Kusobora kusemeza Yahwe, tusemeriire kuba n’okwikiriza. Baitu, Baibuli egamba ngu “okuikiriza tikuli na bona.” (2 Bas. 3:2) Omukwenda Paulo obuyabalize ebigambo binu, akaba namanyisa abantu “abatanyina amagezi, ababi,” abakaba nibamuhiiganiza. Baitu ebintu Paulo ebiyabalizeeho okwikiriza nibikwata na h’abantu abandi. Abantu abamu bacwamu kwanga obwakaiso oburukukyolekera kimu kurungi ngu haroho Omuhangi—kandi ogu nuwe Ruhanga. (Bar. 1:20) Abandi nibasobora kugamba ngu baine ekintu rundi omuntu ow’amaani oubarukwikiririzaamu. Baitu oku tikuli kwikiriza okuhikire.

Tusemeriire kukigumiza kimu ngu Yahwe aroho kwo kandi ngu aha empeera abo abaine okwikiriza okugumire omuli Uwe. (Baheb. 11:6) Okwikiriza kiri kyana ekiretwaho omwoyo gwe ogurukwera. Kusobora kutunga omwoyo ogurukwera, tusemeriire kusaba Yahwe. (Luk. 11:​9, 10, 13) Omulingo omukuru ogutusobora kutunga omwoyo ogurukwera, nugwo kusoma Ekigambo kya Ruhanga, Baibuli. Hanyuma nitusobora kwecumiitirizaaho ebitusoma kandi tuteeke omu nkora ebitwega. Obutukora eki, tuba nitwikiriza omwoyo gwa Yahwe kutukonyera kutwaza obwomeezi bwaitu omu mulingo ogurukwoleka ngu twine okwikiriza okunyakumusemeza.