1-2. Obworaaba otakahikire ha idaara ery’okubatizibwa habwaki otasemeriire kuhwamu amaani? (Rora ekisisani ekya ha kyesweko.)

 OBWORAABA n’ogonza kubatizibwa, eki kigendererwa kirungi eky’oyeterireho. Baitu oyetekaniize kubatizibwa? Obworaaba n’okigumya ngu oyetekaniize kandi n’abagurusi nibakisagika, otatiina kukikora ha kubatizibwa okurahonderaho. Obworakikora noija kutunga okusemererwa omu buheereza bwawe hali Yahwe.

² Ha rubaju orundi, omuntu yakakugambiraga ngu osemeriire kweyongera kukurakurana, otakabatiziibwe? Rundi naiwe okyeroliire wenka? Obukiraaba nukwo kiri, otahwamu amaani. N’osobora kukurakurana okahika ha idaara eri koobe muto rundi mukuru.

3. Kiki omusaija Omunyaisyopiya yakagwize Firipo, kandi eki nikiretaho kikaguzo ki? (Engeso Ezabakwenda 8:36, 38)

³ Soma Engeso Ezabakwenda 8:36, 38. Omukuru Omunyaisyopiya akakaguza Firipo omutebezi w’enjiri ati: “Kiki ekirukuntanga okubatizibwa?” Omusaija Omunyaisyopiya akaba n’agonza kubatizibwa, baitu mali akaba ayetekaniize?

4. Omunyaisyopiya akooleka ata ngu acweriremu kimu kugumizaamu n’ayega?

⁴ Omusaija Omunyaisyopiya “akaba [agenzere] Yerusalemu okuramya.” (Eng. 8:27) Nahabweki n’asobora kuba akaba ali Omuyudaaya omuhinduki, ow’akaba ataahire ediini ey’Abayudaaya. Hataroho kugurukyagurukya akaba ayegere hali Yahwe kuruga omu Byahandiikirwe by’Oruheburaniya ebirukwera.  Baitu akaba akyaine ekihika eky’okwega ebirukukiraho. Firipo obuyasangire omusaija onu mu muhanda, akaba n’akora ki? Akaba n’asoma omuzingo gwa nabbi Isaya. (Eng. 8:28) Ebyakaba n’asoma bikaba byokulya by’omwoyo ebigumire. Omukuru onu atagarukire ha kwega enyegesa ezirukubandizibwaho, baitu akaba n’agonza kugumizaamu n’ayega.

5. Omunyaisyopiya akakora ki hanyuma y’okwega?

⁵ Omusaija ogu akaba ali mukuru hansi y’omukama omukazi owa Kandake owa Isyopiya; akaba ali ‘mujweki w’obuguuda bwe bwona.’ (Eng. 8:27) Nahabweki n’asobora kuba akaba aine obujunanizibwa bwingi. Baitu yatungaga obwire obw’okuramya Yahwe. Atagarukire ha kwega amananu kyonka baitu akateeka omu nkora ebyarukwega. Nahabweki akaruga Isyopia yagenda Yerusalemu kuramya Yahwe ha Yekaru. Orugendo runu rwine kuba rwamwetaagisaga kuteekamu obwire bwingi na sente nyingi, baitu yakoraga kyona ekyarukusobora kuramya Yahwe.

6-7. Okugonza Omunyaisyopiya akaba ayiniire Yahwe kukaikara kuta nikweyongera?

⁶ Omunyaisyopiya onu akeega gamu h’amananu amakuru kandi amahyaka kuruga hali Firipo, otwaliremu n’ebirukukwata hali Masiya. (Eng. 8:34, 35) Aine kuba yakwasirweho muno obuyayegere Yesu eky’akaba amukoliire. Kiki ekiyakozere hanyuma y’okwega ebintu ebi? Akaba n’asobora kwikara ali Muyudaaya omuhinduki ayatekwamuga ekitiinisa. Baitu, akeyongera kugonza Yahwe n’Omwana we. Kikamuleetera kukora encwamu enkuru muno ey’okubatizibwa nk’omu h’abahondezi ba Yesu Kristo. Firipo obuyarozere ngu omusaija onu ahikire kubatizibwa, akamubatiza.

⁷ Naiwe kakuba ohondera ekyokurorraho eky’Omunyaisyopiya, n’osobora kwetekaniriza okubatizibwa. Noija kusobora kugamba otarukutiina ngu, “Kiki ekirukuntanga okubatizibwa?” Leka tubazeeho nk’oku osobora kukora ebintu nibyo bimu omusaija onu yakozere. Akaikara n’ayega, akateeka omu nkora ebiyayegere, kandi yagumizaamu nakurakuraniza okugonza kwe hali Ruhanga.

8. Ekyahandiikirwe ekiri omu Yohana 17:3 nikikukwataho kita?

⁸ Soma Yohana 17:3. Ebigambo bya Yesu binu bikakukonyera kucwamu kwega Baibuli? Baingi bikatukonyera. Baitu ebigambo nibyo bimu nibitugambira kugumizaamu nitwega. Titulireka “okumanya . . . Ruhanga omu owamananu.” (Mug. 3:11) Nitwija kwikara nitwega ebiro n’ebiro. Obuturayongera kwega nitwija kweyongera kwirra haihi na Yahwe.​—Zab. 73:28.

9. Kiki eky’osemeriire kukora hanyuma y’okwega enyegesa za Baibuli ez’okubandizaaho?

⁹ Obututandika kwega hali Yahwe, twega enyegesa ez’okubandizaaho. Omu bbaruha ye hali Abaheburaniya, omukwenda Paulo akazeeta “ebyokubandizaho.” Akaba atarukumanyisa ngu enyegesa zinu tiziine mugaso. Akazirengesaniza n’amaata agakonyera omwana kukura. (Baheb. 5:12; 6:1) Akongera yatererra Abakristaayo boona kutagarukira ha kwega enyegesa ez’okubandizaaho zonka baitu beege n’amananu agahamire ag’omu Kigambo kya Ruhanga. Okurakuraniize ekihika eky’okwega enyegesa za Baibuli ezihamire? N’ogonza kugumizaamu n’okurakurana, kandi noyega hali Yahwe n’ekigendererwa kye?

10. Habwaki abamu kibagumira kwesomesa?

¹⁰ Baingi haliitwe kitugumira kwesomesa. Kandi iwe? Ha isomero, okeega kusoma n’okwesomesa kurungi? Wayegondezaaga omu kwesomesa kandi oyehurra ngu oyegere bingi? Rundi okahwamu amaani watekereza ngu toli murungi ha kusoma ebitabu? Obukiraaba nukwo kiri, toli wenka. Baitu Yahwe n’asobora kukukonyera. Ahikiriire, kandi nuwe Mwegesa arukukirrayo kimu oburungi.

11. Yahwe ayolekere ata ngu nuwe “Omwegesa Arukukirrayo kimu”?

¹¹ Yahwe nuwe “Omwegesa Arukukirrayo kimu.” (Is. 30:20, 21, NWT) Ali Mwegesa arukugumiisiriza, ow’embabazi, kandi ow’okwetegereza. Abeegi be abaserramu ebirungi. (Zab. 130:3) Tatunihirramu kukora ebintu ebitutasobora kukora. Ijuka ngu nuwe yakozere obwongo bwawe. (Zab. 139:14) Tukazaarwa twine ekihika eky’okwega. Omuhangi waitu n’agonza twikale nitwega ebiro n’ebiro kandi tukwegondezeemu. Nahabweki, ky’amagezi kugonza amananu ag’omu Baibuli. (1 Pet. 2:2) Wetereho ebigendererwa eby’osobora kuhikiiriza kandi oikale n’ohondera entekaniza yaawe ey’okusoma n’okwesomesa Baibuli. (Yos. 1:8) Habw’obukonyezi bwa Yahwe, noija kwegondeza omu kumusomaho n’okwikara n’omwegaho.

12. Habwaki tusemeriire kwesomesaaho obwomeezi n’obuheereza bwa Yesu?

¹² Butoosa tunga obwire oyecumiitirizeeho obwomeezi bwa Yesu, n’obuheereza bwe. Kikuru muno kwegera hali Yesu obuturaaba nitugonza kuheereza Yahwe kukira muno omu biro binu ebigumangaine. (1 Pet. 2:21) Yesu akagambira abahondezi be ngu baakuhikirweho ebizibu. (Luk. 14:27, 28) Baitu akaba n’akigumya ngu baakubisingwire nk’oku nauwe yakozere. (Yoh. 16:33) Wesomeseeho obwomeezi bwa Yesu kandi wetereho ebigendererwa ebirakukonyera kwegera ha kyokurorraho kye.

13. Kiki eky’osemeriire kwikara n’osaba Yahwe kandi habwaki?

¹³ Okumanya kwonka tikurukumara. Ensonga habwaki nitwetaaga okumanya niyo ngu n’osobora kweyongera kwega ebirukukwata hali Yahwe n’okukurakuraniza emiringo nk’okugonza hamu n’okwikiriza. (1 Kol. 8:1-3) Obworagumizaamu noyega ikara n’osaba Yahwe kukukonyera kwongera ha kwikiriza kwawe. (Luk. 17:5) Agarukamu esaara nk’ezi. Okwikiriza kwonyini okurukusigikirra ha kumanya okuhikire okurukukwata hali Ruhanga waitu nikwija kukukonyera kweyongera kukurakurana.​—Yak. 2:26.

14. Omukwenda Petero akooleka ata obukuru obw’okuteeka omu nkora ebiturukwega? (Rora ekisisani.)

¹⁴ Omukwenda Petero akooleka nk’oku kiri kikuru abahondezi ba Kristo kwikara nibateeka omu nkora ebibarukwega. Akabazaaho ebirukukwata hali Nuha. Yahwe akagambira Nuha ngu akaba nagenda kukozesa okusandaara kw’amaizi kuhwerekereza abantu ababi  ab’omu kasumi ako. Kumanya ngu hakaba nihagenda kubaho okusandaara kw’amaizi kikaba kitarukumara kujuna Nuha n’eka ye. Wetegereze ngu Petero akaba nabazaaho akasumi okusandaara kw’amaizi kutakabaireho ‘elyato obulikaba niryombekwa.’ (1 Pet. 3:20) Ego, Nuha n’eka ye bakateeka omu nkora ebibakaba nibeega kuruga hali Ruhanga, kuraba omu kwombeka eryato erikooto muno. (Baheb. 11:7) Nuha ekiyakozere, Petero akakirengesaniza n’okubatizibwa obuyahandiikire ati: “[Amaizi] nigo agarukubajunisa inywe hati bunu omu kisisani ekyamazima, nukwo kubatizibwa.” (1 Pet. 3:21) Nitusobora kulengesaniza eky’oliyo n’okora hati kwetekaniriza kubatizibwa, n’omulimo ogw’okwombeka eryato, Nuha n’eka ye ogubaakozere kumara emyaka. Mulimo ki ogw’osemeriire kukora kwetekaniriza okubatizibwa?

15. Okwegarukamu kuruga ha mutima nikitwarramu ki?

¹⁵ Kimu ha bintu ebitusemeriire kubanza kukora nukwo kwegarukamu ebibi byaitu. (Eng. 2:37, 38) Okwegarukamu kuruga ha mutima kituleetera kukora empindahinduka. Olekere kukora ebintu ebirukubiihiza Yahwe, nk’obusiihani, kunywa etaaba rundi kubaza ebigambo ebibi? (1 Kol. 6:9, 10; 2 Kol. 7:1; Bef. 4:29) Obworaaba otakakikozere, ikara n’olengaho kukora empindahinduka. Gambiraho ow’arukukwegesa Baibuli, rundi osabe abagurusi b’ekitebe obukonyezi n’obuhabuzi. Obworaaba okyali muto kandi n’okyaikara n’abazaire baawe ikara n’obasaba bakukonyere kuleka engeso embi ezisobora kukulemesa kubatizibwa.

16. Kuba n’entekaniza enungi ey’oby’omwoyo nikitwarramu ki?

¹⁶ Ekindi, kikuru muno kuba n’entekaniza enungi ey’eby’omwoyo ey’okuhondera butoosa. Kinu nikitwarramu kugenda omu nsorrokano n’okuzejumbiramu. (Baheb. 10:24, 25) Obworaikirizibwa kutebeza hamu n’ekitebe, kikole butoosa. Obwarayeyongera kwejumbira omu mulimo gunu ogurukujuna obwomeezi, noija kweyongera kugwegondezaamu. (2 Tim. 4:5) Obworaaba oli muto kandi noikara n’abazaire baawe, wekaguze: ‘Bazaire bange nubo banyijukya kugenda omu nsorrokano rundi omu buheereza? Rundi nkikora ntahambiriziibwe?’ Obwokora ebintu ebi habwawe wenka, oyoleka okwikiriza kwawe, okugonza n’okusiima hali Yahwe. Zinu ziri “engeso  ezirukwera,” ebisembo eby’osobora kuha Yahwe. (2 Pet. 3:11; Baheb. 13:15) Ebisembo byona ebituhayo twegondiize, bisemeza muno Ruhanga waitu. (Lengesaniza 2 Abakolinso 9:7.) Tukora ebintu binu habwokuba nitugonza kuha Yahwe ekirukukirayo oburungi.

17-18. Mulingo ki omukuru ogurakukonyera kukurakurana kandi habwaki? (Enfumo 3:3-6)

¹⁷ Obworagumizaamu n’okurakurana kuhika ha kubatizibwa, noija kutangatangana ebizibu. Abamu nibasobora kukusekereza habw’enyikiriza yaawe empyaka, kandi abandi bakuhakanize rundi bakuhiiganize. (2 Tim. 3:12) N’osobora kuba oliyo noteekamu amaani kuleka engeso embi baitu obwire obumu n’osobora kwesanga wayongera wagikora. Obundi n’osobora kwehurra kubi kandi okagonza nokubirugaho habwokuba noyehurra ngu torukukisobora. Kiki ekirakukonyera kugumiisiriza? Okugonza okwoiniire Yahwe.

¹⁸ Okugonza okwoiniire Yahwe nugwo mulingo ogurukukirrayo kimu oburungi ogwoine. (Soma Enfumo 3:3-6.) Okugonza kunu nikusobora kukukonyera kwikara n’oheereza Yahwe n’obworatunga ebizibu. Baibuli ekira kubazaaho okugonza okutalekera Yahwe okwainiire abaheereza be. Okugonza kunu nikumanyisa ngu Yahwe talirekaho abaheereza be kandi talireka kubagonza. (Zab. 100:5) Okahangwa omu kisisani kya Ruhanga. (Kub. 1:26) N’osobora kwoleka ota okugonza nk’oku?

19. N’osobora ota kweyongera kusiima Yahwe habw’ebintu akukoliire? (Abagaratiya 2:20)

¹⁹ Tandika n’okusiima. (1 Bas. 5:18) Buli kiro wekaguze, ‘Yahwe anyolekere ata okugonza?’ Hanyuma omusiime omu saara zaawe, obu n’obazaaho ebintu ebyakukoliire. Wetegereze ngu ebintu ebirungi Yahwe eby’akora abikorra iwe nk’omuntu habwokuba n’akugonza, nk’oku omukwenda Paulo yakyetegeriize. (Soma Abagaratiya 2:20.) Wekaguze, ‘Nanyowe ningonza kumwoleka okugonza kwange?’ Okugonza okwoiniire Yahwe nikwija kukukonyera kwangirra ebyohyo n’okugumira ebizibu. Nikwija kukwekambisa kugumira ha ntekaniza yaawe ey’eby’omwoyo kandi kukukonyere kwikara n’oyoleka Sso ow’omu iguru okugonza.

20. Kuhayo obwomeezi bwawe hali Yahwe nikitwarramu ki, kandi habwaki encwamu enu nkuru?

²⁰ Hanyuma y’obwire, okugonza okwoiniire Yahwe nikwija kukuleetera kusaba esaara  ey’embaganiza. Noija kuhayo obwomeezi bwawe hali Ruhanga. Ijuka ngu obw’oyehayo hali Yahwe oba otungire okunihira okurungi okw’okumuheereza ebiro n’ebiro. Obwohayo obwomeezi bwawe hali Yahwe, oba omuraganiize kumuheereza omu bwire oburungi n’obubi. Obwoyehayo, kiba kitarukwetaagisa kukikora omurundi ogundi. Ky’amananu ngu obutwehayo hali Yahwe tuba tukozere encwamu y’amaani. Baitu tekerezaaho kinu, noija kukora encwamu nyingi omu bwomeezi bwawe, ezimu nungi baitu tolisobora kukora ey’erukukira kuhayo obwomeezi bwawe hali Yahwe. (Zab. 50:14) Sitaani naija kulengaho kucekya okugonza okwoiniire Yahwe, n’atekereza ngu torukwija kwikara oli mwesigwa hali Yahwe. Otaliikiriza Sitaani kusingura! (Yob. 27:5) Okugonza okw’amaani okwoiniire Yahwe nikwija kukukonyera kulinda omurago gwawe ogw’okumuheereza ebiro n’ebiro n’okweyongera kumwirra haihi.

21. Habwaki nitugamba ngu okubatizibwa teri niyo mpero baitu ntandikwa?

²¹ Hanyuma y’okwehayo hali Yahwe, gambira abagurusi omu kitebe ha ncwamu enkuru erukuhonderaho. Baitu ikara noijuka ngu okubatizibwa teri niyo empero baitu eba ntandikwa ey’obwomeezi obw’okuheereza Yahwe obutaine bugarukiro. Nahabweki gumya okugonza kwawe hali Yahwe hati. Wetereho ebigendererwa ebirakukonyera kweyongera kugonza Yahwe. Ebigendererwa ebi nibiija kukwekambisa kubatizibwa. Noija kusemererwa muno ha kiro kyawe eky’okubatizibwa. Baitu egi eriba ntandikwa. Okugonza okwoiniire Yahwe n’Omwana we leka kwikale nikweyongera ebiro n’ebiro!