1-2. Noha asobora kukonyera omwegi wa Baibuli kukurakurana akahika ha kubatizibwa?

OMUKAZI arukwetwa Amy arukwikara omu Fiji nagamba ati: “Nagonzaaga ebibanyegesaaga kuruga omu Baibuli. Nkaba manyire by’amananu. Baitu obunatandikire kumara obwire n’ab’oruganda na banyaanya itwe, kikankonyera kukora empindahinduka hamu n’okukurakurana kuhika ha kubatizibwa.” Ekyokurorraho kya Amy nikitwegesa ekintu ekikuru muno: Omwegi wa Baibuli nasobora kukurakurana akahika naha kubatizibwa, obwatunga obukonyezi kuruga h’abandi omu kitebe.

² Buli mutebezi nasobora kukonyera ekitebe kweyongera. (Bef. 4:16) Payoniya arukwetwa Leilani kuruga omu Vanuatu, nagamba ati: “Haroho orufumo orukugamba ngu nikyetaagisa ekyaro kyona kukuza omwana. Nintekereza nukwo kiri n’omu kufoora abantu abegeswa. Nikyetaagisa ekitebe kyona kukonyera omuntu kwija omu mananu.” Abanyabuzaale, abanywani, hamu n’abeegesa, boona bakonyera omu kukuza omwana. Kinu bakikora kuraba omu kumugarramu amaani hamu n’okumwegesa amasomo amakuru. Omu mulingo nugwo gumu, abatebezi bahabura, bagarramu amaani, kandi bateraho abeegi ba Baibuli ekyokurorraho ekirungi. Binu bibakonyera kukurakurana bakahika ha kubatizibwa.​—Nfu. 15:22.

3. Kiki ekiturukwega omu bigambo bya Ana, David, hamu na Leilani?

³ Habwaki omutebezi arukwegesa omwegi wa Baibuli asemeriire kwikiriza obukonyezi abatebezi abandi obubasobora kuha omwegi? Payoniya ow’embaganiza omu Moldova arukwetwa Ana, nagamba ati: “Omwegi wa Baibuli nayetaaga obukonyezi bwingi, kandi kigumire omwegesa we wenka kumuha obukonyezi  bunu bwona.” David * payoniya ow’embaganiza omu ihanga niryo limu, nagamba ati: “Obwire oburukukira obwingi, abatebezi abandi babazaaho ekintu ekikwataho omutima gw’omwegi, ekintu ekintakusoboire kubazaaho.” Leilani nabazaaho ensonga endi ati: “Okugonza n’okusemererwa ab’oruganda booleka nikusobora kukonyera omwegi kumanya abaheereza ba Yahwe ab’amananu.”​—Yoh. 13:35.

4. Kiki ekiturukwija kubazaaho omu kicweka kinu?

⁴ Baitu nosobora kwekaguza, nyowe ninsobora nta kukonyera omwegi kukurakurana kandi kunu tali ninyowe arukumwegesa?’ Katubazeeho ebintu ebitusobora kukora omutebezi obwaturaaliza kumusendekereza kugenda kwega n’omwegi, kandi n’ebitusobora kukora omwegi obw’atandika kwija omu nsorrokano. Nitwija n’okurora omulingo abagurusi basobora kukonyera abeegi ba Baibuli kukurakurana bakahika ha kubatizibwa.

5. Bujunanizibwa ki obw’osemeriire kuhikiriza obwosendekereza omutebezi ha mwegi we?

⁵ Omwegesa nuwe aine obujunanizibwa obukuru obw’okukonyera omwegi kwetegereza Ekigambo kya Ruhanga. Omwegesa obwarakuraaliza kumusendekereza osemeriire kwerora nk’omukonyezi we. Obujunanizibwa bwawe nukwo kumusagika. (Mug. 4:9, 10) Bintu ki ebyosobora kukora kusobora kuba omukonyezi omurungi?

6. Obwoba nogenda kusendekereza omuntu ha mwegi we, nosobora ota kuhondera omusingi oguli omu Enfumo 20:18?

⁶ Tekaniza ebimurukugenda kwegesa. Banza okaguze omwegesa akugambireho bike ebirukukwata ha mwegi. (Soma Enfumo 20:18.) Nosobora kumukaguza oti: “Bintu ki eby’omanyire ha mwegi ogu? Isomo ki eriturayegaho? Kiki eky’orukugonza omwegi wawe ayege omu kwega kunu? Haroho ekintu kyona ekiwakugondeze nkole, rundi nyerinde kukora, rundi kubaza obuturaaba nitumwegesa? Ninsobora nta kwekambisa omwegi ogu kukurakurana?” Ky’amananu ngu, omwegesa tarukwija kukugambira ebintu eby’otasemeriire kumanya ha mwegi, baitu ebyarakugambira nibisobora kukukonyera. Omumisani arukwetwa Joy abazaaho ebintu binu nogu owaba agenzere na uwe kwegesa omwegi. Nagamba ati: “Kubazaaho ebintu binu kikonyera oungenzere na uwe kugonza kukonyera omwegi kandi n’okumanya eky’arabaza obuturaaba nitumwegesa.”

7. Habwaki iwe nk’omukonyezi osemeriire kutekaniza ebimurukugenda kwega?

⁷ Kakuba omutebezi akuraaliza kumusendekereza ha mwegi we, kyakubaire kirungi otekanize isomo erimukugenda kwegaho. (Ezer. 7:10) David outusangirwege tubalizeeho nagamba ati: “Kinsemeza muno ogu oumba  ngenzere na uwe ha mwegi obwaba atekaniize. Kinu kimukonyera kubaza ebintu ebikonyera omwegi.” Ekindi, omwegi nasobora kukyetegereza nk’oku inywena mutekaniize kurungi. Kandi kinu nikiija kumuteeraho ekyokurorraho ekirungi. Nobukiraaba ngu obundi tosoboire kutunga obwire obw’okutekaniza omu bwijwire, hakire tunga obwire obw’okutekaniza ensonga enkuru.

8. Nosobora ota kukigumya ngu, esaara ey’orasaaba obumuraaba mugenzere kwegesa omwegi y’amakuru?

⁸ Kusaba kukuru muno obumurukuba nimwegesa omwegi, nahabweki tekerezaaho kara eby’orabaza kakuba bakusaba kwebembera esaara. Obu nubwo esaara yaawe erahika ha mutima gw’omwegi. (Zab. 141:2) Hanae, arukwikara omu Japan, nahati nakyaijuka esaara eza munyaanya itwe ayasendekeriize omwegesa we. Nagamba ati: “Nkakyetegereza ngu akaba aine enkoragana enungi na Yahwe kandi nanyowe nkaba ningonza kuba nkauwe. Nkehurra ningonzebwa obuyabalizeeho ibara lyange omusaara ye.”

9. Kusigikirra ha Yakobo 1:19, kiki eky’osobora kukora kuba omukonyezi omurungi?

⁹ Sagika omwegesa obwaraaba nayegesa. Payoniya ow’embaganiza omu Nigeria, nagamba ati: “Omukonyezi omurungi ahuliiriza kurungi obumuba nimwega. Kandi abaza ebintu ebirukugasa, baitu tabaza muno habwokuba akyetegereza ngu bujunanizibwa bw’omwegesa kwebembera.” Nosobora ota kumanya akasumi orabalizaamu hamu n’eby’orabaza obumuraaba nimwega? (Nfu. 25:11) Huliiriza kurungi omwegesa hamu n’omwegi obu baraaba nibabaza. (Soma Yakobo 1:19.) Obu nubwo orasobora kukonyera obukiraaba nikyetaagisa. Baitu osemeriire kubanza kutekerezaaho ebyorukugenda kubaza. Ekyokurorraho, tikyakubaire kirungi kubaza ekihinguraine, kusara omwegesa ekirimi obwaraaba aine ekyarukusoborra, rundi kubazaaho isomo lindi. Baitu nosobora kukozesa ebigambo bike, ekyokurorraho, rundi ekikaguzo kukonyera omwegi kwetegereza kurungi ensonga eimurukwegaho. Obwire obumu nosobora kwehurra tikirukwetaagisa kugira ekiwayongeraho ha isomo murukwegaho. Baitu kakuba osiima omwegi kandi okoleeka ngu n’omufaaho, noija kumukonyera kukurakurana.

10. Ebiwarabiremu nibisobora bita kukonyera omwegi?

¹⁰ Bagambire ebiwarabiremu. Obukiraaba kisemeriire, nosobora kugambiraho omwegi omu bugufu omulingo wayegeremu amananu, wasoboire kuraba omu kizibu, rundi omulingo Yahwe akukonyiremu omu bwomeezi bwawe. (Zab. 78:4, 7) Ekyokurorraho kyawe nikyo kisobora kukonyera omwegi. Nikisobora kugumya okwikiriza kwe, rundi kumwekambisa kugumizaamu nakurakurana akahika ha kubatizibwa. Nikisobora nokumwoleka omulingo asobora kuraba omu kizibu eky’aine. (1 Pet. 5:9) Gabriel arukwikara omu Brazil kandi hati Payoniya ow’akasumi koona naijuka ekyamukonyire obwakaba nayega Baibuli.  Nagamba ati: “Obunahuliire ebyokurorraho eby’ab’oruganda, nkeega ngu Yahwe narora ebizibu ebindukurabamu. Kandi nkatekereza nti, obubaraaba basoboire kubiramu, nanyowe ninsobora.”

11-12. Habwaki tusemeriire kutangirra n’omuhimbo omwegi ow’aizire omu nsorrokano?

¹¹ Omwegi wa Baibuli kusobora kukurakurana akahika ha kubatizibwa asemeriire kwija omu nsorrokano obutoosa. Kinu nikiija kumugasira muno. (Baheb. 10:24, 25) Omwegesa we nuwe asobora kumuraaliza kwija omu rusorrokano rwe orw’okubanza. Obw’aija, itwena nitusobora kumwekambisa kugumizaamu naija ha Kyombeko ky’Obukama. Eki nitusobora kukikora tuta?

¹² Tangirra omwegi n’omuhimbo. (Bar. 15:7) Omwegi wa Baibuli kakuba ayehurra ngu atangiriirwe kurungi, eki nikisobora kumuletera kugonza kugumizaamu naija ha Kyombeko ky’Obukama. Mumutangirre n’omuhimbo kandi mumwanjurre abandi, baitu mwerinde kumwijurranaho. Baza na uwe, habwokuba omwegesa we nasobora kuba atakaizire rundi aine ebindi ebyarukukora omu Kyombeko ky’Obukama. Taho omutima omwegi eby’arukubaza kandi omwoleke ngu n’omufaaho. Kutangirra omwegi n’omuhimbo nikisobora kumukonyera kita? Tekerezaaho ekyokurorraho kya Dmitrii, ayabatiziibwe emyaka nke enyuma kandi hati anyakuli omuheereza omu kitebe. Obw’arukwijuka orusorrokano rwe orw’okubanza nagamba ati: “Ow’oruganda akandora nyemeriire aheeru y’Ekyombeko ky’Obukama ntiniire kutaahamu kandi omu mulingo ogw’embabazi akataahamu na nyowe. Baingi bakaija kundamukya. Eki kikampuniriiza muno. Kandi kikansemeza muno kyandetera n’okwegomba ngu kakuba ensorrokano ziriyo buli kiro. Ekintu nka kinu nkaba ntakakiroraga handi hoona.”

13. Enyetwaza yaitu nesobora kukwataho eta omwegi wa Baibuli?

¹³ Mutekeho ekyokurorraho ekirungi. Omulingo twetwazaamu nigusobora kukonyera omwegi wa Baibuli kukigumya ngu azoire amananu. (Mat. 5:16) Vitalii, hati owarukuheereza nka payoniya omu Moldova, nagamba ati: “Nkarora omulingo abandi omu kitebe baikaraga kandi bayetwazaamuga. Kinu kikangumya ngu Abakaiso ba Yahwe niyo diini ey’amananu.”

14. Ekyokurorraho kyawe nikisobora kita kukonyera omuntu kweyongera kukurakurana?

¹⁴ Kusobora kuhika ha kubatizibwa, omwegi asemeriire kuteeka omu nkora ebyarukwega. Kinu tikikira kwanguha. Baitu omwegi obw’arora omulingo mugasirwamu habw’okuteeka omu nkora emisingi ya Baibuli, nikisobora kumwekambisa kubeegeraho. (1 Kol. 11:1) Tekerezaaho ekyokurorraho kya Hanae, outusangirwege tubalizeeho. Nagamba ati:  “Nkakirora ngu ab’oruganda na banyaanya itwe bakaba nibateeka omu nkora ebintu ebinkaba ninyega. Nk’arora omulingo nkaba ninsobora kugarramu abandi amaani, kubaganyira, kandi n’okubooleka okugonza. Babazaahoga kurungi abantu abandi. Nkaba ningonza kuba nkabo.”

15. Enfumo 27:17 n’etukonyera eta kumanya ensonga habwaki kirungi kunywana omwegi wa Baibuli obwagumizaamu kwija omu nsorrokano?

¹⁵ Nywana omwegi wa Baibuli. Omwegi obwaragumizaamu naija omu nsorrokano, mugumizeemu nimumwoleka ngu nimumufaaho. (Baf. 2:4) Lengaho kumumanya kurungi. Nosobora kumusiima habw’empindahinduka ez’akozere, kumukaguza ebirukukwata ha kwega kwe okwa Baibuli, eka ye hamu n’omulimo gwe. Baitu oyerinde kumukaguza ebikaguzo ebiramuswaza. Kubaza na uwe nikisobora kubaletera kufooka banywani. Obwonywana omwegi omukonyera kukurakurana kuhika ha kubatizibwa. (Soma Enfumo 27:17.) Hanae hati naheereza nka payoniya ow’akasumi koona. Obwarukwijuka ensorrokano ze ez’okubanza nagamba ati: “Obunatandikire kutunga abanywani omu kitebe, nkatandika kutunga ekihika eky’okugenda omu nsorrokano kandi nazigendamuga n’obu nabaga njwahire. Nkagonza muno banywani bange abahyaka kandi kikankonyera kwecwaho abanywani abatarukuramya Yahwe. Nkaba ningonza kwirra haihi na Yahwe hamu n’ab’oruganda na banyaanya itwe. Nahabweki nkacwamu kubatizibwa.”

16. Kintu ekindi ekitusobora kukora kukonyera omwegi kwehurra asemeriirwe habwokuba omu kitebe?

¹⁶ Omwegi obw’arayeyongera kukurakurana n’okukora empindahinduka, mukonyere kwehurra ngu ali omu h’ab’omu kitebe. Kinu nitusobora kukikora kurabira omu kumwoleka amakune. (Baheb. 13:2) Denis arukwikara omu Moldova obw’arukwijuka akasumi obwakaba nayega Baibuli nagamba ati: “Emirundi nyingi, ab’oruganda baaralizaaga nyowe na mukazi wange kuba hamu nabo. Bakatugambira omulingo Yahwe yabakonyiremu. Eki kikatugarramu muno amaani. Tukakigumya ngu tukaba nitugonza kuheereza Yahwe kandi ngu eki kikaba nikiija kuturugiramu kuba n’obwomeezi oburungi.” Omwegi obw’afooka mutebezi, nosobora kumuraaliza kukora naiwe omu buheereza. Diego omutebezi kuruga omu ihanga lya Brazil nagamba ati: “Ab’oruganda baingi bakandaaliza kukora nabo omu buheereza. Gunu gukaba mulingo murungi ogw’okubamanya kurungi. Obunayeyongiire kubamanya, nkeega bingi kandi nkeyongera kwirra haihi na Yahwe hamu na Yesu.”

17. Abagurusi b’ekitebe nibasobora kukonyera bata abeegi ba Baibuli?

¹⁷ Abeegi ba Baibuli bahe obwire. Abagarusi omu kitebe, obumwoleka abeegi ba Baibuli okugonza hamu n’okubafaaho nimusobora kubakonyera kuhika ha kubatizibwa. Mubazeege  nabo obubaija omu nsorrokano. Nibaija kwehurra ngu n’obafaaho obw’oraijuka amabara gaabo kukira muno obubaratandika kugarukamu omu nsorrokano. Nosobora n’okukora entekaniza ey’okugendaga n’abatebezi obubarukuba nibagenda kwegesa abeegi baabo. Nosobora kukonyera muno omwegi kukira nk’oku orukutekereza. Payoniya arukwetwa Jackie arukwikara omu Nigeria nagamba ati: “Abeegi ba Baibuli baingi kibahuniiriza obu bakimanya ngu ow’oruganda ounyizire na uwe kubegesa mugurusi omu kitebe. Omwegi omu akagamba ati: ‘Pasita wange eki tasobora kukikora. Abungira abaguuda bonka, kandi nabwo babanza kumusasura!’” Omwegi ogu hati naija omu nsorrokano.

18. Abagurusi b’ekitebe nibasobora bata kuhikiriza kurungi obujunanizibwa obwolekerwe omu 1 Petero 5:2?

¹⁸ Tendeka kandi ogarremu amaani abateebezi abaine abeegi ba Baibuli. Abagurusi omu kitebe, mwine obujunanizibwa obw’amaani obw’okukonyera abatebezi kuhikiriza kurungi obuheereza bwabo, otwaliiremu omulimo ogw’okwegesa abantu Baibuli. (Soma 1 Petero 5:2.) Kakuba omutebezi ahurra ensoni kwegesa omwegi we oroho, nosobora kumusaba okegesa omwegi. Jackie, outusangirwe tubalizeeho nagamba ati: “Abagurusi baikara nibankaguza ebirukukwata h’abeegi bange. Obungumanganirwa omu kwegesa omwegi, abagurusi bampa obuhabuzi obunkonyera.” Abagurusi nibasobora kugarramu amaani n’okwekambisa abatebezi abaine abeegi kugumisiriza. (1 Bas. 5:11) Jackie nayongeraho ati: “Nkinsemeza muno abagurusi obubangarramu amaani kandi obubangambira ngu nibasiima habw’amaani ndukutekamu. Ebigambo nk’ebi bimpeheza nk’okunywa egilaasi ey’amaizi omu bwire bw’omusana. Ebigambo byabo eby’embabazi binkonyera kwehurra ngu nimpikiiriza kurungi omulimo ogw’okwegesa abantu Baibuli.”​—Nfu. 25:25.

19. Kusemererwa ki itwena okutusobora kutunga?

¹⁹ N’obukiraaba ngu omu kasumi kanu titwine muntu outurukwegesa Baibuli, nitusobora kukonyera omuntu kukurakurana omu by’omwoyo. Nitusobora kusagika omwegesa kuraba omu kuhayo eby’okugarukamu byaitu ebitutekaniize kara, baitu twerinde kubaza ekihinguraine. Nitusobora kunywana abeegi obu baija ha Kyombeko ky’Obukama kandi nitusobora kubateeraho ekyokurorraho ekirungi. Abagarusi nibasobora kugarramu amaani abeegi kuraba omu kubaha obwire kandi n’okugarramu abeegesa amaani kuraba omu kubatendeka n’okubasiima. Mali tutunga okusemererwa kwingi obutugira ekitwakoraho, n’obukiba kitaito kukonyera omuntu kugonza n’okuheereza Yahwe.