Nk’azarwa ebiro by’okwezi 19, Maayi 1940, omu tawuni ya Amioûn, omu ihanga lya Lebanon. Hanyuma y’emyaka nke, eka yaitu ekafurukira omu rubuga rwa Tripoli, nambere nakuliire omu ka ey’erumu okugonza, okusemererwa, emanyire Yahwe, kandi n’emugonza. Ninyowe nkaba ndi macura omu baana bataano, abaisiki basatu hamu n’aboojo babiri. Hali bazaire bange kuserra sente tikiri nikyo kintu ekyali nikikirayo obukuru. Kwega Baibuli, kugenda omu nsorrokano, hamu n’okukonyera abandi kumanya hali Ruhanga nibyo bintu eby’ali nibikirayo obukuru omu ka yaitu.

Ekitebe kyaitu kikaba kirumu Abakristaayo baingi abakaba baseserweho amagita. Omu halibo arukwetwa Michel Aboud, nuwe y’ayebemberaga orusorrokano orw’ayetwaga book study. Akaba ayegiire amananu omu New York, kandi y’atandikaho omulimo gw’okutebeza omu Lebanon omu 1921. Ekindukukira kumwijukaho nugwo omulingo ogw’ekitiniisa yakonyiremu banyaanya itwe babiri abato abakaba barugire omu isomo lya Gilead​—Anne hamu na Gwen Beavor. Bakafooka banywani baitu nfe na nfe. Hanyuma y’emyaka nyingi nk’asemererwa muno obunatangatangaine Anne omu ihanga lya Amerika. Kandi nkongera n’atangatangana Gwen ow’akaba aswirwe Wilfred Gooch, kandi bakaba nibaheereza ha Beseeri ha itaagi lya Bungereza omu London.

Obunkaba kyali muto, omu Lebanon hakaba harumu Abakaiso ba Yahwe bake muno. Baitu tukekamba kutebeza abantu ebitukaba twegere kuruga omu Baibuli. Kinu tukakikora n’obukiraaba ngu tukaba nituhiganizibwa abamu h’abebembezi b’amadiini. Ninyijuka kurungi ebintu ebimu eby’atuhikireho.

Kiro kimu nyowe na munyaanya nyowe Sana tukaba nitutebeza omu kalina. Omupadiri akaija omu kalina nambere tukaba nitutebeza. Haroho omuntu aine kuba y’amwesere. Omupadiri katandika kujuma munyaanya nyowe. Omupadiri akakwatwa ekiniga kingi kandi yasindika Sana yayekulingura h’amatembero, yahutaara. Haroho omuntu ay’ateriire poliisi kandi poliisi ekaija yataho obulyo kurora ngu Sana atungire obukonyezi. Bakatwara omupadiri onu ha poliisi, kandi bamusanga aine emundu. Omukuru wa poliisi akamukaguza ati: “Baitu iwe okora mulimo ki? Oyegesa abantu ebirukukwata hali Ruhanga, rundi obegesa kurwana?”

Ekintu ekindi ekindukwijuka kurungi nubwo ekitebe kyaitu ky’apangisize baasi kututwara kutebeza omu tawuni ya hara. Tukaba nitwegondeza omu buheereza kuhikya omupadiri obuyahuliire ngu nitutebeza, kandi y’asorooza abantu baije kuturumba. Bakatutalibaniza muno, batuteera n’amabaale, kandi isenyowe bakamuhutaaza. Ninyijuka nimurora h’amaiso wena aijwire esagama. Akagaruka ha baasi na nyina nyowe kandi itwena tukabahondera tweralikiriire. Baitu tindyebwa, ebigambo nyina nyowe yagambire obwakaba n’asimuura isenyowe, akagamba ati: “Yahwe, caali obaganyire. Tibarukumanya ekibarukukora.”

Ha murundi ogundi tukagenda omu tawuni nambere twazaliirwe kubungira abanyabuzaale. Obutwahikireyo, tukasanga omu ka ya isenkuru nyowe bishopu, omunyadiini ruranganwa. Bishopu akaba akimanyire ngu bazaire bange Bakaiso ba Yahwe. Omu boona akakomamu nyowe n’obukiraaba ngu nkaba nyine emyaka mukaaga. Akagamba ati: “Iwe, habwaki otakabatiziibwe?” Nk’amugarukamu ngu nkaba kyali mwana muto, kandi kusobora kubatiziibwa nkaba ninyetaaga kumanya ebirukukiraho ha Baibuli hamu n’okutunga okwikiriza okugumire. Ekinamugarukiremu kitamusemeze, nahabweki akagambira isenkuru nyowe ngu nkaba murabizeemu amaiso.

Baitu ebintu ebibi nka binu tibyakiraga kubaho. Kutwarra hamu abantu ba Lebanon barungi kandi baine amakune. Nahabweki tukasobora kubaza n’abantu baingi ebirukukwata ha Baibuli, kandi n’okutunga abeegi ba Baibuli baingi.

Obunkaba kyali omu isomero, ow’oruganda omusigazi kuruga omu Venezuela akabunga omu Lebanon. Yaijaga omu nsorrokano z’ekitebe kyaitu kandi akanywana munyaanya nyowe Wafa. Hanyuma y’akasumi, bakataaha omu buswere kandi bagenda kwikara omu Venezuela. Omu bbaruha ze, Wafa akalengaho kusoonasoona isenyowe nukwo eka yaitu yoona efurukire omu Venezuela. Kinu akakikora habwokuba akaba n’agonza muno kwikara haihi naitwe. Hanyuma, tukacwamu twamuhuliiriza kandi twafuruka!

 Tukahika omu Venezuela omu 1953 kandi twatandika kwikara omu Caracas, haihi n’ekikaali kya purezidenti. Habwokuba nkaba kyali muto, n’asemererwaga muno obwire obumu obunaroraga purezidenti narabaho omu motoka ye ey’ebeeyi. Baitu kitanguhire bazaire bange kumanyira ihanga erihyaka, orulimi, enyetwaza, ebyokulya, hamu n’enyikara y’obwire. Baitu obu baali bakatandika kumanyira enyikara omu bwomeezi bwabo obuhyaka ekintu ekibi kikabaho.

Isenyowe akatandika kwehurra nk’omurwaire. Kinu kikatuhuniriza muno, habwokuba akaba ali musaija w’amaani kandi akaba aine obwomeezi oburungi. Tukaba tutakaroraga isiitwe arwaire. Hanyuma bakamusangamu kansa y’endurwa kandi bamusemeza. Eky’obusaasi akafa hanyuma ya wiiki emu, bamazire kumusemeza.

Kigumire muno kusoborra obujune obutwatungire. Nkaba nyine emyaka 13 yonka. Tukateerwa ibumba kanwa, kandi twayehurra oti rundi ensi yaitu yoona ehwaireho. Kumara akasumi, nyina nyowe kikamugumira kukiikiriza ngu iba akaba afiire. Baitu, tukakyetegereza ngu obwomeezi bwine kugumizaamu, kandi Yahwe akatukonyera kuguma. Nkamara emisomo yange eya siniya omu Caracas, obunkaba nyine emyaka 16, kandi nkaba ningonza muno kukonyera eka yaitu omu by’entaahya.

Hanyuma y’akasumi, munyaanya nyowe Sana akaswerwa Rubén Araujo, ow’akaba amaliirize emisomo ye eya Gilead kandi ow’akaba agarukire omu Venezuela. Bakacwamu kufurukira omu New York. Eka yaitu ekacwamu ngu ngende kusoma ha yunivasite, nahabweki nkagenda omu New York n’atandika kwikara na munyaanya nyowe hamu na iba, nukwo nsome nindugirra omu ka yabo. Munyaanya nyowe hamu na iba bakankonyera muno kukurakurana omu by’omwoyo obunkaba ninyikara nabo. Omu kitebe kyaitu ekya Brooklyn Spanish hakaba harumu ab’oruganda baingi abakuzire omu by’omwoyo. Kikansemeza muno kumanya Milton Henschel hamu na Frederick Franz; boona abaheerezaaga ha Beseeri eya Brooklyn.

Obunkaba ndi haihi kumalirra omwaka gwange ogw’okubanza ha yunivasite, nkatandika kutekerezaaho muno omulingo nkaba ninkozesaamu obwomeezi bwange. Nkaba nsomeroho kandi nyecumitirizeeho muno ebicweka kuruga omu Watchtower ebirukubazaaho Omukristaayo kuba n’ebigendererwa ebirungi omu bwomeezi bwe. Nkarora okusemererwa bapayoniya hamu na Beseeri abakaba bali omu kitebe kyaitu okubakaba baine, kandi na nyowe eki nikyo nkaba ningonza. Baitu nkaba ntakabatiziibwe. Hakarabaho akasumi kake nakyetegereza ngu kikuru muno mpeyo obwomeezi bwange hali Yahwe. Kinu nka kikora, kandi n’abatiziibwa ebiro by’okwezi 30 Maaci 1957.

Hanyuma y’okuteera orutambu oru orukuru, nk’atekerezaaho orutambu rundi orukaba ningonza kuteera​—oru nurwo orw’okutaaha obuheereza obw’akasumi koona. Mali nkaba ningonza kufooka payoniya, baitu eki kikaba nikigenda kuguma. Nkaba ningenda kusobora nta kuheereza nka payoniya kandi h’akaire nuko kamu nkahikiriza emisomo yange eya yunivasite? Nyowe hamu n’eka yange tukahandiikirangana ebbaruha nyingi ezirukukwata ha ncwamu yange ey’okuleka emisomo yange eya yunivasite, nkagaruka Venezuela, kandi nk’afooka payoniya.

 Nkagaruka omu Caracas omu Juuni 1957. Baitu nkakirora ngu enyikara ey’eka yaitu ekaba etali nungi. Ekaba neyetaaga obukonyezi omu by’entaahya obw’omuntu ondi. Kiki ekinkaba ninsobora kukora kukonyera? Bakampa omulimo omu bbanka, baitu nkaba ningonza muno kufooka payoniya. Kandi enu niyo ensonga habwaki nkaba ngarukire. Nkacwamu byona kubikora. Kumara emyaka nyingi, nakoraga obwire bwona omu bbanka, kandi mpereeza nka payoniya. Nkaba ntakatungaga bingi eby’okukora kandi n’okusemererwa kwingi nk’okunatungire!

Nk’atunga okusemererwa kwingi obunatangatangaine kandi n’ataaha omu buswere na Sylvia, munyaanya itwe arukuzooka kurungi muno arukuruga German kandi ayagonzaaga muno Yahwe. Akaba afurukiire Venezuela hamu n’abazaire be. Hanyuma y’obwire, tukazaara abaana babiri mutabani waitu Michel (Mike), hamu na muhara waitu Samira. Nk’atandika n’okurolerra nyina nyowe, akatandika kwikara naitwe. Nobukiraaba ngu nkaba nyine kuleka kuheereza nka payoniya kusobora kuhikiiriza obujunanizibwa obw’eka yange, nk’agumizaamu ninyekamba muno omu buheereza. Nyowe hamu na Sylvia twaheerezaaga nka bapayoniya abasagiki buli murundi obutwabaga tutungire liivu kuruga ha mirimo yaitu.

Abaana bange bakaba bakyali omu isomero nambere ekimbalizeehoga ha kubanza ky’aberiireho. Amananu gali nkaba ndi kurungi muno omu by’entaahya, kandi n’abantu abandi abakoraga omu bbanka ez’embaganiza bantekamuga ekitiinisa. Baitu, ekikuru muno nkaba ningonza kurorwa nk’omuheereza wa Yahwe. Nkaikara nintekerezaaho muno ekinsobora kukora kurora abantu bandora omu mulingo ogu. Nyowe hamu na mukazi wange tukaikarra twabazaaho entaahya yaitu. Kakuba nakulekere omulimo gwange ha bbanka, nkaba ningenda kutunga akasiimo akasente nyingi muno. Habwokuba tukaba tutaine mabanja, tukakirora ngu kakuba tworobya obwomeezi baitu twakubaire na sente ezirukumara kuturolerra kumara akasumi kaingi.

Kyali kitanguhire kukora encwamu egi, baitu mukazi wange omugonzebwa, hamu nanyina nyowe bakagisagika. Nahabweki nkaba ningenda kwongera kufooka payoniya ow’akasumi koona. Nk’asemererwa muno! Nkaba ningenda kutandika kuheereza nka payoniya, baitu tukatunga amakuru agatukaba tutarukunihira.

Kiro kimu dakitaali waitu akakigumya ngu Sylvia akaba aine enda. Kikatuhuniiriza itwena! Kandi kikatusemeza muno; baitu nk’atekerezaaho n’encwamu yange ei nkaba nkozere ey’okufooka payoniya. Nkaba ninkyasobora kufooka payoniya? Omu kasumi kake tukatandika kulindirra n’ekihika omugenyi omuhyaka  omu ka yaitu. Baitu nkaba ninkyayekaguza obundaaba ninkyasobora kuheereza nka payoniya?

Hanyuma y’okubazaaho ebigendererwa byaitu, tukacwamu ngu ngumizeemu nfooke payoniya. Mutabani waitu Gabriel akazaarwa omu Apuli 1985. Baitu nabwo nkahuumura ha omulimo gwange ogwa bbanka, kandi n’atandika kuheereza nka payoniya ow’akasumi koona omu Juuni 1985. Hanyuma y’akasumi, nk’atandika kuheereza h’Akatebe k’Itaagi. Baitu ofiisi y’itaagi ekaba etali omu Caracas, eki kikaba nikimanyisa kugenda orugendo rwa miro 50 (80 km) ebiro bibiri rundi bisatu buli wiiki.

Ofiisi y’itaagi ekaba eri omu tawuni ya La Victoria, nahabweki tukacwamu nk’eka kufuruka tugende La Victoria nukwo tube haihi na Beseeri. Egi ekaba mpindahinduka y’amaani habwaitu itwena. Ningonza muno kandi ninsiima muno eka yange. Habwokuba entekereza yabo enungi ekankonyera muno. Munyaanya nyowe Baha akehayo kurolerra nyina itwe. Mike akaba aswire, baitu Samira na Gabriel bakaba nibakyaikara naitwe omu ka. Nahabweki kufurukira omu La Victoria kikamanyisa kulekaho banywani baabo omu Caracas. Kandi ekindi, omugonzebwa wange Sylvia akaba aine kumanyira kwikara omu katawuni akataito hatali omu rubuga orukooto. Kandi itwena tukaba twine kutandika kumanyira kwikara omu nju entaitoho. Ego, encwamu ey’okufuruka kuruga Caracas kugenda La Victoria ekatwarramu ebintu bingi.

Baitu ebintu bikongera by’ahinduka. Gabriel akaswera, kandi Samira akatandika kwikara wenka. Hanyuma nyowe hamu Sylvia tukaraalizibwa kugenda ha Beseeri omu 2007, kandi nuho nituheereza kuhika na hati. Mike, mutabani waitu omukuru n’aheereza nk’omugurusi w’ekitebe, kandi uwe na mukazi we Monica nibaheereza nka bapayoniya ab’akasumi koona. Gabriel n’aheereza nk’omugurusi omu kitebe, akandi uwe na mukazi we Ambra, nibaikara omu Italy. Samira, n’aheereza nka payoniya ow’akasumi koona, kandi akonyera kuheereza ha Beseeri ali omu ka ye.

Ego, nkozere encwamu nyingi ez’amaani omu bwomeezi bwange. Baitu tindukweijukya. Nakwongiire nkora encwamu nizo zimu. Ninsiima muno habw’emigisa hamu n’obujunanizibwa obutungire omu kuheereza Yahwe. Kumara emyaka, nyetegeriize obukuru obwokuba n’enkoragana ey’amaani na Yahwe. Encwamu eziturukwetaaga kukora kazibe ntaito rundi z’amaani Yahwe nasobora kutuha obusinge “oburukukira okumanywa kwona.” (Baf. 4:6, 7) Nyowe hamu na Sylvia nitugonza muno kuheereza ha Beseeri, kandi nitwehurra ngu Yahwe atuhaire omugisa habw’encwamu ezitwakozere, habwokuba tukamwebembeza omu bwomeezi bwaitu.