1. Kiki Yahwe eky’akoliire buli omu haliitwe?

YAHWE acunzire buli omu haliitwe kwija nambere ali. (Yoh. 6:44) Tekerezaaho eki ekikirukumanyisa. Yahwe obuyayekebiijire obuhumbe n’obuhumbe obw’abantu abali omu nsi, akarora omuli iwe ekintu eky’omuhendo​—eki nikyo omutima omurungi ogukaba nigusobora kumugonza. (1 Byom. 28:9) Yahwe akumanyire, n’akwetegereza, kandi n’akugonza. Eki kanikigarramu amaani!

2. Kyokurorraho ki Yesu ekiyakozeseze kwoleka omulingo Yahwe arukufaaho buli emu ha ntaama Ze?

² Yahwe n’akufaaho muno kandi n’afaaho Abakristaayo bagenzi baawe boona. Kukukonyera kwetegereza kinu, Yesu akalengesaniza Yahwe n’omuliisa. Kakuba entaama 1 omu ntaama 100 ebura kuruga omu igana, omuliisa akora ki? Naija ‘kusiga ziri ekyenda mu mwenda, agende ha nsozi, aserre egi enyakubuzire.’ Omuliisa obw’azoora entaama egi tagikwatirwa ekiniga. Baitu asemererwa. Eki nikitwegesa ki? Buli ntaama yoona nkuru muno hali Yahwe. Yesu akagamba ati: “Isenyowe ali omu iguru, tarukwenda omu hali banu abato okuhwerekerra.”​—Mat. 18:12-14.

3. Nitwija kubazaaho ki omu kicweka kinu?

³ Titwakugondeze kuleetera ow’oruganda rundi munyaanya itwe wena kuhwamu amaani. Nitusobora tuta kwerinda kutabaijura abandi? Kiki ekitusobora kukora kakuba omuntu atusaaliza? Nitwija kugarukamu ebikaguzo ebi omu kicweka kinu. Baitu leka tubanze twegeho ebirukukiraho hali “banu abato” ababaziibweho omu Matayo esuura 18.

4. “Banu abato” nubo baha?

⁴ “Banu abato” nubo abegeswa ba Yesu ab’emyaka erukwahukana.  Boona nibasisana “nkabana abato,” habwokuba baikiriza kwegesebwa Yesu. (Mat. 18:3) Nobukiraaba ngu bakakurra omu biikaro ebirukwahukana, baine entekereza n’emiringo erukwahukana, boona nibakiririza omuli Yesu. Kandi na uwe, n’abagonza muno.​—Mat. 18:6; Yoh. 1:12.

5. Yahwe ayehurra ata omuntu obw’atabaijura rundi obw’asaaliza omu h’abantu Be?

⁵ “Banu abato” boona b’omuhendo hali Yahwe. Kwetegereza omulingo Yahwe ayehurra, tekerezaaho omulingo itwe twehurra h’abaana abato. B’omuhendo haliitwe. Tugonza kubalinda habwokuba tibaine maani, obukugu, rundi amagezi nk’abantu abakuru. Amananu gali, titugonza kurora omuntu wena nahikwaho akabi, baitu tusaalirwa muno rundi tubiihirwa omuntu obw’akora kubi omwana omuto. Omu mulingo nugwo gumu, Yahwe n’agonza kutulinda. Asaalirwa rundi akwatwa n’ekiniga omuntu obw’atabaijura rundi obw’asaaliza omu h’abantu Be!​—Is. 63:9; Mar. 9:42.

6. Kusigikirra ha 1 Abakolinso 1:26-29, abantu b’ensi barora bata abegeswa ba Yesu?

⁶ Omu mulingo ki ogundi abegeswa ba Yesu basisanamu ‘abato’? Kitekerezeeho, bantu ki ensi abetwara kuba b’omugaso? Abaguuda, abantu ruranganwa, hamu n’abaine obusobozi. Abegeswa ba Yesu tibakira kuba bati, nahabweki abantu b’ensi bateekereza ngu tibaine mugaso, rundi ‘bato.’ (Soma 1 Abakolinso 1:26-29.) Baitu Yahwe tabarora omu mulingo ogu.

7. Yahwe n’agonza tutwaze tuta ab’oruganda na banyaanya itwe?

⁷ Yahwe n’agonza abaheereza be boona, kababe baikaire nibamuheereza kumara emyaka nyingi rundi bahyaka omu mananu. Ab’oruganda na banyaanya itwe boona b’omugaso hali Yahwe, nahabweki naitwe basemeriire kuba b’omugaso haliitwe. Nitugonza kwoleka “okugonza hali ekitebe ky’Abakristaayo bagenzi baitu boona,” hatali kugonzaaho abamu. (1 Pet. 2:17, NW) Tusemeriire kukora kyona ekiturukusobora kubalinda hamu n’okubafaaho. Kakuba tukyetegereza ngu haroho omuntu wena outusaliize rundi outubiihize, titusemeriire kwefoora ngu busaho ekibaireho, nitugamba ngu omuntu ogu arahuka kubiihirwa kandi ngu asemeriire kutuganyira kandi hanyuma akabyebwa. Habwaki abamu nibasobora kubiihirwa? Obundi habw’omulingo baakuziibwemu, Abakristaayo abamu bateekereza ngu ba hansi muno ekibaletera kwikara niberalikirra abandi ekibarukubatekerezaaho. Abandi bahyaka omu mananu; nibasobora kuba batakegere omulingo basemeriire kutwazaamu obutahikirra bw’abantu abandi. Ensonga ey’etusaliize rundi ey’esaliize abandi tikiri kikuru, ekikuru kiri kukora kyona ekiturukusobora kugarraho obusinge. Ekindi, omuntu ow’ayanguha kubiihirwa bwangu, asemeriire kukyetegereza ngu enyetwaza enu teri nungi kandi asemeriire kulengaho kukora empindahinduka. Hanyuma naija kutunga okusemererwa hamu n’enkoragana enungi n’Abakristaayo bagenzi be.

8. Ntekereza ki ey’abantu bakaba baine omu kasumi ka Yesu ey’akwasireho abegeswa be?

⁸ Kiki eky’aletiire Yesu kubazaaho “banu abato”? Abegeswa be bakaba bamukagwize ekikaguzo kinu: “Noha mukuru omu bukama obwomu iguru?” (Mat. 18:1) Abayudaaya baingi omu kasumi ako batwaraga ebitiinisa kuba kintu ekikuru muno. Omukugu omu nagamba ati: “Kutekwamu ekitiinisa, hamu n’okufooka abantu ruranganwa nikyo kintu ekyali nikikirayo obukuru omu bwomeezi bwabo.”

9. Abegeswa ba Yesu bakaba basemeriire kukora ki?

⁹ Yesu akaba akimanyire ngu abegeswa be  basemeriire kwekamba muno kusobora kweyihamu entekereza ey’ekaba ekanyire muno omu Bayudaaya ey’okugonza ebitiinisa. Akabagambira ati: “Baitu inywe mutaliba muti; baitu anyakuli owa ha mutwe omuliinywe, afoke nkomuto; nogu anyakuli omukuru, afoke nkanyakuhereza.” (Luk. 22:26) Twetwaza nk’abato ‘obututeekereza [ngu] bataahi baitu nibatukira.’ (Baf. 2:3) Obutweyongera kukurakuraniza entekereza nk’egi tweyongera kwerinda kutabaijura abandi.

10. Buhabuzi ki obwa Paulo obutusemeriire kutaho omutima?

¹⁰ Ab’oruganda na banyaanya itwe boona haroho omulingo barukutukiramu. Kyanguhire kurora omulingo barukutukiramu kakuba tuteeka omutima ha miringo yabo enungi. Tusemeriire tuteekaho omutima obuhabuzi obw’omukwenda Paulo y’ahaire Abakolinso, akagamba ngu: “Noha yakwahuraineho [abandi]? Kandi onyina kintu ki ekyotarahairwe? Kandi oraba wahairwe, kiki oyenyumiza nkotahairwe?” (1 Kol. 4:7) Nahabweki titusemeriire n’akake kuleetera abantu abandi kutwegomba rundi kwerora nk’abarukukira abandi. Kakuba ow’oruganda aba amanyire kuha embazo enungi, rundi munyaanya itwe aine ekisembo eky’okutandikaho abeegi ba Baibuli, boona basemeriire kwanguha ekitiinisa kukigarurra Yahwe.

11. Kiki Yesu ekiyatwegeseze omu kyokurorraho kye eky’omukama hamu n’omwiru we?

¹¹ Hanyuma ya Yesu kuhabura abahondezi be kutatabaijura abandi, akaha ekyokurorraho ekirukukwata ha mukama hamu n’omwiru we. Omukama akaganyira omwiru onu, ibanja ery’amaani ery’akaba atasobora kusasura. Hanyuma omwiru ogu wenyini, akanga kuganyira omwiru mutaahi we ow’akaba aine ibanja lye eritaito. Ha kumalirra, omukama akanaga omwiru ogu ow’ataine mbabazi omu nkomo. Isomo ki eriturukwega? Yesu akagamba ati: “Nukwo ati Isenyowe ali omu iguru, alibakora inywe, obumuraba mutarukuganyira inywena omu mitima bene banyu.”​—Mat. 18:21-35.

12. Obutwanga kuganyira tusaaliza tuta abandi?

¹² Ebikorwa by’omwiru ogu bitasaalize uwe wenka, baitu bikasaaliza n’abandi. Eky’okubanza, atoleke omwiru mutaahi we embabazi kuraba ‘omu kumunaga omu nju y’enkomo, obwalikahikya okumara ibanja.’ Ekyakabiri, akasaaliza abairu abandi abaarozere ekiyakozere. “Abairu rubale abatahibe, obubaboine ebibaireho, babihirwa muno.” Omu mulingo nugwo gumu, ebikorwa byaitu bikwataho abandi. Kakuba omuntu atukora kubi kandi tukanga kumuganyira, kiki ekisobora kubaho? Eky’okubanza, tusaaliza omuntu ogu kurabira omu kwanga kumuganyira, kumwetantara, hamu n’okwanga kumwoleka okugonza. Ekyakabiri, tuleetera abantu omu kitebe kwehurra kubi obubakyetegereza ngu titukukoragana n’omuntu ogu.

13. Ekyokurorraho ekya payoniya omu nikikwegesa ki?

¹³ Obutuganyira ab’oruganda na banyaanya itwe twegasira kandi tugasira n’abandi. Eki nikyo kyahikire ha payoniya omu outurukwija kweta Crystal. Munyaanya itwe ondi omu kitebe akamukora kubi. Obw’arukwijuka eby’abaireho Crystal nagamba ati: “Obwire obumu y’abazaaga ebigambo ebirukusaaliza muno, kandi kyasisanaga oti rundi n’ansara n’omuhyo. Nk’abatarukugonza n’okukora na uwe omu buheereza. Nk’atandika kuleka kwekamba omu buheereza, kandi n’okusemererwa kukampwaho.” Crystal akateekereza ngu akaba ahikire kubiihirwa. Baitu ataikale abihiririirwe munyaanya itwe onu kandi Crystal atetekeho muno omutima. N’obwebundaazi akateeka omu nkora obuhabuzi obuli omu kicweka “Ganyira Kuruga ha Mutima” ekiri omu Watchtower  eya Okitobba 15, 1999. Akaganyira munyaanya itwe ogu. Crystal nagamba ati: “Hati nkyetegeriize ngu itwena nitulengaho kujwara omuntu omuhyaka, kandi Yahwe ayetekaniize kutuganyira buli kiro. Ninyehurra oti rundi bantwire omugugu ogurukwingana ensi yoona h’amabega gange. Hati nyongiire natunga okusemererwa.”

14. (a) Kusigikirra ha Matayo 18:21, 22, kizibu ki omukwenda Petero eky’asobora kuba akaba aine? (b) Kiki ekisobora kutukonyera kakuba tuba twine ekizibu nikyo kimu?

¹⁴ Tukimanyire ngu tusemeriire kuganyira; kandi eki nikyo ekintu ekihikire ekitusemeriire kukora. Baitu nikisobora kutugumira kukikora. Nikisoboka kuba ngu obwire obumu n’omukwenda Petero nukwo yayehurraga ati. (Soma Matayo 18:21, 22.) Kiki ekisobora kutukonyera? Eky’okubanza, wecumitirizeeho emirundi yoona Yahwe ey’akuganyire. (Mat. 18:32, 33) Yahwe tasemeriire kutuganyira, baitu akikora ayegondiize. (Zab. 103:8-10) Kandi, “naitwe kituhikiriire kugonzangana.” Nahabweki kuganyira tikiri kintu ekitusobora kucwamu kukora rundi kutakora. Nituteekwa kuganyira ab’oruganda na banyaanya itwe. (1 Yoh. 4:11) Ekyakabiri, cumitirizaaho ekibaho obutuganyira. Tukonyera omuntu ow’aba atusobiize, tuleetaho obumu omu kitebe, tulinda enkoragana yaitu na Yahwe, kandi twetuura omugugu ogw’amaani. (2 Kol. 2:7) Eky’okumalirra, saba hali Yahwe ow’aturagira kuganyira. Otaikiriza Sitaani kutabangura obusinge hagati yaawe n’Abakristaayo bagenzi baawe. (Bef. 4:26, 27) Nitwetaaga obukonyezi bwa Yahwe kusobora kutunga obusinge omu kitebe.

15. Kusigikirra ha Abefeso 4:32, kiki ekitusemeriire kukora kakuba ow’oruganda rundi munyaanya itwe akora ekintu kikatubiihiza muno?

¹⁵ Baitu hati, kakuba haroho Omukristaayo mugenzi wawe ow’akozere ekintu ekikubihiize muno? Kiki eky’osemeriire kukora?  Kora kyona eky’orukusobora kwikazaaho obusinge. Saba hali Yahwe omugambire omulingo orukwehurra. Musabe aheereze omuntu ow’akubihiize emigisa kandi akukonyere kurora emiringo enungi ey’omuntu ogu​—emiringo Yahwe ey’agonzaaho omuntu ogu. (Luk. 6:28) Obworaaba otasobora kwebwa ekintu Omukristaayo mugenzi wawe eky’akozere, tekerezaaho omulingo ogurukukira oburungi ogw’osobora kubazaamu na uwe. Kandi kirungi kwikara notekereza ngu ow’oruganda atakigenderre kukusaaliza. (Mat. 5:23, 24; 1 Kol. 13:7) Kandi obw’orabaza na uwe, kirungi otekereze ngu aine ebigendererwa ebirungi. Baitu kandi kakuba aba atarukugonza kugarraho obusinge? Gumizaamu n’omugumisiiriza. Otateekereza ngu ow’oruganda mugenzi wawe tarukwija kuhinduka. (Soma Abefeso 4:32.) Ekirukukira obukuru, otayahura enzigu, habwokuba eki nikisobora kusiisa enkoragana yaawe na Yahwe. Otaliikiriza ekintu kyona kukutabaijura. Obw’okora eki, oyoleka ngu nogonza Yahwe kukira ekintu ekindi kyona.​—Zab. 119:165.

16. Itwena twine bujunanizibwa ki?

¹⁶ Nitusiima muno habw’omugisa ogutwine ogw’okuheereza Yahwe omu bumu ‘nk’igana limu’ hansi ‘y’omuliisa omu’! (Yoh. 10:16) Akatabu Organized to Do Jehovah’s Will, ha rupapura 165, nikagamba ngu: “Habwokuba noyegondeza omu bumu obu, osemeriire kuhikiiriza obujunanizibwa bwawe obw’okubulinda.” Nahabweki, tusemeriire “kwetendeka kurora ab’oruganda na banyaanya itwe omu mulingo Yahwe abaroramu.” Hali Yahwe itwena tuli ‘bato’ ab’omuhendo. Naiwe nukwo orora oti Abakristaayo bagenzi baawe? Buli kimu kyona eky’okora kubakonyera hamu n’okubafaaho Yahwe akirora, kandi ky’omuhendo hali uwe.​—Mat. 10:42.

17. Kiki ekitucweriiremu kimu kukora?

¹⁷ Tugonza Abakristaayo bagenzi baitu. Nahabweki tucweremu kimu kutaletera bagenzi baitu, enkonge rundi ekinyakubatabaijura. (Bar. 14:13) Turora ab’oruganda na banyaanya itwe kabarukutukira, kandi nitugonza kubaganyira kuruga ha mutima. Tutaliikiriza abantu abandi kututabaijura. Oihireho, leka tucwemu ‘kuhonderaga eby’obusinge, n’ebyokwekambisangana.’​—Bar. 14:19.