1. Kyokurorraho ki Yesu ekiyateriireho abahondezi be kandi bo bakakora ki? (Rora ekisisani ekya ha kyesweko.)

YESU obwakaba ali omu nsi akaikara aine entekereza ey’ehikire omu buheereza bwe, kandi nagonza n’abahondezi be nabo kwikara baine entekereza ey’ehikire ha buheereza. (Yoh. 4:35, 36) Yesu obw’akaba ali n’abegeswa be, batebezaaga n’obwekambi. (Luk. 10:1, 5-11, 17) Baitu hanyuma ya Yesu kukwatwa n’okwitwa, obwekambi bwabo obw’okutebeza bukakeeha ha bw’akasumi kake. (Yoh. 16:32) Hanyuma y’okuhumbuuka, Yesu akabekambisa kuteeka omutima ha kutebeza. Kandi hanyuma ya Yesu kugaruka omu iguru, bakatebeza n’obwekambi bwingi kyaletera n’abanyanzigwa baabo kwetomboita nibagamba ngu: “Dora, muijuize Yerusalemu okwegesa kwanyu.”​—Eng. 5:28.

2. Omulimo gw’okutebeza, Yahwe aguhaire ata omugisa?

² Yesu akebembera omulimo ogwali nigukorwa Abakristaayo ab’omu kyasa eky’okubanza kandi Yahwe akabaha omugisa, abantu baingi baikiriza obutumwa bwabo. Ekyokurorraho ha Pentekote 33 C.E., abantu abarukuhika omu 3,000 bakabatizibwa. (Eng. 2:41) Kandi omuhendo gw’abegeswa gukaikara nigweyongera muno. (Eng. 6:7) Ekindi Yesu akaranga ngu omu biro ebya ha mpero, abantu baingi baakwikiriize amananu.​—Yoh. 14:12; Eng. 1:8.

3-4. Habwaki abamu nikisobora kubagumira kutebeza, kandi kiki ekiturabazaaho omu kicweka kinu?

³ Itwena tusemeriire kulengaho kwikara twine entekereza ey’ehikire ha buheereza. Omu nsi ezimu, kinu kyanguhire kukikora. Habwaki? Habwokuba baingi bagonza kwegesebwa Baibuli kandi abamu kibetaagisa kulinda kuhikya obubaratunga omu h’Abakaiso ba Yahwe arabeegesa! Baitu omu biikaro ebindi, abatebezi  kibagumira muno kukora omulimo gw’okutebeza; abantu tibakira kuba omu maka gaabo, kandi naabo ababa basangirwe omu ka baba batarukugonza kumanya ebya Baibuli.

⁴ Obworaaba n’oikara omu kicweka nambere kigumire kutebeza, amagezi agahairwe omu kicweka kinu nigasobora kukukonyera. Nitwija kubazaaho ebintu abatebezi abamu bakozere kusobora kuhikaho abantu baingi omu buheereza. Kandi nitwija kurora habwaki nitusobora kwikara twine entekereza ey’ehikire, abantu n’obubarahuliiriza obutumwa bwaitu rundi bakabwanga.

5. Bizibu ki Abakaiso ba Yahwe baingi ebibatangatangana?

⁵ Abakaiso ba Yahwe nikyeyongera kubagumira kubaza n’abantu abali omu maka gaabo. Abatebezi abamu nibaikara omu biikaro ebirumu ebyombeko ebiroho obulinzi bw’amaani rundi ebiri omu bisagaati. Ha mulyango gw’ebisagaati nihasobora kuba haroho omulinzi ow’atarukwikiriza omuntu ondi wena kutaahamu ataine orusa kuruga ha muntu arukwikara omunda. Abatebezi abandi nibasobora kugenda nju ha nju hataroho kyona ekirukubalemesa, baitu omu maka basangayo abantu bake. Abandi batebeza omu byaro rundi omu biikaro nambere abantu benaganagire kandi bali bake. Abatebezi nibasobora kurubata orugendo oruraihire muno kusobora kutebeza omuntu omu​—kandi obundi nibasanga n’omuka ataliyo! Obuturaaba nitutebeza omu biikaro nka binu titusemeriire kuhwamu amaani. Kiki ekitusemeriire kukora kusingura ebizibu nka binu kandi tukatebeza abantu baingi?

6. Abatebezi nibasisana bata abasohi?

⁶ Yesu akalengesaniza omulimo gw’okutebeza n’omulimo ogukorwa omusohi. (Mar. 1:17) Abasohi abamu nibasobora kumara ebiro bingi nibasoha batakakwasire encu n’emu. Baitu tibaleka kusoha; oihireho bahindahinduramu. Bahindura obwire, ekiikaro rundi emiringo eibarukukozesa kusoha. Nitusobora kukora empindahinduka nka zinu omu buheereza bwaitu. Katwetegereze ebintu ebimu ebitusobora kukora.

7. Kiki ekisobora kubaho kakuba tutebeza omu bwire oburukwahukana?

⁷ Lengaho kuhikirra abantu omu bwire obundi. Nitwija kutebeza baingi kakuba tutebeza omu bwire obubakira kuba bali omu maka gaabo. N’obukiraaba ngu abantu bamara obwire batali omu maka gaabo, bahika bataaha! Ab’oruganda na banyaanya itwe baingi bakisangire ngu kibanguhira kutebeza omu bwire bwa nyamusana rundi rwebagyo habwokuba nubwo basanga abantu baingi omu maka. Ekindi, omu bwire obu abantu baba batekaine kandi betegekere kubaza. Rundi n’osobora kulengaho kukora ekintu omugurusi w’ekitebe arukwetwa David eky’akora. Nagamba ngu hanyuma y’okutebeza omu kiikaro kumara esaaha emu rundi ibiri, uwe n’omutebezi ondi bagaruka ha maju nambere batasangire omuntu. Nagamba ati, “Kimpuniiriza ngu tusanga abantu baingi bali omu maka obutugarukayo omurundi gwakabiri.” *

8. Nitusobora tuta kiteeka omu nkora amagezi agali omu Omugambizi 11:6 omu buheereza bwaitu?

⁸ Titusemeriire kujwaha. Kinu nikyo turukwega kuruga omu kyahandiikirwe ekyebembiire ekicweka kinu. (Soma Omugambizi 11:6.) David, outusangirwe tubalizeeho atajwahe. Ha nju emu akamara yasangaho omusaija hanyuma y’okulengaho emirundi nyingi atarukusangaho omuntu. Omusaija onu akaba n’agonza kumanya ebirukukwata ha Baibuli kandi akagamba ati, “Nyikaire hanu kumara  emyaka munaani baitu tinkaroraga Abakaiso ba Yahwe baizire ha mulyango gwange.” David nagamba ati, “Nkyetegeriize ngu obwohikirra abantu omu maka gaabo, bakira kuhuliiriza obutumwa obututebeza.”

9. Bintu ki Abakaiso ba Yahwe abamu ebibakozere kusobora kuhikaho abantu abatanguhire kusanga omu maka?

⁹ Lengaho kutebeza omu biikaro ebirukwahukana. Kusobora kuhikaho abantu abatanguhire kusanga omu maka gaabo, abatebezi abamu kibetagisize kuhindura ekiikaro ekibatebezaamu. Ekyokurorraho, kutebeza ha nguudo, hamu n’okukozesa obugaali bikonyire kutebeza abo abaikara omu byombeko nambere kutebeza okw’enju ha nju kutarukwikirizibwa. Kinu kikonyera Abakaiso ba Yahwe kubaza maiso h’amaiso n’abantu abarukwikara omu byombeko ebi. Ekindi, abatebezi baingi bakizoire ngu abantu bagonza kubaza naitwe rundi kwikiriza ebitabu byaitu obubaba bali omu biikaro eby’okuhumurramu ebirumu abantu baingi, bali omu butale rundi omu biikaro eby’obusuubuzi. Floiran, omurolerezi w’ekicweka kuruga Bolivia, nagamba ati: “Tugenda kutebeza omu butale n’omu biikaro eby’obusuubuzi hagati ya saaha 7:00 na 9:00 eza nyamusana, obwire nambere abasuubuzi baba bataine eby’okukora bingi. Bakira kutuhuliiriza kandi tutandikaho n’abeegi ba Baibuli.”

10. Miringo ki ey’osobora kukozesa kutebeza abantu?

¹⁰ Lengaho emiringo y’okutebeza erukwahukana. Katugambe olengereho emirundi erukwahukana kuhikirra omuntu. Omubungiire omu bwire oburukwahukana baitu nabwo tomusangire omuka. Haroho emiringo endi ey’esobora kukukonyera kutebeza omuntu nk’ogu? Katarína, nagamba ati: “Abo abantasanga omu ka mbahandikira amabbaruha, nimbagambira  byonyini ebinakubagambiire obunakubarozere maiso ha maiso.” Eki nikitwegesa ki? Omu buheereza bwawe, lengaho kukozesa emiringo erukwahukana kuhikaho buli muntu omu kicweka kyawe.

11. Habwaki abantu abamu batagonza kuhuliiriza obutumwa bwaitu?

¹¹ Abantu abamu tibagonza kuhuliiriza obutumwa bwaitu. Batekereza ngu tibarukwetaaga kumanya eburukukwata hali Ruhanga rundi Baibuli. Tibaikiririza omuli Ruhanga habwokuba nibarora okubonabona okwijwire omu nsi. Banga Baibuli habwokuba barora obugobya obuli omu bebembezi b’ediini abefoora ngu niborobera ebiri omu Baibuli. Abandi baikara nibatekerezaaho emirimo yabo, amaka gaabo hamu n’ebizibu byabo kandi balemwa kurora omulingo Baibuli esobora kubakonyera. Nitusobora tuta kwikara twine okusemererwa n’obukiraaba ngu abantu turukutebeza nibarora obutumwa bwaitu nk’obutali bw’omugaso?

12. Ebigambo ebiri omu Abafiripi 2:4 nibisobora kutukonyera bita omu buheereza bwaitu?

¹² Yoleka ngu n’ofaaho abandi. Baingi abakaba batarukugonza kuhuliiriza obutumwa bwaitu, bakahika baahuliiriza obubakyetegeriize ngu haroho omutebezi arukubafaaho. (Soma Abafiripi 2:4.) Ekyokurorraho, David, outusangirwe tubalizeeho nagamba ati: “Omuntu obw’agamba ngu tarukugonza tumutebeze, twahura Baibuli hamu n’ebitabu byaitu, hanyuma tumukaguza tuti: ‘Boojo habwaki noyehurra oti?’” Abantu bakirora obutwoleka ngu nitubafaaho. Nibasobora kwebwa ebintu byonyini ebitwabagambiire, baitu nibasobora kwikara nibaijuka omulingo twayolekere ngu nitubafaaho. N’obukiraaba ngu abaturukugenda kutebeza nibasobora kutatwikiriza kugira ekitwabaza, nitusobora kwoleka ngu nitubafaaho kurabira omu mulingo turukwetwazaamu n’okubooleka obunywani.

13. Nitusobora tuta kuhindahinduramu obutumwa bwaitu bukahikaana n’ebyetaago by’omuntu turukutebeza?

¹³ Twoleka ngu nitufaaho omuntu obutuhinduramu obutumwa bwaitu tukabazaaho ebyetaago bye rundi ebintu ebyarukugonza. Ekyokurorraho, haroho ekintu kyona ekirukwoleka ngu aine abaana? Abazaire nibasobora kuba nibagonza kumanya obuhabuzi kuruga omu Baibuli oburukukwata ha kukuza kurungi abaana rundi omulingo basobora kuba n’eka ey’erumu okusemererwa. Ha milyango haroho kufuro nyingi? Nitusobora kubazaaho obucwi bw’ebiragiro n’omulingo buletiire abantu kutiina. Outurukutebeza nasobora kusemererwa kukimanya ngu obucwi bw’ebiragiro nibwija kuhweraho kimu. Buli murundi otunga abantu abarukugonza kuhuliiriza, lengaho kubakonyera kwetegereza omulingo obuhabuzi bwa Baibuli  busobora kubagasira. Katarína, outusangirwe tubalizeeho nagamba ati: “Ntekerezaaho omulingo Baibuli enkonyire kuba n’obwomeezi oburungi.” Nahabweki, Katarína abaza n’obutagasi kandi abarukumuhuliiriza bakirora ngu ebyarukubaza nabigumiza kimu.

14. Kusigikirra ha Enfumo 27:17, abarukutebeza hamu nibasobora bata kukonyerangana?

¹⁴ Tunga obukonyezi kuruga h’abantu abandi. Omu kyasa eky’okubanza, Paulo akegesa Timoseo kutebeza n’okwegesa, kandi akatererra Timoseo na uwe kwegesa abandi omu mulingo nugwo gumu. (1 Kol. 4:17) Nka Timoseo, naitwe nitusobora kwegera h’abantu abali omu kitebe abamazire akasumi nibaheereza. (Soma Enfumo 27:17.) Tekerezaaho ekyokurorraho eky’ow’oruganda arukwetwa Shawn. Kumara akasumi, akaba naheereza nka payoniya omu kyaro nambere abantu abarukukira obwingi baali nibamarwa ediini yabo. Kiki ekyamukonyire kwikara aine okusemererwa? Nagamba ati: “Obukyabaga kisobokere, natungaga omuntu ow’okutebeza na uwe. Obutwabaga nituruga ha nju emu kugenda ha nju endi twakozesaaga obwire obu kukonyerangana n’okwongera ha bukugu bwaitu obw’okwegesa. Ekyokurorraho, twabazaahoga oututebiize eby’abalize n’omulingo tumugarukiremu. Hanyuma twabazaahoga ekitusobora kukora kakuba tuhika ha muntu ondi akabaza ekintu nikyo kimu.”

15. Habwaki kikuru kusaba omu buheereza bwaitu?

¹⁵ Saba Yahwe akukonyere. Saba Yahwe obukonyezi buli murundi orukugenda kutebeza. Kakuba tuba tutaine obukonyezi bw’omwoyo ogurukwera, busaho n’omu omuliitwe ayakusoboire kukora ekintu kyona. (Zab. 127:1; Luk. 11:13) Obworaaba n’osaba Yahwe kukukonyera, mugambire kiki kyonyini ekyorukugonza akukorre. Ekyokurorraho, musabe akukonyere kuhika hali abo boona abarukugonza kumwegaho kandi abetegekere kuhuliiriza. Hanyuma okorre ha kusaba kwawe obu notebeza buli muntu oworatangatangana.

16. Habwaki tusemeriire kwesomesa obuturaaba nitugonza kuhikiriza kurungi obuheereza bwaitu?

¹⁶ Tunga obwire obw’okwesomesa. Baibuli egamba ngu: “Mwerorre inywenka Ruhanga ebyagonza okubiri ebirungi ebisemiire, ebihikiriire.” (Bar. 12:2) Obutwesomesa tweyongera kumanya Ruhanga, kandi obutuba tuli omu buheereza abaturukutebeza bakirora ngu mali ebiturukubaza nitubigumya. Katarína, outusangirwe tubalizeeho nagamba ati: “Enyumaho nkakyetegereza ngu nsemeriire kugumya okwikiriza kwange omu zimu ha nyegesa za Baibuli ezirukubandirizibwaho. Nahabweki n’obwegendereza bwingi, nkesomesa obwakaiso oburukwoleka ngu haroho Omuhangi, Baibuli mali Kigambo kya Ruhanga kandi nk’oku Yahwe aine ekitebe ekyarukukozesa omu kasumi kanu.” Katarína nagamba ngu kwesomesa kukamukonyera kugumya okwikiriza kwe kandi kyamuletera kweyongera kutunga okusemererwa omu buheereza.

17. Habwaki Yesu yaikaire aine entekereza ey’ehikire omu buheereza bwe?

¹⁷ Yesu akaikara aine entekereza ey’ehikire n’obukiraaba ngu abamu tibagonzaaga kuhuliiriza obutumwa bwe. Habwaki? Habwokuba akaba akimanyire nk’oku abantu barukwetaaga kumanya amananu, kandi akaba n’agonza kukonyera abantu baingi nk’oku kirukusoboka. Kandi akaba akimanyire ngu abamu abaayangire kuhuliiriza ha kubanza baakuhikire bahuliiriza. Tekerezaaho ekyabaireho ha ka y’owabu. Omu myaka esatu n’ekicweka Yesu eiyamazire natebeza, busaho n’omu h’abagenzi aboojo ayafookere omwegeswa we. (Yoh. 7:5) Baitu, hanyuma ya Yesu kuhumbuuka, bakafooka Abakristaayo.​—Eng. 1:14.

18. Habwaki twikara nitutebeza?

 ¹⁸ Titumanyire nibaha abarafooka baheereza ba Yahwe. Abantu abamu kibatwara akasumi kusobora kwega amananu. Naabo abanga kutuhuliiriza, obubarora engeso zaitu enungi hamu n’entekereza yaitu ey’ehikire, nikisobora kubaletera kutandika ‘kunyumiza Ruhanga.’​—1 Pet. 2:12.

19. Kusigikirra ha 1 Abakolinso 3:6, 7, kiki ekitusemeriire kwijuka?

¹⁹ N’obukiraaba ngu tubyara kandi tuseserra amaizi, tusemeriire kwijuka ngu Ruhanga nuwe ameza. (Soma 1 Abakolinso 3:6, 7.) Ow’oruganda Getahun, arukwikara omu Ethiopia, nagamba ati: “Kumara emyaka erukuhingura omu 20, ninyowe nyenka akaba ali Omukaiso wa Yahwe omu kiikaro kyaitu. Baitu hati omu kiikaro kinu tuli batebezi 14. Ikumi na basatu nubo babatiziibwe, otwaliremu mukazi wange n’abaana bange basatu. Abantu abarukuhika nka 32 nubo bakira kwija omu nsorrokano.” Getahun aine okusemererwa habwokuba akagumizaamu n’atebeza kandi akalindirra Yahwe kuleta abantu abaine emitima emirungi omu kitebe!​—Yoh. 6:44.

20. Nitusisana tuta n’abantu abarukujuna abandi abali omu kabi?

²⁰ Abantu boona b’omuhendo omu maiso ga Yahwe. Atuhaire omugisa ogw’okukorra hamu n’Omwana we kusorooza abantu kuruga omu mahanga goona empero y’obusinge bunu etakahikire. (Hag. 2:7) Omulimo gwaitu ogw’okutebeza gusobora kulengesanizibwa n’omulimo gw’okujuna abantu abali omu lyato erirukudikira. N’obukiraaba ngu abantu bake basobora kukiraho, boona ababa bejumbiire omu mulimo gunu b’omugaso. Nikyo kimu n’omulimo gwaitu ogw’okutebeza. Titumanyire nibaha abarukwija kujunwa kuruga omu nsi ya Sitaani. Baitu Yahwe n’asobora kukozesa buli omu haliitwe kubakonyera. Ow’oruganda Andreas, arukwikara omu Bolivia, n’agamba ati: “Buli muntu wena aw’ayega amananu kandi akabatizibwa nkyetegereza ngu kinu kisobokere habwokuba abantu baingi bakwataniize hamu.” Leka naitwe twikale twine entekereza nk’egi ey’ehikire ha buheereza bwaitu. Obuturakora tuti, Yahwe naija kutuha emigisa kandi obuheereza nibwija kutuletera okusemererwa kwonyini.