1-2. Habwaki Ebyahandiikirwe ebimu nibisobora kweyongera kuba by’omugaso haliitwe enyikara yaitu obwehinduka?

 OW’ORUGANDA na munyaanya itwe obubaba nibagaitwa, omugurusi akira kubaha orubazo orukusigikirra ha Baibuli orukukwata ha buswere. Emisingi ey’ebazibwaho omu rubazo oru eba etali mpyaka halubo. Baitu kutandika n’ekiro eki, emisingi egi ey’eyongera kuba y’omugaso halibo. Habwaki? Habwokuba nibaija kwetaaga kuteeka emisingi egi omu nkora omu buswere bwabo.

² Nikyo kimu ekibaho ow’oruganda na munyaanya itwe obubafooka bazaire. Kumara emyaka, nibasobora kuba baikaire nibahuliiriza embazo nyingi ezirukukwata ha kukuza abaana. Baitu hati habwokuba baine omwana oubasemeriire kukuza, obuhabuzi obu nibwija kweyongera kufooka bw’omugaso muno halibo. Obu bujunanizibwa bw’amaani! Nahabweki enyikara obwehinduka omu bwomeezi bwaitu, Ebyahandiikirwe ebimu byeyongera kuba by’omugaso muno omu bwomeezi bwaitu. Enu niyo ensonga habwaki Abakaiso ba Yahwe basoma Ebyahandiikirwe, kandi nk’oku abakama ba Isaleri baragiirwe, nabo babyecumitirizaaho ‘ebiro byona’ eby’obwomeezi bwabo.​—Bir. 17:19.

3. Nitugenda kubazaaho ki omu kicweka kinu?

³ Abazaire, mwine omugisa ogw’amaani nk’Abakristaayo ogw’okwegesa abaana banyu ebirukukwata hali Yahwe. Baitu timurukugonza kugarukira ha kubegesa amananu kyonka, nimugonza n’okubakonyera kugonza muno Yahwe. Kiki ekimusobora kukora kukonyera abaana banyu kugonza Yahwe? Omu kicweka kinu, nitugenda kubazaaho emisingi ena kuruga omu Baibuli ey’esobora kukonyera inywe abazaire. (2 Tim. 3:16) Nitwija  n’okurora omulingo abazaire abamu bagasiirwe habw’okuteeka omu nkora obuhabuzi bunu.

4. Musingi ki ogumu ogusobora kukonyera abazaire kukonyera abaana baabo kugonza Yahwe kuruga ha mutima? (Yakobo 1:5)

⁴ Omusingi 1: Muserre obuhabuzi kuruga hali Yahwe. Musabe Yahwe kubaha amagezi agamurukwetaaga kukonyera abaana banyu kumugonza kuruga ha mutima. (Soma Yakobo 1:5.) Nuwe arukukirrayo kimu kuha obuhabuzi oburungi. Haroho ensonga nyingi habwaki nitugamba tuti. Leka tubazeeho ensonga ibiri. Ey’okubanza, Yahwe nuwe amazire akasumi akarukukira obwingi ali omuzaire. (Zab. 36:9) Eyakabiri, obuhabuzi obwaha, buli kaire burugamu ebirungi byonka.​—Is. 48:17.

5. (a) Bintu ki kuruga omu kitebe kya Yahwe ebisobora kukonyera abazaire kukuza abaana baabo? (b) Kusigikirra ha vidiyo, kiki eky’oyegere kuruga omu mulingo ow’oruganda na munyaanya itwe Amurim baakulizeemu abaana baabo?

⁵ Yahwe aha abazaire obutumwa bwingi kuruga omu Baibuli obusobora kubakonyera kukuza abaana abarukumugonza. (Mat. 24:45) Ekyokurorraho, n’osobora kutunga obuhabuzi oburungi kuruga omu bicweka “Obukonyezi Hali Eka,” ebikaire nibiizira omu Awake! kumara emyaka. Kandi hati ebiri ha mukura gwaitu. Ekindi, vidiyo nyingi eziri ha jw.org nizisobora kukonyera abazaire kuteeka omu nkora obuhabuzi bwa Yahwe obubarukuba nibakuza abaana baabo. *​—Nfu. 2:4-6.

6. Taata omu ayehurra ata ha buhabuzi uwe na mukazi we obubatunga kuruga omu kitebe kya Yahwe?

⁶ Abazaire baingi bolekere okusiima kwabo habw’obukonyezi Yahwe obw’abahaire kurabira omu kitebe kye. Taata arukwetwa Joe nagamba ati: “Kukuliza abaana basatu omu mananu tikyanguhire. Nyowe na mukazi wange tusaba Yahwe butoosa kutukonyera. Kandi emirundi erukukira obwingi twehuliire ngu ekicweka rundi vidiyo eiziire omu bwire bwonyini obuturukugyetagiramu kutukonyera kuraba omu kizibu ekitwine. Obwomeezi bwaitu bwona twikaire nituserra obuhabuzi kuruga hali Yahwe.” Joe na mukazi we bakizoire ngu ebintu nk’ebi bikonyire abaana baabo kwirra haihi na Yahwe.

7. Habwaki kiri kikuru muno abazaire kukora kyona ekibarukusobora kuteeraho abaana baabo ekyokurorraho ekirungi? (Abarumi 2:21)

 ⁷ Omusingi 2: Ba kyokurorraho ekirungi. Abaana betegereza muno abazaire baabo ebibakora kandi bakira kwegera ha kyokurorraho kyabo. Ky’amananu ngu busaho omuzaire ow’ahikiriire. (Bar. 3:23) Baitu, abazaire basemeriire kukora kyona ekirukusoboka kuteeraho abaana baabo ekyokurorraho ekirungi. (Soma Abarumi 2:21.) Taata omu obwakaba nabazaaho abaana, akagamba ati: “Bali nk’omufaalisi ogunyunyuta amaizi goona agagwetoroire.” Nayongeraho ati: “Batugambira obututakora ebintu ebitubeegesa kukora.” Nahabweki, obuturaaba nitugonza abaana baitu kugonza Yahwe, okugonza kwaitu haluwe nikwetaaga kuba kugumire kandi nikweyoleka.

8-9. Kiki eky’oyegere omu bigambo bya Andrew na Emma?

⁸ Haroho emiringo nyingi abazaire eibasobora kukozesa kwegesa abaana baabo kugonza Yahwe. Wetegereze ow’oruganda Andrew ow’aine emyaka 17 ekiyagambire: “Bazaire bange baakiraga kunyegesa ngu kikuru muno kusaba. Buli kiro, ise nyowe yasabaga na nyowe n’obukiraaba ngu nabaga mazire kusaba nyenka. Bazaire bange baakiraga kunyijukya ngu: ‘Nosobora kubaza na Yahwe emirundi nyingi ey’orukugonza.’ Habw’ensonga egi, kusaba kikafooka kintu kikuru muno hali nyowe, hati nikinyanguhira kusaba kandi nyehurra ngu Yahwe ali Ise nyowe arukungonza.” Abazaire, mwikale nimukiijuka ngu okugonza okumwiniire Yahwe nikusobora kukonyera abaana banyu nabo kumugonza.

⁹ Tekerezaaho n’ekyokurorraho kya munyanya itwe Emma. Ise obuyabalekereho, akasigira nyina amabanja maingi ag’okusasura. Emma nagamba ati: “Emirundi erukira obwingi nyina nyowe tiyabaga na sente ezirukumara, baitu yaikaraga nabazaaho omulingo Yahwe afaaho abaheereza be. Nakirorraga kimu ngu obwomeezi bwe nabutwaza kusigikirra ha bintu ebyarukwikiririzaamu. Maama yateekaga omu nkora ebintu ebiyanyegesaaga.” Isomo ki eriturukwega? Abazaire nibasobora kwegesa abaana baabo kurabira omu kubateraho ekyokurorraho ekirungi n’obukiraaba ngu bali omu nyikara ezigumangaine.​—Bag. 6:9.

10. Migisa ki abazaire Abaisaleri eibakaba baine ey’okubaza n’abaana baabo? (Ekyebiragiro 6:6, 7)

¹⁰ Omusingi 3: Baza n’abaana baawe butoosa. Yahwe akaragira Abaisaleri abaakara kwegesa abaana baabo butoosa ebirukumukwataho. (Soma Ekyebiragiro 6:6, 7.) Abazaire abo bakaba baine emigisa nyingi ey’okubaza n’abaana baabo buli kiro kandi n’okubakonyera kugonza Yahwe kuruga ha mutima. Ekyokurorraho, omwojo omu Isaleri n’asobora kuba yamaraga obwire bwingi nakonyera ise kulima rundi kugesa. Baitu mugenzi we omwisiki n’asobora kuba yamaraga obwire bwingi na nakonyera nyina kusona, kuruka, hamu n’okukora emirimo endi ey’omuka. Abazaire n’abaana obu bakorraga hamu, baabaga nibasobora kubazaaho ensonga nyingi enkuru. Ekyokurorraho, baabaga nibasobora kubazaaho oburungi bwa Yahwe hamu n’omulingo aikaire nakonyeramu eka yabo.

11. Mugisa ki gumu abazaire ogubaine ogw’okubaza n’abaana baabo?

¹¹ Obwomeezi hati tibuli nk’obwakara. Omu mahanga maingi, abazaire tibakyamara bwire n’abaana baabo buli kiro. Abazaire nibasobora kuba bali ha mulimo, kandi abaana bali ha isomero. Nahabweki, abazaire basemeriire kulengaho muno kutunga obwire obw’okubaza n’abaana baabo. (Bef. 5:15, 16; Baf. 1:10) Okuramya okw’eka guli mugisa gumu ogubasobora kukozesa. Ow’oruganda omuto Alexander nagamba ati: “Butoosa ise nyowe akora entekaniza  ez’okuramya kw’eka, kandi taikiriza ekintu kyona kutulemesa kumara hamu obwire obu. Hanyuma y’okwega, tutunga obwire obw’okubaza hamu.”

12. Kiki omutwe gw’eka eky’asemeriire kwijuka obwarukuba nayebembera okuramya kw’eka?

¹² Obworaaba oli mutwe gw’eka, n’osobora ota kukonyera abaana baawe kwegondeza omu kuramya kw’eka? Habwaki otasoma n’abaana baawe ekitabu kyaitu ekihyaka ekirungi Wegondeze Omu Bwomeezi Ebiro n’Ebiro! Okwega oku nikwija kukuha omugisa omurungi ogw’okubaza n’abaana baawe. Nogonza abaana baawe bakugambire ebibarukutekereza hamu n’ebiberalikiriize, nahabweki otakozesa obwire bw’okuramya kw’eka kubajumirra rundi kubahana. Kandi lengaho kutabihirwa abaana baawe obubarakugambira ebintu ebitarukwikiranganiza n’emisingi ya Baibuli. Oihireho, basiime habw’okukugambira omulingo gwonyini ogubarukwehurramu kandi obekambise kugumizaamu nibabaza naiwe batarukutiina. Obworamanya omulingo barukwehurramu nubwo oramanya nk’oku osobora kubakonyera kurungi.

13. Migisa ki endi abazaire eibaine eibasobora kukozesa kukonyera abaana baabo kwirra haihi na Yahwe?

¹³ Abazaire, muserre emigisa buli kiro eimusobora kukozesa kukonyera abaana banyu kwirra haihi na Yahwe. Tosemeriire kulinda akaire ak’okubegesa Baibuli nubwo okabegesa hali Ruhanga waitu ow’okugonza. Munyaanya itwe Lisa ow’aine abaana nagamba ati: “Tukakonyera abaana baitu kurora akakwate akali hagati ya Yahwe hamu n’ebintu ebiyahangire. Ekyokurorraho, embwa zaitu obuzakoraga ebintu ebirukuhuniriza ebyaleteraga abaana baitu kuseka, twabagambiraga nk’oku eki kirukwoleka omulingo Yahwe ali Ruhanga ow’asemeriirwe, kandi nk’oku nikisoboka naitwe kutunga okusemererwa n’okwegondeza omu bintu ebirukusekesa.”

14. Habwaki kikuru abazaire kukonyera abaana baabo kuserra abanywani abarungi? (Enfumo 13:20)

¹⁴ Omusingi 4: Konyera abaana baawe kuserra abanywani abarungi. Ekigambo kya Ruhanga nikyolekera kimu ngu, abanywani baitu nibasobora kutukwataho omu mulingo omurungi rundi omubi. (Soma Enfumo 13:20.) Abazaire, mumanyire abanywani b’abaana  banyu? Mwakabaroraga kandi mukamara hamu nabo obwire? Kiki ekimusobora kukora kukonyera abaana banyu kunywana abo abarukugonza Yahwe? (1 Kol. 15:33) Nimusobora kukonyera abaana banyu kutunga abanywani kurabira omu kuraaliza abantu abaine enkoragana enungi na Yahwe kubeteranizaaho kandi n’okumara hamu obwire.​—Zab. 119:63.

15. Kiki abazaire ekibasobora kukora kukonyera abaana baabo kutunga abanywani abarungi?

¹⁵ Tekerezaaho ekyokurorraho kya taata arukwetwa Tony. Nasoborra kiki uwe na mukazi we ekibakozere kukonyera abaana baabo kutunga abanywani abarungi, nagamba ati: “Kumara emyaka nyingi, nyowe na mukazi wange twikaire nituraaliza omu ka yaitu ab’oruganda na banyaanya itwe abakuru n’abato, kandi abarukuruga omu biikaro ebirukwahukana. Tulya nabo ekiihuro kandi batweteranizaaho omu kuramya kwaitu okw’eka. Gunu guli mulingo omurungi gw’okumanya abo abarukugonza Yahwe kandi abarukumuheereza baine okusemererwa. Tutungire omugisa ogw’okuraaliza abaroleerezi b’ebicweka, abamisani, hamu n’abandi omu ka yaitu. Abaana baitu bakeega bingi kuruga omu byokurorraho ebibatugambireho, obwekambi obubayolekere, hamu n’amaani agabateiremu omu kuheereza Yahwe, kandi byona bikabakonyera kwirra haihi na Yahwe.” Abazaire, mucweremu kimu kukonyera abaana banyu kutunga abanywani abarungi.

16. Kiki eky’osemeriire kukora kakuba omwana wawe agamba ngu tarukugonza kuheereza Yahwe?

¹⁶ Kiki eky’osemeriire kukora kakuba omwana wawe agamba ngu takyagonza kuheereza Yahwe n’obukiraaba ngu oteiremu amaani maingi kumukonyera? Otatekereza ngu olemerwe kuhikiriza obujunanizibwa bwawe nk’omuzaire. Itwena otwaliremu n’omwana wawe Yahwe atuhaire obugabe bw’okwecweramu kumuheereza rundi kwanga. Omwana wawe obwaraaba acwiremu kuruga hali Yahwe, otaleka kunihira ngu kiro kimu naija kugaruka haluwe. Ijuka ekyokurorraho eky’omwana ayazahire. (Luk. 15:11-19, 22-24) Omusigazi ogu akakora ebintu bingi ebibi, baitu ha kumalira akagaruka. Abamu nibasobora  kugamba ngu: “Oru rwali ruganikyo kwonka, eki nikisobora kubaho kwo?” Ego, nikisobora kubaho! Amananu gali, eki kyonyini nikyo kyahikire ha musigazi arukwetwa Elie.

17. Ekyokurorraho kya Elie nikikugarramu kita amaani?

¹⁷ Elie nabazaaho abazaire be ati: “Bakakora kyona ekirukusoboka kunkonyera kugonza Yahwe, hamu n’Ekigambo kye Baibuli. Baitu obunkaba nyine emyaka nka 15, nkatandika kujeema.” Elie akatandika kukora ebintu ebitahikire omu nsita, kandi n’abazaire be obubalengereho kumukonyera omu by’omwoyo, akanga. Hanyuma ey’okuruga omu ka, ak’ejumbira omu bikorwa ebibi. Eki n’obukiraaba nukwo kyabaire, obwire obumu yabazaahoga Baibuli n’abanywani be. Elie nagamba ati: “Obunayeyongiire kubaza na munywani wange ebirukukwata hali Yahwe, nkeyongera kutekerezaaho Yahwe. Mpora mpora, ensigo ez’amananu kuruga omu Baibuli zikaba ziri omu mutima gwange, abazaire bange ezibakozere n’amaani kumbyaramu, zikatandika kukura.” Hanyuma y’akasumi, Elie akagaruka omu mananu. * Tekerezaaho omulingo abazaire be basemeriirwe habwokuba kuruga omu buto bakaba balengereho kumwegesa kugonza Yahwe!​—2 Tim. 3:14, 15.

18. Oyehurra ota hali abazaire abakora n’amaani kwegesa abaana baabo kugonza Yahwe?

¹⁸ Abazaire, Yahwe abahaire ekisembo ekirungi muno eky’okukuza abaana abarafooka baheereza be aba nyenkya. (Zab. 78:4-6) Nitubasiima kuruga ha mutima, habw’amaani agamurukutekamu kukonyera abaana banyu! Obumuragumizaamu kukora kyona ekimurukusobora kukonyera abaana banyu kugonza Yahwe kandi n’okubeegesa kumworobera, mukigumye ngu nimwija kusemeza Isiitwe ow’omu iguru ow’okugonza.​—Bef. 6:4.