1. Biki ebitumanyire h’ab’oruganda abato?

AB’ORUGANDA abato, nimusobora kuba b’omugaso muno omu kitebe. Baingi omuli inywe mwine amaani maingi muno. (Nfu. 20:29) Mukora bingi kukonyera Abakristaayo bagenzi banyu. Kandi obundi mwakugondeze kufooka abaheereza omu kitebe. Baitu nosobora kwehurra ngu abandi nibatekereza ngu oli muto muno, rundi tokahikire kuheebwa obujunanizibwa obw’amaani. N’obworaaba oli muto haroho ebintu eby’osobora kukora hati ebisobora kuletera abandi omu kitebe kukwesiga kandi n’okukutekamu ekitiinisa.

2. Nitwija kubazaaho ki omu kicweka kinu?

² Omu kicweka kinu, nitwija kubazaaho obwomeezi bw’Omukama Daudi. Kandi nitwija kubazaaho kake ebintu ebimu ebyahikireho abakama babiri aba Yuda Asa, hamu na Yehosafati. Nitwija kubazaaho ebizibu abasaija banu basatu batungire, omulingo bayetwaizeemu, kandi n’omulingo ab’oruganda abato basobora kwegera ha byokurorraho byabo.

3. Mulingo ki ogumu abato basobora kukonyeramu abakuzire omu myaka abali omu kitebe?

³ Daudi obwakaba akyali muto, akatunga obukugu abantu abandi obubarozere nk’obw’omugaso. Busaho kugurukyagurukya akaba ali muntu w’eby’omwoyo, akakurakuraniza obukugu bwe obw’okuzina, kandi akakozesa ekisembo kye kugasira Saulo omukama Ruhanga ow’akaba akomere. (1 Sam. 16:16, 23) Inywe abasigazi, mwine obukugu obusobora kugasira abandi  omu kitebe? Baingi omuli inywe mubwine. Ekyokurorraho, nimusobora kwetegereza omulingo abakuzire omu myaka basiima, obumuboleka omulingo basobora kukozesa kurungi tabuleeti zaabo hamu n’ebyoma ebindi ebya kalimagezi kwesomesa hamu n’omu nsorrokano. Nimusobora kubakonyera habwokuba mumanyire ebya kalimagezi.

4. Kusisanaho na Daudi, miringo ki ab’oruganda abato ei basemeriire kukurakuraniza? (Rora ekisisani ekya ha kyesweko.)

⁴ Omu bwomeezi bwe obwa buli kiro, Daudi akakyoleka ngu ali muntu ow’obujunanizibwa kandi ow’arukwesigwa. Ekyokurorraho obw’akaba akyali musigazi akekamba kurolerra entama za ise. Obujunanizibwa bunu bukateeka obwomeezi bwe omu kabi. Daudi hanyuma akasoborra Omukama Saulo ati: ‘Omuiru wawe akaba nalinda entaama za ise; hakaija entale, [hamu] edubu, yaiha akataama omu igana, nyowe nagihondera, nagitema, nakanagisa omu kanwa kayo.’ (1 Sam. 17:34, 35) Daudi akaba akimanyire ngu asemeriire kufaaho entama, kandi akazirwanirra n’obumanzi. Ab’oruganda abato nibasobora kwegera hali Daudi kuraba omu kwekamba kuhikiriza obujunanizibwa bwona obubaheebwa.

5. Kusigikirra ha Zabuli 25:14, kintu ki ekirukukira obukuru ab’oruganda abato ekibasobora kukora?

⁵ Daudi obw’akaba akyali muto akakurakuraniza enkoragana enungi na Yahwe. Enkoragana egi ekaba eri nkuru muno kukira obumanzi rundi obukugu bwe obw’okuteera enanga. Yahwe akaba ali Ruhanga wa Daudi kandi munywani we nfe na nfe. Daudi wenyini akahandiikaho Yahwe ati: “Omuganjano gwe guba gw’abo abanyakumutiina.” (Zab 25:14, Runyoro/Rutooro Bible 2012.) Ab’oruganda abato, ekintu ekirukukira obukuru ekimusobora kukora kutunga obujunanizibwa oburukukiraho, nukwo kugumya enkoragana yanyu na Ise inywe ow’omu iguru.

6. Abantu abamu bakatekereza ki hali Daudi?

⁶ Ekizibu ekimu Daudi ekiyarabiremu kyali ngu abantu abamu batekerezaaga ngu muto muno rundi tali w’obujunanizibwa. Ekyokurorraho, Daudi obuyayehaireyo kurwanisa Goliasi, Omukama Saulo akalengaho kumutanga obuyamugambiire ati: “Baitu oli [mwana muto].” (1 Sam. 17:31-33) Enyumaho, mugenzi wa Daudi omwojo akamujunaana kuba muntu owatali w’obujunanizibwa. (1 Sam. 17:26-30) Baitu Yahwe, atatekereze ngu Daudi muto muno rundi tali w’obujunanizibwa.  Akaba amanyire Daudi kurungi. Kandi Daudi habwokuba akesiga munywani we Yahwe kumuha amaani, akasobora kwita Goliasi.​—1 Sam. 17:45, 48-51.

7. Kiki ekyosobora kwega kuruga omu kyokurorraho kya Daudi?

⁷ Kiki eky’osobora kwegera ha kyokurorraho kya Daudi? Nikikwegesa ngu noyetaaga kugumiisiriza. Nikisobora kutwarra abantu abakumanyire kuruga omu buto obwire, kutandika kukurora nk’omuntu ow’akuzire. Baitu okigumye ngu Yahwe tateeka omutima ha mulingo orukuzookamu. Akumanyire kurungi kandi amanyire n’ebintu eby’osobora kukora. (1 Sam. 16:7) Isomo erindi ery’osobora kwega kuruga omu kyokurorraho kya Daudi niryo ngu, noyetaaga kugumya enkoragana yaawe na Ruhanga. Kinu Daudi akakikora kuraba omu kwetegereza ebintu Yahwe ebiyahangire. Daudi akecumitiriza muno h’amasomo agayayegere hali Omuhangi, kuruga omu bintu ebiyaroraga. (Zab. 8:3, 4; 139:14; Bar. 1:20) Ekintu ekindi eky’osobora kukora nukwo kusaba Yahwe akuhe amaani ag’orukwetaaga. Ekyokurorraho, abamu h’abeegi bagenzi baawe bakusekereza habwokuba omu h’Abakaiso ba Yahwe? Eki obukiraaba nukwo kiri, saba Yahwe akukonyere kugumira ekizibu eki. Teeka omu nkora obuhabuzi obuli omu Kigambo kye kandi n’omu bitabu hamu na vidiyo ebirukusigikirra ha Baibuli. Buli murundi orarora omulingo Yahwe arakukonyeramu kuraba omu kizibu, noija kweyongera kumwesiga. Kandi ekindi, abandi obubararora ngu noyesiga Yahwe, nibaija kutandika kukwesiga.

8-9. Kiki ekyakonyire Daudi kugumiisiriza obw’akaba alinzire kufooka omukama, kandi kiki ab’oruganda abato ekibasobora kwegera ha kyokurorraho kye?

⁸ Tekerezaaho ekizibu ekindi Daudi ekiyarabiremu. Hanyuma ya Daudi kuseswaho amagita kufooka omukama, akaba aine kulinda emyaka nyingi atakatandikire kulema nk’omukama wa Yuda. (1 Sam. 16:13; 2 Sam. 2:3, 4) Omu kasumi ako, kiki eky’amukonyire kulinda aine okugumiisiriza? Omu kiikaro ky’okuhwamu amaani, Daudi akateeka omutima hali ebi eby’akaba nasobora kukora. Ekyokurorraho, obuyairukiire omu kicweka ky’Abafirisiti, Daudi akakozesa obwire obu kurwanisa abanyazingwa Baisaleri. Omu kora eki Daudi akasobora kulinda emitaano ey’ekicweka kya Yuda.​—1 Sam. 27:1-12.

⁹ Kiki ab’oruganda abato ekibasobora kwegera ha kyokurorraho kya Daudi? Kozesa buli mugisa gwona kuheereza ab’oruganda bagenzi baawe. Tekerezaaho ekyokurorraho eky’ow’oruganda arukwetwa Ricardo. * Kurugira kimu omu buto akaba nagonza kuheereza nka payoniya ow’akasumi koona. Baitu abagurusi bakamugambira ngu akaba atakahikire. Omu kiikaro ky’okuhwamu amaani rundi kukwatwa ekiniga, Ricardo akeyongera kwekamba omu buheereza. Nagamba ati: “Obundukutekerezaaho ebyabaireho, ninkirora ngu nkaba ninyetaaga kweyongera kukurakurana. Omutima nkaguteeka ha kugarukirayo abo ababaga bolekere okugonza omu buheereza hamu n’okwetekaniza kurungi ntakagarukireyo. Nkatunga n’omwegi wange owa Baibuli ow’okubanza. Kandi obunayeyongiire kutebeza, obutiini obunkaba nyine bukagenda nibumpwamu.” Ricardo hati payoniya ow’akasumi koona omurungi, kandi muheereza omu kitebe.

10. Kiro kimu Daudi akakora ki obwakaba atakakozere encwamu ey’amaani?

¹⁰ Tekerezaaho ekintu ekindi ekyahikire hali Daudi. Obw’akaba ayeserekere omukama Saulo omu kicweka ky’Abafirisiti, Daudi hamu nabasaija be bakalekaho ab’omu maka gaabo  bagenda kurwana. Obubakaba bagenzere, abanyazingwa bakatahirra amaka gaabo kandi batwara abantu baabo boona. Daudi akaba nasobora kutekereza ngu habwokuba ali murwani mukugu, nasobora kumanya omulingo ogw’okucungura abantu baabo. Baitu Daudi akesiga Yahwe kumuhabura. Kurabira omu nyakatagara orukwetwa Abyasara, Daudi akakaguza Yahwe ati: “Obundaba nimpondera igana eri, ndabakwata?” Yahwe akagambira Daudi kubahondera kandi akamugumya ngu naija kuba musinguzi. (1 Sam. 30:7-10) Kiki ekyorukwega kuruga omu nyikara enu?

11. Kiki eky’osobora kukora otakakozere encwamu?

¹¹ Banza oserre obuhabuzi otakakozere encwamu. Wekaguzeeho abazaire baawe. Kandi nosobora kutunga obuhabuzi oburungi kuruga omu kwekaguzaaho abagurusi b’ekitebe abamazire akasumi kaingi nibaheereza. Yahwe nayesiga abasaija banu kandi naiwe nosobora kubesiga. Yahwe abarora ‘nk’ebisembo’ hali ekitebe. (Bef. 4:8) Noija kukora encwamu enungi obworayegera ha kyokurorraho kyabo eky’okwikiriza kandi okahuliriza amagezi amarungi agabarakuha. Hati leka tubazeeho ekitusobora kwegera ha Mukama Asa.

12. Miringo ki enungi Omukama Asa ey’akaba aine nambere yatandikiire kulema?

¹² Omukama Asa obw’akaba akyali muto akabali mwebundaazi kandi aine obumanzi. Ekyokurorraho, hanyuma ya ise arukwetwa Abiya kufa, Asa akafooka mukama kandi akatandika kampaini ey’okumaraho kuramya ebisisani. Kandi akaragira “Yuda okuserra [Yahwe], Ruhanga wa baisenkuru, nokukora ebiragiro nebyatairweho.” (2 Byom. 14:1-7) Kandi Zera Omunyaisiyopiya obuyatahiriire Yuda n’abamahe abarukuhika 1,000,000, Asa akakora ekintu eky’amagezi yaserra obukonyezi kuruga hali Yahwe, akasaba ati: “[Yahwe], busaho ondi rundi iwe wenka okujuna, hali ogu owamani nogu atanyina amani: otukonyere, ai [Yahwe] Ruhanga waitu; baitu ntwesiga iwe.” Ebigambo binu ebirungi nibikyolekera kimu ngu Asa akaba aine okwikiriza okw’amaani ngu Yahwe aine obusobozi obw’okumujuna hamu n’abantu be. Asa akesiga Ise ow’omu iguru kandi Yahwe akasingura Abanyesyopiya.​—2 Byom. 14:8-12.

13. Kiki ekyahikire hali Asa hanyuma y’akasumi, kandi habwaki?

¹³ Kyali nikitiinisa muno abasirikale  1,000,000 obubaizire kurwanisa Asa, baitu habwokuba akesiga Yahwe, Asa akabasingura. Eky’obusaasi kiri ngu, Asa obuyatungire ekizibu ekindi ekitaito, atabanze kwekaguzaaho Yahwe. Obuyatinisiriziibwe Omukama omubi owa Isaleri arukwetwa Baasa, Asa akaserra obukonyezi kuruga mw’omukama owa Aramu. Encwamu egi ekarugamu ebizibu bingi! Yahwe kurabira omu nabbi we arukwetwa Hanani, akagambira Asa ati: “Baitu okesiga omukama wa Aramu, kunu otesige [Yahwe] Ruhanga wawe, nikyo ihe eryomukama wa Aramu likizire omukono gwawe.” Kandi kwiha nobu, yaikaraga omu bulemu. (2 Byom. 16:7, 9; 1 Bakam. 15:32) Eki nikitwegesa ki?

14. Nosobora ota kwesiga Yahwe, kandi kusigikirra ha 1 Timoseo 4:12, kiki ekyorafooka obw’orakikora?

¹⁴ Ikara oli mwebundaazi kandi ogumizeemu noyesiga Yahwe. Obuwabatiziibwe okooleka ngu oine okwikiriza okw’amaani kandi ngu noyesiga Yahwe. Kandi Yahwe n’okusemererwa kwingi akakutangirra omu ka ye. Hati ekyorukwetaaga kukora nukwo kugumizaamu n’omwesiga. Nikisobora kukwanguhira kwesiga Yahwe obwoba nokora encwamu ez’amaani, baitu kiki eky’okora omu ncwamu ezindi? Mali kakikuru oyesige Yahwe obworaaba nokora encwamu, otwaliremu ezi ezirukukwata ha by’okwesemeza, omulimo, hamu n’ebigendererwa byawe omu bwomeezi! Otesiga amagezi agaawe wenka. Oihireho serra emisingi y’a Baibuli erukukwata ha nyikara egi ey’orumu, kandi hanyuma ohondere oburagirizi obu. (Nfu. 3:5, 6) Ekyo obw’orakikora, noija kusemeza Yahwe kandi noija kuletera ab’omu kitebe kyawe kukutekamu ekitiinisa.​—Soma 1 Timoseo 4:12.

15. Nk’oku kyolekerwe omu 2 Ekyebyomubusinge 18:1-3; 19:2, nsobi ki Omukama Yehosafati ezi yakozere?

¹⁵ Ky’amananu ngu nka itwe itwena, naiwe tohikiriire, kandi obwire obumu noija kukora ensobi. Baitu otaikiriza kinu kukulemesa kukora kyona ekyorukusobora kuheereza Yahwe. Tekerezaaho ekyokurorraho eky’Omukama Yehosafati. Akaba aine emiringo nyingi enungi. Obwakaba akyali muto, “akaserra Ruhanga wa ise, yagendera omu biragiro bye.” Ekindi akatuma abakuru kugenda omu mbuga zoona eza Yuda kwegesa abantu hali Yahwe. (2 Byom. 17:4, 7) Nobukiraaba ngu akaba ali mwesigwa, Yehosafati na uwe obwire obumu yakoraga encwamu ezitali nungi. Habw’okukora  emu ha ncwamu zinu, Yahwe akakozesa omu h’abaheereza be kuhana Yehosafati. (Soma 2 Ekyebyomubusinge 18:1-3; 19:2.) Isomo ki ery’osobora kwega kuruga omu byahandiikirwe ebi?

16. Kiki ekyosobora kwega omu kyokurorraho kya Rajeev?

¹⁶ Ikiriza obuhabuzi kandi obuteke omu nkora. Obundi nk’abasigazi abandi naiwe nikisobora kuba nikikugumira kwebembeza Yahwe omu bwomeezi bwawe. Otahwamu amaani. Tekerezaaho ekyokurorraho eky’ow’oruganda omuto arukwetwa Rajeev. Obw’akaba n’abazaaho emyaka ye ey’obuto bwe akagamba ati: “Obwire obumu tinamanyaga ekindukugonza kukora omu bwomeezi bwange. Kusisanaho n’abato abandi, nagonzaga muno eby’emizaano hamu n’eby’okwesemeza kukira kugenda omu nsorrokano rundi omu buheereza.” Kiki ekyakonyire Rajeev? Omugurusi w’ekitebe ayakwasirweho akamuhabura. Rajeev nasoborra ati: “Akankonyera kutekerezaaho omusingi oguli omu 1 Timoseo 4:8.” Rajeev akebundaaza, yahondera obuhabzi obu kandi yatekerezaaho ebintu ebirukukira obukuru omu bwomeezi bwe. Nagamba ati: “Nkacwamu kwebembeza ebigendererwa eby’omwoyo omu bwomeezi bwange.” Kiki ekyarugiremu? Rajeev nasoborra ati: “Hanyuma y’emyaka nke mazire kuheebwa obuhabuzi obu nkakomwa kufooka omuheereza omu kitebe.”

17. Abakristaayo abakuzire omu myaka nibehurra bata h’ab’oruganda abato abarukuheereza Yahwe?

¹⁷ Abakristaayo abakuzire omu myaka, basiima muno ab’oruganda abato abaheereza hamu nabo omu bumu! (Zef. 3:9) Bagonza muno amaani n’obwekambi ebimwoleka, obumuba nimukora emirimo ei muhairwe. Mali mubaletiire kubagonza muno.​—1 Yoh. 2:14.

18. Nk’oku kyolekerwe omu Enfumo 27:11, Yahwe ayehurra ata h’abato abamuheereza?

¹⁸ Ab’oruganda abato, mutalyebwa ngu Yahwe n’abagonza kandi n’abesiga. Akaranga ngu omu biro ebya ha mpero, hakubaireho ihe ery’abasigazi abakwehaireyo kumuheereza begondiize. (Zab. 110:1-3) Akimanyire ngu n’omugonza kandi nogonza kumuheereza nk’oku orukusobora. Nahabweki bamuntu arukugumiisiriza hali abantu abandi, hamu na hali iwe wenka. Obw’orakora ensobi, ikiriza obuhabuzi hamu n’okuhanwa okw’oratunga, kandi obirole nk’ebirukuruga hali Yahwe. (Baheb. 12:6) Wekambe kuhikiriza obujunanizibwa bwona obworaheebwa. Kandi ekirukukira obukuru, omu byona eby’orakora, letera So ow’omu iguru kukwesimisa.​—Soma Enfumo 27:11.