AB’ORUGANDA na banyaanya itwe baingi abaafurukire kara kuruga omu mahanga g’owabu baagenda omu mahanga agandi kuserra sente bagarukireyo omu mahanga g’owabu. Habw’okugonza Yahwe n’okugonza abantu abandi, bacwiremu kugenda omu biikaro ebiine obwetaago bw’abatebezi b’Obukama. (Mat. 22:37-39) Biki ebibayefeeriize, kandi migisa ki eibatungire? Kutunga eby’okugarukamu, katubazeeho ihanga lya Cameroon eriri omu bugwa izooba bwa Afrika.

Omu 1998 ow’oruganda arukwetwa Onésime akaruga omu ihanga ly’owabu, erya Cameroon. Akamara emyaka 14 aheeru. Kiro kimu, obwakaba ali omu nsorrokano, akahurra ekyokurorraho ekirukukwata ha kutebeza. Ow’oruganda ow’akaba naaha orubazo akagamba ati: “Kakuba abanywani babiri baba nibasoha omu biikaro ebirukwahukana, baitu omu hali bo aikara n’akwata encu nyingi kukira mutaahi we, notekereza ow’ali nambere hali encu ntaito tarukwija kugenda nambere hali encu nyingi?”

Ekyokurorraho kinu kikaletera Onésime kutekerezaaho encwamu ey’okugaruka Cameroon nambere hali abantu baingi abarukugonza kwega Baibuli nukwo akonyere abatebezi abaliyo. Baitu hakaba haroho ebintu ebirukumweraliikiriza. Arasobora kumanyira kwikara omu Cameroon, hanyuma y’okumara emyaka nyingi aheeru? Kusobora kumanya obwaraaba n’asobora, Onésime akagaruka Cameroon kumara ameezi mukaaga. Hanyuma omu 2012, akagarukira kimu Cameroon.

Onésime nagamba ati: “Nkaba nyine kumanyira kwikara omu kiikaro ekirukwokya hamu ny’enyikara z’obwomeezi empyaka. Kyali nikinyetaagisa kwongera kumanyira kwikarra ha ntebe ezitaine busago omu Kyombeko ky’Obukama. Baitu nagamba aine akaseko h’amatama ngu “Obunayeyongeraga kuteeka omutima ha kuhuliriza, nayeyongeraga kwebwa entente enungi eziri omu Byombeko by’Obukama ebindi.”

Omu 2013, Onésime akaswera Géraldine, ow’akaba agarukire Cameroon hanyuma y’okwikara France kumara emyaka mwenda. Migisa ki abaswerangaine banu eibatungire habw’okwebembeza ebintu eby’omwoyo? Onésime nagamba ati: “Tukagenda hamu omu Isomero ery’Abatebezi b’Obukama kandi tukandika kuheereza ha Beseri. Omu mwaka oguhoire, h’akabatiziibwa abeegi ba Baibuli 20 omu kitebe kyaitu. Hati nimpurra ndi omu kiikara kirungi ‘eky’okusohamu.’” (Mar 1: 17, 18) Géraldine nayongeraho ati: “Ntungire emigisa nyingi eyinkaba ntarukunihira.”

Judith akaba afurukiire omu America baitu yagonzaaga muno kwongera ha buheereza bwe. Nagamba ngu, “Obunabaga mbungiire abanyabuzaale bange omu Cameroon, natungaga abeegi ba Baibuli baitu obwire bw’okugarukayo obubwahikaga,  narraga habw’okubarugahoga.” Baitu Judith akabanza kutiina kugaruka Cameroon. Omulimo ogw’akaba nakora, bamusasuraga sente nyingi kandi gwamusobozesaaga kusasurra obujanjabi bwa ise yatungaga omu Cameroon. Baitu Judith akesiga Yahwe kandi yacwamu kugaruka Cameroon. Nagamba ngu obumu yayegombaga ebintu ebirungi ebiyayegondezaamuga omu Amerika. Akasaba hali Yahwe kumukonyera kukora empindahinduka kandi akagarukwamu amaani habw’obukonyezi omureleerezi w’ekicweka na mukazi we bamuhaire.

Judith obwarukwijuka ebiyarabiremu nagama ati: “Omu myaka esatu nkasemerewa habw’okutunga abaana bbana omu by’omwoyo.” Judith akatandika kuheereza nka payoniya ow’embaganiza. Kandi omu kasumi kanu n’aheereza hamu na iba, Sam-Castel, omu mulimo ogw’okubungira ebitebe. Baitu kiki ekyahikire hali ise Judith? Judith n’abanyabuzaale be bakasobora kutunga irwarro omu ihanga lindi ery’aikiriize ise kumusemerereza busa. Ekirungi kiri ngu, okusemezebwa kunu kukagenda kurungi.

Ow’oruganda ow’arukwetwa Victor akafuruka y’agenda Canada. Hanyuma y’okusoma ekicweka ekiri omu Omunaara gw’Omulinzi ekirukukwata ha kusoma okwa haiguru, akatekerezaaho okusoma kwe. Akaleka emisomo ye eya ha univasite yatandika kutendekwa omulimo ogwali nigutwara obwire butaito. Nagamba ati: “Nkasobora kutunga omulimo bwangu kandi n’okufooka payoniya ekintu ekinaikaraga ninyegomba.” Hanyuma, Victor akaswera Caroline, kandi babunga omu Cameroon. Obubakaba babungiire ofiisi y’itaagi, bakabekambisa kutekerezaaho eky’okuheereza omu Cameroon. Victor nagamba ati: “Hakaba hataroho ensonga yoona ey’ekaba n’esobora kututanga kandi nk’oku twali tworobezeemu obwomeezi bwaitu, tukasanga ngu nitusobora kwikiriza okusabwa kunu.” Nobukiraaba ngu obwomeezi bwa Caroline bukaba butali burungi, bakacwamu kugenda Cameroon.

Victor na Caroline bakatandika kuheereza nka bapayoniya ab’akasumi koona nukwo bakonyere abantu baingi abaali nibagonza kwegesebwa Baibuli. Bakaba baahwire sente ezirukumara, nahabweki ha kubanza kyali kitarukwetagisa kukora. Hanyuma bakagenda Canada kukora kumara emyezi ntaito ekyabasobozeseze kugaruka Cameroon kugumizaamu nibaheereza nka bapayoniya. Migisa ki eibatungire? Bakagenda omu Isomero ery’Abatebezi b’Obukama, baheereza nka bapayoniya ab’embaganiza, kandi hati nibaheereza omu kwombeka ebyombeko by’ekitebe. Victor nagamba ati: “Kuruga omu nyikara yaitu enungi kikatusobozesa kwesigira kimu Yahwe, kandi mali akatukonyera.”

Omu 2002, ow’oruganda Alain, ow’akaba ali mwegi ha univasite omu German akasoma turakiti ey’erukwetwa Youths​—What Will You Do With Your Life? Obutumwa obuyasangiremu bukamwekambisa kweteraho ebigendererwa ebihyaka. Omu 2006, akagenda omu isomero erya Ministerial Training School hanyuma akasindikwa kuheereza omu Cameroon nambere yazaliirwe.

Omu Cameroon, Alain akatunga omulimo ogurukwetagisa kukora obwire buke. Hanyuma, akatunga omulimo nambere bamusasuraga kurungi, baitu akeralikirra ngu nigwija kumuletera kukora kake omu buheereza. Nahabweki obuyayeserwe kugenda kuheereza nka payoniya ow’embaganiza, akaikiriza aho naaho. Mukama we akamwongeza omusaara, baitu Alain akagumira ha ncwamu ye. Hanyuma, Alain akaswera Stéphanie, ow’akaba aikaire France kumara emyaka nyingi. Bizibu ki Stéphanie yatungire hanyuma y’okugaruka Cameroon?

Stéphanie nagamba ati: “Nkarwa endwaire nyingi ezitali z’amaani baitu buli kaire natungaga obujanjabi kandi nkira.” Abaswerangaine banu bakatunga emigisa habw’okugumiisiriza. Alain nagamba ati:  “Obutwagenzere kutebeza omu kyaro kimu ekirukwetwa Katé, tukasangayo abantu baingi abaali nibagonza kwega Baibuli. Hanyuma, tukasobora kwega nabo Baibuli nitukozesa esimu. Babiri h’abeegi abo, bakabatazibwa kandi gurupu ekatandikwaho.” Stéphanie nayongeraho ati: “Busaho kusemererwa okurukukira okw’okukonyera abantu bakahika ha rulengo orw’okwehayo hali Yahwe. Habw’okuheereza hanu, tutungire okusemererwa okwa mulingo ogu emirundi nyingi.” Kasumi kanu, Alain na Stéphanie nibaheereza omu mulimo ogw’okubungira ebitebe.

Munyaanya itwe Gisèle kabatizibwa obwakaba n’asoma omu isomero ly’aba dakitaali omu Italy. Ow’oruganda na mukazi we abamwegeseze Baibuli abaali nibaheereza nka bapayoniya bakaba baine obwomeezi obwanguhire, kandi eki kikamukwataho muno kyamuletera kugonza kwongera ha buheereza bwe. Nahabweki Gisèle akatandika kuheereza nka payoniya ow’akasumi koona obw’akaba ali haihi kumalirra emisomo ye.

Gisèle yali n’agonza kugaruka Cameroon nukwo ayongere ha buheereza bwe hali Yahwe, baitu akaba aine ebirukumweraliikiriza. Nagamba ngu, “Nkaba nyine kwerekesa omugisa ogw’okuba mwikazi wa Italy, kandi nsigeyo abanywani bange n’abanyabuzaale.” Baitu eki n’obukiraaba nukwo kyali kiri, Gisèle akafuruka yagaruka Cameroon omu Maayi 2016. Hanyuma y’obwire, akaswerwa Léonce, kandi ofiisi y’itaagi lya Cameroon ekabasaba kugenda kuheereza omu tawuni eya Ayos, nambere hakaba hali obwetaago bw’amaani obw’abatebezi.

Obwomeezi bwali buli buta omu Ayos? Gisèle nagamba ati: “Amasanyarazi gaakiraga kubura kumara wiiki nyingi, kandi kyali kitarukusoboka kucajinga esimu zaitu. Nahabweki obwire obwingi zabaaga zitaroho. Nkega kucumbisa enku, kandi twagendaga n’enengere ebiri hamu na toci kuleeta amaizi ekiro habwokuba obwire obu habayoga abantu bataito ha iziba.” Kiki ekyakonyire Gisèle na iba kugumiisiriza? Gisèle nagamba ati: “Omwoyo gwa Yahwe, kusagikangana, kandi abanyabuzaale n’abanywani baitu kutugarramu amaani kandi n’obwire obumu kutusagika omu bya sente, binu bikatukonyera kuraba omu kasumi ako.”

Gisèle asemeriirwe habw’okugaruka omu ihanga ly’owabu? Nagarukamu ngu “Ego! Hataro kugurukyagurukya kwona. Obwomeezi bukabanza bwaguma kandi twahurra tuhoirwemu amaani, baitu hanyuma y’okusingura ebi, nyowe na iba nyowe tukarora ngu tukakora eki kyonyini ekitwali tusemeriire kukora. Nitwesiga Yahwe kandi nituhurra tuli haihi na uwe.” Léonce na Gisèle bakagenda omu Isomero ery’Abatebezi b’Obukama, kandi hati nibaheereza nka bapayoniya ab’embaganiza.

Nk’abasohi abagumiisiriza enyikara ezigumangaine nukwo bakwate encu nyingi, abo abagaruka omu mahanga g’owabu, baine ebibefeereza begondiize nukwo bakonyere abantu abagonza amakuru amarungi ag’obukama. Hataroho kugurukyagurukya kwona, Yahwe naija kwijuka obwekambi bwa abatebezi abo habw’okugonza okubolekere habw’ibara lye. (Neh. 5:19; Baheb. 6:10) Obworaaba n’oikara omu ihanga lindi kandi haroho obwetaago bw’abatebezi omu ihanga nambere warugire, nosobora kugarukayo? Obw’oragarukayo, emigisa nyingi ekulindiriire.​—Nfu. 10:22.