Nkazaarwa omu Desemba 22, 1929, omu Noville, ekyaro ekitaito ekirumu faamu mwenda ekiri haihi na Bastogne, omu Belgian Ardennes. Nkaba nyine okusemererwa omu buto bwange obunkaba ndi ha faamu n’abazaire bange. Nyowe na muto wange twakamaga ente n’engaro buli kiro kandi twakonyeraga n’omu kugesa. Omu kyaro kyaitu ekitaito, twakorraga hamu.

Bazaire bange, Emile na Alice, bakaba bali Bakatuliki kaswa. Tibayosaaga kusaba buli Sande. Baitu nk’omu mwaka 1939, bapayoniya kuruga omu England bakaija omu kyaro kyaitu kandi batandika kuleeteraga isenyowe Consolation magazine (hati ey’erukumanywa nka Awake!). Ahonaaho isenyowe akakyetegereza ngu ebyakaba nasoma omu magaziini gaali mananu, kandi kyamwekambisa kutandika kusoma Baibuli. Obuyalekere kugenda ha Keleziya, abataahi baitu kandi abakaba bali banywani baitu, bakatandika kumuhakaniza. Bakasindikiriza isenyowe kusigara ali Mukatuliki, ekyarugirremu kuteera empaka nyingi.

Kikansaaliza muno kurora isenyowe naraba omu kusindikirizibwa okwa mulingo ogu. Eki kikanyekambisa kuserra obukonyezi bwa Ruhanga kuraba omu saara eimbalizeehoga ha kutandika kw’ekicweka kinu. Abataahi obubalekere kutuhakaniza, nkasemererwa muno. Nkakigumya ngu Yahwe ali Ruhanga “Anyakuhurra okusaba.”

Aba Nazi omu Germany bakataahirra Belgium omu Maayi 10, 1940, ekyaletiire abantu kuruga omu ihanga. Eka yaitu ekairukira omu France ey’amasirimuka. Obutukaba nitugenda, tukatangatangaana obulemu obukaba buli hagati y’abaserikale ba German hamu n’aba France.

Obutwagarukire ha faamu yaitu, tukakyetegereza ngu ebintu ebirukukira obwingi bakaba babinyagire. Embwa yaitu yonka ey’erukwetwa Bobbie, niyo ekaba  esigaireho kututangirra. Ebintu ebi byona, bikandetera kwekaguza, ‘Habwaki haroho obulemu n’okubonabona kwingi?’

Omu kasumi ako, tukagasirwa muno omu rubungo rw’Ow’oruganda Emile Schrantz, a ow’akaba ali payoniya kandi omugurusi w’ekitebe. Akakozesa Baibuli kutusoboroora habawaki haroho okubonabona, kandi yagarukamu n’ebikaguzo byange ebirukukwata ha bwomeezi. Nkeyongera kugumya enkoragana yange na Yahwe, kandi nakigumya ngu ali Ruhanga ow’okugonza.

Obulemu n’obubukaba butakahoire, eka yaitu ekagumizaamu n’ekwatagana n’ab’oruganda. Omu Agusto 1943, Ow’oruganda José-Nicolas Minet akaija ha faamu yaitu kuha orubazo. Hanyuma akakaguza ati, “Nooha ayakugondeze kubatizibwa?” Nyowe hamu na Isenyowe, tukaimukya emikono. Tukabatirizibwa omu kisaaru ekitaito ekikaba kiri haihi na faamu yaitu.

Omu Desemba 1944, amahe ga German gakakora okutaahirra kwago okw’okumalirra omu Bulemu obw’Ensi Yoona Obwakabiri omu Bulaaya eya bugwa izooba, obulemu obumanyirwe nka the Battle of the Bulge. Twaikaraga omu kiikaro haihi nambere obulemu bukaba buli, kandi tukamara haihi okwezi kwona nitwikara omu kisiika ekya hansi eky’enju yaitu. Kiro kimu obunaturukire aheeru kuliisa ebisoro, ebicweka bya bbomu bikateera ha faamu yaitu, kandi byaihaho orusu orw’ekiju ky’ebisoro. Omuserikale Omumerika ow’akaba ali omu kiju ky’ebisoro ekikaba kiri haihi nanyowe, akatokera haiguru nagamba ati, “Byama hansi!” Nkairuka nabyama haihi nauwe, kandi yateeka helementi ye ha mutwe gwange kundinda.

Hanyuma y’obulemu, tukatandika kubaza n’ab’oruganda na banyaanya itwe ab’omu kitebe kya Liège, ekikaba kiri hara naitwe kilomita 90 (milo 56) omu matemba. Hanyuma, tukasobora kutandikaho guruupu entaito omu Bastogne. Nkatandika kukora n’abasorooza b’omusoro, kandi natunga n’omugisa ogw’okwega ebiragiro. Hanyuma, nkatandika kukora omu ofiisi emu eya gavumenti. Omu. 1951 tukateekaniza orusorrokano orukooto omu Bastogne. Abantu abarukuhika nka kikumi nubo baabaireho, otwaliiremu na munyaanya itwe ow’akaba ali payoniya omwekambi ow’arukwetwa, Elly Reuter. Akaba avugire gaali kilomita 50 (milo 31) kusobora kwija ha rusorrokano. Omu kaire kake, tukatandika kujumbirangana. Elly nubwo akaba atungire okuraalizibwa okw’okugenda omu Isomero lya Gilead omu United States.  Akahandiikira ekitebe ekikuru nabasoborra habwaki akaba asalizeemu okuraalizibwa. Ow’oruganda Knorr, ow’akaba nayebembera Abakaiso ba Yahwe kasumi ako, omu mulingo ogw’embabazi, akamugarukamu nagamba ngu obundi uwe na musaija we balisobora kugenda omu Isomero lya Gilead. Tukataaha obuswere omu Febwali 1953.

Omu mwaka ogu gwonyini, nyowe na Elly tukagenda ha rusorrokano orukooto orukaba nurwetwa the New World Society Assembly orwabaire omu Yankee Stadium, New York. Obutukaba tuli ha rusorrokano oru, nkatangatangana ow’oruganda ayampaire omulimo omurungi kandi yatusaba kufuruka kugaruka omu United States. Hanyuma y’okusaba Yahwe ha nsonga egi, nyowe na Elly tukacwamu kwanga omulimo ogu kandi twagaruka Belgium kusagika guruupu entaito ey’ekaba erumu abatebezi abarukuhika nka ikumi omu Bastogne. Omwaka ogwahondiireho, kikatusemeza obutwazaire omwana omwojo ow’arukwetwa, Serge. Eky’obusaasi, hanyuma y’emyezi musanju, akarwara kandi yafa. Tukasaba Yahwe kutugumwa kandi twagumibwa n’okunihira okw’okuhumbuuka.

Omu Okitobba 1961, nkasobora kutunga omulimo ogukaba nigunsobozesa kuheereza nka payoniya. Kiro eki kyonyini, nkatunga esimu kuruga hali ow’oruganda ow’akaba ali ha ofiisi y’itaagi erya Belgium. Akankaguza obundaaba ninsobora kuheereza nka circuit servant (kasumi kanu ow’arukumanywa nk’omuroleerezi w’ekicweka). Nkamukaguza nti: “Titusemeriire kubanza kuheereza nka bapayoniya tutakaikiriize obujunanizibwa bunu?” Okusaba kwange kukaikirizibwa. Hanyuma y’okumara emyezi munaana nituheereza nka bapayoniya, tukatandika omulimo gw’okubungira ebitebe omu Sebutemba 1962.

Hanyuma y’okumara emyaka ebiri omu mulimo gw’okubungira ebitebe, tukaraalizibwa kuheereza ha Beseri omu Brussels. Tukatandika kuheereza ha Beseri omu Okitobba 1964. Obujunanizibwa bunu obuhyaka bukatuleetera kutunga emigisa nyingi. Hanyuma y’obwire buke Ow’oruganda Knorr abungiire Beseri yaitu omu 1965, kikampuniiriza obubaankomere kuheereza nka branch servant. Hanyuma, nyowe na Elly tukaraalizibwa kugenda omu kilaasi 41 ey’isomero lya Gilead. Ebigambo Ow’oruganda Knorr eby’akaba abalize emyaka 13 enyuma bikaba bihikiriire! Hanyuma y’isomero, tukagaruka ha Beseri ya Belgium.

Kumara emyaka, ntungire omugisa ogw’okukozesa obukugu bwange omu by’ebiragiro kukonyera omu kurwanirra obugabe bwaitu obw’okuramya omu Bulaaya hamu n’omu nsi ezindi. (Baf. 1:7) Kinu kikandetera kutangatangana abakuru mu gavumenti kuruga omu mahanga 55 nambere omulimo gwaitu gukaba gutangirwe, rundi gutairweho ebiragiro ebigumire. Omu kiikaro ky’okugambira abakuru omu gavumenti ha bintu ebimmanyire omu by’ebiragiro, nayeyanjuraga ‘nk’omusaija wa Ruhanga.’ Buli kiro nasabaga Yahwe obukonyezi habwokuba nkimanyire ngu “Omutima gwomukama guli omu mukono gwa [Yahwe] nkebyambu: Aguhindura hona nkokwagonza.”—Nfu. 21:1.

Ekintu ekikyakizireyo kunkwataho nubwo obunabalize n’omukuru omu gavumenti kuruga omu Parliament  ya Bulaaya. Nkaba nsabire emirundi nyingi kubaza nauwe, kandi ha kumalirra akaikiriza tutangatangane. Akangambira ngu, “Ninyija kukuha edakiika ikumi naitaano, kandi tindukugonza ohinguzemu n’emu.” Nkainamya omutwe natandika kusaba. Omusaija onu n’okutiina akankaguza ekinkaba ninkora. Obunainunukire nkagamba nti, “Ninsiima Ruhanga habwokuba oli omu h’abaheereza be.” Akankaguza ati, “N’omanyisa ki?” Nkamwoleka ekyahandiikirwe ekirukusangwa omu Abarumi 13:4. Akaba ali omu Protestant, nahabweki ekyahandiikirwe kinu kikamukwataho muno. Ekyarugiremu? Tukabaliza edakiika makumi asatu, kandi ebyarugiremu bikaba birungi. Ekindi, akagamba ngu nateekamu ekitiinisa omulimo gw’Abakaiso ba Yahwe.

Kumara emyaka nyingi, abantu ba Yahwe bahikire ha businguzi obw’amaani omu by’ebiragiro omu Bulaaya obukirukuhika h’Abakristaayo kutagwera rubaju, kurwanirra obugabe bw’abaana, kusasura emisoro hamu n’ebindi. Mali gubaire mugisa gw’amaani kwejumbira omu bintu binu byona n’okwerorra omulingo Yahwe atuhikize ha businguzi. Abakaiso ba Yahwe basingire emisango ey’erukuhingura omu 140 omu kooti ey’erukurwanirra obugabe bw’abantu omu Bulaaya!

Omu myaka ya 1990 nkakorra hamu n’Ow’oruganda Philip Brumley, kuruga ha kitebe ekikuru, hamu n’Ow’oruganda Valter Farneti, kuruga omu Italy, kukonyera ab’oruganda na banyaanya itwe kutunga obugabe obw’okuramya Yahwe, habwokuba omulimo gwaitu gukaba gutairweho ebiragiro. Nkahandiikira ofiisi ey’erukukikirra abantu ob’omu Cuba omu Belgium kandi natangatangana omukuru omu gavumenti ow’akaba akomerwe kukoraho okusaba kwaitu. Emirundi ey’okubanza eitwamutangatangaine, tutasobole kugonjoora obutetegerezangana obwaleetiire gavumentu kuteekaho omulimo gwaitu ebiragiro.

Hanyuma y’okusaba Yahwe oburagirizi, tukasaba kandi baatwikiriza kutwara Baibuli ezirukuhika 5,000 omu Cuba. Baibuli zikahika kurungi kandi zagabirwa ab’oruganda, kandi kinu kikatungumya ngu Yahwe akaba ahaire omugisa amaani agatukaba tutairemu. Hanyuma, tukongera twasaba kusindika Baibuli ezirukuhika 27,500. Kandi okusaba kunu nakwo kukaikirizibwa. Kukonyera ab’oruganda omu Cuba buli omu kutunga Baibuli ye kikandetera okusemererwa kwingi muno.

Mbungiire Cuba emirundi nyingi muno kubakonyera kusemezaamu enyikara ey’eby’ebiragiro obukirukuhika ha mulimo gwaitu. Omu kukora eki, kikankonyera kutunga enkoragana enungi n’abakuru baingi omu gavumenti.

Omu 1994 abantu abarukuhingura 1,000,000 bakaitwa omu kiita bantu nambere  abantu bakaba nibarwanisa Abatutsi omu Rwanda. Eky’obusaasi, bamu h’ab’oruganda na banyaanya itwe bakaitwa. Hanyuma, guruupu entaito ey’ab’oruganda ekakomwa omu ihanga eri kukonyera ab’oruganda kubahikyaho ebyetaago byabo n’okubahuumuza.

Guruupu yaitu obuyahikire omu Kigali orubuga orukuru, tukasanga ofiisi ey’okuhindurramu ebitabu hamu n’ekisiika eky’okwahuramu ebitabu bitiirwe amasasi maingi muno. Tukahurra ebirukukwata h’ab’oruganda na banyaanya itwe abakaba baisirwe n’ebipanga ebikooto. Baitu nabwo tukahurra ebintu ebirungi ebirukukwata ha kugonza ab’oruganda okubaayolekere. Ekyokurorraho, tukatangatangana ow’oruganda Omututsi ow’akaba ayeserekere omu kiina kumara ebiro 28, obu n’alindwa eka ey’Abakaiso ba Yahwe Abahutu. Obutukaba tuli omu rusorrokano omu Kigali, tukakora kyona ekirukusoboka kuhuumuza omu by’omwoyo ab’oruganda na banyaanya itwe abarukuhingura omu 900.

Hanyuma tukacwanganiza ensaro twagenda Zaire (hati ey’erukumanywa nka Democratic Republic of the Congo) kuserra guruupu enkooto ey’ab’oruganda kuruga Rwanda abakaba bairukiire omu nkambi z’ensuhuuki haihi n’orubuga orwa Goma. Tutasobole kubazoora, nahabweki tukasaba Yahwe kutukonyera kutuhikya nambere bali. Hanyuma tukarora omuntu naija nambere tuli kandi twamukaguza obw’araaba namanya omuntu weena anyakuli omu h’Abakaiso ba Yahwe. Akagarukamu ati “Ego, nanyowe ndi omu h’Abakaiso ba Yahwe. Leka mbatwale h’akatebe akarukukonyera abahikirweho ebigwererezi.” Hanyuma y’okugarramungana amaani n’akatebe akarukukonyera abahikirweho ebigwererezi, tukatangatangana abasuhuuki abarukuhika 1,600 kubagarramu amaani n’okubahuumuza omu by’omwoyo. Kandi tukongera twabasomera ebbaruha kuruga h’Akatebe Akalemi. Ab’oruganda na banyaanya itwe bakakwatwaho munu obubaahuliire ebigambo ebirukugarramu amaani ebirukugamba ngu: “Twikara nitubasabira. Tukimanyire ngu Yahwe talibalekaho.” Mali ebigambo ebi kuruga h’Akatebe Akalemi bikahikirra. Kasumi kanu, ab’oruganda abarukuhingura 30,000 baliyo nibaheereza Yahwe n’okusemererwa omu Rwanda!

Hanyuma y’okumara haihi emyaka 58 omu buswere, mukazi wange omugonzebwa Elly akafa omu 2011. Nkatunga okuhuumuzibwa kuruga hali Yahwe kuraba omu kusaba. Ekindi, nkatunga okuhuumuzibwa kuraba omu kugambiraho abandi amakuru amarungi ag’Obukama.

N’obukiraaba ngu ndi omu myaka yange eya 90, ninkyagumizaamu ninyejumbira omu buheereza buli wiiki. Ekindi, nyine okusemererwa kwingi ngu ninsobora kukonyera omu Kitongole ky’Ebiragiro hanu ha ofiisi y’itaagi lya Belgium, n’okugambiraho abandi ebindabiremu otwaliiremu n’okugarramu abato amaani hanu ha Beseri.

Omu myaka 84 enyuma, nubwo nabandize kusaba hali Yahwe. Egi ekaba ntandikwa enungi muno ey’orugendo orundetiire kwirra haihi na Yahwe. Ninsiima muno Yahwe habwokuba ngu omu bwomeezi bwange bwona aikaire nagarukamu esaara zange.—Zab. 66:19. b