1-2. Omuhandiiki omu akagamba ki, kandi kiki ekiturukwija kubazaaho omu kicweka kinu?

KASUMI kanu obukaikuru n’obukaikuru bw’abantu bagamba ngu baikiririza omuli Yesu, baitu tiborobera ebintu ebiyayegeseze. (2 Tim. 4:3, 4) Omuhandiiki omu akagamba ati: “Kasumi kanu kakuba haroho omuntu ondi owali nka Yesu, arukubaza ebintu nk’ebya Yesu ow’okubanza ebiyabalize . . . , twakwangire omuntu ogu nk’oku twayangire Yesu emyaka 2000 enyuma? . . . Baingi bagarukamu ngu: Ego, twakumwangire.”

² Baingi omu kyasa eky’okubanza bakahurra Yesu nayegesa kandi bakamurora nakora ebyamahano, baitu bakanga kumwikiririzaamu. Habwaki? Omu kicweka ekyahoire, tukabazaaho ensonga ina habwaki abantu baatabaijukire habw’ebintu Yesu yabalize n’ebiyakozere. Katubazeeho ensonga ezindi ina. Nitwija n’okurora ensonga habwaki abantu kasumi kanu baanga abahondezi ba Yesu kandi n’omulingo tusobora kwerinda kutabaijuka.

3. Kiki Yesu ekiyakozere ekyaletiire abamu kutabaijuka?

³ Yesu obwakaba ali omu nsi, yamaraga obwire n’abantu aba buli mulingo. Yaliiraga hamu n’abantu abaguuda kandi ab’amaani, kandi yamaraga obwire bwingi n’abantu abanaku kandi abataine bukonyezi. Ekindi, yayolekaga embabazi abo abatwarwaga kuba ‘abasiisi.’ Abamu abayefooraga kuba abahikiriire ekihinguraine bakatabaijuka habwa Yesu ekiyakozere. Bakakaguza abegeswa be bati: “Kiki ekirukubalisa nokunywa  hamu nabahoza nabasiisi?” Yesu akabagarukamu ati: “Abomiire [tibetaaga] omufumu; baitu abarwaire. Ntaije okweta abahikiriire, baitu abasiisi okwegarukamu.”​—Luk. 5:29-32.

4. Kusigikirra hali nabbi Isaya, kiki Abayudaaya ekibakaba basemeriire kumanya hali Masiya?

⁴ Ebyahandiikirwe nibigamba ki? Emyaka nyingi Masiya obwakaba atakaizire, nabbi Isaya akamubazaaho ngu abantu tibakumwikiriize. Akaranga ati: “Akagaywa kandi akangwa abantu; . . . nkomuntu abantu oubasereka amaiso gabu, nukwo yagayirwe ati, naitwe tutamuteho ekitinisa.” (Is. 53:3) Obunabbi bukooleka ngu “abantu” bakwetantaire Masiya, nahabweki Abayudaaya ab’omu kasumi ka Yesu baali basemeriire kukimanya ngu abantu bakumwangire.

5. Baingi kasumi kanu, barora bata abahandozi ba Yesu?

⁵ Nitukyarora ekizibu nikyo kimu kasumi kanu? Ego. Abebembezi b’amadiini baingi, basemererwa muno abantu ruranganwa, abaguuda, rundi ensi aberora nk’ab’amagezi obubabeteranizaaho omu makanisa gaabo. Baikiriza abantu nka banu kuba omu makanisa gaabo n’obukiraaba ngu nibakora ebintu Yahwe ebyarukunoba. Abebembezi b’amadiini abo barora abaheereza ba Yahwe abekambi, kandi abaine engeso ezirukwera nk’abantu aba hansi habwokuba tibamanyirwe kusigikirra ha rulengo orw’ensi. Nk’oku Paulo yagambire, Ruhanga akakomamu abo abagayibwa. (1 Kol. 1:26-29) Baitu hali Yahwe, abaheereza be boona abesigwa b’omuhendo muno.

6. Kiki Yesu ekiyagambire omu Matayo 11:25, 26, kandi nitusobora kumwegeraho tuta?

⁶ Nitusobora tuta kwerinda kutabaijuka? (Soma Matayo 11:25, 26.) Titusemeriire kuhabisibwa omulingo ensi eroramu abaheereza ba Ruhanga. Tusemeriire kukimanya ngu Yahwe akozesa abantu abebundaazi bonka kukora ebyagonza. (Zab. 138:6) Tutekerezeeho ebintu byona, Yahwe ebyasoboire kukora nakozesa abantu, ensi ab’erora nk’abatali b’amagezi rundi abatasomere.

7. Habwaki Yesu yayesere Abafalisaayo abagobya, kandi kiki ekibakozere?

⁷ N’obumanzi obwingi, Yesu akajunaana abebembezi b’ediini ab’omu kasumi ke habwokuba bateegese abantu kuramya Yahwe omu mulingo oguhikire. Ekyokurorraho, akooleka nk’oku Abafalisaayo bali bagobya habwokuba bateekaga omutima ha mulingo gw’okunabamu engaro kukira kufaaho abazaire baabo. (Mat. 15:1-11) Abegeswa ba Yesu nibasobora kuba bahuniriire habw’ebigambo ebi. Nahabweki bakamukaguza ngu: “Omanyire Abafalisayo babihiirwe obubahuliire ekigambo eki?” Yesu akabagarukamu ati: “[Ekibyairwe] kyona Isenyowe owomu iguru ekyatarabyaire kiryomberwamu. Mubaleke; bali bebembezi abafire amaiso. Baitu omufu wamaiso obwananata omufu wamaiso, bombi baligwa omu kina.” (Mat. 15:12-14) Yesu ataikirize omulingo omubi ababembezi b’ediini banu bayetwaizeemu, kumutanga kubaza amananu.

8. Yesu akakyoleka ata ngu ezimu ha nyegesa ez’amadiini tizirikusemeza Ruhanga?

⁸ Yesu akooleka ngu ezimu ha nyegesa z’ediini zikaba zitahikire. Atagambe ngu enyegesa zoona ez’ediini Ruhanga naziikiriza. Oihireho akasoborra ngu baingi bakubaire omu muhanda ogugalihire ogurukuhikya omu kuhwerekerra kandi bake nubo bakutahire omu muhanda ogufunzire ogurukuhikya omu bwomeezi. (Mat. 7:13, 14) Akakyoleka kurungi ngu abamu bakwefoire nk’abarukuheereza Ruhanga kandi kunu batarukumuheereza. Akagamba ati: “Mwerinde banabi abebisuba ababaizira omu byokujwara ebyentama, baitu omunda nizo  enyamaiswa ezirukutagura. Muli bamanyira ha byana byabu.”​—Mat. 7:15-20.

9. Nyegesa ki ezimu ez’ediini Yesu eziyayolekere ngu tizihikire?

⁹ Ebyahandiikirwe nibigamba ki? Obunabbi obuli omu Baibuli bukaranga ngu Masiya yakubaire n’ihali ery’enju ya Ruhanga. (Zab. 69:9; Yoh. 2:14-17) Ihali eri likaletera Yesu kwanika enyegesa hamu n’ebikorwa eby’amadiini ag’ebisuba. Ekyokurorraho, Abafalisaayo baikirizaaga ngu omwoyo tigufa, ekirukumanyisa ngu omuntu yagumizaamuga ali mwomeezi hanyuma y’okufa; baitu Yesu akegesa ngu abafu bagwijagiire, ekirukumanyisa ngu babaga batakyali bomeezi. (Yoh. 11:11) Abasadukaayo bo baikirizaaga ngu tiharoho kuhumbuuka; baitu Yesu akahumbuura munywani we Lazaro. (Yoh. 11:43, 44; Eng. 23:8) Abafalisaayo bayegesaaga ngu haroho amaani agatarukurorwa rundi ngu Ruhanga nuwe acwamu buli kimu kyona ekitubaho rundi ekitukora. Baitu Yesu akegesa ngu abantu nubo becweramu kuheereza Ruhanga rundi kutamuheereza.​—Mat. 11:28.

10. Habwaki baingi batabaijuka habw’enyegesa zaitu?

¹⁰ Nitukyarora ekizibu nikyo kimu kasumi kanu? Ego. Baingi batabaijuka habwokuba enyegesa zaitu ezirukusigikirra ha Baibuli zooleka ngu amadiini maingi geegesa ebisuba. Abebembezi b’amadiini begesa abahondezi baabo ngu Ruhanga afubira ababi omu murro ogutaraara. Bakozesa enyegesa enu ey’etahikire kutinisiriza abantu nukwo abantu baborobere. Nk’abaheereza ba Yahwe, abarukuramya Ruhanga ow’okugonza tukonyera abantu kumanya ngu enyegesa enu tehikire. Ekindi abebembezi b’amadiini begesa ngu omwoyo tigufa. Enyegesa enu kakuba eba ehikire, nikimanyisa ngu tikyakwetagisize abantu kuhumbuuka. Tukyolekera kimu ngu enyegesa enu teri omu Baibuli. Kwahukanaho n’amadiini ageegesa ngu buli kimu kyona ekitubaho kikacwibwamu kara Ruhanga rundi amaani agatarukurorwa, itwe twegesa ngu omuntu aine obugabe obw’okwecweramu kuheereza Ruhanga. Ababembezi b’amadiini bakora ki obutwoleka ngu begesa b’ebisuba? Emirundi erukukira obwingi babiihirwa!

11. Kusigikirra ha bigambo bya Yesu ebirukusangwa omu Yohana 8:45-47, kiki Ruhanga ekyarukwetaagisa abaheereza be?

 ¹¹ Nitusobora tuta kwerinda kutabaijuka? Obuturaaba nitugonza amananu, tusemeriire kwikiriza n’okworobera Ruhanga eby’atugambira. (Soma Yohana 8:45-47.) Kwahukanaho na Sitaani, itwe tugumira h’amananu. Titukora kintu kyona ekihakaniza amananu. (Yoh. 8:44) Ruhanga nayetagisa abantu be ‘kunoba obubi’ kandi “bagumire ha burungi” nk’oku Yesu yakozere.​—Bar. 12:9; Baheb. 1:9.

12. Habwaki omulingo Yesu yafiiremu gwatabaijwire Abayudaaya baingi?

¹² Kintu ekindi ekyatabaijwire Abayudaaya omu kasumi ka Yesu? Paulo akagamba ati: “Itwe ntutebeza Kristo [ayahanikirwe] ha muti, hali Abayudaya enkonge.” (1 Kol. 1:23) Habwaki omulingo Yesu yafiiremu gwatabaijwire Abayudaaya baingi? Yesu kufeera ha muti bakamurora nk’omucwi w’ebiragiro kandi omusiisi​—hatali Masiya.​—Bir. 21:22, 23.

13. Abo abatabaijukire habwa Yesu, bakalemwa kumanya ki?

¹³ Abayudaaya baingi abatabaijukire bakalema kukimanya ngu Yesu akaba ataine musango, bakamujunanira busa, kandi bamutwaza omu mulingo ogutali gw’obwinganiza. Abo abacweriire Yesu omusango, batafeeyo kurora ngu yatunga obwinganiza. Abacwi b’emisango omu kooti enkuru ey’Ekiyudaaya bakesorooza hamu kandi bacwera Yesu omusango bwangu bwangu batahondiire ebiragiro ebirukukwata ha kucwa emisango. (Luk. 22:54; Yoh. 18:24) Omu kiikaro eky’okuhuliiriza emisango ey’ekaba n’ejunanwa Yesu n’obwakaiso obukaba buroho, abacwi b’emisango ubo bonka bakaserra “bakaiso abebisuba okuhangirra Yesu bamuite.” Eki obukyalemere, nyakatagara omukuru akalengeho kuletera Yesu kubaza ebintu ebitahikire nukwo nibyo basigikirreho kumusingisa omusango. Kinu kyali kitarukwikiraniza n’ebiragiro. (Mat. 26:59; Mar. 14:55-64) Kandi hanyuma ya Yesu kuhumbuuka omu bafu, abacwi b’emisango abo abagobya bakaha abaserikale Abaroma abaali nibalinda ekituuro  erupiya nyingi nukwo bajanjaaze ebisuba kusoborra habwaki ekituuro kyali kitarumu kantu.​—Mat. 28:11-15.

14. Obunabbi bukabazaaho ki okufa kwa Masiya?

¹⁴ Ebyahandiikirwe nibigamba ki? N’obukiraaba ngu Abayudaaya baingi omu kasumi ka Yesu, batanihire ngu Masiya kyakumwetaagisize kufa, wetegereze kiki obunabbi ekibwabalize: “Akasesa obwomezibwe okuhikya okufa, yabarwa nabasisi: baitu aketweka ebibi byabaingi, yatonganira abasisi.” (Is. 53:12) Nahabweki busaho nsonga yoona eyakuletiire Abayudaaya kutabaijuka, Yesu obuyaisirwe nk’omusiisi.

15. Bintu ki ebibarukujunaana Abakaiso ba Yahwe ebiretiire abamu kutabaijuka?

¹⁵ Nitukyarora ekizibu nikyo kimu kasumi kanu? Ego! Yesu bakamusibaho omusango kandi bagumusingisa, n’omu kasumi kanu abantu bakozere ekintu nikyo kimu h’Abakaiso ba Yahwe. Wetegereze ebyokurorraho ebimu. Hagati y’emyaka 1930 hamu na 1940, omu ihanga ly’Amerika, hakabayo emisango nyingi ey’okurwanirra obugabe bwaitu obw’okuramya Ruhanga. Abacwi b’emisango abamu, baali niboolekera kimu ngu nibatunoba. Omu Quebec, Canada, ediini y’Abakatoliki ekakwataniza na Gavumenti kuhakaniza omulimo gwaitu. Abatebezi baingi bakatekwa omu nkomo habw’okutebeza bataahi baabo ha Bukama bwa Ruhanga. Omu Germany, gavumenti eya Banazi ekaita ab’oruganda abato baingi abesigwa. Omu myaka nke enyumaho, ab’oruganda omu Russia baikaire nibabasingisa emisango kandi nibateekwa omu nkomo habw’okubazaaho Baibuli, ekintu ab’obulemi ekibeeta ekikorwa “eky’okuhinguraniza.” N’empindura eya New World Translation of the Holy Scriptures omu rulimi Orurasya ekatangwa kandi etwarwa kuba ekitabu “ekirukukihinguraniza” ngu habwokuba ekozesa ibara Yahwe.

16. Kusigikirra ha 1 Yohana 4:1, tusemeriire kwegendereza nukwo tutahabisibwa ebisuba ebirukukwata h’abantu ba Yahwe. Habwaki eki kikuru?

¹⁶ Nitusobora tuta kwerinda kutabaijuka? Manya amananu gonyini. Omu Kwegesa kwe Okwa ha Rusozi, Yesu akatererra abaali nibamuhuliiriza ngu abantu abamu bakubahangiriire ‘nebigambo ebibi byona.’ (Mat. 5:11) Ebisuba binu biruga hali Sitaani. Aletera abarukutuhakaniza kujanjaaza ebisuba ebirukukwata hali abo abagonza amananu. (Kus. 12:9, 10) Tusemeriire kwangira kimu ebisuba abarukutuhakaniza ebibatubazaaho. Tutaliikiriza ebisuba nk’ebyo kututiinisa kuheereza Ruhanga rundi kucekya okwikiriza kwaitu.​—Soma 1 Yohana 4:1.

17. Ebintu ebyabaireho Yesu obwakaba ali haihi kufa nibisobora bita kuba byatabaijwire abamu?

¹⁷ Nihaburayo akasumi kake Yesu aitwe, omu h’abakwenda be 12 akamugobeza. Omukwenda ondi akehakana Yesu emirundi esatu, kandi rwebagyo oru atakafiire, abakwenda be boona bakamulekaho. (Mat. 26:14-16, 47, 56, 75) Kinu Yesu kitamuhuniirize. Akaba agambire ngu kinu nikiija kubaho. (Yoh. 6:64; 13:21, 26, 38; 16:32) Ebintu binu obubyabaireho, abamu nibasobora kuba batabaijukire bacwamu ngu tibarukugonza kuba abegeswa ba Yesu. Nibasobora kuba batekeriize ngu ‘abakwenda ba Yesu obubaraaba nukwo barukwetwaza bati, tindukugonza kuba omu halibo!’

18. Ebintu ebyabaireho Yesu atakafiire, bikahikiriza bunabbi ki?

¹⁸ Ebyahandiikirwe nibigamba ki? Emyaka nyingi muno Yesu atakaizire omu nsi, Yahwe akooleka kurabira omu Kigambo kye ngu Masiya bakumugobiize n’ebicweka 30 eby’efeeza. (Zak. 11:12, 13) Kandi ogu ayakumugobiize, yakubaire omu h’abanywani be. (Zab.  41:9) Nabbi Zakaliya na uwe akahandiika ati: “Tera omulisa, entama ziriraranga.” (Zak. 13:7) Omu kiikaro ky’okutabaijuka habw’ebintu ebyabaireho, okwikiriza kwabo abaine emitima emiculeezi kukaba kusemeriire kweyongera kuguma habw’okurora obunabbi bunu nibuhikirra hali Yesu.

19. Abantu abarukugonza amananu basemeriire kumanya ki?

¹⁹ Nitukyarora ekizibu nikyo kimu kasumi kanu? Ego. Omu kasumi kanu, Abakaiso ba Yahwe abamu abamanyirwe barugire omu mananu, bafooka bahakaniza, kandi balengereho n’okuhabya abamu. Bajanjaize amakuru amabi, agatahikire, hamu n’ebisuba ebirukukwata h’Abakaiso ba Yahwe kurabira omu by’amakuru hamu na intaneeti. Baitu abantu abagonza amananu tibahabisibwa. Oihireho bakimanyire ngu ebintu binu, byakubaireho.​—Mat. 24:24; 2 Pet. 2:18-22.

20. Nitusobora tuta kwerinda kutabaijurwa abantu abarugire omu mananu? (2 Timoseo 4:4, 5)

²⁰ Nitusobora tuta kwerinda kutabaijuka? Tusemeriire kwikaza okwikiriza kwaitu kugumire, obu nitwesomesa buli kiro, nitusaba butoosa, kandi twikale nitukora omulimo Yahwe ogw’atuhaire. (Soma 2 Timoseo 4:4, 5.) Obuturaaba twine okwikiriza okugumire, titurukwija kutiina obuturahurra amakuru amabi agarukukwata h’Abakaiso ba Yahwe. (Is. 28:16) Okugonza okutwiniire Yahwe, Ekigambo kye, hamu n’ab’oruganda, nikwija kutukonyera kwerinda kutabaijurwa abo abarugire omu mananu.

21. N’obukiraaba ngu baingi kasumi kanu banga obutumwa bwaitu, kiki ekiturukugumiza kimu?

²¹ Omu kasumi ka Yesu, baingi bakatabaijuka kandi bamwanga. Baitu abandi baingi bakamwikiririzaamu. Omuli banu nihatwarramu omusaija ayaikarraga omu Rusorrokano orw’Abayudaaya hamu ‘n’ekitebe ekya banyakatagara baingi,’ (Eng. 6:7; Mat. 27:57-60; Mar. 15:43) Omu mulingo nugwo gumu kasumi kanu, obukaikuru bw’abantu tibatabaijukire. Habwaki? Habwokuba bamanyire kandi bagonza amananu agarukusangwa omu Byahandiikirwe. Ekigambo kya Ruhanga nikigamba: “Bayina obusinge bwingi abarukugonza ebiragiro byawe; [busaho] ekibesitaraho.”​—Zab. 119:165.