Habwaki omusaija arukwetwa “nanka” yagambire ngu ‘kyakusiisire’ obugwetwa bwe kakuba yaswire Rusi? (Rus. 4:1, 6)

Omu busumi bwa Baibuli, omusaija ow’aswire obuyafaaga ataine omwana, kyaletahoga ebikaguzo nka binu: Kiki ekyakuhikire ha itaka lye? Ibara ly’eka ye lyakuhoireho ebiro n’ebiro? Ebiragiro bya Musa byagarukamuga ebikaguzo ebi.

Kiki ekyahikaga ha itaka ery’omusaija ayafaaga rundi ayafookaga munaku kandi akatunda itaka lye? Mugenzi we omusaija rundi omunyabuzaale we yanunuraga rundi yacunguraga itaka eri. Kinu kyakonyeraga itaka eri kwikara omu kika.​—Lev. 25:23-28; Kubar. 27:8-11.

Ibara ly’eka y’omusaija ayabaga afiire lyalindwaga lita? Kuraba omu ntekaniza y’obuswere nambere mugenzi wa kifa yasweraga mukazi wa kifa, nk’oku kyabaire hali Rusi. Omusaija ogu yasweraga mukazi wa kifa nukwo azaale omugwetwa ayalindaga ibara lya kifa kandi atwale n’obugwetwa bwe. Entekaniza enu yayolekaga okufaayo hali omufakati.​—Bir. 25:5-7; Mat. 22:23-28.

Tekerezaaho ekyokurorraho kya Naomi. Akaba aswirwe omusaija arukwetwa Erimereki. Erimereki hamu n’abatabani baabo babiri obubafiire, Naomi akaba atakyaine muntu ow’okumurolerra. (Rus. 1:1-5) Naomi obuyagarukire Yuda, akagambira mukamwana we kusaba Boazi kwongera kugura itaka lyabo. Boazi akaba ali munyabuzaale wa Erimereki. (Rus. 2:1, 19, 20; 3:1-4) Baitu Boazi akakyetegereza ngu hakaba haroho omunyabuzaale ondi Baibuli ow’eyeta “nanka” ow’akaba ali haihi omu buzaale kumukiraho. Nahabweki, “nanka” nuwe akaba aine omugisa gw’okubanza kucwamu obwaraaba nagonza kugura itaka eri rundi nangwa.​—Rus. 3:9, 12, 13.

Hakubanza, “nanka” akaba nagonza kukonyera. (Rus. 4:1-4) N’obukiraaba ngu kikaba nikiija kumwetaagisa kutekamu sente, akakyetegereza ngu Noami akaba atakyasobora kuzaara omwana ayakugweserwe itaka kuruga hali Erimereki. Eki nikimanyisa ngu “nanka” akaba nagenda kutwara itaka lya Erimereki kandi lifooke limu ha bugwetwa bwe, nahabweki, eki kikaba kirungi haluwe.

Baitu “nanka” akahika yahindura entekereza ye obuyakyetegeriize ngu akaba aine kuswera Rusi. Akagamba ati: “Tindukusobora okukinunura nyenka, rundi ndeke okusisa [obugwetwa bwange].” (Rus. 4:5, 6) Habwaki yahindwire entekereza ye?

Kakuba “nanka” rundi omuntu ondi yaswire Rusi kandi akazaara omwana omwojo, omwana ogu yakugweserwe itaka lya Erimereki. Hati kinu ‘kyakusiisire’ kita ‘obugwetwa’ bwa “nanka”? Baibuli tetugambira, baitu hanu haroho ensonga ezisobora kuba zamulemeseze.

• Ey’okubanza, sente eziyakukozeseze kugura itaka lya Erimereki zakusisaine nk’ezimuferiire busa, habwokuba itaka eri lyakubaire lya mutabani wa Rusi.

• Eyakabiri, akaba naija kutunga obujunanizibwa bw’okurolerra Naomi na Rusi.

• Eyakasatu, kakuba Rusi yazaliire “nanka” abaana abandi, nabo bakubagaine ha bugwetwa bwe n’abaana be abayakusangirwe aine.

• Eyakana, kakuba “nanka” yakubaire ataine abaana abe habwe, omwana wa “nanka” ayakuzairwe omu Rusi, yakubaire asemeriire kutunga obugwetwa bwa Erimereki n’obwa “nanka.” Nahabweki, yakuferiirwe itaka lye nirigenda hali omwana ow’akaba atarukwija kwetwa ibara lye. “Nanka” akaba atarukugonza kufeerwa obugwetwa bwe habw’okugonza kukonyera Naomi. Niyo ensonga habwaki yacwiremu ngu omununuzi ow’akaba n’amugarukaho, ogu nuwe Boazi atwale obujunanizibwa obu. Boazi akaikiriza habwokuba akaba nagonza “okuimukiza obugwetwabwe ibara lyogu ayafire.”​—Rus. 4:10.

Nikizooka ngu “nanka” akaba nagonza kwikazaaho ibara lye lyonka n’obugwetwa bwe. Akaba ali muntu ow’arukwegondeza wenka. N’obukiraaba ngu “nanka” akakora n’amaani muno kulinda ibara lye, busaho n’omu ow’amanyire ibara lye. Ekindi, akafeerwa omugisa ogw’embaganiza Boazi oguyatungire, ogw’okubalirwa omu rukarra rw’abantu abaarugirwemu Masiya, ogu nuwe Yesu Kristo. Mali kakikaba ky’obusaasi “nanka” kwanga omugisa ogw’okukonyera omuntu ow’akaba ali omu bwetaago, habw’okwegondeza wenka!​—Mat. 1:5; Luk. 3:23, 32.