Abamu abasoma Ekyahandiikirwe eki bwangu bwangu bekaguza ekikaguzo eki. Baitu enkarra ezi, nizibazaaho abasaija babiri abarukwahukana boona abayetwaga Mefibosesi, kandi haroho ekitusobora kwega kuruga omu kweijukya ebyabaireho.

Saulo Omukama wa Isaleri, akaba aine abatabani musanju hamu na bahara babiri. Yonasani nuwe akaba ali mutabani wa Saulo ow’okubanza. Hanyuma, Omukama Saulo akazaara omutabani ondi arukwetwa Mefibosesi ayazairwe mukazi we arukwetwa Riziba. Ekirukuhuniiriza, na Yonasani akaba aine omutabani ow’arukwetwa Mefibosesi. Nahabweki, Omukama Saulo akaba aine omutabani hamu n’omwijukuru abakaba baine ibara erya Mefibosesi.

Haroho akasumi, Omukama Saulo obuyayehinduliire Abagibeoni abakaba nibaikara n’Abaisaleri kandi yalengaho kugonza kubahwerekereza boona. Nikizooka ngu, abamu halibo bakaitwa. Eki kyali kitahikire nakati. Habwaki? Habwokuba omu kasumi ka Yosuha, abakuru ba Isaleri baali bakozere ekiragaano eky’obusinge n’Abagibeoni.​—Yos. 9:3-27.

Ekiragaano eki kikaba nikikyakora n’omu kasumi k’Omukama Saulo. Kwahukana n’ekikaba kiri omu kiragaano eki, omukama akalengaho kuhwerekereza Abagibeoni boona. Habw’okukora kinu, Saulo n’ab’omu nju ye bakatunga omusango ogw’okuseesa esagama. (2 Sam. 21:1) Hanyuma, Daudi akafooka omukama. Abagibeoni abakaba basigaireho bakagambira Daudi ekibi kinu ekikaba kikozerwe. Daudi akabakaguza omulingo asobora kusasura habw’ekibi Omukama Saulo akaba akozere nukwo Yahwe asobole kuha ensi y’Isaleri omugisa. Omu kiikaro ky’okumusaba sente, Abagibeoni bakamusaba kuhayo n’okwita abatabani musanju ab’omusaija ‘ayacwire amagezi’ okugonza kubahwerekereza. (Kubar. 35:30, 31) Daudi akaikiriza okusaba kwabo.​—2 Sam. 21:2-6.

Omu kasumi ako, Saulo na Yonasani bakaba bamazire kufeera omu bulemu, baitu mutabani wa Yonasani Mefibosesi akaba akyali mwomeezi. Akatunga butandwa obwakaba akyali muto eyamuletiire kuba mulema kandi ateteranizeeho isenkuru omu kutahirra Abagibeoni. Daudi akaba akozere ekiragaano eky’obunywani na Yonasani, ekyakugasiire n’abaana baabo otwaliiremu na mutabani wa Yonasani, Mefibosesi. (1 Sam. 18:1; 20:42) Ekyahandiikirwe nikigamba kiti: “Omukama [Daudi akooleka embabazi] Mefibosesi mutabani wa Yonasani, mutabani wa Saulo, habwekirahiro kya [Yahwe] ekikaba kiri namberali.”​—2 Sam. 21:7.

Baitu nabwo akakora Abagibeoni ekibamusabire. Akahayo batabani ba Saulo babiri, kandi omu halibo akaba nayetwa Mefibosesi hamu n’abaijukuru bataano aba Saulo aboojo. (2 Sam. 21:8, 9) Daudi ekiyakozere kikaleetera ensi y’Isaleri kwihwaho omusango ogw’okuseesa esagama.

Ebyabaireho tibirukutumanyisa ebyafaayo byonka. Ekiragiro kya Ruhanga kyali nikyetegerezebwa kurungi. Kikaba nikigamba kiti: “Abana bataliitwa habwabaisebo.” (Bir. 24:16) Yahwe tiyakwikiriize batabani ba Saulo babiri hamu n’abaijukuru aboojo bataano kwitwa obubakubaire bataine musango. Ekiragiro eki kikongeraho ngu: “Omuntu wena aliitwa habwekibikye wenka.” Nikizooka batabani hamu n’abaijukuru musanju aba Saulo abaisirwe haroho omulingo bayejumbiire omu kwita Abagibeoni. Ekyarugiremu, banu musanju bakasasurra ekibi kyabo.

Ekyokurorraho kinu nikyoleka ngu omuntu tasobora kwekwasa ngu akakora ekibi habw’okuteekereza rundi habw’okugamba ngu nahondera ekiragiro ekyahairwe. Orufumu orw’amagezi nirugamba ngu: “Terekereza oruhenda orwebigere byawe, emihanda yawe yona egumibwe.”​—Nfu. 4:24-27; Bef. 5:15.