1. Ncwamu ki enkuru abantu boona ei basemeriire kukora?

 ABANTU kasumi kanu baine encwamu enkuru ei basemeriire kukora. Barasagika Yahwe Ruhanga nk’Omulemi ow’asemeriire kulema obuhangwa bwona, rundi barasagika omunyanzigwa we omukaali Sitaani? Tibasobora kugamba ngu tibaine rubaju orubarasagika. Buli muntu asemeriire kuba aine orubaju orw’arasagika. Encwamu yoona eibarakora, niija kwoleka obubaraaba nibaija kwomeera ebiro n’ebiro rundi nangwa. (Mat. 25:31-33, 46) Omu kasumi ‘ak’omuhito omwingi,’ nibaija kutekwaho akokurorraho ak’okujunwa rundi ak’okuhwerekerra.​—Kus. 7:14; 14:9-11; Ez. 9:4, 6.

2. (a) Ekyahandiikirwe ekiri omu Abaheburaniya 10:35-39 nikitutererra kukora ki? (b) Ekitabu eky’Okusuku’rwa nikisobora kutukonyera kita?

² Soma Abaheburaniya 10:35-39. Obworaaba ocwiremu kusagika obulemi bwa Yahwe, okozere encwamu enungi. Hati naiwe oine ekihika eky’okugonza kukonyera abandi kukora encwamu enungi. Nosobora kukozesa obutumwa obuli omu kitabu eky’Okusuku’rwa kubakonyera. Ekitabu eki ekirungi nikyoleka kiki ekirahika h’abantu abarukuhakaniza Yahwe, baitu nikyoleka n’emigisa abo abarasagika obulemi bwe n’obwesigwa ei baratunga. Tusemeriire kwesomesa amananu ganu ag’omugaso. Obuturakora eki nikiija kutukonyera kweyongera kucweramu kimu kuheereza Yahwe. Ekindi, nitusobora kukozesa ebintu ebitwegere kukonyera abandi kucwamu kuheereza Yahwe kandi n’okwikara nibamuheereza.

3. Biki ebiturukugenda kubazaaho omu kicweka kinu?

³ Omu kicweka kinu, nitugenda kubazaaho ebikaguzo binu: Kiki ekirukwija kuhika hali abo abasagika obulemi bwa  Ruhanga? Kandi, kiki ekirukwija kuhika hali abo abaracwamu kusagika ekisoro ekirukutukura ekirukubazibwaho omu Okusuku’rwa?

4. Omukwenda Yohana akarora guruupu ki enyakuli na Yesu omu iguru?

⁴ Omu kusuku’rwa, omukwenda Yohana arora guruupu ibiri ezirukusagika obulemi bwa Yahwe kandi zoona zitunga omugisa ogw’obwomeezi obutahwaho. Guruupu ey’okubanza iine abantu 144,000. (Kus. 7:4) Batwarwa omu iguru kuruga omu nsi, kukora gavumenti, rundi Obukama bali hamu na Yesu. Bali hamu na Yesu, “nibaija kulema ensi.” (Kus. 5:9, 10, NWT; 14:3, 4) Omu kusuku’rwa, omukwenda Yohana arora bemeriire na Yesu ha Rusozi Sayuni omu iguru.​—Kus. 14:1.

5. Omu kasumi akatali kahara, kiki ekirukwija kuhika h’abaseserweho amagita abakyali bomeezi omu nsi?

⁵ Kurugira kimu omu busumi obw’abakwenda, kuhika kasumi kanu enkumi n’ekumi z’abantu bakomerwe kuba kicweka 144,000. (Luk. 12:32; Bar. 8:17) Omukwenda Yohana agambirwa ngu bake muno, abaija kuba bakyali bomeezi hanu omu nsi, omu biro ebya ha mpero. “Abasigaireho” banu nibaija kutunga “akokurorraho” ak’okumalirra, akarukwoleka ngu Yahwe abasimire omuhito omwingi gutakatandikire. (Kus. 7:2, 3; 12:17) Hanyuma omu kasumi ak’omuhito omwingi, nibaija kutwarwa omu iguru kweteranizaaho abandi abali kicweka kye 144,000, abaafiire bali besigwa. Nibaija kulema hamu na Yesu omu Bukama bwa Ruhanga.​—Mat. 24:31; Kus. 5:9, 10.

6-7. (a) Guruupu ki endi omukwenda Yohana eiyarozere, kandi kiki ekiturukugyegaho? (b) Habwaki abaseserweho amagita abasigaireho ‘n’ab’ekitebe kingi’ basemeriire kugonza kumanya ebiri omu Okusuku’rwa esuura 7?

⁶ Hanyuma y’okurora guruupu ey’eragenda omu iguru, omukwenda Yohana arora “ekitebe kingi.” Kwahukanaho na guruupu eya 144,000, guruupu enu erumu abantu abatasobora kubarwa. (Kus. 7:9, 10) Kiki ekiturukubegaho? Omukwenda Yohana agambirwa ngu: “Banu nibo barugire omu muhito omwingi, kandi bayogya ebyokujwara byabu, babyeza omu sagama Eyomwana Gwentama.” (Kus. 7:14) Hanyuma y’okukira omuhito omwingi, “ekitebe kingi” nikiija kwikara hanu omu nsi kandi kyegondeze omu migisa enyingi.​—Zab. 37:9-11, 27-29; Nfu. 2:21, 22; Kus. 7:16, 17.

⁷ Katube tukomerwe kugenda omu iguru rundi kwikara omu nsi, nitwerora omu bigambo ebihandiikirwe omu Okusuku’rwa esuura 7? Tusemeriire kweroramu. Mali kanu nikaija kuba kasumi ak’okusemerewa habwa guruupu zinu ibiri ez’abaheereza ba Ruhanga! Nitwija kutunga okusemererwa kwingi muno habwokuba tukacwamu kusagika obulemi bwa Yahwe. Kintu ki ekindi ekitabu eky’Okusuku’rwa kitugambira ha muhito omwingi?​—Mat. 24:21.

8. Omuhito omwingi nigwija kutandika guta, kandi abantu abarukukira obwingi nibaija kwetwaza bata?

⁸ Omu kicweka ekyahoire, tukeega ngu gavumenti ez’ensi niziija kwehindukirra Baburoni Orukuru, ekirukumanyisa ediini zoona ez’ebisuba omu nsi. (Kus. 17:16, 17) Enu niyo erukwija kuba ntandikwa ey’omuhito omwingi. Baitu eki kiraletera abantu baingi kutandika kuheereza Yahwe? Nangwa. Oihireho, Okusuku’rwa esuura 6 n’eyoleka ngu omu kasumi ako akagumangaine, abantu abatarukuheereza Yahwe nibaija kuserra obulinzi kuruga omu by’obulemi eby’ensi hamu n’eby’obusubuzi, ebirukulengesanizibwa n’ensozi. Nk’oku abantu abo batarukwija kusagika Obukama bwa Ruhanga, Yahwe naija kubatwara nk’abarukumuhakaniza.​—Luk. 11:23; Kus. 6:15-17.

9. Abaheereza ba Yahwe nibaija kwahukana bata h’abantu abandi, kandi kiki ekirarugamu?

 ⁹ Amananu gali ngu, abaheereza ba Yahwe abesigwa nibaija kwahukanira kimu n’abantu abandi omu kaire ako akagumangaine ak’omuhito omwingi. Nubo bonka omu nsi abarukwija kuba nibaheereza Yahwe Ruhanga kandi bangiire kimu kusagika “ekisoro.” (Kus. 13:14-17) Habwokuba nibaija kuba bakyali besigwa hali Yahwe, abarukumuhakaniza nibaija kubihirwa muno. Ekirarugamu, amahanga agesoroize hamu nigaija kutahirra abantu ba Ruhanga omu nsi yoona. Baibuli eyeta okutahirra kunu Gogi owa Magogi.​—Ez. 38:14-16.

10. Nk’oku kyolekerwe omu Okusuku’rwa 19:19-21, kiki Yahwe ekyarakora abantu be obubaratahirirwa?

¹⁰ Kiki Yahwe ekyarakora habw’okutahirra kunu? Natugambira ati: “Ekiniga kyange kiriimuka.” (Ez. 38:18, 21-23) Okusuku’rwa esuura 19 n’etusoborra ekirayongeraho. Yahwe naija kusindika Omwana we kulinda abantu Be kandi asingule abanyanzigwa baabo. Yesu naija kweteranizibwaho ‘amahe ag’omu iguru,’ kandi abo nubo bamalaika abesigwa hamu 144,000. (Kus. 17:14; 19:11-15) Kiki ekiraruga omu bulemu bunu? Ebitongole hamu n’abantu boona abarukuhakaniza Yahwe nibaija kuhwerekerezebwa kimu!​—Soma Okusuku’rwa 19:19-21.

11. Mukoro ki omukuru muno ogurukubazibwaho omu kitabu eky’Okusuku’rwa?

¹¹ Teramu akasisani orole omulingo abaheereza ba Ruhanga omu nsi barayehurramu hanyuma y’okuhwerekerra kw’abanyanzigwa ba Ruhanga! Ako nikaija kuba kasumi ak’okusemererwa kwingi! N’obukiraaba ngu nihaija kubaho okusemererwa kwingi omu iguru Baburoni Orukuru obururahwerekerezebwa, haroho ekintu ekindi ekirukwija kuleeta okusemererwa okurakiraho. (Kus. 19:1-3) Ekintu kinu nikyo omukoro omukuru muno omu kitabu eky’Okusuku’rwa, kandi omukuro gunu nugwo, “obugole Obwomwana Gwentama.”​—Kus. 19:6-9.

12. Nk’oku kyolekerwe omu Okusuku’rwa 21:1, 2, obugole obw’Omwana Gwentaama nibwija kubaho di?

¹² Obugole bunu burabaho di? Obulemu obwa Haramagedoni obuburaaba butakatandikire 144,000 boona nibaija kuba bali omu iguru. Baitu, ako tikarukwija kuba kasumi ak’obugole obw’Omwana Gwentaama. (Soma Okusuku’rwa 21:1, 2.) Obugole obw’Omwana Gwentaama nibwija kubaho hanyuma y’obulemu obwa Haramagedoni, kandi n’abanyanzigwa ba Ruhanga boona bamazire kwihwaho.​—Zab. 45:3, 4, 13-17.

13. Obugole obw’Omwana Gwentaama buramanyisa ki hali abo abarukukwatwaho?

¹³ Obugole obw’Omwana Gwentaama buramanyisa ki hali abo abarukukwatwaho? Nk’oku obugole rundi okugaitwa kuteraniza hamu omusaija n’omukazi, omu mulingo nugwo gumu obugole obw’Omwana Gwentaama nibwija kuteraniza hamu Yesu Kristo Omukama, ‘n’omugole’ we, 144,000. Kutandika n’omukoro gunu omukuru, 144,000 bali hamu na Yesu nibaija kutandika kulema ensi kumara emyaka 1000.​—Kus. 20:6.

14-15. Okusuku’rwa esuura 21 n’erengesaniza 144,000 na ki? (Rora ekisisani ekyaha kyesweko.)

¹⁴ Hanyuma, Okusuku’rwa esuura 21 erengesaniza 144,000 n’orubuga orurungi muno orurukwetwa “Yerusalemu oruhyaka.” (Kus. 21:2, 9) Orubuga runu rwine amabaale 12 ag’omusingi aganyakuhandiikirweho “amabara ikumi nabiri, agabakwenda ikumi nababiri Abomwana Gwentama.” Habwaki kinu kyasemiize omukwenda Yohana? Habwokuba akarora  ibara lye lihandiikirwe ha limu h’amabaale ago. Ogu gwali mugisa gw’amaani!​—Kus. 21:10-14; Bef. 2:20.

¹⁵ Orubuga runu nirwahukanira kimu n’embuga ezindi. Ikuute ly’ezaabu enungi, amalembo 12 ag’eruru, muhuruzi hamu n’emisingi yarwo bikaba bitimbirwe n’amabaale amarungi, kandi orubuga runu rukaba nirwinganainga kurungi embaju zoona. (Kus. 21:15-21) Baitu, omukwenda Yohana akakyetegereza ngu rukaba rwine ekirukuburwamu! Kinu nikyo Yohana yagambire, akagamba ati: “Kunu ntabonemu yekaru: baitu [Yahwe] Ruhanga Owobusobozi bwona Nomwana Gwentama niyo yekaru yarwo. Kunu orubuga tirurukutaga izoba nobukwakuba okwezi okurujwera: baitu ekitinisa kya Ruhanga kikarumulikira, netabaza yarwo nuwe Mwana Gwentama.” (Kus. 21:22, 23) Abo abali kicweka kya Yesusalemu oruhyaka nibaija kuba bali na Yahwe. Nahabweki, nibaija kuba batakyayetaaga yekaru. (Kus. 22:3, 4) Ekindi, omu kuheereza Ruhanga nibaija kuba nibebemberwa Yesu ayafookere kara nyakatagara omukuru omu iguru. (Baheb. 7:27) Habw’ensonga zinu, Yahwe na Yesu nibabazibwaho nka yekaru omu rubuga oru.

16. Kiki ekirukwija kuhika h’abantu omu Bulemi obw’Emyaka Rukumi ey’Obukama bwa Ruhanga?

¹⁶ Kisemeza muno abaseserweho amagita obubatekerezaaho orubuga runu. Baitu nabo abaine okunihira okw’okwikara omu nsi basemeriire kugonza kumanya ebirukukwata ha rubuga runu. Omu Bulemi bw’Emyaka Rukumi obw’Obukama bwa Ruhanga, Yerusalemu oruhyaka nirwija kuleeta emigisa nyingi muno omu nsi. Omukwenda Yohana arora emigisa negera ‘nk’ekyambu eky’amaizi ag’obwomeezi.’ Kandi ha mbaju z’ekyambu arora ‘emiti ey’obwomezi’ eroho amababi ‘ag’okukiza amahanga.’ (Kus. 22:1, 2) Abantu boona abaliba baroho kasumi ako, balitunga omugisa ogw’okwegondeza omu migisa enu. Mpora mpora, abo abarukworobera Yahwe nibaija kufooka abahikiriire. Tiharukwija kwongera kubaho okurwara, obusaasi, hamu n’okurra habw’obujune.​—Kus. 21:3-5.

17. Nk’oku kyolekerwe omu Okusuku’rwa 20:11-13, nibaha abarukwija kugasirwa omu Bulemi obw’Emyaka Rukumi?

¹⁷ Nibaha abaragasirwa omu migisa enu? Ab’ekitebe ekingi abarakira Haramagedoni, hamu n’abaana kuzaarwa omu nsi empyaka nubo barabanza kugasirwa. Baitu Okusuku’rwa  esuura ya 20 n’eraganiza ngu n’abafu balihumbuuka. (Soma Okusuku’rwa 20:11-13.) Abantu ‘abahikiriire’ abaafiire omu busumi obwakara hamu “nabatahikiriire” abatarutungire omugisa ogw’okwega hali Yahwe, nibaija kuhumbuuka bongere babe bomeezi omu nsi. (Eng. 24:15; Yoh. 5:28, 29) Tugambe ngu omu Bulemi obw’Emyaka Rukumi, abafu boona balihumbuuka bagaruke omu nsi? Nangwa. Abo habw’obubi bwabo abayangire omugisa ogw’okuheereza Yahwe batakafiire tibarukwija kuhumbuuka. Bakatunga omugisa ogw’okumwegaho baitu bayoleka ngu tibasemeriire kwikara omu Rugonjo Orurungi omu nsi.​—Mat. 25:46; 2 Bas. 1:9; Kus. 17:8; 20:15.

18. Nyikara ki erukwija kuba eri omu nsi ha kumalirra kw’emyaka 1,000?

¹⁸ Nambere emyaka 1000 erahwera abo boona abaraaba bali omu nsi nibaija kuba bafookere abahikiriire. Busaho n’omu alyongera kutalibanizibwa ekibi ekiyaijukwire kuruga hali Adamu. (Bar. 5:12) Omukyeno ogwaleserwe ekibi kya Adamu nigwija kuba gwihirweho kimu. Omu mulingo ogu, abantu abarukwija kuba bali omu nsi nibaija ‘kufooka bomeezi’ habwokuba nibaija kufooka abahikiriire ha kumalirra kw’emyaka 1,000.​—Kus. 20:5.

19. Habwaki halibaho okulengwa okw’okumalirra?

¹⁹ Tukimanyire ngu Yesu akaikara ali mwesigwa hali Ruhanga n’obukiraaba ngu Sitaani akamulenga. Baitu abantu boona abahikiriire baraikara bali besigwa hali Yahwe, Sitaani obw’araheebwa omugisa ogw’okubalenga? Buli omu naija kugarukamu ekikaguzo kinu Sitaani obwaralekerwa kuruga omu kiina ekitaine bugarukiro ha kumalirra kw’emyaka 1,000. (Kus. 20:7) Abo abararaba omu kulengwa okw’okumalirra bali besigwa nibaija kutunga obwomeezi obutahwaho hamu n’obugabe mali. (Bar. 8:21) Abo abarajeema, nibaija kuhwerekerra na Sitaani hamu n’abadaimoni be habw’ebiro n’ebiro.​—Kus. 20:8-10.

20. Noyehurra ota habw’obunabbi bunu oburukuhuniriza obuli omu kitabu eky’Okusuku’rwa?

²⁰ Noyehurra ota hanyuma y’okusomaho omu bugufu ebintu ebiri omu kitabu eky’Okusuku’rwa? Tikirukukusemeza kurora ngu naiwe oli kicweka ky’obunabbi bunu oburukuhuniriza? Kinu tikirukukwekambisa kugonza kuraaliza abandi kutweteranizaaho omu kuramya Ruhanga waitu omu mananu? (Kus. 22:17) Hati nk’oku tubalizeeho ebintu binu ebirabaho omu kasumi ak’omu maiso, twine okusemerwa kwingi kandi nitugonza kubaza nk’omukwenda Yohana obuyagambire ati: “Amina: ija Mukama waitu Yesu.”​—Kus. 22:20.