1. Yahwe naraaliza abaheereza be kukora ki? (Rora ekisisani.)

 OBUTUBA nitugonza okuhuumuzibwa n’obukonyezi tusaba oha? Tumanyire eky’okugarukamu eky’ekikaguzo eki. Nitusobora kuhikirra Yahwe kuraba omu kusaba. Yahwe naturaaliza kukora eki kyonyini. Nagonza ‘tumusabe butoosa.’ (1 Bas. 5:17) Nitusobora kumuhikirra obwire bwona nitumusaba oburagirizi obuturukwetaaga. (Nfu. 3:5, 6) Habwokuba Yahwe agonza kutukonyera obwire bwona, tatuterireho emirundi eitusemeriire kumusaba.

2. Kiki ekiturukwija kubazaaho omu kicweka kinu?

² Nitusiima muno habw’ekisembo eky’okusaba. Baitu habwokuba twine bingi eby’okukora, nikisobora kutugumira kutunga obwire obw’okusaba. Ekindi nitusobora kwehurra ngu tusemeriire kusemezaamu esaara zaitu. Ekirungi kiri ngu nitusobora kutunga obuhabuzi n’okwekambisibwa kuruga omu Byahandiikirwe. Omu kicweka kinu, nitwija kurora omulingo ekyokurorraho kya Yesu kisobora kutukonyera kutunga obwire obw’okusaba. Nitwija kubazaaho ebintu bitaano ebitusobora kuteeka omu saara zaitu ebiraziretera kweyongera kusemera.

3. Yesu akaba amanyire ki obukirukuhika ha kusaba?

³ Yesu akaba akimanyire ngu esaara z’omuhendo hali Yahwe. Obwakaba atakaizire omu nsi, yaroraga Ise nagarukamu esaara z’abaheereza be abesigwa. Ekyokurorraho, Yesu akaba ali na Ise obuyagarukiremu esaara za Hana, Daudi,  Eriya n’abandi. (1 Sam. 1:10, 11, 20; 1 Bakam. 19:4-6; Zab. 32:5) Egi niyo ensonga habwaki yayegeseze abegeswa be kusaba butoosa batarukugurukyagurukya.—Mat. 7:7-11.

4. Esaara za Yesu nizitwegesa ki?

⁴ Kuraba omu kusaba hali Yahwe, Yesu akateraho abegeswa be ekyokurorraho ekirungi ekyokuhondera. Omu buheereza bwe bwona, Yesu yasabaga butoosa. N’obukiraaba ngu akaba aine bingi eby’okukora kandi yabaga ayetoroirwe abantu baingi, yatungaga obwire obw’okusaba. (Mar. 6:31, 45, 46) Yazindukaga nyenkyakara nukwo atunge obwire obw’okusaba ali wenka. (Mar. 1:35) Kiro kimu obwakaba aine kukora encwamu ey’amaani, akasaba kuhikya obwire bukiire. (Luk. 6:12, 13) Kandi obwire bw’ekiro atakafiire, akasaba muno nukwo ateeke omutima ha kumalirra obujunanizibwa oburukukirayo obukuru obwamulesere omu nsi.—Mat. 26:39, 42, 44.

5. Nitusobora tuta kwegera ha kyokurorraho kya Yesu obutuba nitusaba?

⁵ Ekyokurorraho kya Yesu nikitwegesa ngu n’obuturaaba twine bingi eby’okukora, tusemeriire kutunga obwire obw’okusaba. Nka Yesu, nitusobora kutunga obwire obw’okusaba kuraba omu kuzinduka nyenkyakara rundi kulindaho kubyama. Obutukora eki, twoleka Yahwe ngu nitusiima habw’ekisembo kinu eky’embaganiza. Munyaanya itwe arukwetwa Lynne naijuka omulingo yakwasirweho obuyayegere ha mugisa ogw’okusaba omurundi ogw’okubanza. N’agamba ati: “Obunakimanyire ngu ninsobora kubaza na Yahwe obwire bwona, kikankonyera kumurora nk’omunywani wange nfenanfe, n’okugonza kweyongera kusemezaamu esaara zange.” Hataroho kugurukyagurukya baingi omuliitwe nukwo turukwehurra tuti. Hati leka tubazeeho ebintu bitaano ebikuru ebitusobora kubazaaho omu saara zaitu ebiraziretera kweyongera kusemera.

6. Kusigikirra ha Okusuku’rwa 4:10, 11, kiki Yahwe eky’asemeriire kuheebwa?

⁶ Kugiza Yahwe. Omu kwolekwa okurukuhuniiriza, omukwenda Yohana akarora abakuru 24 bali omu iguru nibaramya Yahwe. Bakakugiza Yahwe nibagamba ngu  asemeriire kuheebwa “ekitinisa nokutinwa nobusobozi.” (Soma Okusuku’rwa 4:10, 11.) Bamalaika abesigwa nabo baine ensonga nyingi ez’okukugiza n’okuha Yahwe ekitiinisa. Baikara nauwe omu iguru kandi bamumanyire kurungi. Barora emiringo ye enungi kuraba omu bintu eby’akora. Obubarora Yahwe nakora ebintu ebyo kibaleetera kumukugiza.—Yob. 38:4-7.

7. Bintu ki ebituleetera kukugiza Yahwe?

⁷ Naitwe nitugonza kukugiza Yahwe omu saara zaitu kuraba omu kubazaaho ebintu ebiturukumugonzaho. Obworaaba noyesomesa Baibuli, lengaho kuserra emiringo ya Yahwe ey’orukukirayo kugonza. (Yob. 37:23; Bar. 11:33) Hanyuma omugambire omulingo orukwehurra ha miringo egi. Nitusobora n’okukugiza Yahwe habw’okutukonyera n’okukonyera ab’oruganda na banyaanya itwe. N’aturolerra kandi n’atulinda.—1 Sam. 1:27; 2:1, 2.

8. Nsonga ki ezimu ezituleetera kusiima Yahwe? (1 Abasesalonika 5:18)

⁸ Siima Yahwe. Twine bingi eby’okusiimira Yahwe kuraba omu kusaba. (Soma 1 Abasesalonika 5:18.) Nitusobora kumusiima habw’ebirungi byona ebitwine habwokuba buli kisembo ekirungi kiruga haluwe. (Yak. 1:17) Ekyokurorraho, nitusobora kumusiima habw’ensi yaitu enungi n’ebyahangirwe ebindi ebirukuhuniiriza. Ekindi, nitusobora kumusiima habw’obwomeezi obwatuhaire, habw’eka yaitu, banywani baitu, n’okunihira okutwine. Nitugonza n’okumusiima habw’okutwikiriza kuba n’enkoragana enungi nauwe.

9. Habwaki tusemeriire kwikara nitusiima Yahwe?

⁹ Nikisobora kukwetaagisa kuteekamu amaani kutekerezaaho ebintu ebikuleetera kusiima Yahwe. Twikara omu nsi nambere baingi batarukusiima. Abantu bateeka omutima ha kibarukugonza kutunga omu kiikaro ky’okuguteeka ha kibasobora kukora kwoleka okusiima habw’ebibaine. Kakuba naitwe tutunga entekereza nk’egi, esaara zaitu nizisobora kubamu ebiturukugonza kutunga byonka. Tusemeriire kwikara nitusiima Yahwe habw’ebintu eby’atukorra.—Luk. 6:45.

10. Kwoleka okusiima kikakonyera kita munyaanya itwe kugumiisiriza? (Rora ekisisani.)

¹⁰ Kuba abantu abarukusiima nikisobora kutukonyera kugumira ebizibu. Tekerezaaho ekyokurorraho kya munyaanya itwe Kyung-sook, ekirukusangwa omu Watchtower eya Janwali 15, 2015. Bakamukeberamu ekookoro ey’ebihaha kandi ekaba etasobora kukira. Akagamba ati: “Oburwaire bunu bukambonesa muno. Nkehurra nk’owaihirweho buli kimu, kandi natiina muno.” Kiki ekyakonyiire Kyung-sook kugumiisiriza? Akagamba ngu buli rwebagyo atakagenzere kubyama, yagendaga harusu rw’enju ye nasaba omu iraka erirukuhulirwa kandi nabazaaho ebintu bitaano ebyarukusiimira  Yahwe kiro eki. Kinu kyamuhuumuzaaga kandi kyamuleeteraga kwoleka okusiima kwe hali Yahwe. Akarora omulingo Yahwe akonyera abaheereza be abesigwa obubaba nibaraba omu nyikara ezigumire kandi akakyetegereza ngu emigisa eitutunga omu bwomeezi n’ekirra hara ebizibu. Nka Kyung-sook, twine ensonga nyingi habwaki tusemeriire kusiima Yahwe n’obukiraaba ngu nituraba omu bizibu. Kwoleka okusiima kwaitu kuraba omu kusaba nikisobora kutukonyera kugumiisiriza n’okwikara twine entekereza ey’ehikire.

11. Habwaki abegeswa baali nibetaaga obumanzi hanyuma ya Yesu kugaruka omu iguru?

¹¹ Saba Yahwe akuhe obumanzi obw’okutebeza. Yesu obwakaba nagenda kugaruka omu iguru, akaijukya abegeswa be obujunanizibwa obukuru muno obw’okuha obwakaiso oburukumukwataho omu “Yerusalemu, na Buyudaya bwona, nomu Samaliya, nokuhikya empero zensi.” (Eng. 1:8; Luk. 24:46-48) Hanyuma y’akacu kake, abebembezi b’Abayudaaya bakakwata omukwenda Petero na Yohana baabatwara omu maiso g’orukurato baabaragira kuleka kutebeza kandi baabatiinisiriza. (Eng. 4:18, 21) Petero na Yohana bakakora ki?

12. Kusigikirra ha Engeso Ezabakwenda 4:29, 31, abakwenda bakakora ki?

¹² Hanyuma y’okutiinisirizibwa, Petero na Yohana bakabagarukamu bati: “Obukiraba kiri kirungi omu maiso ga Ruhanga okuhurra inywe okukira Ruhanga mutekereze: baitu itwe titurukusobora okuleka okugamba ebitwaboine nebitwahuliire.” (Eng. 4:19, 20) Petero na Yohana obubaalekiirwe, bakaimukiza hamu iraka baasaba esaara erukuhikaana n’ekigendererwa kya Ruhanga. Bakasaba bati: “Obahe abairu bawe okugamba ekigambo kyawe nobumanzi.” Kandi Yahwe akagarukamu esaara yabo erukuruga ha mutima.—Soma Engeso Ezabakwenda 4:29, 31.

13. Ekyokurorraho kya Jin-hyuk nikitwegesa ki?

¹³ Nitusobora kwegera ha kyokurorraho kyʼabakwenda kuraba omu kugumizaamu nitutebeza ab’obusobozi n’obubalengaho kututanga. Tekerezaaho ekyokurorraho ky’Ow’oruganda Jin-hyuk ayatairwe omu nkomo habw’okwanga kutaaha amahe. Omu nkomo, akaheebwa obujunanizibwa bw’okurolerra bamu h’abanyankomo abaabaga basibirwe bonka omu kasiika, baitu akaba atarukwikirizibwa kubagambira ebirukukwata ha Baibuli. Akasaba Yahwe obumanzi n’amagezi nukwo abazeeho amananu kakuba atunga omugisa. (Eng. 5:29) N’agamba ati: “Yahwe akagarukamu esaara yange yampa amagezi n’obumanzi kandi natandika kwegesa abanyankomo baingi Baibuli kumara edakiika itaano twemeriire ha mulyango gw’akasiika. Hanyuma, omu bwire bw’ekiro, nahandiikaga amabbaruha ag’okuha abanyankoma abandi ekiro ekirahonderaho.” Naitwe nitusobora kukigumya ngu Yahwe naija kutukonyera kuhikiiriza obuheereza bwaitu. Kusisanaho Owʼoruganda Jin-hyuk, nitusobora kusaba Yahwe obumanzi n’amagezi.

14. Kiki ekisobora kutukonyera obutuba nituraba omu bizibu? (Zabuli 37:3, 5)

¹⁴ Saba Yahwe akukonyere kugumira ebizibu. Baingi omuliitwe nitutalibanizibwa oburwaire, okwetuntura, tuferiirwe omuntu waitu, twine ebizibu omu maka, nituhiiganizibwa rundi twine ekizibu ekindi. Emitalibaine endi nk’okucwekaho kw’oburwaire rundi obulemu biretiire obwomeezi  kweyongera kugumangana. Gambira Yahwe byona ebikuli ha mutima kandi omusoborre enyikara yaawe nk’okuwakugambiire munywani waawe nfenanfe. Okigumye ngu Yahwe naija kukukonyera.—Soma Zabuli 37:3, 5.

15. Okusaba kutukonyera kuta “kugumira obujune”? Bazaaho ekyokurorraho.

¹⁵ Kwekamba kusaba nikiija kutukonyera ‘kugumiisiriza omu bujune.’ (Bar. 12:12) Yahwe amanyire abaheereza be ebibarukurabamu kandi ‘ahurra okurra kwabo.’ (Zab. 145:18, 19) Payoniya ow’emyaka 29 arukwetwa Kristie kinu akakyerorra. Akatandika kutalibanizibwa endwaire kandi kyamuleetera kwenuuba muno. Hanyuma akakyetegereza ngu nyina arwaire oburwaire obw’amaani kandi obutarukukira. N’agamba ati: “Nkasaba muno Yahwe kumpa amaani ag’okugumiisiriza buli kiro. Nkalengaho kwikara nyine entekaniza enungi ey’eby’omwoyo kuraba omu kugenda omu nsorrokano n’okwesomesa. Obunabaga ninyehurra kubi, okusaba kwankonyeraga. Kukimanya ngu Yahwe aikara ayetekaniize kumpuliiriza kyampumuzaaga muno. N’obukiraaba ngu ebizibu byange bitahweho ahonaaho, Yahwe akagarukamu okusaba kwange yampa obusinge omu mutima n’omu bitekerezo.” Nahabweki leka twikale nitwijuka ngu Yahwe “amanyire okujuna abarukutina Ruhanga omu kwohebwa.”—2 Pet. 2:9.

16. Habwaki nitwetaaga obukonyezi bwa Yahwe kusobora kwangirra ebyohyo?

¹⁶ Saba Yahwe akukonyere kwangirra okwohebwa. Habwokuba tuli bantu abatahikiriire, nikitwetaagisa kwikara nituteekamu amaani kusobora kwangirra kwohebwa kukora ebitahikire. Sitaani aikara nakora kyona ekirukusoboka kutulemesa kukora ebirukusemeza Yahwe. Omulingo gumu ogw’akikoramu nukwo kuraba omu byokwesemeza ebibi. Ebyokwesemeza binu bisiisa entekereza yaitu n’omuntu waitu ow’omunda  kandi bisobora kutuleetera kukora ekibi eky’amaani.—Mar. 7:21-23; Yak. 1:14, 15.

17. Nitusobora tuta kukorra ha kusaba kwaitu okw’okwangirra ebyohyo? (Rora ekisisani.)

¹⁷ Nitwetaaga obukonyezi bwa Yahwe obuturaaba nitugonza kusingura okwohebwa. Omu saara ya Yesu ey’akokurorraho akagamba ngu tusabege tuti: “Otatutwara omu kwohebwa, baitu otujune hali omubi.” (Mat. 6:13) Yahwe n’agonza kutukonyera baitu twine kubanza kumusaba obukonyezi. Ekindi, tusemeriire kukorra ha saara zaitu. Tusemeriire kwetantara kusoma n’okurora ebintu ebirukukurakuraniza entekereza ya Sitaani ey’ekanyire omu nsi. (Zab. 97:10) Nitusobora kuba n’ebitekerezo ebirungi kuraba omu kwesomesa Baibuli. Kugenda omu nsorrokano n’okwejumbira omu buheereza nakyo nikisobora kulinda ebitekerezo byaitu. Kandi Yahwe naturaganiza ngu tasobora kutuleka kwohebwa kukira ekitusobora kugumira.—1 Kol. 10:12, 13.

18. Obukirukuhika ha kusaba, kiki itwena ekitusemeriire kukora?

¹⁸ Itwena nitwetaaga kweyongera kusaba kwikara tuli besigwa hali Yahwe omu biro binu ebigumire. Buli kiro tunga obwire osabe kuruga ha mutima. Yahwe n’agonza ‘tuseese emitima yaitu omu maiso ge’ kuraba omu kusaba. (Zab. 62:8) Kugiza Yahwe kandi omusiime habw’ebintu byona ebyarukukora. Musabe akuhe obumanzi omu buheereza. Musabe akukonyere kugumira ebizibu n’okwangirra ebyohyo ebyoratunga. Otaikiriza ekintu kyona rundi omuntu wena kukulemesa kusaba Yahwe buli kiro. Baitu, Yahwe agarukamu ata esaara zaitu? Nitwija kubazaaho ekikaguzo kinu ekikuru omu kicweka ekirukuhonderaho.