1. Bikaguzo ki ebitusobora kwekaguza?

OBWIRE obumu oyehurra oyetuntwire obwotekerezaaho ebintu ebiraabaho omu kasumi ak’omu maiso, nk’okuhwerekereza amadiini ag’ebisuba, kutahirra okwa Gogi owa Magogi, hamu n’obulemu obwa Haramagedoni? Haroho obw’oyekaguza, ‘Ndasobora kwikara ndi mwesigwa ebintu binu ebirukutiinisa obubirabaho?’ Kwegaho Yesu ebiyabalize omu kyahandiikirwe ekyebembiire ekicweka kyaitu nikiija kukukonyera. Yesu akagambira abegeswa be ati: ‘Omutima gwanyu gutalituntura: mwikirize Ruhanga.’ (Yoh. 14:1) Okwikiriza okugumire nikwija kutukonyera kuraba omu kasumi ako ak’omu maiso tutarukutiina.

2. Nitusobora tuta kugumya okwikiriza kwaitu, kandi kiki ekiturukugenda kubazaaho omu kicweka kinu?

² Kutekerezaaho omulingo twetwazaamu obutihikwaho ebirengo hati, nikiija kutukonyera kumanya eky’okukora kugumya okwikiriza kwaitu. Buli kirengo ekiturabamu okwikiriza kwaitu kweyongera kuguma. Kinu nikiija kutukonyera kugumira ebirengo omu kasumi ak’omu maiso. Omu kicweka kinu nitwija kubazaaho enyikara ina abegeswa ba Yesu ezibarabiremu ez’ayolekere ngu bakaba nibetaaga okwikiriza okurukukiraho. Hanyuma nitwija kubazaaho omulingo tusobora kugumira ebizibu nibyo bimu omu kasumi kanu, kandi n’omulingo bisobora kutukonyera kwetekaniriza ebiraabaho omu maiso.

3. Ebigambo bya Yesu ebiri omu Matayo 6:30, 33 nibitukonyera kwetegereza ki?

³ Ky’obuhangwa nyineeka kugonza kuhikyaho mukazi we n’abaana be ebyokulya ebirukumara, eby’okujwara, hamu n’oburaaro. Kinu tikyanguhire kukikora omu kasumi kanu akagumangaine. Abakristaayo bagenzi baitu abamu baferiirwe emirimo yabo, kandi balemerwe kutunga endi n’obukiraaba ngu balengereho  muno kugiserra. Abandi bangire emirimo etasemeriire kukorwa Omukristaayo. Ebintu nka binu obubibaho tuba nitwetaaga kuba n’okwikiriza okw’amaani ngu Yahwe naija kutuha ebyetaago by’eka yaitu. Yesu akasoborra kurungi ensonga enu hali abegeswa be omu Kwegesa kwe okwa ha Rusozi. (Soma Matayo 6:30, 33.) Obutuba nitukigumiza kimu ngu Yahwe tarukwija kutulekaho, kitukonyera emitima yaitu kugiteeka ha kwebembeza Obukama. Obuturarora omulingo Yahwe aratukonyera kutunga ebyetaago byaitu, nitwija kweyongera kwirra haihi na uwe kandi okwikiriza kwaitu nikwija kweyongera kuguma.

4-5. Kiki ekyakonyire eka emu ey’ekaba eyetuntwire habw’ebyetaago eby’omubiri?

⁴ Tekerezaaho omulingo eka emu kuruga omu Venezuela yatungire obukonyezi kuruga hali Yahwe obw’ekaba eyetuntwire ha mulingo ogw’okutungamu ebyetaago eby’omubiri. Omu kasumi k’enyuma, eka ya Castro yatungaga sente ezirukumara kurabira omu kulima ha itaka ly’abo. Hanyuma, abasaija abamu abakaba baine emundu bakanyaga itaka lyabo kandi balibabingamu. Nyineeka w’eka egi Miguel, nagamba ati: “Kusobora kutunga ebyetaago byaitu, hati nitulima h’akataka akataito omuntu akayatutiirize, kandi nuho turukwikara. Buli kiro mbanza kusaba Yahwe kutuha ebyetaago byaitu eby’ekiro eki.” Obwomeezi bw’eka egi tibwanguhire, baitu habw’okwikiririza kimu ngu Isebo ow’okugonza omu iguru nasobora kubaha ebyetaago byabo ebya buli kiro, eka ya Castro n’egumizaamu butoosa kugenda omu nsorrokano hamu n’okwejumbira omu buheereza. Nibebembeza Obukama omu bwomeezi bwabo, kandi Yahwe n’abaha ebibarukwetaaga.

⁵ Omu kasumi kanu akagumangaine, Miguel na mukazi we Yurai, bataire muno omutima ha mulingo Yahwe abaire n’abarolerramu. Obwire obumu, Yahwe akozeseze ab’oruganda na banyaanya itwe kubaha ebintu ebibarukwetaaga, rundi kukonyera Miguel kutunga omulimo. Obwire obundi, Yahwe abakonyire kutunga ebyetaago byabo kurabira omu bukonyezi obubatungire kuruga ha ofiisi y’itaagi. Yahwe takabalekahoga. Ekirugiremu, barozere omulingo okwikiriza kw’eka yabo kweyongiire kuguma. Muhara wabo ow’arukukira obukuru Yoselin, hanyuma y’okubazaaho ekyokurorraho kimu nambere Yahwe yabakonyire, akagamba ati: “Nikigarramu muno amaani kurora omulingo Yahwe yatukonyiremu. Munywani wange, kandi ninkigumiza kimu ngu naija kwikara n’ankonyera obwomeezi bwange bwona.” Nayongeraho ati: “Ebirengo eka yaitu eby’erabiremu bitukonyire kwetekaniriza ebirengo eby’amaani eby’omu kasumi ak’omu maiso.”

6. Nosobora ota kugumya okwikiriza kwawe obworukuba oine ebizibu omu by’entahya?

⁶ Oine ebizibu omu by’entahya? Eki obukiraaba nukwo kiri, mali obwomeezi bwawe tibwanguhire. Enyikara yaawe n’obweraaba egumire muno nosobora kukozesa akasumi ako kugumya okwikiriza kwawe. Saba hali Yahwe kandi osome ebigambo bya Yesu ebiri omu Matayo 6:25-34, hanyuma obyecumitirizeeho. Tekerezaaho ebyokurorraho eby’omu kasumi kanu  ebirukugumya ngu Yahwe aha abo abaine bingi eby’okukora omu buheereza ebyetaago byabo. (1 Kol. 15:58) Obworakora eki nikiija kukonyera kukigumya ngu So ow’omu iguru naiwe naija kukukonyera nk’oku yakonyire abandi abali omu nyikara nk’eya we. Amanyire ebyetaago byawe, n’omulingo arabikuhamu. Obw’orarora omulingo Yahwe arukukukonyeramu omu bwomeezi bwawe, okwikiriza kwawe nikwija kweyongera kuguma nukwo osobole kugumira ebirengo eby’amaani eby’omu kasumi ak’omu maiso.​—Hab. 3:17, 18.

7. Kusigikirra ha Matayo 8:23-26, ihunga ery’amaani likalenga lita okwikiriza kw’abegeswa?

⁷ Yesu hamu n’abegeswa be obu baali nibagenda omu lyato, bakateerwa ihunga ery’aho naaho, Yesu akakozesa akaire ako kubakonyera kwetegereza ngu baali nibetaaga kugumya okwikiriza kwabo. (Soma Matayo 8:23-26.) Ihunga likaba ly’amaani muno, eky’aletiire ebigonzi kwijuza eryato n’amaizi, baitu Yesu akaba agwijagiire. Abegeswa abakaba batiinire obubamwimukize kandi bamusaba kubajuna, omu mulingo ogw’embabazi Mukama waitu akabahana ati: “Kikyekibatinisa, inywe abanyina okuikiriza okuke?” Abegeswa abakaba batiniire baali basemeriire kukyetegereza ngu Yahwe akaba aine obusobozi obw’okulinda Yesu hamu n’abakaba bali na uwe batahikwaho akabi. Kinu nikitwegesa ki? Okwikiriza okugumire nikusobora kutukonyera kugumira ihunga ery’amaani rundi ekizibu kyona eky’amaani ekirukusisana nk’ihunga.

8-9. Okwikiriza kwa Anel kukalengwa kuta, kandi kiki eky’amukonyire?

⁸ Tekerezaaho munyaanya itwe Anel atali omu buswere kuruga omu Puerto Rico, ayatungire okwikiriza okugumire hanyuma y’okuraba omu birengo eby’amaani. Ekirengo ekiyarabiremu kikaba “eky’ihunga ery’amaani.” Ekirengo kinu kikatandika omu 2017 ihunga erirukwetwa Hurricane Maria obulyahwerekeriize eka ye. Kandi habw’ihunga linu akafeerwa n’omulimo gwe. Anel nagamba ati: “Omu busumi obu obugumangaine nketuntura muno, baitu nkeega kwesiga Yahwe kurabira omu kusaba kandi n’okutaikiriza okwetuntura kundemesa kukora ebinkaba nsemeriire kukora.”

⁹ Anel nagamba ngu n’obuhulizi bukamukonyera kugumira ebizibu bye. Nagamba ati: “Kuhondera oburagirizi kuruga omu kitebe kikankonyera kwikara ntekaine. Yahwe akankonyera kurabira omu Bakristaayo bagenzi bange, bakangarramu amaani kandi bakampa ebintu ebinkaba ninyetaaga kusobora kubaho.” Akongeraho ati: “Yahwe akampa bingi kukira ebinkaba ninsobora kumusaba, kandi okwikiriza kwange kukeyongerra kimu kuguma.”

10. Kiki eky’osobora kukora kakuba ohikwaho ihunga ery’amaani?

¹⁰ Oine ihunga ery’amaani ery’orukurabamu omu bwomeezi bwawe? Nosobora kuba nobonabona habw’ekigwererezi. Rundi nosobora kuba oine oburwaire obw’amaani obukulekere ohoirwemu muno amaani, kandi otamanyire n’eky’okukora. Obwire obumu, nosobora kwehurra oyetuntwire, baitu otaikiriza okwetuntura kwawe kukuletera kuleka kwesiga Yahwe.  Mwirre haihi kurabira omu kumusaba kuruga ha mutima. Gumya okwikiriza kwawe kurabira omu kwecumitirizaaho emiringo erukwahukana Yahwe eiyakukonyiremu omu busumi obwa kara. (Zab. 77:11, 12) Ikara n’okigumya ngu talikulekaho nakake.

11. Habwaki tusemeriire kucweramu kimu kworobera abo abarukutwebembera?

¹¹ Kiki ekindi ekisobora kukukonyera kugumira ebirengo? Anel agambirege obuhulizi. Yega kwesiga abo abarukwesigwa Yahwe hamu na Yesu. Obwire obumu, abo abarukutwebembera nibasobora kutuha oburagirizi oburukutuzookera nk’obutaine makuru. Baitu Yahwe atuha emigisa, obutuba bahulizi. Tukimanyire kuruga omu Baibuli hamu n’omu byokurorraho eby’abaheereza ba Yahwe abesigwa ngu obuhulizi bujuna obwomeezi. (Kurug. 14:1-4; 2 Byom. 20:17) Wecumitirizeeho ebyokurorraho nk’ebyo. Obw’orakikora nikiija kukukonyera kweyongera kugonza kuhondera oburagirizi kuruga omu kitebe kya Yahwe omu kasumi kanu, kandi n’omu kasumi ak’omu maiso. (Baheb. 13:17) Nahabweki torukwija kutiina omuhito omwingi oguli haihi kwija.​—Nfu. 3:25.

12. Ekyahandiikirwe ekiri omu Luka 18:1-8 nikyoleka ngu kakwate ki akali hagati y’okuba n’okwikiriza hamu n’okugumiisiriza obutalibwinganiza?

¹² Yesu akaba akimanyire ngu obutali bwinganiza bwali nibugenda kulenga okwikiriza kw’abegeswa be. Kusobora kubakonyera kubugumira akabazaaho ekyokurorraho ekirukusangwa omu kitabu kya Luka. Yesu akabagambiraho omufaakati ay’aikaire n’ayesengereza omucwi w’emisango omugobya kumucwera omusango omu bwinganiza. Akaba n’akigumya ngu obw’araikara nasaba omucwi w’emisango onu obukonyezi naija kuhika amukonyere. Hanyuma, omucwi w’emisango akahuliiriza okwesengereza kwe. Kinu nikitwegesa ki? Yahwe w’obwinganiza. Nahabweki Yesu akagamba ati: “Kandi Ruhanga taliramurra bakomebe, abamwamirra nyamusana nekiro?” (Soma Luka 18:1-8.) Hanyuma Yesu akongeraho ati: “Baitu omwana womuntu obwaliija alisanga okuikiriza hansi?” Obututwazibwa omu mulingo ogutali gw’obwinganiza tuba nitwetaaga kugumiisiriza, kusobora kukigumya ngu twine okwikiriza okugumire okurukusisana n’okw’omufaakati ogu. Okwikiriza nk’oku nikwija kutukonyera kukigumya ngu Yahwe naija kutukonyera. Nitwetaaga n’okwikiriza ngu okusaba kw’amaani muno. Obwire obumu, esaara zaitu nizisobora kugarukwamu omu miringo tubaire tutarukunihira.

13. Kusaba kukakonyera kuta eka emu ey’ekaba etwaziibwe omu mulingo ogutali gw’obwinganiza?

¹³ Tekerezaaho ekyokurorraho kya munyaanya itwe Vero, arukwikara omu Democratic Republic of the Congo. Vero, musaija we atali omu mananu, hamu na muhara we ow’emyaka 15 bakaba baine kwiruka, ekyaro ky’abo obukyatahiriirwe guruupu y’abarrebbo. Obubakaba bali omu muhanda bakatangatangana rodibulooka, nambere abarrebbo babemeriize kandi babatiinisiriza kubaita. Vero obuyatandikire kurra, muhara we akalengaho kumugumya kurabira omu  kusaba naatoka kandi naakozesa ibara lya Yahwe emirundi nyingi omu saara ye. Obuyamazire kusaba, omudumizi w’abarrebbo akamukaguza ati: “Mwisiki, noha y’akwegeseze kusaba?” Akamugarukamu ati: “Nyina nyowe nuwe yanyegeseze n’akozesa ekyokurorraho ekiri omu Matayo 6:9-13.” Omudumizi w’abarrebbo akagamba ati: “Mwisiki genda n’abazaire baawe omu businge, kandi Yahwe Ruhanga wanyu abalinde!”

14. Kiki ekisobora kulenga okwikiriza kwaitu, kandi kiki ekiratukonyera kugumiisiriza?

¹⁴ Ebyokurorraho nk’ebyo nibitwegesa ngu titusemeriire kugaya amaani g’okusaba. Baitu kiki eky’osmeriire kukora kakuba esaara zaawe zitagarukwamu bwangu rundi omu mulingo ogurukuhuniriiza? Nk’omufaakati omu kyokurorraho kya Yesu gumizaamu n’osaba, n’okigumya ngu Ruhanga tarukwija kukuleka kandi ngu naija kuhika akugarukemu omu mulingo gwona. Gumizaamu n’oyesengereza Yahwe akuhe omwoyo gwe ogurukwera. (Baf. 4:13) Ijuka ngu omu kasumi akatali kahara, Yahwe naija kukuha emigisa nyingi ey’erakuletera kwebwa okubonabona kwona okuwarabiremu. Yahwe obwakukonyera kugumira ebirengo, oyeyongera kuguma kandi nikiija n’okukusobozesa kugumira ebirengo omu kasumi ak’omu maiso.​—1 Pet. 1:6, 7.

15. Nk’oku kyolekerwe omu Matayo 17:19, 20, kizibu ki abegeswa ba Yesu ekibaatungire?

¹⁵ Yesu akegesa abegeswa ngu okwikiriza kwali nikugenda kubakonyera kuraba omu bizibu. (Soma Matayo 17:19, 20.) Kiro kimu bakalemwa kubinga daimoni n’obukiraaba ngu omu busumi obw’enyuma baali basoboire kuzibinga. Kizibu ki ekyali kibaireho? Yesu akasoborra ati baali nibetaaga okwikiriza okurukukiraho. Akabagambira ngu kakuba baali baine okwikiriza okurukumara bakusoboire kuraba omu bizibu ebirukusisana nk’ensozi! Omu kasumi kanu, naitwe nitusobora kutangatangana ebizibu ebirukuzooka nk’ebitutarukusobora kurabamu.

16. Okwikiriza kukakonyera kuta Geydi kuguma hanyuma ya iba kwitwa?

¹⁶ Tekerezaaho ekyokurorraho ekya munyaanya itwe Geydi, kuruga omu ihanga lya Guatemala. Iba arukwetwa Edi, akaitwa obubakaba nibagaruka omu ka nibaruga omu rusorrokano rw’ekitebe. Okwikiriza kwa Geydi kumukonyire kuta kugumira obujune bwe obw’amaani? Nagamba ati: “Okusaba kunkonyera kunagira Yahwe omugugu gwange, ekindetera kwehurra nyine obusinge. Nindora omulingo Yahwe anfaaho kurabira omu b’omuka yange hamu n’abanywani bange ab’omu kitebe. Kwikara nyine bingi eby’okukora omu kuheereza Yahwe kikehya ha busaasi bwange kandi kinkonyera kuraba omu kiro nteralikiriire ekihinguraine ha birabaho nyenkya. Hanyuma yokuraba omu kizibu kinu, nyegere ngu ekirengo kyona ekindatunga omu kasumi ak’omu maiso, ninyija kusobora kukirabamu habw’obukonyezi bwa Yahwe, Yesu, hamu n’ekitebe.”

17. Kiki ekitusobora kukora kakuba tuba twine ekizibu eky’amaani muno ekirukusisana n’orusozi?

¹⁷ Oli mukuganya habw’okufeerwa omuntu oworukugonza? Tunga obwire obw’okwongera kugumya okwikiriza kwawe omu kuhumbuuka  kurabira omu kusoma Ebyahandiikirwe kuruga omu Baibuli ebirukukwataho abo abahumbwirwe. Oine obujune habwokuba omu ha b’omu ka yaawe abingirwe omu kitebe? Wesomese nukwo osobole kukigumya ngu omulingo Yahwe ahanamu nugwo ogurukukirayo oburungi. Ekizibu kyona ekyoraaba norabamu, kikozese nk’omugisa ogw’okwombeka okwikiriza kwawe. Gambira Yahwe omulingo gwonyini ogw’orukwehurramu. Otesoroora baitu oikale haihi n’ab’oruganda na banyaanya itwe. (Nfu. 18:1) Wejumbire omu mirimo ey’erakukonyera kugumiisiriza, n’obukiraaba ngu orra obw’oijuka ekyabaireho. (Zab. 126:5, 6) Gumizaamu n’entekaniza yaawe ey’okugenda omu nsorrokano, omu buheereza, hamu n’okwesomesa Baibuli. Kandi ikara notekerezaaho ebintu ebirungi Yahwe eby’araganiize kukukorra omu kasumi ak’omu maiso. Obw’orarora omulingo Yahwe akukonyeramu, okwikiriza kwawe omuli uwe kweyongera kuguma.

18. Kakuba okyetegereza ngu okwikiriza kwawe tikugumire ekirukumara, kiki eky’osobora kukora?

¹⁸ Ebirengo ebiwarabiremu kara, rundi ebyokurabamu hati, kakuba byoleka ngu okwikiriza kwawe tikugumire ekirukumara, otahwamu amaani. Gunu gurole nk’omugisa ogw’okugumya okwikiriza kwawe. Naiwe saba nk’abakwenda ba Yesu abasabire bati: “Otukanyize okuikiriza kwaitu.” (Luk. 17:5) Ekindi, tekerezaaho n’ebyokurorraho ebitubalizeeho omu kicweka kinu. Kusisanaho na Miguel na Yurai, ijuka obusumi nambere Yahwe y’akuhaire ebyetaago byawe. Kusisanaho na muhara wa Vero hamu na Anel, saba muno Yahwe kukira muno obworukuba oine ekizibu eky’amaani. Kandi nka Geydi, ijuka ngu Yahwe nasobora kukuha obukonyezi obworukwetaaga kurabira omu b’omu ka yaawe rundi abanywani. Obw’oraikiriza Yahwe kukukonyera kuraba omu birengo eby’oine omu kasumi kanu, noija kweyongera kukigumiza kimu ngu naija kukukonyera kugumira ekirengo kyona eky’oratunga omu kasumi ak’omu maiso.

19. Kiki Yesu eky’akaba nagumya, kandi kiki naiwe eky’osobora kugumya?

¹⁹ Yesu akakonyera abegeswa be kurora nambere bakaba nibetaaga kukanyisa okwikiriza kwabo, baitu akaba nakigumya ngu habw’obukonyezi bwa Yahwe bakaba nibaija kusobora kusingura ebirengo omu kasumi ak’omu maiso. (Yoh. 14:1; 16:33) Akaba nakigumya ngu kwikiriza okugumire kukaba nikugenda kukonyera ab’ekitebe ekingi kuraba omu muhito omwingi. (Kus. 7:9, 14) Naiwe oraaba omu halibo? Habw’embabazi za Yahwe ezitatusemeriire, naiwe noija kuba omu halibo, kakuba okora kyona ekyorukusobora hati kugumya okwikiriza kwawe!​—Heb. 10:39.