1-2. Nyikara ki ezigumire baingi ezibarukurabamu?

OMUKWENDA Paulo akekambisa Timoseo, otwaliiremu n’Abakristaayo boona kuhikiriza kurungi obuheereza bwabo. (2 Tim. 4:5) Nahabweki obuhabuzi bwa Paulo bukuru hali itwe. Baitu obwire obumu kiguma. Ab’oruganda na banyaanya itwe baingi batiina kwejumbira omu mulimo gw’okutebeza. (2 Tim. 4:2) Ekyokurorraho, ab’oruganda abamu nibaikara omu biikaro nambere omulimo gwaitu gutangirwe. Baikara nibatebeza n’obukiraaba ngu bakimanyire nibasobora kuteekwa omu nkoma!

² Abaheereza ba Yahwe bahikwaho ebizibu bingi ebisobora kubamaramu amaani. Ekyokurorraho, baingi bakora kumara esaaha nyingi kusobora kuhikyaho ab’omu maka gaabo ebyetaago. Baakugondeze kukora ekirukukiraho omu buheereza, baitu baba bajwahire ha kumalirra kwa wiiki. Abandi tibasobora kukora bingi habwokuba baine oburwaire obutarukukira rundi bakuzire omu myaka; kandi nibasobora kuba bataruga omu maka gaabo. Abandi bakira kwehurra ngu tibali b’omugaso. Munyaanya itwe arukwetwa Mary, * nagamba ati: “Kinyetaagisa kuteekamu amaani maingi muno kurwanisa enyehurra zange embi kandi kinu kindetera kujwaha muno. Hanyuma nyecwera omusango habwokuba kintwarra obwire n’amaani eganakukozeseze omu buheereeza.”

3. Kiki ekiturukwija kubazaaho omu kicweka kinu?

³ Katube tuli omu nyikara eya mulingo ki, Yahwe n’asobora kutuha amaani agaturukwetaaga kwikara nitumuheereza kusigikirra ha busobozi bwaitu. Tutakabalizeeho omulingo Yahwe asobora kutukonyeramu, katurole omulingo yagarwiremu Paulo na Timoseo amaani kusobora kuhikiriza obuheereza bwabo n’obukiraaba bakatunga ebizibu.

4. Bizibu ki ebyahikireho Paulo?

⁴ Paulo akaraba omu bizibu bingi. Aketaaga amaani, kukira muno omu kasumi obuyatiirwe emiigo, amabaale, n’obuyatairwe omu nkomo. (2 Kol. 11:23-25) Paulo atatiine kugamba ngu obwire obumu akaba aine kuteekamu amaani kurwanisa enyehurra ezitahikire. (Bar. 7:18, 19, 24) Ekindi akaba aine kugumira ekizibu ekikaba kiri “[nk’ihwa] omu mubiri” eky’akaba nagonza Ruhanga amwiheho.​—2 Kol. 12:7, 8.

5. Bintu ki Paulo ebiyasoboire kukora n’obukiraaba ngu akaba aine ebizibu?

⁵ Yahwe akaha Paulo amaani kusobora kuhikiriza obuheereza bwe n’obukiraaba ngu akaba aine ebizibu bingi. Tekerezaaho ebintu Paulo y’asoboire kukora. Ekyokurorraho, obwakaba asibiirwe omu nju nk’omunyankomo omu Roma​—akekamba kutebeza amakuru amarungi hali abebembezi ba Bayudaaya kandi obundi na hali abakuru ba gavumenti. (Eng. 28:30, 31; Baf. 1:13) Omu kasumi nukwo kamu, Ruhanga akakozesa Paulo kuhandiika amabbaruha agakonyire Abakristaayo abaakara n’ab’omu kasumi kanu. Ekindi, ekyokurorraho kya Paulo, kikagumya Abakristaayo ab’omu kitebe kya Roma, kandi kinu kyabaletera kutunga obumanzi bayeyongera “okuguma muno okugamba ekigambo kya Ruhanga okutatina.” (Baf. 1:14) N’obukiraaba ngu Paulo akaba atasobora kuheereza nk’oku yakugondeze, akakozesa kurungi enyikara ey’akaba arumu, kandi kinu kikarugirramu amakuru amarungi kurarangibwa.”​—Baf. 1:12.

6. Kusigikirra ha 2 Abakolinso 12:9, 10, kiki ekyasobozeseze Paulo kuhikiriza kurungi obuheereza bwe?

⁶ Paulo akakyetegereza ngu buli kimu kyona ekiyakozere omu kuheereza Ruhanga atakikole habw’amaani ge baitu habw’amaani ga Yahwe. Akagamba ngu amaani ga Ruhanga “nigahikirra omu [buceke].” (Soma 2 Abakolinso 12:9, 10.) Kurabira omu mwoyo gwe ogurukwera, Yahwe akaha Paulo amaani kusobora kuhikiriza kurungi obuheereza bwe​—n’obukiraaba ngu akahiiganizibwa, y’ateekwa omu nkomo kandi y’atunga n’ebizibu ebindi.

7. Bizibu ki Timoseo eby’akaba aine ebyakumuletiire kulemwa kuhikiriza kurungi obuheereza bwe?

⁷ Timoseo ow’akaba ali munywani wa Paulo omuto, na uwe akesiga amaani ga Ruhanga kusobora kuhikiriza kurungi obuheereza bwe. Timoseo yasendekerezaaga Paulo ha ngendo ze eziraihire ez’obumiisani. Ekindi, Paulo akamutuma ha omu biikaro ebindi kubungira ebitebe  n’okubigarramu amaani. (1 Kol. 4:17) Timoseo n’asobora kuba yayehuliire nk’atarukusobora. Obundi enu niyo ensonga habwaki Paulo yamutereriire ati: “Omuntu wena aleke okugaya obusigazi bwawe.” (1 Tim. 4:12) Ekindi, omu kasumi ako, Timoseo na uwe akaba aine ihwa lye omu mubiri​—‘ery’okurwararwara.’ (1 Tim. 5:23) Baitu Timoseo akaba akimanyire ngu omwoyo gwa Yahwe ogurukwera nigwija kumuha amaani agarukwetaaga kusobora kutebeza amakuru amarungi n’okuheereza Abakristaayo bagenzi be.​—2 Tim. 1:7.

8. Yahwe agumya ata abantu be kasumi kanu?

⁸ Kasumi kanu, Yahwe aheereza abantu be “amani agali amaingi muno” nukwo baikale nibamuheereza n’obwesigwa. (2 Kol. 4:7) Leka tubazeeho ebintu bbina Yahwe eby’atuha kutugumya n’okutukonyera kwikara tuli besigwa hali uwe: okusaba, Baibuli, kumara obwire n’Abakristaayo bagenzi baitu, hamu n’obuheereza.

9. Okusaba kusobora kutukonyera kuta?

⁹ Okusaba kutugumya. Nk’oku kyolekerwe omu Abefeso 6:18, Paulo natwekambisa ‘kusabaga bwona’ hali Ruhanga. Ruhanga naija kugarukamu okusaba kwaitu kurabira omu kutuha amaani. Ow’oruganda Jonnie, arukwira omu Bolivia, akarora omulingo Yahwe y’amukonyiremu obuyatungire ebizibu ebirukwahukana. Mukazi we hamu n’abazaire be bakarwara muno ha murundi gumu. Jonnie kikamugumira kuhikyaho boona basatu ebyetaago byabo. Nyina akafa, kandi kikatwara akasumi kaingi mukazi we hamu na ise kusobora kukira. Jonnie obwarukwijuka ebyabaireho, nagamba ati, “Obunayeralikirraga muno, ekyakiraga kunkonyera nukwo kugambira Yahwe byonyini ebiri ha mutima gwange kuraba omu kusaba.” Yahwe akaheereza Jonnie amaani ag’akaba nayetaaga kusobora kugumiisiriza. Ronald, omugurusi w’ekitebe kuruga Bolivia, akakimanya ngu nyina akaba aine kansa. Kandi hanyuma y’okwezi kumu nyina akafa. Kiki ekyamukonyire kuguma? Nagamba ati: “Kusaba Yahwe kinkonyera kumugambira byona ebiri ha mutima gwange hamu n’enyehurra yange. Nkimanyire nanyetegereza kurungi kukira omuntu ondi wena.” Obwire obumu, nitusobora kwehurra ngu ebizibu bituhinguraineho kandi tukalemwa n’okumanya eby’okugambira Yahwe omu saara zaitu. Baitu Yahwe n’agonza tumusabe n’obukitugumira kumusoborra omulingo turukwehurramu.​—Bar. 8:26, 27.

10. Nk’oku kyolekerwa omu Abaheburaniya 4:12, habwaki kikuru kusoma Baibuli n’okugyecumitirizaaho?

¹⁰ Baibuli etukonyera kuguma. Paulo akasoma Ebyahandiikirwe kusobora kugarurwamu amaani n’okuhumuzibwa, kandi naitwe nikyo tusemeriire kukora. (Bar. 15:4) Obutusoma Baibuli kandi tukagyecumitirizaaho, Yahwe n’asobora kutukonyera kurora omulingo esobora kutukonyeramu. (Soma Abaheburaniya 4:12.) Ronald, outusangirwe tubalizeeho, nagamba ati: “Nyine okusemererwa habwokuba nyekamba kusoma Baibuli buli rwebagyo. Nyecumitirizaaho muno emiringo ya Yahwe hamu n’omulingo ogw’okugonza ogw’atwazaamu abantu. Kinu kinkonyera kugarukwamu amaani.”

11. Baibuli ekagumya eta munyaanya itwe ow’akaba aine obusaasi?

¹¹ Obutwecumitirizaaho Ekigambo kya Ruhanga kitukonyera kuba n’entekereza ey’ehikire ha bizibu byaitu. Tekerezaaho omulingo Baibuli yagasiire omufaakati omu. Omugurusi w’ekitebe akamugambira ngu naija kutunga amasomo agaramugasira kakuba asoma ekitabu kya Yobu. Obuyakikozere akabanza kucwera Yobu omusango habw’entekereza ye  ey’etahikire. Akateeramu akasisani n’amugambira ngu: “Yobu! Leka kuba n’entekereza ey’etahikire!” Baitu akyetegereza ngu na uwe entekereza ye ekaba n’esisana nk’eya Yobu. Kinu kikamukonyera kuhindura entekereza ye kandi yatunga amaani ag’okugumira obusaasi obw’okufeerwa iba.

12. Yahwe akozesa ata Abakristaayo bagenzi baitu kutugumya?

¹² Atugumya kurabira omu Bakristaayo bagenzi baitu. Omulingo ogundi, Yahwe ogw’akozesa kutugumya nukwo kurabira omu b’oruganda na banyaanya itwe. Paulo akahandiika nagamba ngu akaba aine ekihika eky’okugarramu Abakristaayo bagenzi be amaani kandi nabo kugamugarramu. (Bar. 1:11, 12) Mary, outusangirwe tubalizeeho agonza kuba hamu n’ab’oruganda na banyaanya itwe. Nagamba ati: “Yahwe akozeseze ab’oruganda na banyaanya itwe abakaba batamanyire ebizibu byange. Bakangambira ebigambo ebirukugarramu amaani, bansindikira kaadi, kandi eki kyonyini nikyo nkaba ninyetaaga. Kinkonyera kubaza na banyaanya itwe abandi abaine ebizibu nk’ebyange hamu n’okwegera ha bintu eby’abakonyire. Kandi n’abagurusi b’ekitebe bandetera kwehurra ngu ndi w’omugaso muno omu kitebe.”

13. Nitusobora tuta kugarramungana amaani obuturukuba tuli omu nsorrokano?

¹³ Kimu ha biikaro ebirukukirayo oburungi nambere tusobora kugarramungana amaani nuho omu nsorrokano. Obwoija omu nsorrokano, n’osobora kulengaho kugarramu abandi amaani kurabira omu kubagambira ngu n’obagonza kandi n’okubasiima habw’ebibarukukora. Ekyokurorraho, orusorrokano oburukaba rutakatandikire, omugurusi omu arukwetwa Peter akagambira munyaanya itwe ow’aine iba ow’atali omu h’Abakaiso ba Yahwe ati: “Nikigarramu muno amaani kukurora hanu. Oija n’abaana baawe mukaaga boona bajwaire kurungi kandi boona baine eby’okugarukamu.” Munyaanya itwe akakwatwaho n’amaziga gamwija omu maiso kandi yagamba ati: “Eki nikyo mbaire ninyenda omuntu angambire kiro kinu.”

14. Kwejumbira omu mulimo gw’okutebeza kitukonyera kita?

¹⁴ Obuheereza butugumya. Obututebeza abandi amananu agali omu Baibuli tuhumuzibwa kandi tugarukwamu amaani, kababe baikiriize rundi nangwa. (Nfu. 11:25) Munyaanya itwe arukwetwa Stacy akarora omulingo obuheereza bugarramu amaani. Omu ha b’omu ka ye obuyabingirwe omu mananu akasalirwa muno kandi akaikara nayekaguza ati, ‘Haroho ekirukukiraho ekinakukozere kumukonyera?’ Stacy kikamugumira muno kuleka kutekerezaaho ekizibu eki. Kiki ekyamukonyire kugumira enyikara enu eyamuleterega kwetuntura muno? Obuheereza! Obuyatandikire kutebeza, omutima akaguteeka h’abantu abarukwetaaga obukonyezi bwe omu buheereza. Nagamba ati: “Omu kasumi ako, Yahwe akampa omwegi wa Baibuli ayakurakuraine bwangu. Eki kikangarramu muno amaani. Ekintu ekyakizireyo kunkonyera kutekaana nukwo kwejumbira omu mulimo gw’okutebeza.”

15. Kiki ekyorukwega kuruga omu bigambo bya Mary?

¹⁵ Abamu nibasobora kutekereza ngu tibarukukora muno omu buheereza, habw’enyikara ezibarumu. Obworaaba n’oyehurra oti, ijuka ngu Yahwe asemererwa obwokora ekyorukusobora. Yongera otekerezaaho ekyokurorraho kya Mary. Obuyagenzere kutebeza omu kiikaro nambere barukubaza orulimi orundi, akehurra nk’ataine mugaso. Nagamba ati, “Kumara akasumi, ekintu kyonka ekinkaba ninsobora kukora kyali kuhayo eky’okugarukamu ekigufu, rundi kusoma ekyahandiikirwe, rundi kuheereza omuntu turakiti.” Kinu kikamuletera  kwehurra nkataine ekyarukukora kakuba olengesaniza naabo abakaba bamanyire kurungi orulimi. Baitu, akahindura entekereza ye. Akatandika kukyetegereza ngu n’obwaraaba atarukumanya kurungi orulimi, Yahwe n’asobora kumukozesa. Nagamba ati, “Amananu agali omu Baibuli ganguhire kugetegereza, kandi nugo gahindura obwomeezi bw’omuntu.”

16. Kiki ekisobora kukonyera abo abatasobora kuruga omu maka gaabo kugarukwamu amaani?

¹⁶ Yahwe akimanyire ngu bamu hali itwe tugonza muno kutebeza baitu titusobora kuruga omu maka gaitu. Nahabweki n’asobora kutukonyera kutebeza abo abaturolerra, badakitaali hamu na banaasi. Kakuba tulengesaniza obuheereza bwaitu obw’akasumi kanu hamu n’obwa kara, nitusobora kuhwamu amaani. Baitu kakuba tumanya omulingo Yahwe arukutukonyeramu hati, nitwija kutunga amaani ag’okugumira buli kirengo twine okusemererwa.

17. Kusigikirra ha Omugambizi 11:6, habwaki tusemeriire kugumizaamu nitutebeza, n’obuturukuba tutarozere ebirungi ebirukurugamu aho naaho?

¹⁷ Titumanyire embibo ey’amananu eitubyara ey’esobora kumera kandi ekatandika kukura. (Soma Omugambizi 11:6.) Ekyokurorraho, munyaanya itwe arukwetwa Barbara, anyakuli omu myaka 80, atebeza butoosa n’akozesa esimu n’okuhandiika amabbaruha. Omu bbahasa emu eiyasindikire, akatekamu Watchtower eya Maaci 1, 2014, enyakwine omutwe “Ruhanga Ekyakukoliire.” Atamanye ngu ebbaruha enu, akagisindikira omusaija na mukazi we abakaba babingirwe omu kitebe. Bakasoma magaziini enu kandi baikara nibagigarukamu. Omusaija akehurra oti rundi Yahwe wenyini nuwe akaba n’abaza nauwe. Omusaija onu na mukazi we bakatandika kwija omu nsorrokano kandi bayongera bafooka Abakaiso ba Yahwe hanyuma y’okumara emyaka erukuhingura omu 27. Barbara akagarukwamu amaani habw’okurora ebirungi ebyarugire omu kuhandiika ebbaruha egi!

18. Ruhanga kusobora kutugarramu amaani, kiki ekitusemeriire kukora?

¹⁸ Yahwe atuteriireho emiringo nyingi ey’etukonyera kutunga amaani ge amaingi. Obutukozesa ebintu ebyatuhaire ​—nk’okusaba, Baibuli, Abakristaayo bagenzi baitu n’obuheereza​—twoleka ngu nitwesiga obusobozi bwa Yahwe kandi ngu n’agonza kutukonyera. Nahabweki leka twikalege nitwesiga Isiitwe ow’omu iguru, ow’agonza “kwoleka amaani ge habw‘abo abaine omutima oguhikiriire nambere ali.”​—2 Byom. 16:9, NW.