1. Habwaki abaheereza ba Yahwe obwire obumu behurra baine amasu?

OBWIRE obumu baingi omuli itwe tukwatwa amasu. Habw’abantu abamu, enyehurra enu ehwaho bwangu. Baitu abandi, nibasobora kumara obwire bwingi baine amasu. Nitusobora kwehurra twine amasu n’obutuba tuli n’abantu baingi. Abamu kibagumira kutunga abanywani omu kitebe ekihyaka. Abandi baruga omu maka agakoraga buli kimu kyona hamu, nahabweki bakwatwa amasu obubaruga h’abanyabuzaale baabo bakagenda kwikara hara. Abandi behurra kubi habwokuba baba batakyasobora kumara obwire n’omuntu oubagonzaaga ayafiire. Kandi Abakristaayo abamu, muno muno abo abakyali bahyaka omu mananu, behurra banagiriziibwe abanyabuzaale hamu n’abanywani baabo abaakara obubabecwaho rundi obubabahiganiza.

2. Bikaguzo ki ebiturukugenda kugarukamu?

² Yahwe amanyire kandi nayetegereza buli kimu kyona ekirukutukwataho. Obutuba twine amasu, aba akimanyire, kandi nagonza kutukonyera. Yahwe atukonyera ata? Kiki ekitusobora kukora kwekonyera? Kandi nitusobora tuta kukonyera abandi omu kitebe kyaitu abaine amasu? Leka tubazeeho eby’okugarukamu eby’ebikaguzo binu.

3. Yahwe akooleka ata ngu n’afaaho Eriya?

³ Yahwe n’agonza abaheereza be boona kutunga okusemererwa. Yahwe ali haihi na buli omu omuli itwe, kandi akyetegereza obutwehurra tusalirwe rundi tuhoirwemu amaani. (Zab. 145:18, 19) Tekerezaaho omulingo Yahwe yataireho muno omutima nabbi Eriya. Omusaija ogu omwesigwa akaba aroho omu kasumi akakaba kagumangaine omu Isaleri. Abaheereza ba Yahwe bakaba nibahiganizibwa muno, kandi abanyanzigwa ab’amaani bali nibagonza kwita Eriya. (1 Bakam. 19:1, 2) Ekintu ekindi  ekisobora kuba ky’atalibaniize Eriya, nukwo kutekereeza ngu nuwe nabbi wenka ow’akaba asigaireho ow’arukuheereza Yahwe. (1 Bakam. 19:10) Aho naaho Ruhanga aine ekiyakozereho kukonyera Eriya. Yahwe akasindika malaika we kugumya nabbi we ngu akaba atali wenka​—ngu hakaba h’akyaliyo Abaisaleri abandi baingi abarukutiina Ruhanga!​—1 Bakam. 19:5, 18.

4. Marako 10:29, 30 n’eyoleka eta omulingo Yahwe afaaho abaheereza be abataine bukonyezi bw’abanyabuzaale baabo rundi abanywani?

⁴ Yahwe akimanyire ngu obutucwamu kumuheereza, abamu omuli itwe twefeereza ebintu bingi. Kimu ha bintu ebitusobora kufeerwa nubwo obukonyezi kuruga omu banyabuzaale baitu abatali omu mananu, hamu n’abanywani baitu abaakara. Obundi habw’okweralikirra, omukwenda Petero akakaguza Yesu ati: “Itwe tukasiga byona, twakuratira iwe; naitwe tulitunga ki?” (Mat. 19:27) Omu mulingo gw’embabazi Yesu akagambira abegeswa be ngu ekitebe kikaba nikigenda kuba eka yabo ey’omwoyo. (Soma Marako 10:29, 30.) Kandi Yahwe omutwe gw’eka enu ey’eby’omwoyo, naraganiza ngu naija kukonyera abo boona abarukugonza kumuheereza. (Zab. 9:10) Tekerezaaho ebintu ebimu eby’omugaso eby’osobora kukora kusobora kutunga obukonyezi bwa Yahwe obworukuba n’orwanisa amasu.

5. Tugasirwa tuta obututeeka omutima ha mulingo Yahwe arukuturolerramu?

⁵ Teeka omutima ha mulingo Yahwe arukukurolerramu. (Zab. 55:22) Kinu nikiija kukukonyera kukirora ngu toli wenka. Munyaanya itwe atali omu buswere arukwetwa Carol, * anyakwine abanyabuzaale abatali omu mananu nagamba ati: “Obunyijuka kandi nkecumitirizaaho omulingo Yahwe ankonyire kuraba omu birengo kinkonyera kwehurra ngu tindi nyenka. Kandi eki kingumya ngu Yahwe naija kugumizaamu n’ankonyera n’omu kasumi ak’omu maiso.”

6. 1 Petero 5:9, 10 n’esobora eta kukonyera abo abaine ekizibu ky’amasu?

⁶ Tekerezaaho omulingo Yahwe arukukonyeramu Abakristaayo bagenzi baawe abaine ebizibu. (Soma 1 Petero 5:9, 10.) Ow’oruganda  Hiroshi ow’amazire emyaka nyingi mananu, baitu ataine munyabuzaale wena omu mananu, nagamba ati: “Omu kitebe kyanguhire kukirora ngu buli omu wena aine ebizibu. Kukimanya ngu itwena nitwekamba kuheereza Yahwe nikisobora kugarramu amaani itwe ab’ataine abanyabuzaale omu mananu.”

7. Okusaba kukukonyera kuta?

⁷ Ikara oine entekaniza enungi ey’okwejumbira omu bintu eby’omwoyo. Kinu nikitwarramu kugambira Yahwe omulingo gwonyini ogw’orukwehurramu. (1 Pet. 5:7) Munyaanya itwe arukwetwa Massiel, nagamba ati: “Kimu ha bintu ebikuru muno ebikyakizireyo kunkonyera kugumira amasu nukwo kusaba Yahwe kuruga ha mutima.” Munyaanya itwe omu omuto, obuyacwiremu kuheereza Yahwe akehurra aine amasu habwokuba abanyabuzaale be bakaba batarukuheereza Yahwe. Nagamba ati: “Yahwe akaba ali Ise nyowe kwo, namusabaga emirundi nyingi buli kiro, kandi namugambiraga omulingo gwonyini ogu nabaga ninyehurramu.”

8. Kusoma n’okwecumitirizaaho Ekigambo kya Ruhanga kikukonyera kita?

⁸ Soma Ekigambo kya Ruhanga obutoosa kandi oyecumitirizeeho ebyahandiikirwe eby’embaganiza ebirukwoleka okugonza Yahwe okw’akwiniire. Munyaanya itwe Bianca, ow’arukugumira ebigambo ebirukumaramu amaani kuruga omu banyabuzaale be, nasoborra ati: “Kusoma n’okwecumitirizaaho ebyokurorraho kuruga omu Baibuli hamu n’eby’abaheereza ba Yahwe ab’omu kasumi kanu abali omu nyikara nk’eyange mali kinkonyire muno.” Abakristaayo abamu bakwata omu mutwe ebyahandiikirwe ebirukuhuumuza muno, nka Zabuli 27:10 hamu na Isaya 41:10. Abandi bakisangire ngu kuhuliiriza amaraka ag’ebintu ebibarukugenda kwega kibakonyera kuleka kwehurra baine amasu obubaba nibetekaniriza ensorrokano rundi nibesomesa Baibuli.

9. Kugenda omu nsorrokano kikugasira kita?

⁹ Kora kyona ekirukusoboka kugenda omu nsorrokano obutoosa. Noija kugasirwa omu bintu ebirukugarramu amaani eby’orayega, noija n’okutunga n’omugisa ogw’okumanya Abakristaayo bagenzi baawe. (Baheb. 10:24, 25) Massiel, outusangirwe tubalizeeho, nagamba ati: “Nobukiraaba ngu nkaba nyine ensoni nyingi muno, nkacwamu kugendaga omu nsorrokano zoona kandi n’okuha eky’okugarukamu. Kinu kikankonyera kwirra haihi ab’oruganda na banyaanya itwe omu kitebe.”

10. Habwaki kikuru kufoora Abakristaayo abesigwa baywani baitu?

¹⁰ Foora Abakristaayo abesigwa banywani baawe. Serra abanywani omu kitebe abosobora kwegeraho, nobukiraaba baine emyaka erukwahukana n’eyaawe rundi bakakurra omu nyikara erukwahukana n’eyaawe. Baibuli n’etwijukya  ngu amagezi “gaba nabasaija abagurusire [n’abakaikuru].” (Yob. 12:12) N’abakuzire omu myaka nibasobora kwega bingi kuruga h’abato abali omu kitebe. Daudi akaba ali muto muno ha Yonasani, baitu eki kitabatange kufooka banywani nfe na nfe. (1 Sam. 18:1) Daudi na Yonasani bakakonyerangana kuheereza Yahwe, n’obukiraaba ngu bakaraba omu bizibu eby’amaani. (1 Sam. 23:16-18) Munyaanya itwe arukwetwa Irina kandi omu kasumi kanu ow’ataine omunyabuzaale wena omu mananu, nagamba ati: “Ab’oruganda na banyaanya itwe, mali nibasobora kufooka bazaire baitu ab’omwoyo rundi bagenzi baitu. Yahwe nasobora kubakozesa kufooka eka eiturukwetaaga.”

11. Kiki eky’osemeriire kukora kusobora kutunga abanywani nfe na nfe?

¹¹ Kutunga abanywani abahyaka nikisobora kuguma, kukira muno obworukuba oine ensoni. Munyaanya itwe Ratna, anyakwine ensoni, kandi ayayegere amananu n’obukiraaba ngu akaba nahakanizibwa, nagamba ati: “Nkaba nyine kukiikiriza ngu ninyetaaga obukonyezi bw’ab’oruganda na banyaanya itwe omu kitebe.” Nikisobora kuguma kugambiraho omuntu ondi enyehurra zaawe, baitu obw’okikora omuntu ogu ow’ogambiire n’asobora kufooka munywani wawe nfe na nfe. Banywani baawe nibagonza kukugarramu amaani kandi n’okukusagika, baitu nibetaaga obagambire omulingo basobora kukikoramu.

12. Obuheereza nibusobora kukukonyera buta kutunga abanywani abarungi?

¹² Omulingo ogumu ogw’osobora kutunga abanywani nugwo ogw’okutebeza hamu n’Abakristaayo bagenzi baawe. Munyaanya itwe Carol outusangirwe tubalizeeho nagamba ati: “Ntungire abanywani baingi abarungi, habw’okumara obwire na banyaanya itwe omu buheereza hamu n’omu mirimo endi ey’ekitebe. Kumara emyaka nyingi Yahwe ankonyire n’akozesa abanywani banu.” Obutwekamba kufoora Abakristaayo abesigwa banywani baitu mali kirugamu ebirungi. Yahwe akozesa abanywani nk’abo kukugarramu amaani obw’oba ohwirwemu amaani, ekyokurorraho obw’oba oine amasu.​—Nfu. 17:17.

13. Bujunanizibwa ki buli omu obwine omu kitebe?

¹³ Buli omu omu kitebe aine obujunanizibwa obw’okuleetaho obusinge kandi n’okwoleka abandi okugonza nukwo hatabaho omuntu wena ow’arukwehurra ngu anagiriziibwe. (Yoh. 13:35) Ebintu ebitukora hamu n’ebitubaza nibisobora kugarramu muno abandi amaani! Wetegereze munyaanya itwe omu ekiyagambire: “Obunayegere amananu, ekitebe kikafooka eka yange. Tinakusoboire kufooka omu h’Abakaiso ba Yahwe kakuba nkaba ntaine obukonyezi bwabo.” Kiki eky’osobora kukora kukonyera abo abataine abanyabuzaale baabo omu mananu kwehurra ngu bali kicweka ky’ekitebe?

14. Kiki eky’osobora kukora kunywana abahyaka?

¹⁴ Lengaho kunywana abahyaka. Nitusobora kutandika kukikora kurabira omu kutangirra omu mulingo ogw’embabazi abantu hamu n’ab’oruganda abahyaka abaija omu kitebe kyaitu. (Bar. 15:7) Baitu titusemeriire kugarukira ha kubaramukya kurungi kwonka. Nitugonza hanyuma y’akasumi kufooka banywani baabo nfe na nfe. Nahabweki ba w’embabazi kandi oyoleke ngu mali nofaaho abahyaka. Lengaho kwetegereza ebizibu ebibarukurabamu, baitu oyerinde kubakaguza ebikaguzo ebirabaswaza. Abamu nikisobora kubagumira kubazaaho omulingo barukwehurra, nahabweki otabahambiriza kubaza. Oihireho, omu mulingo ogw’embabazi bakaguze ebikaguzo ebirakukonyera kumanya omulingo barukwehurramu, kandi bahuliirize kurungi  obubaraaba nibakugarukamu. Ekyokurorraho, nosobora kubakaguza omulingo bayegeremu amananu.

15. Abakristaayo abakuzire omu by’omwoyo nibasobora bata kukonyera abandi omu kitebe?

¹⁵ Buli omu omu kitebe naija kukura omu by’omwoyo kakuba Abakristaayo abakuzire omu by’omwoyo, kukira muno abagurusi b’ekitebe, obubooleka ngu nibamufaaho. Munyaanya itwe Melissa, ayakonyirwe nyina kukurra omu mananu, nagamba ati: “Ninsiima muno ab’oruganda abaali bali nk’abaise nyowe, abamazire obwire hamu nanyowe kandi abanfiireho. Obumba ninyetaaga omuntu ow’okubaza na uwe, nyine omuntu ounsobora kuhikirra.” Ow’oruganda omuto arukwetwa Mauricio, ayayehuliire ngu anagirweho hanyuma y’ow’oruganda ay’amwegeseze Baibuli kufuka omu by’omwoyo, nagamba ati: “Abagurusi b’ekitebe bakankonyera muno kandi kinu kikankonyera muno. Babazaaga nanyowe butoosa. Batebezaaga hamu nanyowe, bangambiraga ebibabaga beegere kuruga omu kwesomesa kwabo okwa Baibuli, kandi tuzaana hamu n’emizaano.” Melissa hamu na Mauricio hati nibaheereza ha Beseri.

16-17. Miringo ki endi eitusobora kukonyeramu abandi?

¹⁶ Konyera omu miringo erukwahukana. (Bag. 6:10) Ow’oruganda Leo, arukuheereza omu ihanga eriri hara muno n’eka ye, nagamba ati: “Obwire oburukukira obwingi ekyoba noyetaaga kiba kikorwa kitaito eky’embabazi, omu kasumi akahikire. Ninyijuka kiro kimu nkatunga butandwa ya motoka. Nambere nahikiire omu ka, nkaba nyine ebitekerezo bingi. Baitu haroho ow’oruganda na mukazi we abandaliize kugenda omu ka yabo kulya nabo ekihuuro. Tindukwijuka ekitwaliire, baitu ekindukwijuka bakampuliiriza omu mulingo ogw’embabazi. Ha kumalirra nkehurra kurungi!”

¹⁷ Itwena tugonza kuba hamu n’Abakristaayo bagenzi baitu, kandi n’okubazaaho ebintu ebituhuliire omu mbazo ha nsorrokano enkooto ez’ekiro kimu rundi ez’ebiro bisatu. Baitu, Carol outusangirwe tubalizeeho nagamba ati: “Nyehurra nyine amasu kukira muno ha nsorrokano enkooto.” Habwaki? Nagamba ati: “Nobukiraaba ngu mbanyetoroirwe enkumi n’enkumi ez’ab’oruganda na banyaanya itwe, emirundi erukukira obwingi bakira kuba baikaliire hamu n’ab’omu maka gaabo. Obumbarora nyehurra nyine amasu maingi muno.”  Abamu kibagumira kugenda omu rusorrokano orukooto orw’ekiro kimu rundi orw’ebiro bisatu hanyuma y’okufeerwa omugonzebwa wabo. Haroho omuntu ow’omanyire ow’aine ebizibu nka binu? Habwaki otamuraaliza aketeranizaaho eka yanyu ha rusorrokano rukooto orahonderaho?

18. Nitusobora tuta kuteeka omu nkora 2 Abakolinso 6:11-13 obuturukuba nitukunira abandi?

¹⁸ Mara nabo obwire. Lengaho kumara obwire n’ab’oruganda na banyaanya itwe abarukwahukana, kukira muno abo abarukwehurra baine amasu. Nitugonza ‘tugalihye’ emitima yaitu, kukira muno h’abantu nk’abo. (Soma 2 Abakolinso 6:11-13.) Melissa outusangirwe tubalizeeho nagamba ati: “Twasemererwaga muno ab’oruganda na banyaanya itwe obubaturalizaaga omu maka gabo kumara hamu obwire, rundi kugenda kubunga hamu nabo.” Haroho omuntu omu kitebe kyanyu ow’osobora kukunira?

19. Bwire ki nambere kisobora kuba kikuru muno kumara obwire n’Abakristaayo bagenzi baitu?

¹⁹ Haroho obwire nambere Abakristaayo bagenzi baitu barasemererwa muno kakuba tuba hamu nabo. Abamu kibagumira kuba hamu n’abanyabuzaale baabo abatali omu mananu omu bwire bw’ebiro bikuru. Abamu nibasobora kwehurra baine obujune bwingi muno ha biro ebimu, nka ha kiro omugonzebwa wabo y’aferiiremu. Obutwehayo kumara obwire n’ab’oruganda na banyaanya itwe abaine ebizibu nk’ebi, twoleka ngu “nitubafaaho kuruga ha mutima.”​—Baf. 2:20, NW.

20. Ebigambo bya Yesu ebiri omu Matayo 12:48-50, nibisobora kutukonyera bita obuturukuba twine amasu?

²⁰ Haroho ensonga nyingi muno habwaki obwire obumu Omukristaayo nasobora kuhurra aine amasu. Baitu titusemeriire kukyebwa ngu, Yahwe nayetegerereza kimu enyehurra nk’ezi. Emirundi erukukira obwingi, akozesa Abakristaayo bagenzi baitu kutuha ebiturukwetaaga. (Soma Matayo 12:48-50.) Naitwe twoleka ngu nitusiima Yahwe habw’ekitebe, obutukora kyona ekirukusoboka kukonyera ab’oruganda na banyaanya itwe. Nobukiraaba ngu obwire obumu twehurra ngu twine amasu maingi, tusemeriire kukiijuka ngu tituli itwenka habwokuba Yahwe aikara naitwe obwire bwona!