1. Kintu ki ekirukusemeza ekyakuhikire h’Abayudaaya abaali nibagenda kuruga omu bunyagwa?

 ABAYUDAAYA bakaba basemeriirwe muno. Yahwe akaba ‘aimukize omutima gwa Kuro, omukama wa Peresi’ kulekera Abaisaleri abakaba bamazire emyaka nyingi muno omu bunyagwa omu Baburoni. Omukama akarangirra ngu Abayudaaya bagaruke omu nsi y’owabubo ‘bombeke enju ya [Yahwe], Ruhanga wa Isareri.’ (Ezer. 1:1, 3) Eki kyali nikisemeza muno! Eki kyali nikimanyisa ngu okuramya okwa Ruhanga ow’amananu kwali nikugenda kwongera kugarurweho omu nsi ey’akaba ahaire abantu be.

2. Abayudaaya abakaba barugire omu bunyagwa kiki ekibasoboire kukora?

² Omu mwaka 537, Abayudaaya abaabandize kuruga omu bunyagwa bakahika omu Yerusalemu orubuga orukuru orwa Yuda omu bukama bw’amasirimuka. Abayudaaya abakaba bagarukire, aho naaho bakatandika kwombeka yekaru, kandi nambere omwaka gwa 536 gwahikiire, baali bamazire ira kwombeka omusingi!

3. Kuhakanizibwa kwa mulingo ki Abayudaaya okubatungire?

³ Hanyuma y’Abayudaaya kutandika kwombeka yekaru, abantu baingi bakatandika kubahakaniza. Abantu abakaba babetoroire ‘bakajwahya emikono y’abantu ba Yuda, babatuntuza omu kwombeka kwabo.’ (Ezer. 4:4) Enyikara egi ekagumira Abayudaaya kandi ebintu bikeyongerra kimu kusiisikara. Omu mwaka 522, Atakisakisi, akafooka omukama omuhyaka owa Peresi. * Abahakaniza bakarora empinduka enu nk’omugisa ogw’okutangira kimu omulimo ogw’okwombeka kurabira omu ‘kutaho ebiitima omu biragiro.’ (Zab. 94:20) Kandi bakasindika ebbaruha hali Omukama Atakisakisi nibamugambira ngu Abayudaaya bakaba bakozere orukwe orw’okumujeemera. (Ezer. 4:11-16) Omukama akaikiririza omu bisuba byabo kandi yaragira ngu okwombeka yekaru kwemerezebwe. (Ezer. 4:17-23) Habw’okubeemereza, Abayudaaya bakaleka kwombeka yekaru.​—Ezer. 4:24.

4. Kiki Yahwe ekiyakozere hanyuma y’abahakaniza kutanga omulimo ogw’okwombeka yekaru? (Isaya 55:11)

 ⁴ Abantu abatarukuramya Yahwe abakaba bali omu nsi egi, hamu n’abamu omu gavumenti ya Peresi bakaba bacweriiremu kimu kutanga omulimo ogw’okwombeka yekaru. Baitu Yahwe akaba nagonza bamaliirize omulimo gunu, kandi uwe aikara nahikiriza ebigendererwa bye. (Soma Isaya 55:11.) Akaimukya nabbi atarukutiina arukwetwa Zakaliya kandi akamuha okwolekwa okw’ebintu munaana ebirukuhuniiriza ebyakaba asemeriire kugambira Abayudaaya nukwo abagarremu amaani. Okwolekwa oku okurukugarramu amaani kukabakonyera kurora ngu, bakaba batasemeriire kutiina abarukubahakaniza kandi kukabekambisa kugumizaamu nibakora omulimo gwa Yahwe. Omu kwolekwa okwakataano, Zakaliya akarora etabaaza hamu n’emiti ebiri ey’emizaituni.

5. Kiki ekiturukugenda kubazaaho omu kicweka kinu?

⁵ Obwire obumu itwena tuhwamu amaani. Nahabweki nitusobora kugasirwa kakuba tutekerezaaho mulingo Yahwe yagarwiremu Abaisaleri amaani kurabira omu kwolekwa okwa Zakaliya okwakataano. Kwetegereza kurungi okwolekwa kunu nikisobora kutukonyera kuheereza Yahwe n’obwesigwa n’obuturukuba nituhakanizibwa, n’obutuhikwaho empindahinduka, kandi n’obututunga oburagirizi obututarukwetegereza. Omu kicweka kinu nitugenda kubazaaho ensonga zinu zoona.

6. Okwolekwa okw’etabaaza n’emiti ey’emizaituni okurukubazibwaho omu Zakaliya 4:1-3, kukaha kuta Abayudaaya obumanzi? (Rora ekisisani ekiri ha kyesweko.)

⁶ Soma Zakaliya 4:1-3. Okwolekwa okw’etaabaza hamu n’emiti ebiri ey’emizaituni kukaha Abayudaaya obumanzi obw’okugumizaamu nibombeka n’obukiraaba ngu bakaba nibahakanizibwa. Omu mulingo ki? Oyetegeriize nk’oku etaabaza ekaba eine amafuta agarukwikara nigagyamu gatarukuleka? Amafuta kuruga omu miti ebiri ey’emizaituni gaikaraga nigaseeseka omu kibindi kandi hanyuma garuga omu kibindi gagenda omutaara musanju ez’etabaaza. Amafuta ganu gasobozesaaga etaara kwikara nizaaka obwire bwona. Zakaliya akakaguza ati: “Binu biki mukama wange?” Malaika akamugarukamu n’obutumwa bunu kuruga hali Yahwe, akagamba ati: “Tihali habwobusobozi, nobuhokuba habwamani, baitu habwomwoyo gwange, agambire [Yahwe] wamahe.” (Zek. 4:4, 6) Amafuta kuruga omu miti gaali nigakiikirra omwoyo gwa Yahwe ogurukwera ogw’amaani kandi ogutasobora kuhwaho. Omwoyo ogurukwera, gwali nigukira amaani ihe lya Peresi lyona. Habwokuba Yahwe akaba nabasagika, abarukwombeka yekaru bakusoboire kumaliiriza omulimo gwabo n’obukiraaba ngu bakaba nibahakanizibwa. Obutumwa bunu bukabagarramu muno amaani! Abayudaaya ekibaali baine kukora, nukwo kwesiga Yahwe kandi n’okwongera kutandika kwombeka. Kandi eki nikyo kyonyini baakozere n’obukiraaba ngu omulimo gwali gukyatangirwe.

7. Mpindahinduka ki eyaletiire abombeki ba yekaru kuhumuzibwa?

⁷ Haroho empindahinduka eyaletiire abombeki ba yekaru kuhumuzibwa. Mpindahinduka ki egi? Omu mwaka 520, Daliyo I, nuwe yafookere omukama wa Peresi. Omu mwaka gwe ogwakabiri nk’omukama, akakizoora ngu kutanga okw’okwombeka yekaru kyali kitahikire. Hanyuma Daliyo akaragira ngu bamalirre okwombeka yekaru. (Ezer. 6:1-3) Encwamu y’omukama ekahuniiriza buli omu, baitu akakora n’ekirukukiraho. Akaragira abantu abakaba betoroire Abayudaaya kulekeraho kubahakaniza kandi n’okubaha sente, hamu na buli kimu ekibakaba nibetaaga kumaliiriza kwombeka yekaru! (Ezer. 6:7-12) Ekyarugiremu, Abayudaaya bakamaliiriza kwombeka yekaru omu mwaka gwa 515, hanyuma y’emyaka ena yonka​—Ezer. 6:15.

8. Habwaki nosobora kuba mumanzi n’obwohakanizibwa?

 ⁸ N’omu kasumi kanu, abaheereza ba Yahwe baingi nibahakanizibwa. Ekyokurorraho, abamu nibaikara omu mahanga nambere omulimo gwaitu gutangirwe. Omu mahanga nkaago, ab’oruganda nibasobora kukwatwa ‘n’okutwarwa hali abalemi n’abakama,’ kandi bunu buba bwakaiso halibo. (Mat. 10:17, 18) Obwire obumu, empindahinduka omu bwebembezi n’esobora kuleetera ab’oruganda kutunga obugabe obw’okuramya. Rundi omucwi w’emisango nasobora kukora encwamu ey’esobora kutusobozesa kutunga obugabe obw’okuramya. Abakristaayo abandi nibahikwaho okuhakanizibwa okw’omulingo ogundi. N’obukiraaba ngu nibaikara omu mahanga nambere baine obugabe obw’okuramya, nibahakanizibwa abanyabuzaale abacweriiremu kimu kubalemesa kuheereza Ruhanga. (Mat. 10:32-36) Emirundi erukukira obwingi, abanyabuzaale baitu abarukutuhakaniza obubakyetegereza ngu tibasobora kutuhambiriza kuleka kuheereza Yahwe, baleka kutuhakaniza. Kandi abamu abaatuhiganizaaga bakahika bafooka abaheereza ba Yahwe. Obworahikwaho okuhakanizibwa otaleka kuheereza Yahwe! Ba mumanzi. Yahwe n’akozesa omwoyo gwe ogurukwera ogw’amaani, kukukonyera. Nahabweki tosemeriire kutiina ekintu kyona!

9. Habwaki Abayudaaya abamu basaliirwe obubarozere omusingi ogwa yekaru empyaka nigombekwa?

⁹ Omusingi ogwa yekaru empyaka obugwayombekerwe, Abayudaaya abamu abakuzire omu myaka bakarra. (Ezer. 3:12) Bakaba barozere yekaru ey’esemiire muno ey’ekaba eyombekerwe Sulemani, ekyabaletiire kurora yekaru empyaka ey’ekaba n’eyombekwa ‘nketali kintu.’ (Hag. 2:2, 3) Bakasaalirwa muno habw’okulengesaniza yekaru empyaka hamu n’enkuru. Okwolekwa Zakaliya okuyatungire kwakubakonyire kwongera kutunga okusemererwa. Omu mulingo ki?

10. Ebigambo bya malaika ebirukusangwa omu Zakaliya 4:8-10 bikakonyera bita Abayudaaya kuleka kusaalirwa?

¹⁰ Soma Zakaliya 4:8-10. Kiki malaika eky’akaba namanyisa obuyagambire ngu Abayudaaya “balisemererwa, [obu]balirora akabale akokulenga omu mukono gwa Zerubaberi [omulemi Omuyudaaya]”? Akabaale ak’okulenga rundi birigi ekozesebwa kumanya ekintu obukiraaba kiterekeriire kurungi. Nahabweki malaika akaba nagumya Abaisaleri ngu yekaru n’obweraaba ekaba etasemiire nk’oku abamu baali nibaginihira, ekaba niija kumarwa kwombekwa kandi ebe nk’oku Yahwe akaba nagonza. Yahwe akaba nagenda kusemerererwa yekaru egi, nahabweki nabo bakaba basemeriire kugisemerererwa. Yahwe  eky’akaba natwara kuba kikuru ha yekaru empyaka, nikyo eky’okumuramya omu mulingo arukusiima. Abayudaaya kakuba omutima bagutaire ha kuramya Yahwe omu mulingo arukusiima hamu n’okumusemeza bakwongiire batunge okusemererwa.

11. Bizibu ki ebimu abaheereza ba Yahwe ebibarukurabamu kasumi kanu?

¹¹ Baingi omuliitwe kitugumira obutuhikwaho empindahinduka. Abamu abaheerezaaga omu buheereza obw’embaganiza obw’akasumi koona kumara akasumi kaingi, obuheereza bwabo buhindukire. Abamu balekereho obujunanizibwa obubarukugonza muno habw’okukura omu myaka. Ky’obuhangwa kusaalirwa kakuba empindahinduka nka zinu zituhikaho. Ha kubanza nitusobora kutetegereza encwamu ey’ekozerwe rundi kutaikiranganiza nayo. Nitusobora kuba nitwehurra ngu ebintu byakorwaga kurungi kara. Kandi nitusobora kuhwamu amaani, tukateekereza ngu habw’empindahinduka zinu, titukyasobora kuheereza Yahwe omu mulingo ogurukukiraho. (Nfu. 24:10) Okwolekwa kwa Zakaliya nikusobora kuta kutukonyera kwikara nituha Ruhanga ekirukukirayo oburungi?

12. Kwolekwa kwa Zakaliya nikusobora kuta kutukonyera kwikara twine okusemererwa enyikara yaitu n’obwehinduka?

¹² Kitwanguhira kumanyiira empindahinduka empyaka obutulengaho kurora ebintu omu mulingo Yahwe abiroramu. Kasumi kanu nahikiiriza ebintu eby’amaani muno kandi twine omugisa ogw’amaani ogw’okuba bakozi bagenzi be. (1 Kol. 3:9) Obujunanizibwa obutwine nibusobora kuhinduka, baitu okugonza Yahwe okwatwiniire tikulihinduka. Nahabweki, kakuba empindahinduka ey’ekozerwe omu kitebe ekukwataho, wetantale kumara obwire bwingi notekerezaaho ensonga zoona habwaki empindahinduka egi ekozerwe. Omu kiikaro ky’okwegomba “ebiro byaira,” saba Yahwe akukonyere kurora ebirungi omu mpindahinduka empyaka. (Mug. 7:10) Omu kiikaro ky’okutekerezaaho ebintu eby’otakyasobora kukora, tekerezaaho ebintu byona eby’osobora kukora. Omu kwolekwa kwa Zakaliya, nitwegamu isomo erikuru muno ery’okwikara twine entekereza ey’ehikire. Ekirarugamu, nitwija kwikara twine okusemererwa kandi tuli besigwa enyikara zaitu n’obuzirahinduka.

13. Habwaki Abaisaleri abamu nibasobora kuba baatekeriize ngu encwamu ey’okwongera kwombeka yekaru ekaba etali nungi?

¹³ Omulimo ogw’okwombeka yekaru kugakaba gutangirwe. Baitu abasaija abakaba bakomerwe kwebembera omulimo, Nyakatagara  Omukuru Yesuha (Yosuha) hamu n’Omulemi Zerubaberi​—“[bakatandika] okwombeka enju ya Ruhanga.” (Ezer. 5:1, 2) Abayudaaya abamu nibasobora kuba baatekeriize ngu encwamu egi tehikire. Abayudaaya bakaba batasobora kusereka kwombeka kwa yekaru kandi bakaba bakimanyire ngu abanyanzigwa baabo bakaba nibaija kukora kyona ekirukusoboka kutanga omulimo ogu. Abasaija babiri abakaba nibebembera omulimo, Yosuha na Zerubaberi bakaba nibetaaga kukigumya ngu Yahwe nabasagika. Bakatunga okugumibwa kunu. Omu mulingo ki?

14. Kusigikirra ha Zakaliya 4:12, 14, Nyakatagara Omukuru Yosuha hamu n’Omulemi Zerubaberi, bakatunga okugumibwa kwa mulingo ki?

¹⁴ Soma Zakaliya 4:12, 14. Omu kicweka kinu eky’okwolekwa kwa Zakaliya, malaika asoborra nabbi wa Ruhanga omwesigwa ngu emiti ebiri emizaituni n’ekikirra ‘abaana babiri [abaseserweho] abamagita,’ kandi abo nubo Yosuha na Zerubaberi. Malaika akagamba ngu, kikasisana oti rundi abasaija banu babiri bakaba bemeriire haihi na Yahwe, Mukama wensi yoona. Ogu gukaba mugisa gw’amaani muno! Yahwe akaba nabesigira kimu. Nahabweki Abaisaleri, bakaba nibasobora kwesigira kimu buli kimu kyona abasaija abo bakaba nibabagambira habwokuba Yahwe akaba n’abakozesa kubebembera.

15. Nitusobora tuta kwoleka ngu nituteekamu ekitiinisa oburagirizi bwa Yahwe oburukusangwa omu Kigambo kye?

¹⁵ Omu kasumi kanu, Yahwe nakyagumizaamu kwebembera abantu be n’akozesa Ekigambo kye Baibuli. Omu kitabu eki ekirukwera atugambira nk’oku tusobora kumuramya omu mulingo oguhikire. Tusobora tuta kwoleka ngu nituteekamu ekitiinisa oburagirizi obututunga kuruga omu Kigambo kya Ruhanga? Kuraba omu kutunga obwire obw’okukisoma n’obwegendereza hamu n’okukyetegereza. Wekaguze: ‘Obumba ninsoma Baibuli rundi kimu ha bitabu byaitu, mbanza kwemerramu kake kandi nkecumiitirizaaho ebindukusoma? Ndengaho kuseruliiriza h’amananu omu Baibuli agagumire kwetegereza? Rundi ndabamu burabamu bwangu bwangu?’ (2 Pet. 3:16) Kakuba tutunga obwire obw’okucumiitirizaaho Yahwe ebyarukutwegesa, nitwija kusobora kuhondera oburagirizi obwarukutuha kandi n’okuhikiiriza omulimo gwaitu ogw’okutebeza.​—1 Tim. 4:15, 16.

16. Obutuba tutetegeriize kurungi oburagirizi, kuruga ha “mwiru omwesigwa kandi ow’amagezi” kiki ekisobora kutukonyera kubuhondera?

¹⁶ Omulingo ogundi Yahwe ogwatuhamu oburagirizi, nugwo ogw’okurabira omu “omwiru omwesigwa kandi ow’amagezi.” (Mat. 24:45, NWT) Obwire obumu nasobora kutuha oburagirizi  obututarukwetegereza kurungi. Ekyokurorraho, nitusobora kutunga oburagirizi obutekaniziibwe kutukonyera kwetekaniriza ekigwererezi ekiturukuteekereza ngu tikirukusobora kubaho omu kiikaro kyaitu. Rundi nitusobora kwehurra ngu omwiru omwesigwa natutinirra ekihinguraine omu kasumi ak’oburwaire obw’amaani. Kiki ekitusemeriire kukora kakuba twehurra ngu oburagirizi obutuhairwe tibuli bw’amagezi? Nitusobora kuteekerezaaho omulingo Abaisaleri bagasiirwe obubayorobiire oburagirizi obubahairwe kurabira omu Yosuha na Zerubaberi. Nitusobora n’okutekerezaaho Ebyahandiikirwe ebindi ebitwasomere. Obwire obumu, abantu ba Ruhanga batungaga oburagirizi obutarukuzooka kuba bw’amagezi omu ndora y’abantu, baitu obwamalirraga bujunire obwomeezi bwabo.​—Bac. 7:7; 8:10.

17. Okwolekwa okwetaabaza hamu n’emiti ebiri emizaituni, kukakwataho kuta Abayudaaya?

¹⁷ Okwolekwa okwakataano Zakaliya okuyatungire, n’obukuraaba kukaba kuli kugufu, kukakonyera Abayudaaya kukora omulimo gwabo n’obwekambi kandi n’okuramya Yahwe. Kandi obubataire omu nkora ebibayegere kuruga omu kwolekwa kwa Zakaliya, bakarora nk’oku Yahwe yabasagikire omu mulingo ogw’okugonza kandi yabaha n’oburagirizi. Kurabira omu kukozesa omwoyo gwe ogurukwera ogw’amaani, Yahwe akabakonyera kugumizaamu n’omulimo gwabo kandi n’okwongera kutunga okusemererwa.​—Ezer. 6:16.

18. Okwolekwa kwa Zakaliya nikusobora kukukwataho kuta?

¹⁸ Okwolekwa kwa Zakaliya okwetabaaza hamu n’emiti ebiri emizaituni nikusobora kukwataho muno obwomeezi bwawe. Nk’oku turozere, nikusobora kukukonyera kutunga amaani agorukwetaaga kugumira okuhakanizibwa, kutunga okusemererwa okworukwetaaga, kugumira empindahinduka omu bwomeezi bwawe, kandi n’okwesiga okworukwetaaga kusobora kworobera oburagirizi obwotarukwetegereza. Kiki eky’osemeriire kukora obwotunga ebizibu omu bwomeezi bwawe? Eky’okubanza, rora Zakaliya ekiyarozere​—kandi eki nikyo obwakaiso oburukugumya ngu Yahwe nafaaho abantu be. Hanyuma teeka omu nkora ebyorukurora kurabira omu kwesiga Yahwe kandi n’okugumizaamu kumuramya n’omutima gwawe gwona. (Mat. 22:37) Obworakora ebi, Yahwe naija kukukonyera kumuheereza oine okusemererwa ebiro n’ebiro.​—Bak. 1:10, 11.