu kakuba mubazaaho kara empindahinduka ey’asemeriire kukora, omwegi aija kutandika kara kugikoraho. Obwobazaaho ensonga egi, oyoleka ngu n’omufaaho.​—Zab. 141:5; Nfu. 27:17.

6. Habwaki tusemeriire kukaguza omwegi waitu entekereza ye?

⁶ Kikuru muno tukaguze omwegi waitu owa Baibuli ekyarukuteekereza ha isomo eri. Kinu nikiija kukukonyera kumanya omwegi wawe eby’ayetegeriize hamu n’ebyarukwikiriza. Kakuba okora kinu butoosa, nikiija kukwanguhira omu kasumi ak’omu maiso kubazaaho na uwe ensonga ezisobora kumugumira kwikiriza. Ekitabu Wegondeze omu Bwomeezi Ebiro n’Ebiro! Kirumu ebikaguzo bingi ebirukukonyera kumanya entekereza y’omuntu. Ekyokurorraho, isomo 04 lirumu ekikaguzo: “Notekereza Yahwe ayehurra ata obwokozesa ibara lye?” Isomo 09 lirumu ekikaguzo: “Bintu ki ebimu ebiwakugondeze kusabaho?” Ha kubanza, nikisobora kugumira omwegi wawe kugarukamu ebikaguzo nka binu. Nosobora kumutendeka kuraba omu kumukonyera kutekerezaaho ebyahandiikirwe hamu n’ebisisani ebiri omu kitabu.

7. Nitusobora kukozesa tuta kurungi ebyokurorraho eby’abaireho kwo?

⁷ Omwegi wawe obwayetegereza eky’asemeriire kukora, kozesa ebyokurorraho eby’abaireho kwo kumwekambisa kukikora. Eky’okurorraho, kakuba omwegi wawe aba naija omu nsorrokano nayosa, mwoleke vidiyo Yahwe Akanfaaho enyakuli omu kicweka “Seruliiriza” eky’isomo 14. Omu masomo maingi agali omu kitabu Wegondeze omu Bwomeezi Ebiro n’Ebiro! noija kusangamu ebyokurorraho nk’ebi omu kicweka “Yega Ebirukukiraho” rundi “Seruliiriza.” * Werinde kulengesaniza omwegi wawe n’omuntu ondi kuraba omu kumugambira oti, “Ogu obwaraaba asoboire kukikora, naiwe nosobora.” Leka omwegi nuwe ayehikire ha ncwamu egi. Oihireho, bazaaho ensonga enkuru ezakonyire omuntu ou murozere omu vidiyo kuteeka omu nkora enyegesa eza Baibuli. Obundi nosobora kubazaaho ekyahandiikirwe rundi ekintu ekindi ekya mukonyire. Buli murundi obukiba kisobokere, bazaaho muno omulingo Yahwe yakonyiremu omuntu ogu.

8. Nitusobora kukonyera tuta omwegi waitu kugonza Yahwe?

⁸ Konyera omwegi wawe kugonza Yahwe. Omu mulingo ki? Kozesa buli kagisa koona kukonyera omwegi wawe kwega bingi hali Yahwe. Konyera omwegi wawe kukyetegereza ngu Yahwe ali “Ruhanga ow’okusemererwa” kandi ow’akonyera abo abamugonza. (1 Tim. 1:11, NW; Baheb. 11:6) Yoleka omwegi ngu naija kugasirwa obwarateeka omu nkora eby’ayegere kandi musoborre ngu emigisa eyaratunga habw’okukikora n’eyoleka ngu Yahwe n’amugonza. (Is. 48:17, 18) Omwegi wawe obw’arayeyongera kukurakuraniza okugonza okwainiire Yahwe naija kweyongera  kugonza kukora empindahinduka ez’asemeriire kukora.​—1 Yoh. 5:3.

9. Kusigikirra ha Marako 10:29, 30, kiki ekisobora kukonyera omuntu kwefeereza ebintu ebimu kufooka omwegeswa ow’abatiziibwe?

⁹ Kusobora kukurakurana akahika ha kubatizibwa, omwegi wa Baibuli nikiija kumwetaagisa kwefereza ebintu ebimu. Nk’omusaija omuguuda outusangirwe tubalizeeho, abeegi abamu nikisobora kubetaagisa kwefeereza eby’obuguuda byabo. Kakuba omulimo gwabo guba nigucwa emisingi ya Baibuli, nikisobora n’okubetaagisa kuserra omulimo ogundi. Baingi nikisobora kubetaagisa kwecwaho abanywani abatarukugonza Yahwe. Abandi abanyabuzaale baabo abatarukugonza Abakaiso ba Yahwe nibasobora kubecwaho. Yesu akagamba ngu, kyakugumiire abantu abamu kwefeereza. Baitu akaraganiza ngu abo abamuhondera, tibarukwija kweijukya. Yahwe naija kubaha empeera kurabira omu kubaha eka ey’okugonza omu baheereza be. (Soma Marako 10:29, 30.) Nosobora ota kukonyera omwegi wawe kugasirwa omu kisembo kinu ekirungi?

10. Kiki ekyorukwega omu kyokurorraho kya Manuel?

¹⁰ Fooka Munywani w’omwegi wawe. Kikuru muno kwoleka omwegi wawe ngu n’omufaaho. Habwaki? Tekerezaaho ebigambo bya Manuel, arukwikara omu Mexico. Obw’arukwijuka eby’abaireho obwakaba akyali mwegi wa Baibuli nagamba ati: “Buli murundi obutwabaga tutakatandikire kusoma, omwegesa wange yankaguzaaga nk’oku nabaga ndi. Yankonyeraga kuteekana kandi yanyikirizaaga kumugambira n’ebirukukwata ha nsonga ezindi. Mali nayehurraga ngu n’anfaaho.”

11. Abeegi baitu nibasobora kugasirwa bata kakuba tumara nabo obwire?

¹¹ Mara obwire n’abeegi baawe nk’oku Yesu yamazire obwire n’abahondezi be. (Yoh. 3:22) Obukiraaba kisemeriire, raaliza omwegi wawe omu ka yaawe kunywa na uwe caai, rundi kulya na uwe ekiihuro rundi kurora na uwe emu ha puroguraamu eza jw broadcasting. Omwegi wawe nasobora kusiima muno kakuba omuraaliza  omu kasumi nambere abanyabuzaale be hamu n’abanywani baba nibajaguza ebijaguzo ebitarukusigikirra ha misingi ya Baibuli. Kazibwe arukwikara omu Uganda nagamba ati: “Nintekereza ngu ekicweka eky’ebintu byona ebinayegere hali Yahwe nkabyega kuraba omu kumara obwire n’omwegesa wange kandi ebindi omu kwega kwange. Nkarora omulingo Yahwe afaaho muno abantu be kandi nk’oku baine okusemererwa. Eki nanyowe nikyo nkaba ningonza omu bwomeezi bwange.”

12. Habwaki tusemeriire kugenda n’abatebezi abarukwahukana obuturukuba nitugenda kwegesa omwegi?

¹² Raaliza abatebezi abarukwahukana obworaaba nogenda kwegesa omwegi wawe. Obwire obumu nitusobora kutekereza ngu kyanguhire kwegesa omwegi tuli itwenka rundi kwikara nitugenda n’omutebezi omu. N’obukiraaba ngu eki nikisobora kuba nikyo kitwanguhira kukora nikiija kugasira muno omwegi waitu kakuba obwire obumu tugenda n’abatebezi abarukwahukana. Dmitrii arukwikara omu Moldova nagamba ati: “Buli mutebezi ayasendekerezaaga omwegesa wange, yasoborraga ebintu omu mulingo ogw’embaganiza. Eki kikankonyera kurora emiringo endi ei nkaba ninsobora kuteeka omu nkora ebinayegaga. Kandi ntakwatwe muno ensoni obunagenzere omu rusorrokano rwange orw’okubanza habwokuba nkaba mazire ira kutangatangana nʼabʼoruganda baingi.”

13. Habwaki tusemeriire kukonyera omwegi waitu kwija omu nsorrokano?

¹³ Konyera omwegi wawe kugenda omu nsorrokano ez’ekitebe. Habwaki? Habwokuba Yahwe aragira abaheereza be kusorrokana hamu; kandi kiri kicweka ky’okuramya kwaitu. (Baheb. 10:24, 25) Kwongerra hali eki, ab’oruganda na banyaanya itwe ka yaitu ey’omwoyo. Obutuba tuli nabo omu nsorrokano, tusisana nkabali omu ka nituliira hamu ekiihuro ekirungi. Obwokonyera omwegi wawe owa Baibuli kugenda omu nsorrokano oba n’omukonyera kuteera orutambu orukooto oruramukonyera kuhika ha kubatizibwa. Baitu nikisobora kumugumira kuteera orutambu oru. Ekitabu Wegondeze omu Bwomeezi Ebiro n’Ebiro! nikisobora kita kukonyera omwegi kusingura ebizibu ebimulemesa kwija omu nsorrokano?

14. Nitusobora tuta kwekambisa omwegi waitu kwija omu nsorokano?

¹⁴ Kozesa isomo 10 eriri omu kitabu Wegondeze omu Bwomeezi Ebiro n’Ebiro! kwekambisa omwegi wawe. Ekitabu kinu obukikaba kitakaturukiibwe, abatebezi abamu bakasabwa kukozesa isomo linu kwegesa abeegi baabo. Bakagamba ngu likakora kurungi muno kandi likakonyera abeegi baabo kugenda omu nsorrokano. Baitu otalinda kubanza kuhika omu isomo erya 10 nukwo okaraaliza omwegi wawe kwija omu nsorrokano. Tandikiraho omu bwangu kumuraaliza kandi gumizaamu n’omuraaliza butoosa. Buli mwegi araba omu bizibu ebirukwahukana. Nahabweki, teeka omutima ha byetaago by’omwegi wawe kandi orole obuharaba haroho omulingo gwona ogw’osobora kumukonyera. Otahwamu amaani obu hararabaho akasumi atakatandikire kuziijamu. Gumiisiriza, baitu ogumizeemu n’omuraaliza.

15. Omwegi waitu nasobora kuba natiina ki?

¹⁵ Noijuka obuwahuliire otiiniremu kufooka omu h’Abakaiso ba Yahwe? Obundi okaba noyehurra ngu torukwija kusobora kutebeza omu rwijwire. Obundi okatiina ngu abanyabuzaale rundi abanywani be nibaija kukuhakaniza. Obukiraaba nukwo kiri, nosobora kwetegereza omulingo omwegi wawe owa Baibuli arukwehurra. Yesu akagamba ngu abantu abamu bakaba nibasobora kutunga okutiina nk’oku, baitu akatererra abahondezi be kutaikiriza okutiina kubalemesa kuheereza Yahwe. (Mat. 10:16, 17, 27, 28) Yesu akakonyera ata abahondezi be kusingura  okutiina okubakaba baine? Kandi nosobora ota kuhondera ekyokurorraho kye?

16. Nitusobora kutendeka tuta omwegi waitu kugambiraho abandi eby’arukwega?

¹⁶ Mpora mpora, tendeka omwegi wawe kubazaaho okwikiriza kwe. Abegeswa ba Yesu nibasobora kuba batiniire obuyabagambiire kugenda kutebeza. Baitu Yesu akabakonyera kuraba omu kubagambira abantu bakaba basemeriire kutebeza hamu n’obutumwa obw’okutebeza. (Mat. 10:5-7) Nosobora ota kwegera ha kyokurorraho kya Yesu? Konyera omwegi wawe kumanya abantu abasobora kutebeza. Ekyokurorraho, mukaguze obwaraaba amanyire omuntu wena ow’asobora kugasirwa omu gamu h’amananu agayegere omu Baibuli. Hanyuma mukonyere kutekaniza kuraba omu kumugambira nk’oku asobora kugambira abandi amananu ago. Obukiraaba kisemeriire, nimusobora kwerengesamu nimukozesa ebicweka “Abantu Abamu Bagamba” hamu na “Omuntu Nasobora Kukukaguza,” ebirukusangwa omu kitabu Wegondeze omu Bwomeezi Ebiro n’Ebiro! Obworakikora, teeka omutima ha kukonyera omwegi wawe kukozesa Baibuli kugarukamu omu mulingo ogwanguhire kandi ogw’amagezi.

17. Nitusobora tuta kukozesa Matayo 10:19, 20, 29-31 kukonyera omwegi waitu kwesiga Yahwe?

¹⁷ Konyera omwegi wawe kwesiga Yahwe. Yesu akagumya abegeswa be ngu Yahwe naija kubakonyera habwokuba n’abagonza. (Soma Matayo 10:19, 20, 29-31.) Ijukya omwegi wawe ngu na uwe Yahwe naija kumukonyera. Nosobora kumukonyera kwesiga Yahwe kuraba omu kusaba hamu na uwe ha bigendererwa bye. Franciszek arukwikara omu Poland nagamba ati: “Omwegesa wange yakiraga kubazaaho ebigendererwa byange omu saara ze, obunarozere omulingo Yahwe akaba n’agarukamu esaara ze, omu bwangu na nyowe nk’atandika kusaba. Obunkaba ninyetaaga kusaba ha mulimo gwange omuhyaka banyikirize ngendege omu nsorrokano hamu na ha rusorrokano orukooto orw’ebiro bisatu, nkarora omulingo Yahwe yankonyiremu.”

18. Yahwe ayehurra ata ha mulimo abegesa Abakristaayo ogu bakora?

¹⁸ Yahwe nafaaho muno abeegi baitu aba Baibuli. Amanyire omulingo abegesa Abakristaayo bekamba kukonyera abantu kwirra haihi na uwe kandi n’abagonza habw’obwekambi bwabo. (Is. 52:7) Obworaaba otaine omuntu ow’orukwegesa Baibuli omu kasumi kanu, naiwe nosobora kukonyera abeegi ba Baibuli kukurakurana bakahika ha kubatizibwa kuraba omu kusendekereza abatebezi abandi h’abeegi baabo.