1. Kiki abantu ekibarora obubaija omu nsorrokano zaitu ha bw’omurundi gwabo ogw’okubanza? (Rora ekisisani.)

 TEKEREZAAHO omusaija na mukazi we abaizire omu nsorrokano omurundi gwabo ogw’okubanza ha Kyombeko ky’Obukama. Bakwatwaho muno habw’okubatangirra kurungi n’okugonza okuli omu b’oruganda na banyaanya itwe. Obubaba nibagaruka omu ka, omukazi agambira iba ati: ‘Abantu banu nibetwaza kurungi muno kandi b’embaganiza hali abantu abandi.’

2. Kiki ekiretiire abamu kutabaijuka?

² Okugonza okuli omu bantu ba Yahwe mali kw’embaganiza. Baitu nabwo, Abakaiso ba Yahwe tibahikiriire. (1 Yoh. 1:8) Nahabweki obutweyongera kumanya abali omu kitebe, nitusobora kweyongera kurora obutahikirra bwabo. (Bar. 3:23) Eky’obusaasi, abamu baikiriize obutahikirra w’abandi kubatabaijura.

3. Akokurorraho ak’abahondezi ba Yesu ab’amananu niko kaha? (Yohana 13:34, 35)

³ Yongera orole ekyahandiikirwe ekyebembiire ekicweka kinu. (Soma Yohana 13:34, 35.) Akokurorraho ak’abahondezi ba Kristo ab’amananu niko kaha? Nukwo okugonza, hatali obuhikiriire. Wetegereze ngu Yesu atagambe ati: ‘Nukwo mulimanya muli begeswa bange.’ Baitu akagamba ati: ‘Nukwo boona balimanya muli begeswa bange.’ Nahabweki Yesu akooleka ngu abahondezi be ab’amananu hamu naabo abali aheeru y’ekitebe Ekikristaayo bakumanyiriire abahondezi be ab’amananu habw’okugonza okuboolekangana.

4. Kiki abantu abamu ekibakugondeze kumanya h’Abakristaayo ab’amananu?

⁴ Abantu abamu abatali Abakaiso ba Yahwe nibasobora kwekaguza bati: ‘Okugonza kwoleka kuta abahondezi ba Yesu ab’amananu? Yesu akooleka ata abakwenda be okugonza? Kandi nikisoboka kita kwegera ha kyokurorraho kya Yesu kasumi kanu?’ Kirungi naitwe abali bamu h’Abakaiso ba Yahwe tutekerezeeho eby’okugarukamu by’ebikaguzo binu. Obuturakora eki, nikisobora kutukonyera kweyongera kwoleka okugonza kukira muno obuturarora obutahikirra bw’abagenzi baitu.​—Bef. 5:2.

5. Soborra ebigambo bya Yesu ebirukusangwa omu Yohana 15:12, 13.

⁵ Yesu akasoborra ngu abahondezi be baakwolekere okugonza okw’embaganiza. (Soma Yohana 15:12, 13.) Wetegereze ekiyabaragiire: ‘Mugonzanganege, nkoku nabagondeze inywe.’ Eki nikimanyisa ki? Yesu akagumizaamu n’asoborra ngu kunu nukwo okugonza okw’okwefeereza okuleetera Omukristaayo kufeera Omukristaayo ondi obukirukuba kyetaagisize. b

6. Ekigambo kya Ruhanga nikyoleka kita obukuru obw’okugonza?

⁶ Ekigambo kya Ruhanga kitwegesa ngu okugonza kukuru muno. Ekyokurorraho, zinu ziri zimu ha nkarra abantu abarukukira obwingi ezibagonza: “Ruhanga nukwo kugonza.” (1 Yoh. 4:8) “Gonza mutahi wawe nkokwoyegonza wenka.” (Mat. 22:39) “Okugonza nukuswekerra ebibi bingi.” (1 Pet. 4:8) “Okugonza tikuhwaho.” (1 Kol. 13:8) Enkarra zinu hamu n’ezindi nizooleka habwaki kiri kikuru kukurakuraniza n’okwoleka omulingo gunu omurungi.

7. Habwaki Sitaani atasobora kuteraniza abantu omu kugonza kwonyini?

 ⁷ Abantu abarukukira obwingi bekaguza: ‘Nikisoboka kita kumanya ediini ey’amananu? Ediini zoona zigamba ngu nizegesa amananu, baitu zegesa ebintu ebirukwahukana ebirukukwata hali Ruhanga.’ Sitaani asoboire kuburanganiza abantu kuraba omu kuleetaho amadiini maingi ag’ebisuba. Baitu tasobora kuleetaho ekitebe eky’abantu kuruga omu nsi yoona abarukugonzangana nk’ab’oruganda abali omu bumu. Yahwe wenka nuwe asobora kukora eki. Eki nukwo kiri habwokuba okugonza okw’amananu kuruga hali Yahwe. Abo abaine omwoyo gwe kandi abaahaire omugisa nubo bonka basobora kwoleka okugonza kwonyini. (1 Yoh. 4:7) Enu niyo ensonga habwaki Yesu yagambire ngu abahondezi be ab’amananu baakwolekere okugonza kwonyini.

8-9. Abantu baingi bakwasirweho bata okugonza okubarora omu bantu ba Yahwe?

⁸ Nk’oku Yesu yarangire, baingi basoboire kumanyirra abahondezi ba Yesu ab’amananu habw’okugonza okuboolekangana. Ekyokurorraho, Ow’oruganda Ian naijuka orusorrokano orukooto orw’okubanza oruyagiremu orukaba ruli omu kizaaniro haihi n’owabu. Omu myezi nke enyuma, Ian akaba agenzere omu kizaaniro eki kurora omuzaano. N’agamba ati: “Orusorrokano rukahukanira kimu ha muzaano. Abakaiso ba Yahwe baali nibabaza kurungi, bajwaire kurungi kandi n’abaana baabo baali nibetwaza kurungi.” Nayongeraho ati: “Ekirukukira byona, abantu banu bakaba nibazooka nk’abaine okumarwa n’obusinge, ebintu ebinkaba ninserra. Tinkwijuka orubazo rwona orwahairwe ha kiro eki, baitu ninyijuka omulingo Abakaiso ba Yahwe bayetwaizeemu.” c Okugonza kwonyini okutwolekangana nukwo kutuleetera kwetwaza tuti. Habwokuba tugonza ab’oruganda na banyaanya itwe, tubooleka embabazi kandi tubatamu ekitiinisa.

⁹ Ow’oruganda John nauwe akehurra omu mulingo nugwo gumu obuyatandikire kugenda omu nsorrokano. N’agamba ati: “Nkagonza muno omulingo gw’obunywani ogubantwaizemu . . . bakansisanira nk’abamalaika. Okugonza okw’amananu okubanyolekere kukandetera kukigumya ngu nzoire amananu.” Ebyokurorraho binu hamu n’ebindi bingi byoleka ngu Abakaiso ba Yahwe bali Bakristaayo ab’amananu. d

10. Nidi obutusobora kwoleka okugonza okw’Ekikristaayo? (Rora obugambo obuli hansi.)

¹⁰ Nk’oku tusangirwe turozere, busaho n’omu ha bagenzi baitu ow’ahikiriire. Obwire obumu, babaza rundi bakora ebintu ebitubiihiza. e (Yak. 3:2) Eki obukibaho, tuba twine omugisa ogw’okwoleka okugonza okw’Ekikristaayo omu bigambo n’omu bikorwa. Kiki ekitusobora kwegera ha kyokurorraho kya Yesu?​—Yoh. 13:15.

11. Yakobo na Yohana baketwaza bata kubi? (Rora ekisisani.)

¹¹ Yesu akaba atarukunihirramu abahondezi be kuba abahikiriire. Oihireho, omu mulingo ogw’okugonza akabakonyera kuterekereza ensobi zaabo nukwo basiimwe Yahwe. Kiro kimu, Yakobo na Yohana bakagambira nyinabo kusaba Yesu abahe ebiikaro eby’okubanza  omu Bukama. (Mat. 20:20, 21) Nahabweki, Yakobo na Yohana bakooleka emyehembo n’omutima ogw’okugonza kukira abandi.​—Nfu. 16:18.

12. Yakobo na Yohana nubo bonka abaayetwaize kubi? Soborra.

¹² Yakobo na Yohana tinubo bonka abaayetwaize kubi ha kiro eki. Wetegereze omulingo abakwenda abandi bayetwaizeemu: “Na bali ikumi obubahuliire babihirrwa bene babu ababiri.” (Mat. 20:24) Nitusobora kutekerezaaho omulingo Yakobo na Yohana baatiire empaka n’abakwenda abandi. Obundi abamu nibasobora kuba baagambire ngu: ‘Ninywe baha kusaba ebiikaro eby’okubanza omu Bukama? Tali ninywe inywenka abakozere n’amaani kuheereza na Yesu. Itwena tusemeriire kuheebwa ebiikaro ebi ebikuru.’ Kyona ekyabaireho, enyikara enu ekaleetera abakwenda kuleka kwolekangana okugonza habw’akacu kake.

13. Yesu aketwaza ata abakwenda be obubaayetwaize kubi? (Matayo 20:25-28)

¹³ Kiki Yesu ekiyakozere? Atabiihirwe. Atagambe ngu ningenda kuserrayo abakwenda abarungi, abebundaazi, kandi abakwolekangana okugonza. Oihireho, Yesu akabaza nabo omu mulingo ogw’embabazi habwokuba akaba akimanyire ngu nibagonza kukora ekihikire. (Soma Matayo 20:25-28.) Akaikara nabatwaza omu mulingo ogw’okugonza, n’obukiraaba ngu baikaraga nibateera empaka obukirukuhika ha nooha arukukirayo obukuru omulibo.​—Mar. 9:34; Luk. 22:24.

14. Nyikara ki abakwenda ba Yesu eyibaakuliiremu?

¹⁴ Hataroho kugurukyagurukya, Yesu akatekerezaaho enyikara abakwenda be eyibakuliiremu. (Yoh. 2:24, 25) Bakaba bakuliire omu kiikaro nambere abebembezi ba madiini bayebembezaaga obukuru n’okuranganwa. (Mat. 23:6; lengesaniza na vidiyo Ebiikaro eby’Omu Maiso omu Isorrokaniro ha bugambo oburukusoborra Matayo 23:6.) Ekindi, abebembezi b’ediini ey’Ekiyudaaya bayeroraga nk’abahikiriire kukira abandi. f (Luk. 18:9-12) Yesu akakyetegereza ngu entekereza enu ekakwataho omulingo abakwenda be barukweroramu n’omulingo barukuroramu abandi. (Nfu. 19:11) Akaba akimanyire ngu abegeswa be baakukozere ensobi kandi akabagumiisiriza. Akaba akimanyire ngu bantu barungi, nahabweki akabakonyera kuba bebundaazi n’okwoleka abandi okugonza.

15. Kiki ekiturukwegera ha kyahikire hali Yakobo na Yohana?

¹⁵ Nitusobora kwega bingi ha kyahikire ha Yakobo na Yohana. Baali batasemeriire kusaba ebiikaro eby’okubanza omu Bukama. Baitu n’abakwenda abandi baali batasemeriire kwikiriza enyikara egi kutalibaniza obumu bwabo. Baitu Yesu akooleka abakwenda boona 12 embabazi, n’okugonza. Kinu nikitwegesa ki? Abandi ekibatukora tinikyo kyonka ekikuru, baitu n’omulingo twetwazaamu obubatusobeza nagwo mukuru. Kiki ekisobora kutukonyera? Ow’oruganda obwatubiihiza nitusobora kwekaguza: ‘Habwaki ekyakozere kinsaliize muno? Nikyoleka omulingo omubi ogusemeriire kukoraho? Nikisobora kuba ngu ow’ambihiize naraba omu nyikara ey’egumire? N’obukiraaba ngu haroho ensonga habwaki nsemeriire kubiihirwa, ninsobora kwoleka okugonza kandi nkamuganyira?’ Obutweyongera kwoleka abandi okugonza, tweyongera kwoleka ngu tuli bahondezi ba Kristo ab’amananu.

16. Kintu ki ekindi ekitusobora kwegera ha kyokurorraho kya Yesu?

¹⁶ Ekindi, ekyokurorrraho kya Yesu nikitwegesa ngu tusemeriire kulengaho kwetegereza kurungi Abakristaayo bagenzi baitu. (Nfu. 20:5) Ky’amananu ngu, Yesu akaba n’asobora kumanya ebiri omu mitima y’abantu. Baitu itwe titusobora. Baitu nitusobora kugumiisiriza ab’oruganda na banyaanya itwe obubatusobeza. (Bef. 4:1, 2; 1 Pet. 3:8) Nikiija kutwanguhira kukikora kakuba tumanya ebirukubakwataho. Leka turole ekyokurorraho.

17. Omuroleerezi w’ekicweka akagasirwa ata obuyalengereho kumanya kurungi ow’oruganda?

¹⁷ Omuroleerezi w’ekicweka ow’arukuheereza omu buruga izooba bwa Afrika naijuka ow’oruganda ouyaroraga nk’owataine embabazi. Omuroleerezi w’ekicweka aketwaza ata? N’agamba ati: “Omu kiikaro ky’okumwetantara, nkateekamu amaani kulengaho kumumanya kurungi.” Obuyakikozere, akakyetegereza ngu haroho ebintu ebimu ow’oruganda ebiyarabiremu ebyamuletiire kwetwaza omu mulingo ogu. Omuroleerezi w’ekicweka ayongera agamba ati: “Obunayetegeriize nk’oku kikaba kitanguhire ow’oruganda onu kukora empindahinduka, nkahurra namwegomba muno. Tukafooka banywani.” Mali, obutulengaho kwetegereza  kurungi ab’oruganda na banyaanya itwe, kikira kutwanguhira kubooleka okugonza.

18. Bikaguzo ki ebitusobora kwekaguza kakuba Omukristaayo mugenzi waitu atusobeza? (Enfumo 26:20)

¹⁸ Obwire obumu nitusobora kwehurra nitugonza kuhikirra Omukristaayo mugenzi waitu ow’atusobiize nukwo tubazeeho ekibaireho. Baitu nitusobora kubanza kwekaguza ebikaguzo binu: ‘Nimmanya ekibaireho kyonyini?’ (Nfu. 18:13) ‘Omuntu onu ow‘ansobiize n’asobora kuba ngu takigenderiire kumbihiza?’ (Mug. 7:20) ‘Nakakoraga ensobi niyo emu?’ (Mug. 7:21, 22) ‘Obundabaza n’omuntu ogu, kiraleetera ekizibu kweyongera?’ (Soma Enfumo 26:20.) Obuturayecumiitirizaaho ebikaguzo nka binu, okugonza okutwiniire Abakristaayo bagenzi baitu nikusobora kutuleetera kuleka kutekerezaaho ekibaireho.

19. Kiki eky’ocwiremu kukora?

¹⁹ Hataroho kugurukyagurukya, Abakaiso ba Yahwe bakyolekiire kimu ngu nubo begeswa ba Yesu ab’amananu habwokuba boolekangana okugonza kwonyini. Twoleka ngu tuli bahondezi ba Yesu ab’amananu obutugumizaamu nitwoleka Abakristaayo bagenzi baitu okugonza n’obukiraaba ngu tibahikiriire. Obutukora eki, nitusobora kukonyera abandi kukirora ngu mali ediini yaitu niyo ediini ey’amananu kandi bakatweteranizaaho kuheereza Yahwe, Ruhanga ow’okugonza. Nahabweki leka tucweremu kimu kwikara nitwoleka okugonza habwokuba nuko kokurorraho ak’Abakristaayo ab’amananu.