1. Kiki abazaire ekibagondeza abaana baabu?

 ABAZAIRE, tukimanyire ngu mugonza muno kukonyera abaana banyu kumanya n’okugonza Yahwe. Baitu Ruhanga tarorwa. Nimusobora muta kukonyera abaana banyu kumurora nk’omuntu wenyini n’okumwirra haihi?​—Yak. 4:8.

2. Abazaire nibasobora bata kwegesa abaana baabo ha miringo Yahwe?

² Omulingo omukuru ogw’okukonyera abaana kwirra haihi na Yahwe nugwo ogw’okwega nabo Baibuli. (2 Tim. 3:14-17) Baitu, Baibuli ebazaaho omulingo ogundi abaana basobora kwega hali Yahwe. Omu kitabu ekya Enfumo, taata naijukya mutabani we kutaleka kutekerezaaho emiringo ya Yahwe enyakwolekerwe omu byahangirwe. (Nfu. 3:19-21) Nitwija kubazaaho emu ha miringo abazaire basobora kukozesa ebyahangirwe kwegesa abaana baabo ha miringo ya Yahwe.

3. Abazaire nibasobora bata kukonyera abaana baabo?

³ Baibuli n’egamba ngu emiringo ya Ruhanga ‘ey’etarukurorwa kuruga ha kuhangwa kw’ensi, n’erolerwa kimu, n’emanyirwa hali ebi ebyahangirwe.’ (Bar. 1:20) Abazaire, nimusobora kuba nimwegondeza omu kumara hamu obwire n’abaana banyu. Kozesa obwire obu kukonyera abaana baawe kurora akakwate akali hagati ‘y’ebyahangirwe’ n’emiringo ya Yahwe enungi. Leka turole kiki abazaire ekibasobora kwegera ha mulingo Yesu yayegesaamuga.

4. Yesu akakozesa ata ebyahangirwe kwegesa abegeswa be? (Luka 12:24, 27-30)

 ⁴ Wetegereze omulingo Yesu yakozeseze ebyahangirwe kwegesa. Kiro kimu akagambira abegeswa be kwetegereza kurungi ebinyonyi n’ebyakyo. (Soma Luka 12:24, 27-30.) Yesu akaba n’asobora kubazaaho ekimera rundi ekisoro ekindi kyona, baitu akacwamu kukozesa ebinyonyi n’ebyakyo, ebintu abegeswa be baali bamanyire kurungi. Abegeswa nibasobora kuba baarozere ebingoora nibiharruka omu mwanya n’ebyakyo ebyakize. Teramu akasisani Yesu nayoleka akaara ha bintu binu ebyarukubazaaho. Kandi kiki ekiyakozere hanyuma y’okubazaaho ebyokurorraho binu? Akegesa abageswa be isomo ery’amaani muno erirukwoleka nk’oku Isebo ow’omu iguru ali mugabi kandi aine embabazi. Yahwe naija kuliisa kandi ajweke abaheereza be abesigwa nk’oku akora hali ebingoora n’ebyakyo.

5. Abazaire nibasobora bata kukozesa ebyahangirwe kwegesa abaana baabo hali Yahwe?

⁵ Abazaire, murayegera ha mulingo gwa Yesu ogw’okwegesa? N’osobora kugambira omwana waawe ha kyahangirwe ekikira kukusemeza, nk’ekisoro rundi ekimera. Hanyuma, musobororre nikitwegesa ki hali Yahwe. N’osobora n’okumukaguza ekisoro rundi ekimera ekirukukirayo kumusemeza. Kakuba okozesa ekyahangirwe ekirukukirayo kusemeza omwana waawe, naija kukuhuliiriza kurungi obworaaba n’omugambiraho emiringo ya Yahwe.

6. Kiki ekitusobora kwegera hali nyina Christopher?

⁶ Abazaire nikibetaagisa kumara obwire bwingi nibaseruliiriza ha kisoro rundi ekimera batakabalizeeho ebikirukubegesa hali Yahwe? Nangwa. Yesu atasoborre bingi ha mulingo ebingoora biryamu rundi omulingo ebyakyo bikuramu. N’obukiraaba ngu omwana waawe agonza kwega bingi ebirukukwata ha bintu Yahwe yahangire, obwire obumu ebigambo bike rundi ekikaguzo ekyanguhire nikimara kwegesa omwana waawe ensonga. Wetegereze ow’oruganda arukwetwa Christopher ekyarukwijuka obwakaba akyali muto, n’agamba ati: “Nyina nyowe yakozesaaga ebigambo bike kutukonyera kusiima ebyahangirwe ebitwetoroire. Ekyokurorraho, obutwabaga haihi n’ensozi yagambaga ati: ‘Murole nk’oku ensozi zinu ziri nkooto kandi zisemiire muno! Emirimo ya Yahwe terukuhuniiriza?’ Rundi obutwabaga haihi n’enyanja, yagambaga ati: ‘Murole amaani ag’ebigonzi ebi! Eki tikirukwoleka nk’oku Ruhanga ali w’amaani muno?’” Christopher ayongeraho ati: “Ebigambo ebi ebyanguhire, baitu ebiine amakuru bikatukwataho muno.”

7. Nimusobora muta kukonyera abaana banyu kutekereza ha byahangirwe?

⁷ Abaana banyu obubagenda nibakura, nimusobora kubeegesa kutekerezaaho ebyahangirwe n’okwega ebirukukwata ha miringo ya Yahwe. Nimusobora kubazaaho ekintu kimu Yahwe ekiyahangire kandi mukakaguza abaana banyu muti, “Eki nikibeegesa ki hali Yahwe?” Nikisobora kukuhuniiriza kuhurra ebibarakugambira.​—Mat. 21:16.

8. Mugisa ki abazaire Abaisaleri ogubakaba baine obubaabaga nibarubata “omu muhanda” n’abaana baabo?

⁸ Abazaire Abaisaleri bakaterererwa kwegesa abaana baabo ebiragiro bya Yahwe obubaabaga nibarubata “omu muhanda.” (Bir. 11:19) Omu Isaleri hakaba harumu emihanda nyingi. Kikaba kyanguhire kurora ebisoro, ebinyonyi n’ebyakyo ebirukwahukana. Abaisaleri obubaabaga nibarubata omu muhanda, abazaire bakaba baine emigisa nyingi ey’okwegesaaho abaana baabo ebintu Yahwe yahangire. Nainywe abazaire nimusobora kuba mwine emigisa niyo emu kwegesaaho abaana banyu ebyahangirwe. Tekerezaaho omulingo abazaire abamu bakozere eki.

9. Kiki eky’osobora kwegera ha kyokurorraho kya Punitha na Katya?

⁹ Munyaanya itwe arukwetwa Punitha ow’arukwikara omu rubuga orukooto omu India, n’agamba ati: “Obutugenda omu kyaro kubungira abanyabuzaale baitu, tugurora nk’omugisa ogw’okukonyera abaana baitu kwega ha bihangwa bya Yahwe ebirungi. Nintekereza ngu abaana bange betegereza kurungi ebyahangirwe obubaba batali omu rubuga orwijwiremu abantu n’ebiiruka.” Abazaire, abaana banyu tibarukwija kwebwa obwire obumuramara nabo omu biikaro ebi ebirungi. Munyaanya itwe arukwetwa Katya kuruga omu Moldova n’agamba ati: “Ebintu ebindukukira kwijuka obunkaba nkyali muto, nibyo ebinakozere n’abazaire bange obutukaba tuli omu kyaro. Ninsiima muno abazaire bange habwokunyegesa kuruga omu buto kubanza kwemerra nketegereza kurungi ebyahangirwe n’okurora ekibirukunyegesa hali Yahwe.”

10. Kiki abazaire ekibasobora kukora kakuba kiba nikibagumira kuruga omu rubuga? (Rora akasanduuko “ Obukonyezi Hali Abazaire.”)

¹⁰ Kiki eky’osobora kukora kakuba kiba kitarukusoboka kugenda omu kyaro? Ow’oruganda Amol ow’arukwikara omu India, n’agamba ati: “Nambere ndukwikara abazaire bakora kumara esaaha nyingi, kandi nikyetaagisa sente nyingi kugenda omu kyaro. Baitu, n’osobora kurora ebintu Yahwe yahangire kandi okabazaaho emiringo ye obworukuba oli omu kiikaro ekirungi muno.” Kakuba oyetegereza kurungi, haihi n’eka yaawe n’osobora kuzoora ebyahangirwe eby’osobora kwoleka abaana baawe. (Zab. 104:24) N’osobora kurora ebinyonyi, ebihuka, ebimera, n’ebintu ebindi bingi. Karina, kuruga Germany, n’agamba ati: “Nyina nyowe agonza ebyakyo, obunkaba nkyali mwisiki muto, yanyolekaga ebyakyo ebisemiire muno obutwabaga niturubata  hamu.” Ekindi, abazaire nimusobora kukozesa vidiyo nyingi n’ebitabo ebirukukwata ha byahangirwe ebiturukiibwe ekitebe kyaitu kwegesa abaana banyu. Koobe oli munyikara ki, n’osobora kukonyera abaana baawe kwetegereza kurungi Ruhanga ebiyahangire. Hati leka tubazeeho emu ha miringo ya Yahwe ey’osobora kwegesa abaana baawe.

11. Abazaire nibasobora bata kukonyera abaana baabo kwetegereza okugonza kwa Yahwe?

¹¹ Kusobora kukonyera abaana baawe kwetegereza okugonza kwa Yahwe, n’osobora kubazaaho omulingo ebisoro birolerramu ebyana byabyo. (Mat. 23:37) Ekindi, n’osobora n’okubazaaho ebyahangirwe bingi ebyembaganiza ebitukira kugonza. Karina, outusangirwe tubalizeeho n’agamba ati: “Obutwabaga tugenzere kurubatamu na nyina nyowe, yanyekambisaga kubanza kwemerra nukwo nyetegereze kurungi nk’oku buli kyakyo kiri kyembaganiza n’omulingo oburungi bwakyo bwoleka okugonza kwa Yahwe. Na hanyuma y’emyaka nyingi, ninkyayetegereza kurungi ebyakyo, erangi zabyo, n’omulingo birukwahukana. Nibikyagumizaamu kunyijukya ngu Yahwe mali nangonza.”

12. Abazaire nibasobora bata kukonyera abaana baabo kwetegereza amagezi ga Yahwe? (Zabuli 139:14) (Rora ekisisani.)

¹² Mukonyere abaana banyu kwetegereza amagezi ga Ruhanga. Hataroho kugurukyagurukya, Yahwe natukira amagezi. (Bar. 11:33) Ekyokurorraho, n’osobora kusoborra omwana waawe nk’oku amaizi gaimuka omu mwanya kukora ebicu, hanyuma bigenda omu kiikaro ekindi bitarukuteekamu amaani. (Yob. 38:36, 37) Ekindi, n’osobora kubazaaho omulingo ogurukuhuniiriza omubiri gwaitu gwakozerwemu. (Soma Zabuli 139:14.) Tekerezaaho taata arukwetwa Vladimir nk’oku yakikozeremu. N’agamba ati: “Kiro kimu mutabani waitu akagwa n’egaali yahutaara okuju. Hanyuma y’ebiro bike, ekihooya kikakira. Nyowe na mukazi wange tukamusoborra ngu Yahwe akahanga emibiri yaitu n’obusobozi obwokwekiza yonka. Kandi tukamwoleka ngu ebintu ebikozerwe abantu tibiine busobozi obu. Ekyokuroraaho, motoka tesobora kwekanika yonka hanyuma ya butandwa. Ekyahikire ha mutabani waitu kikamukonyera kwetegereza amagezi ga Yahwe.”

13. Abazaire nibasobora bata kukonyera abaana baabo kwetegereza amaani ga Ruhanga? (Isaya 40:26)

¹³ Yahwe n’atugambira kwimukya amaiso gaitu kurora haiguru kandi tutekerezeeho omulingo amaani ge agarukuhuniiriza gaikaza enyunyuuzi omu kiikaro kyazo. (Soma Isaya 40:26.) N’osobora kwekambisa abaana baawe kurora haiguru omu mwanya kandi becumiitirizeeho ebibarukurora. Wetegereze munyaanya itwe kuruga Taiwan ow’arukwetwa Tingting ekyarukwijuka obwakaba akyali muto, n’agamba ati: “Kiro kimu nyina nyowe akantwara omu kiikaro ekiri hara n’orubuga, kandi tukaba nitusobora kurora enyunyuuzi nyingi muno haiguru habwokuba tukaba tutali omu rubuga orwijwiremu ebitaara. Omu kasumi ako nkaba nyeralikiriire habw’okusindikirizibwa abeegi bagenzi bange kandi nayekaguzaaga obundaaba ninsobora kwikara ndi mwesigwa hali Yahwe. Nyina nyowe akanyekambisa kuteekerezaaho amaani Yahwe agayakozeseze kuhanga enyunyuuzi zoona kandi yanyijukya ngu n’asobora kukozesa amaani ago kunkonyera kuraba omu buli kirengo kyona. Hanyuma y’okwetegereza kurungi ebyahangirwe, kikandetera kweyongera kumanya kurungi Yahwe, kandi nacweramu kimu kweyongera kumuheereza.”

14. Abazire nibasobora bata kukozesa ebyahangirwe kukonyera abaana baabo kurora Yahwe nka Ruhanga ow’asemeriirwe?

¹⁴ Ebintu Yahwe yahangire nibyoleka ngu aine okusemererwa kandi n’agonza naitwe tube n’okusemererwa. Abanyasayansi bakizoire ngu ebisoro ebirukukira obwingi, otwaliremu ebinyonyi n’encu bizaana. (Yob. 40:20) Abaana baawe baakasekaga hanyuma y’okurora ekisoro nikizaana? Obundi bakarora akajangu nikahambya akapiira rundi obwana bw’embwa niburwana. Kiro kindi abaana baawe obubalirora ekisoro nikikora ebintu ebirukusekesa, n’osobora kukozesa omugisa ogu kubaijukya ngu nituheereza Ruhanga ow’asemeriirwe.​—1 Tim. 1:11.

15. Kiki ekisobora kukonyera abazaire kumanya abaana baabo ebibarukutekereza? (Enfumo 20:5) (Rora ekisisani.)

¹⁵ Obwire obumu, nikisobora kugumira abazaire kuleetera abaana baabo kubazaaho ebizibu  ebibarukurabamu. Obworaaba oli omu nyikara egi, n’osobora kwekambisa abaana baawe kukugambira ebibarukutekereza. (Soma Enfumo 20:5.) Abazaire abamu kibanguhira kukora eki obubarukuba nibegondeza omu byahangirwe n’abaana baabo. Habwaki? Habwokuba nihaba haroho ebintu bike ebirukubahugura. Taata ow’arukwetwa Masahiko kuruga omu Taiwan n’abazaaho ensonga endi, n’agamba ati: “Obutumara hamu obwire n’abaana baitu, tukagenda kutemba ensozi, kurubatira ha musa gwenyanja, behurra batekaine muno. Nahabweki kitwanguhira kubaza nabo n’okwetegereza ebibarukurabamu.” Katya outusangirwe tubalizeeho n’agamba ati: “Obunarugaga ha isomero, nyina nyowe yantwaraga omu kiikaro ekisemiire muno. Omu kiikaro eki nubwo kyanyanguhiraga kumugambira ebyabaga bimpikireho ha isomero rundi ebirukunyeraliikiriza.”

16. Amaka nigasobora gata kwegondeza omu byahangirwe?

¹⁶ Ebintu Yahwe yahangire nibisobora kukonyera abali omu maka kwegonza n’okugumya engoragana yabo. Baibuli n’egamba ngu haroho “akasumi akokusekeramu” n’akasumi “akokuziniramu.” (Mug. 3:1, 4) Yahwe akahanga ebiikaro ebirungi muno omu nsi nambere tusobora kukorra ebintu ebiturukugonza. Amaka maingi gagonza kuba hamu omu malindiro g’ebisoro, omu byaro, kutemba ensozi rundi ha nyanja. Abaana abamu bagonza kwiruka n’okuzaanira omu biikaro ebirungi, kurora ebisoro rundi kuziha omu bisaaru n’omu nyanja. Mali twine emigisa nyingi ey’okwegondeza omu bintu Yahwe yahangire.

17. Habwaki abazaire basemeriire kukonyera abaana baabo kwegondeza omu byahangirwe?

¹⁷ Omu nsi empyaka, abazaire n’abaana baabo nibaija kwegondeza muno omu bintu Yahwe yahangire. Kasumi ako, titulitiina ebisoro kandi nabyo tibiritutiina. (Is. 11:6-9) Nitwija kwegondeza omu bintu Yahwe yahangire ebiro n’ebiro. (Zab. 22:26) Baitu abazaire, mutalindirra akasumi ako nubwo mukatandika kukonyera abaana banyu kwegondeza omu byahangirwe. Obworakozesa ebyahangirwe kwegesa abaana baawe hali Yahwe, nibaija kwikiranganiza n’ebigambo by’Omukama Daudi ebirukugamba ngu: “Ai [Yahwe]; kunu busaho emirimo eri nkeyawe.”​—Zab. 86:8.