Abamu h’Abalevi abakaba batarukuheereza nk’abanyakatagara, bakoraga emirimo endi nk’okuheereza nk’abapolisi. Abapoliisi banu badumirwaga omukuru w’abalinzi ba yekaru. Omuhandiiki Omuyudaaya arukwetwa Philo nasoborra emirimo y’abapoliisi banu nagamba ati: “Abalevi abamu bakoraga nkaba balinzi b’emiryango, abandi balindaga omu [yekaru munda] omu maiso ga h’Aharukwera kutanga omuntu wena atasemeriire kutahamu abe akigenderiire rundi atakigenderiire. Abandi baikaraga nibetoroora Yekaru kugirinda. Abamu bakoraga nyamusana kandi abandi bakora ekiro.”

Abapolisi banu bayoroberaga ebiragiro eby’orukurato orw’abebembezi b’ediini ey’Ekiyudaaya. Abapoliisi banu nubo Bayudaaya bonka abali nibaikirizibwa gavumenti y’Abaroma kukwata eby’okurwanisa.

Omukugu omu kuseruliiriza ha bya Baibuli arukwetwa Joachim Jeremias nagamba ati: “Abaserukale obu bakwasire Yesu, akabakaguza ati naikaraga obukyabukya omu Yekaru ninyegesa baitu mutankwate. Yesu akaba atasobora kubakaguza ati kakuba baali batali bamu hali abo abaheerezaga nk’abapoliisi ba yekaru.” (Mat. 26:55) Omuhandiiki nuwe omu nayongera nagamba ngu naabo abasindikirwe omu bwire obw’enyumaho kukwata Yesu baali bapoliisi ba yekaru. (Yoh. 7:32, 45, 46) Hanyuma abapoliisi banu n’omukuru wabo bakasindikwa kuleeta abegeswa ba Yesu omu maiso g’orukurato orw’abebembezi b’ediini ey’Ekiyudaaya, kandi nikisoboka kuba ngu abapoliisi banu nubo basikire omukwenda Paulo kumwiha omu yekaru.​—Eng. 4:1-3; 5:17-27; 21:27-30.