1-2. Kiki ekikira kubaho abantu obu babatizibwa, kandi kiki ekiturukugenda kubazaaho omu kicweka kinu?

 WAKARORAGA guruupu y’abantu abarukugenda kubatizibwa? Ohurra encwamu yabo eibarukugumiza kimu obubaba nibagarukamu ebikaguzo bibiri batakabatiziibwe. Orora abanyabuzaale hamu n’abanywani baabo nk’oku barukubesiimisa. Ababatiziibwe obubaruga omu maizi, ohurra abantu nibateera omu ngaro kandi orora okusemererwa ha maiso gaabo. Haihi buli wiiki, enkumi n’enkumi z’abantu bateera orutambu orw’okwehayo hamu n’okubatizibwa, nk’Abakaiso ba Yahwe.

² Kandi iwe? Obworaaba n’otekerezaaho kubatizibwa, oli muntu w’embanganiza omu nsi enu embi habwokuba ‘n’oserra Ruhanga.’ (Zab. 14:1, 2) Ekicweka kinu kitekaniziibwe habwawe k’obe oli muto rundi okuzire. Baitu naitwe ababatiziibwe nitugonza kugumya encwamu yaitu ey’okuheereza Yahwe ebiro n’ebiro. Haroho ensonga nyingi habwaki tugonza kuheereza Yahwe, baitu leka tubazeeho isatu halizo.

3. Habwaki abaheereza ba Yahwe bagonza amananu hamu n’okuhikirra? (Zabuli 119:128, 163)

³ Yahwe akaragira abantu be ‘kugonzaaga amazima.’ (Zak. 8:19) Yesu akatererra abahondezi be kuhonderaga okuhikirra. (Mat. 5:6) Kinu nikimanyisa ngu omuntu nayetaaga kuba n’okugonza okw’amaani okw’okukora ekihikire, ekirungi, kandi ekirukwera omu maiso ga Ruhanga. Ogonza amananu n’okuhikirra? Nitukigumya ngu n’obigonza. Onoba ebisuba n’ebintu byona ebitahikire hamu n’ebibi. (Soma Zabuli 119:128, 163.)  Omuntu ow’abaza ebisuba aba n’ayegera hali Sitaani omulemi w’ensi enu. (Yoh. 8:44; 12:31) Kimu ha bigendererwa bya Sitaani nikyo eky’okusiiga ibara lya Yahwe erirukwera enziro. Sitaani aikaire n’ararangya ebisuba hali Ruhanga waitu kurugira kimu ha bujeemu obwabaireho omu Adeni. Akalengaho kuleetera abantu kutekereza ngu Ruhanga akaba n’ayegondeza wenka kandi ali Mulemi omugobya ow’arukwima abantu ebirungi. (Kub. 3:1, 4, 5) Ebisuba bya Sitaani hali Yahwe biretiire abantu kumutekerezaaho kubi. Abantu obubacwamu kwanga ‘kugonza amazima,’ Sitaani n’asobora kubaleetera kukora ebintu byona ebitahikire n’ebibi.​—Bar. 1:25-31.

4. Yahwe ayolekere ata ngu ali “Ruhanga owamananu”? (Rora ekisisani.)

⁴ Yahwe ali “Ruhanga owamananu,” kandi ayegesa amananu abo boona abarukumugonza. (Zab. 31:5) Obwakora eki, abakonyera kubaiha omu bwiru bw’ebisuba bya Sitaani. Ekindi, Yahwe ayegesa abaheereza be kuba besigwa kandi abahikiriire. Eki kibakonyera kuba bantu ab’ekitiinisa n’okutuga obusinge obw’omu mutima. (Nfu. 13:5, 6) Eki akikukoliire obw’okaire n’oyega Baibuli? Oyegere ngu emiringo ya Yahwe niyo erukukirrayo kimu oburungi hali iwe n’abantu boona. (Zab. 77:13) Nahabweki n’ogonza kukora eki Ruhanga ekyagamba ngu kihikire. (Mat. 6:33) N’ogonza kumanyisa abandi amananu, kandi oyoleke ngu Sitaani ebiyabalize hali Ruhanga waitu Yahwe bisuba. Eki n’osobora kukikora ota?

5. N’osobora ota kusagika amananu n’okuhikirra?

⁵ N’osobora kwetwaza omu mulingo ogurukwoleka abandi ngu, n’oyangira kimu ebisuba bya Sitaani, kandi n’osagika amananu. N’osobora kukyoleka ngu n’ongonza Yahwe kuba Mulemi wawe kandi ngu n’ogonza kukora ebi ebyagamba ngu nibyo ebihikire. Eki n’osobora kukikora ota? Weheyo hali Yahwe kuraba omu kusaba kandi hanyuma oyoleke okwehayo kwawe omu rwijwire kuraba omu kubatizibwa. Kugonza amananu n’ebintu ebihikire nibyo bisemeriire kukwekambisa kucwamu kubatizibwa.

6. Nsonga ki ezikuleetera kugonza Yesu Kristo ezirukusangwa omu Zabuli 45:4?

⁶ Habwaki ogonza Yesu Kristo? Wetegereze ensonga ezimu enungi ezirukusangwa omu Zabuli 45:4. (Soma.) Yesu agonza amananu, obwebundaazi, n’okuhikirra. Obworaaba  n’ogonza amananu n’okuhikirra, eki nikimanyisa ngu n’ogonza Yesu kristo. Tekerezaaho omulingo yarwaniriire n’obumanzi amananu hamu n’ebintu ebihikire. (Yoh. 18:37) Baitu, Yesu akakurakuraniza ata obwebundaazi?

7. Kiki ekikusikiiriza obu kirukuhika ha bwebundaazi bwa Yesu?

⁷ Yesu ayoleka obwebundaazi kuraba omu kyokurorraho kye. Ekyokurorraho, agarurra Ise ekitiinisa kyona hatali kukyegarurra. (Mar. 10:17, 18; Yoh. 5:19) Obwebundaazi bwa Yesu bukuleetera kwehurra ota? Bukuleetera kugonza Omwana wa Ruhanga n’okumuhondera? Hataroho kugurukyagurukya eki nukwo kiri. Habwaki Yesu ali mwebundaazi? Habwokuba agonza kandi ayegera hali Ise, owali mwebundaazi. (Zab. 18:35; Baheb. 1:3) Tosikiirizibwa kugonza Yesu ow’ayegera ha miringo ya Yahwe kikumi ha kikumi?

8. Habwaki tugonza Yesu nk’Omukama waitu?

⁸ Tugonza Yesu nk’Omukama waitu habwokuba nuwe Mulemi arukukirrayo kimu oburungi. Yahwe nuwe yatendekere Omwana we kandi yamukoma kuba Mulemi. (Is. 50:4, 5) Tekerezaaho, okugonza okw’okwefeereza Yesu yayolekere. (Yoh. 13:1) Osemeriire kugonza Yesu Kristo, habwokuba nuwe Omukama wawe. Akasoborra ngu abo abamugonza mali kandi bakooleka okugonza kwabo kuraba omu kworobera ebiragiro bye, abeeta banywani be. (Yoh. 14:15; 15:14, 15) Mali kamugisa gw’amaani kuba munywani w’Omwana wa Yahwe!

9. Okubatizibwa okw’Abakristaayo nikusisana kuta n’okwa Yesu?

⁹ Kimu ha biragiro bya Yesu nikyo eky’abahondezi be kubatizibwa. (Mat. 28:19, 20) Yesu akatuteraho ekyokurorraho. Okubatizibwa kwa Yesu nikwahukana n’okwabahondezi be omu miringo emu. (Rora akasanduuko “ Omulingo Okubatizibwa kwa Yesu Kurukwahukana ha kw’Abahondezi Be.”) Baitu omu miringo endi, nikusisana. Yesu obuyabatiziibwe akooleka ngu ayehaireyo kukora Ise eby’agonza. (Baheb. 10:7) Omu mulingo nugwo gumu, abahondezi ba Yesu obubabatizibwa booleka omu rwijwire ngu bahaireyo obwomeezi bwabo hali Yahwe Ruhanga. Ekintu ekirukukirayo omu bwomeezi bwabo kiba eky’okukora Ruhanga ebyagonza hatali ebyabo bonka. Nahabweki baba nibahondera ekyokurorraho kya Mukama wabo.

10. Habwaki n’ogonza Yesu, kandi okugonza oku kusemeriire kukwekambisa kukora ki?

¹⁰ Oikiriza Yesu nk’Omwana wa Yahwe omu wenka kandi nk’Omukama Ruhanga ow’akomere kutulema. Omanyire ngu Yesu ahikiriire kandi ayegera hali Ise kikumi ha kikumi. Oyegere ngu akaliisa abaine enjara, yahuumuza abahoirwemu amaani, kandi yakiza n’abarwaire. (Mat. 14:14-21) Orozere omulingo arukwebemberamu ekitebe kye kasumi kanu. (Mat. 23:10) Kandi okimanyire ngu naija kukora ebirukukiraho omu kasumi ak’omu maiso nk’Omukama w’Obukama bwa Ruhanga. N’osobora kwoleka ota ngu n’omugonza? Kuraba omu kuhondera ekyokurorraho kye. (Yoh. 14:21) N’osobora kukora eki kuraba omu kwehayo hali Yahwe kandi okabatizibwa.

11. Nsonga ki erukukirayo obukuru ey’esemeriire kuleetera omuntu kubatizibwa?

¹¹ Nsonga ki erukukirayo obukuru ey’eretera omuntu kubatizibwa? Yesu akooleka ekiragiro kya Ruhanga ekirukukirrayo kimu obukuru obuyagambire ati: “Ogonzege Mukama Ruhanga wawe nomutima gwawe gwona, nobwomezi bwawe bwona, namagezi gwawe gona, namani gawe gona.” (Mar. 12:30) Ebigambo ebi nibyoleka okugonza okwoiniire Ruhanga?

12. Habwaki ogonza Yahwe? (Rora ekisisani.)

¹² Haroho ensonga nyingi ezisemeriire kukuleetera  kugonza Yahwe. Ekyokurorraho, oyetegeriize ngu nuwe “ensoro eyobwomezi” kandi ngu nuwe atuha “ekisembo kyona ekirungi nekisembo kyona ekihikiriire.” (Zab. 36:9; Yak. 1:17) Buli kintu eky’oyegondezaamu kiruga hali Ruhanga waitu omugabi, kandi ow’okugonza.

13. Habwaki ekicunguro kiri kisembo ekirungi muno?

¹³ Ekicunguro kiri kisembo ekirungi muno Yahwe ekyatuhaire. Habwaki nitugamba tuti? Tekerezaaho enkoragana enyakuli hagati ya Yahwe n’Omwana we. Yesu akagamba ati: “Isenyowe nikyo angondeza” kandi nanyowe “ningonza Isenyowe.” (Yoh. 10:17; 14:31) Enkoragana yabo ekeyongera kuguma habw’obuhumbe n’obuhumbe obw’emyaka eyibaamazire hamu. (Nfu. 8:22, 23, 30) Hati, tekerezaaho obusaasi Ruhanga yahuliire obuyaikiriize Omwana we kubonabona n’okufa. Yahwe agonza muno abantu otwaliremu naiwe yahika na ha rulengo orw’okuhayo Omwana we omu omugonzebwa nk’ekihongwa kusobozesa iwe n’abandi kwomeera ebiro n’ebiro. (Yoh. 3:16; Bag. 2:20) Enu niyo ensonga erukukirayo obukuru ey’etuleetera kugonza Ruhanga.

14. Kigendererwa ki ekirukukirrayo kimu oburungi eky’osobora kweteraho omu bwomeezi?

¹⁴ Okugonza kwawe hali Yahwe kweyongiire habwokuba oyegere bingi ebirukumukwataho.  Hataroho kugurukyagurukya n’ogonza kweyongera kumwirra haihi hati, n’ebiro byona. Kandi eki n’osobora kukikora. Omu mulingo ogw’embabazi n’akwekambisa kusemeza omutima gwe. (Nfu. 23:15, 16) Kandi eki n’osobora kukikora hatali omu bigambo byonka baitu n’omu bikorwa. Kandi omulingo otwazaamu obwomeezi bwawe nigwija kwoleka obworaaba n’ogonza Yahwe. (1 Yoh. 5:3) Eki nikyo ekigendererwa ekirukukirrayo kimu oburungi eky’osobora kweteraho omu bwomeezi.

15. N’osobora ota kwoleka okugonza okwoiniire Yahwe?

¹⁵ N’osobora ota kwoleka okugonza okwoiniire Yahwe? Eky’okubanza, saba esaara ey’embaganiza ey’okwehayo hali Ruhanga ow’amananu wenka. (Zab. 40:8) Hanyuma, yoleka okwehayo kwawe omu rwijwire kuraba omu kubatizibwa. Nk’oku tusangirwe turozere, okubatizibwa kwawe kaba kasumi ak’okusemererwa kandi akakuru muno omu bwomeezi bwawe. Otandika obwomeezi obuhyaka, hatali habwawe baitu habwa Yahwe. (Bar. 14:8; 1 Pet. 4:1, 2) Egi n’esobora kuzooka nk’encwamu ey’amaani muno kandi mali nukwo kiri. Baitu ekusobozesa kwomeera obwomeezi oburukukirayo oburungi. Omu mulingo ki?

16. Kusigikirra ha Zabuli 41:12 Yahwe naija kuha ata empeera abo boona abehayo kumuheereza?

¹⁶ Yahwe nuwe akyakizireyo kugaba. N’obu twakumuha ebintu ebirukwingana nkaha, aikara n’atuha ebirukukiraho. (Mar. 10:29, 30) Naija kukuha obwomeezi oburukukirayo oburungi, oburumu okusemererwa, n’okumarwa omu nsi enu embi. Kandi egi ekyali ndozo. Orugendo orutandika n’okubatizibwa kwawe tirwiine obugarukiro. N’osobora kugumizaamu n’oheereza Isiitwe ow’omu iguru ebiro n’ebiro. Okugonza okuli hagati yaawe na Yahwe nikwija kwikara nikweyongera, kandi noija kwomeera ebiro n’ebiro nkauwe.​—Soma Zabuli 41:12.

17. Kintu ki eky’osobora kuha Yahwe ekyataine?

¹⁷ Obwohayo obwomeezi bwawe hali Ruhanga kandi okabatizibwa, otunga omugisa ogw’okuha Yahwe ekintu eky’omuhendo muno. Akuhaire buli kintu kyona ekirungi, n’okusemererwa omu bwomeezi. Naiwe n’osobora  kuha Omukama w’iguru n’ensi ekintu ekyataine kandi eki nikyo okwehayo kumuheereza oyegondiize. (Yob. 1:8; 41:11; Nfu. 27:11) Gunu nugwo omulingo ogurukukirrayo kimu oburungi ogw’osobora kukozesaamu obwomeezi bwawe. Okugonza okwoiniire Yahwe niyo ensonga erukukirrayo kimu obukuru ey’esemeriire kukuleetera kubatizibwa.

18. Bikaguzo ki eby’osobora kwekaguza?

¹⁸ Hati, n’osobora kugarukamu ota ekikaguzo kinu, Orabatizibwa? Niiwe wenka ow’asobora kukigarukamu. Baitu nikisobora kukukonyera kakuba oyekaguza oti, ‘Ndinzireki kubatizibwa?’ (Eng. 8:36) Ijuka ensonga isatu ezitubalizeeho. Ey’okubanza, ogonza amananu n’okuhikirra. Wekaguze, ‘Ndindiriire n’ekihika ekiro nambere buli omu wena aliba nabaza amananu kandi n’akora ekihikire?’ Eyakabiri, n’ogonza Yesu kristo. Wekaguze, ‘Ngonza Omwana wa Ruhanga nk’Omukama wange kandi ngonza kuhondera ekyokurorraho kye?’ Eyakasatu, kandi ekirukukirrayo kimu obukuru ogonza Yahwe. Wekaguze, ‘Ngonza kusemeza omutima gwa Yahwe kuraba omu kumuheereza nka Ruhanga wange?’ Eby’okugarukamu byawe eby’ebikaguzo ebi biraaba biri ego, hati habwaki otabatizibwa? Olinzireki?​—Eng. 16:33.

19. Habwaki otasemeriire kutiina kubatizibwa? Bazaaho ekyokurorraho. (Yohana 4:34)

¹⁹ Obworaaba n’otiina kubatizibwa, tekerezaaho ekyokurorraho Yesu yakozeseze. (Soma Yohana 4:34.) Wetegereze ngu Yesu akalengesaniza kukora Ise eby’agonza n’ebyokulya. Habwaki? Habwokuba ebyokulya birungi ha bwomeezi bwaitu. Yesu akaba akimanyire ngu buli kimu kyona Yahwe ekyatugambira kukora kiba kirungi haliitwe. Yahwe tagonza tukole ekintu kyona ekisobora kuturugirramu akabi. Yahwe eby’agonza okole nibitwarramu iwe kubatizibwa? Ego. (Eng. 2:38) Nahabweki kigumye ngu kworobera ekiragiro eky’okubatizibwa nikiija kukugasira. Obworaaba otatiina kulya ekiihuro ekirukukirayo oburungi, habwaki otiina kubatizibwa?

20. Kiki ekiturabazaaho omu kicweka ekirukuhonderaho?

²⁰ Habwaki abantu abamu baikaraho kubatizibwa? Baingi nibasobora kugarukamu bati, “Tinkahikire.” Amananu gali, encwamu egi ey’okuhayo obwomeezi bwawe hali Yahwe kandi okabatizibwa, eri ncwamu ey’erukukirrayo kimu obukuru ey’osobora kukora. Nahabweki nikyetaaga obwire, kukitekerezaaho n’obwegendereza, n’okuteekamu amaani kwetekaniza. Baitu obworaaba n’ogonza kubatizibwa, kiki eky’osobora kukora hati kwetekaniza? Nitwija kubazaaho eky’okugarukamu eky’ekikaguzo eki omu kicweka ekirukuhonderaho.