1. Kwikara nitwetegereza kurungi, nikimanyisa ki? (2 Timoseo 4:5)

 OBUHABAHO ekintu kikatubiihiza, obwesigwa bwaitu hali Yahwe hamu n’ekitebe kye nibusobora kulengwa. Nitusobora tuta kusingura ekizibu nk’eki? Nitwetaaga kwikara nitwetegereza kurungi kandi tukaikara tuli bulindaara tugumire omu kwikiriza. (Soma 2 Timoseo 4:5. b) Twikara nitwetegereza kurungi obutwikara tuteekaine, tukateekereza kurungi, kandi n’okwekamba kurora ensonga omu mulingo Yahwe aziroramu. Kakuba tukora tuti, enyehurra zaitu tizirukwija kulema ebiteekerezo byaitu.

2. Biki ebiturukugenda kubazaaho omu kicweka kinu?

² Omu kicweka ekyahoire, tukabazaaho ebizibu bisatu ebitusobora kutunga kuruga aheeru y’ekitebe. Omu kicweka kinu, nitwija kubazaaho ebizibu bisatu kuruga omu kitebe ebisobora kulenga obwesigwa bwaitu hali Yahwe hamu n’ekitebe kye. Kandi binu nibyo (1) Omukristaayo mugenzi waitu obwatutwaza kubi, (2) obutuhanwa, kandi (3) obukitugumira kugenda n’empindahinduka ez’omu kitebe. Nitusobora tuta kwikara nitwetegereza kurungi, kandi n’obwesigwa tukagumira hali Yahwe hamu n’ekitebe kye obututangatangana ebizibu nk’ebi?

3. Nitusobora kwetwaza tuta kakuba twehurra ngu Omukristaayo mugenzi waitu atutwaize kubi?

³ Wakatwazibwaga kubi Omukristaayo mugenzi wawe, obundi omuntu ow’aine obujunanizibwa nk’omugurusi? Nikisoboka kuba ngu ow’oruganda atakigenderre kukusaaliza. (Bar. 3:23; Yak. 3:2) Baitu nabwo ebikorwa bye nibisobora kuba byakusaalize.  N’osobora kuba wabuzirwe oturo habw’okutekerezaaho ekinti eki. N’osobora kuba wayekagwize oti, ‘ow’oruganda obwaraaba nasobora kwetwaza omu mulingo nk’ogu, mali kinu kitebe kya Ruhanga?’ Kinu nikyo ekintu kyonyini Sitaani eky’arukugonza tuteekereze. (2 Kol. 2:11) Entekereza nk’egi embi n’esobora kutuletera kwebaganiza hali Yahwe hamu n’ekitebe kye. Nahabweki, kakuba twehurra ngu ow’oruganda rundi munyaanya itwe atutwaize kubi, nitusobora tuta kwikara nitutekereza kurungi kandi tukerinda entekereza embi?

4. Yusufu akaikara nateekereza ata kurungi obuyatwaziibwe kubi, kandi masomo ki agatusobora kwega kuruga omu kyokurorraho kye? (Okubanza 50:19-21)

⁴ Otaahura enzigu. Yusufu obwakaba akyali muto, bakuru be bakamutwaza kubi. Bakaba bamunobere, kandi bamu halibo bakaba nibagonza n’okumwita. (Kub. 37:4, 18-22) Hanyuma bakamutunda omu bwiru. Ekyarugiremu, akatangatangana ebirengo eby’amaani kumara emyaka 13. Yusufu yakusoboire kuteekereza ngu Yahwe akaba atarukumugonza. Kandi yakusoboire kwekaguza Yahwe obwaraaba akaba amulekereho omu bwire nambere akaba nayetaaga obukonyezi. Baitu Yusufu atabiihirwe. Oihireho akaikara natekereza kurungi habw’okwikara ateekaine. Obuyatungire omugisa ogw’okwesasuza hali bagenzi be atakikole, oihireho akabooleka okugonza kandi yabaganyira. (Kub. 45:4, 5) Yusufu akeetwaza omu mulingo ogu habwokuba akaikara aine okuteekereza okurungi. Omu kiikaro ky’okuteeka omutima ha bizibu bye akaikara natekerezaaho ekigendererwa kya Yahwe. (Soma Okubanza 50:19-21.) Isomo ki eriturukwega? Obworaaba otwaziibwe kubi, otabiihirirwa Yahwe, rundi okateekereza ngu akulekereho. Oihireho tekerezaaho omulingo arukukonyera kugumira ekirengo. Ekindi, abandi obubakutwaza kubi lengaho kuswekerra obutahikirra bwabo n’okugonza.​—1 Pet. 4:8.

5. Miqueas akaikara ata n’okwetegereza okurungi obuyayehuliire ngu atwaziibwe kubi?

⁵ Tekerezaaho ekyokurorraho eky’akasumi kanu eky’omugurusi w’ekitebe arukwetwa Miqueas kuruga omu South America. c Naijuka akasumi nambere yayehuliire ngu akaba atwaziibwe kubi bamu h’ab’oruganda abaine obujunanizibwa omu kitebe. Akagamba ati: “Tinkatungaga okwetuntura nk’oku omu bwomeezi bwange. Nkatiina muno. Naburwaga oturo omu bwire bw’ekiro, kandi nacuraga muno habwokuba nayehurraga ngu hakaba hataroho ekintu kyona ekinsobora kukoraho.” Baitu nabwo, Miqueas akaikara aine okwetegereza okurungi nayekamba kulema enyehurra ze. Akaikara nasaba Yahwe kumuha omwoyo ogurukwera n’amaani kugumiisiriza. Akakora okuseruliiriza omu bitabu byaitu kutunga amagezi agasobora kumukonyera. Isomo ki eriturukwega? Kakuba oyehurra ngu ow’oruganda rundi munyaanya itwe akutwaize kubi, ikara oteekaine kandi lengaho kulema enyehurra zaawe embi ez’osobora kuba oine. N’osobora kutamanya kiki ekyaletiire omuntu ogu kubaza rundi kwetwaza omu mulingo ogu. Nahabweki gambira Yahwe omu kusaba kandi omusabe akukonyere kurora ensonga omu mulingo omuntu ogu arukuziroramu. Obworakora eki nikiija kukuletera kuteekereza ngu ow’oruganda rundi munyaanya itwe atakigenderre kukukora kubi kandi nikiija kukwanguhira kumuganyira. (Nfu. 19:11) Ijuka ngu Yahwe amanyiire kimu enyikara yaawe kandi naija kukuha amaani ag’orukwetaaga kusobora kugumiisiriza.​—2 Byom. 16:9; Mug. 5:8.

6. Habwaki kiri kikuru kurora okuhanwa kwa Yahwe nk’akokurorraho ak’okutugonza? (Abeheburaniya 12:5, 6, 11)

⁶ Yahwe obw’atuhana nikisobora kutusaaliza  muno. Baitu obututeeka omutima ha busaasi bwonka, tusobora kutandika kuteekereza ngu okuhanwa kubaire kutali kw’obwinganiza rundi kw’obukaali. Ekirugamu, nitusobora kulemwa kurora ekintu ekikuru kandi eki nikyo ngu Yahwe natuhana habwokuba natugonza. (Soma Abaheburaniya 12:5, 6, 11.) Kandi kakuba tuleka enyehurra zaitu kutulema tuba nituha Sitaani akagisa ak’okututahirra. Nagonza twange okuhanwa kandi ekirukukirayo obubi, nagonza twebaganize hali Yahwe hamu n’ekitebe kye. Obworaaba ohanirwe, n’osobora ota kwikara n’oyetegereza kurungi?

7. (a) Nk’oku kyolekerwe omu kisisanu, Yahwe akakozesa ata Petero hanyuma y’okwikiriza okuhanwa? (b) Kiki ekyorukwega kuruga omu kyokurorraho kya Petero?

⁷ Ikiriza okuhanwa, kandi okole empindahinduka ezirukwetaagisibwa. Yesu akahana Petero omu maiso g’abakwenda bagenzi be emirundi erukuhingura omu gumu. (Mar. 8:33; Luk. 22:31-34) Eki nikisobora kuba kyaletiire Petero kwehurra aswaire muno! Baitu, Petero akaikara ali mwesigwa hali Yesu. Akaikiriza okuhanwa kandi yayegera ha nsobi ze. Ekyarugiremu, habw’okwikara ali mwesigwa, Yahwe akamuha empeera kandi yamuha n’obujunanizibwa obw’amaani omu kitebe. (Yoh. 21:15-17; Eng. 10:24-33; 1 Pet. 1:1) Kiki ekitusobora kwega kuruga omu kyokurorraho kya Petero? Tugasirwa kandi tugasira n’abandi obutwikiriza okuhanwa, tukaleka kuteeka omutima ha kuswara okuruga omu kuhanwa, kandi tukakora empindahinduka ezirukwetaagisibwa. Obutukora tuti, tweyongera kufooka b’omugaso hali Yahwe hamu n’Abakristaayo bagenzi baitu.

8-9. Hanyuma y’okuhanwa, Bernardo ha kubanza akehurra ata, baitu kiki ekyamukonyire kuterekereza entekereza ye?

⁸ Tekerezaaho ekyahikire hali Ow’oruganda Bernardo, kuruga omu Mozambique. Akaihwaho obujunanizibwa obw’okuheereza nk’omugurusi. Bernardo akehurra ata ha kubanza? Nagamba ati, “Nkabiihirwa habwokuba ntagonze okuhanwa okunatungire.” Akaba ayeralikiriire ha mulingo abandi baramuroramu omu kitebe. Nagamba ati, “Kikantwarra emyezi kurora okuhanwa omu mulingo oguhikire kandi n’okwongera kwesiga Yahwe hamu n’ekitebe kye.” Kiki ekyakonyire Bernardo kuhindura entekereza ye?

⁹ Bernardo akaterekereza entekereza ye. Nasoborra ati: “Obunkaba nimpeereza nk’omugurusi  omu kitebe, nakozesaaga Abaheburaniya 12:7 kukonyera abandi kuba n’entekereza ey’ehikire ha kuhanwa kwa Yahwe. Nkekaguza nti: ‘Noha arukwetaaga kuta omu nkora ekyahandiikirwe kinu?’ Abaheereza ba Yahwe boona​—otwaliiremu nanyowe.” Hanyuma Bernardo akakora n’empindahinduka ezindi kwongera kwesiga Yahwe hamu n’ekitebe kye. Akongera ha bwire obw’okusoma Baibuli hamu n’okugyecumitirizaaho. N’obukiraaba ngu akaba ayeralikiriire ha mulingo ab’oruganda hamu na banyaanya itwe bamuroramuga, yakoraga nabo omu buheereza kandi ayejumbira n’omu nsorrokano ez’ekitebe. Hanyuma y’akasumi, Bernardo akongera yafoorwa omugurusi w’ekitebe. Nka Bernardo, obworaaba otungire okuhanwa, lengaho kutateeka omutima ha kuswara, ikiriiza obuhabuzi, kandi okole empindahinduka ezirukwetaagisibwa. d (Nfu. 8:33; 22:4) Obworakora oti, kigumize kimu ngu Yahwe naija kukuha empeera habw’okwikara oli mwesigwa hali uwe hamu n’ekitebe kye.

10. Mpindahinduka ki ey’ekitebe ey’esobora kuba yalengere obwesigwa obw’abasaija Abaisaleri abamu?

¹⁰ Empindahinduka z’ekitebe nizisobora kulenga obwesigwa bwaitu. Kakuba tutegendereza, nitusobora kuziikiriza kutubaganiza hali Yahwe. Ekyokurorraho, tekerezaaho empindahinduka eyahikireho Abaisaleri hansi y’Ebiragiro bya Musa. Obubaali batakatungire Ebiragiro, banyineeka nubo bakoraga emirimo ey’obwanyakatagara. Bayombekaga ebyoto kandi nibakikirra amaka gaabo omu kuhongera Yahwe ebihongwa. (Kub. 8:20, 21; 12:7; 26:25; 35:1, 6, 7; Yob. 1:5) Baitu Ebiragiro obubyatairweho, banyineeka bakaba batakyaikirizibwa kukora emirimo enu. Yahwe akakoma banyakatagara kuruga omu ka ya Aroni kuhayo ebihongwa. Kuruga omu kasumi ako, nyineeka wena ow’atali omu h’abaijukuru ba Aroni obuyatandikaga kukora emirimo ey’obwanyakatagara, akaba nasobora kwitwa. e (Lev. 17:3-6, 8, 9) Tugambe ngu empindahinduka enu n’esobora kuba niyo yaletiire Kora, Dasani, Abiramu, hamu n’abakuru 250 kujeemera Musa na Aroni? (Kub. 16:1-3) Titumanyire ensonga yonyini. Baitu k’ebe nsonga ki, Kora hamu n’abantu abamweteranizeeho bakalemwa kwikara bali besigwa hali Yahwe. Kakuba empindahinduka z’ekitebe zirenga obwesigwa bwawe, kiki eky’osobora kukora?

11. Kiki ekiturukwega kuruga omu kyokurorraho eky’abamu h’Abakohasi?

¹¹ Sagika omu bwijwire empindahinduka z’ekitebe. Abaisaleri obubakaba bali omu irungu, Abakohasi bakaba baine obujunanizibwa obw’embaganiza. Buli murundi Abaisaleri baafurraga enkambi kugenda omu kiikaro ekindi, bamu h’Abakohasi bahimbaga esanduuko y’ekiragano nibebembera abantu. (Kubar. 3:29, 31; 10:33; Yos. 3:2-4) Gunu kagukaba mugisa gw’amaani! Baitu ebintu bikahinduka Abaisaleri obubataahire omu Nsi ey’Ekaba Eraganizibwe. Esanduuko ekaba etakyayetagisibwa kuhimbwa buli kaire. Nahabweki nambere Sulemani yafookiire omukama, Abakohasi abamu bakaheebwa omulimo ogw’okuzina, abamu kuheereza nk’abalinzi ba ha miryango, kandi abandi kurolerra amahurro. (1 Byom. 6:31-33; 26:1, 24) Busaho nambere harukwoleka ngu Abakohasi bakatontorooma rundi bakasaba obujunanizibwa oburukukiraho habwokuba bakaba baine obujunanizibwa obw’embaganiza ha kubanza. Isomo ki eriturukwega? Sagika  n’omutima gwawe gwona empindahinduka ekitebe kya Yahwe kikora otwaliiremu n’ezi ezisobora kukwataho obujunanizibwa bwawe. Tunga okusemererwa omu bujunanizibwa bwona obworaheebwa. Ijuka ngu obujunanizibwa bwawe tibuli nubwo obukufoora w’omuhendo hali Yahwe. Yahwe asiima obwebundaazi bwawe kukirra hara obujunanizibwa bwona obwoine.​—1 Sam. 15:22.

12. Zaina akehurra ata obuyaihirwe ha Beseeri?

¹² Tekerezaaho ekyokurorraho ekya munyaanya itwe Zaina, ayahikirweho empindahinduka omu buheereza bwe kandi kyamuletera kufeerwa obuheereza obuyagonzaaga muno. Bakamusindika kuheereza nka payoniya ow’embaganiza hanyuma y’okumara emyaka 23 naheereza ha Beseeri. Nagamba ati: “Empindahinduka omu buheereza bwange ekanteera ibumbakanwa. Nkehurra nk’ow’ataine mugaso kandi nkaikara ninyekaguza, ‘Nsobi ki einakozere?’” Eky’obusaasi, ab’oruganda na banyaanya itwe bakongera ha busaasi bwe obubamugambaga ngu: “Kakuba wali n’okora kurungi ekitebe tikyakukwihire ha Beseeri.” Kumara akasumi, Zaina akehurra ahoirwemu amaani ekyamuleteraga kuraara narra. Baitu nagamba ati: “Baitu ntagurukyegurukye ekitebe kya Yahwe rundi okugonza kwe.” Zaina akasobora ata kwikara natekereza kurungi?

13. Kiki Zaina ekiyakozere kusingura enyehurra ze embi?

¹³ Zaina akasobora kusingura enyehurra embi. Omu mulingo ki? Akasoma ebicweka kuruga omu bitabu byaitu ebyabazaahoga enyikara ey’akaba narabamu kandi byamukonyera kugigumira. Ekicweka ekiine omutwe “N’osobora Kugumira Okuhoibwamu Amaani!” ekirukusangwa omu Watchtower eya Febwali 1, 2001, kikamukonyera muno. Ekicweka eki nikisoborra omulingo omuhandiiki wa Baibuli Marako asobora kuba yarwanisize enyehurra nizo zimu obuyahikirweho empindahinduka omu bujunanizibwa bwe. Zaina nagamba ati, “Ekyokurorraho kya Marako kikaba kintu ekinkaba ninyetaaga kunkonyera kusingura okuhwamu amaani.” Ekindi Zaina akaikara haihi n’abanywani be. Kandi atesoroole; rundi kweganyira. Akakyetegereza ngu omwoyo ogurukwera nugwo gwebembera encwamu z’ekitebe kya Yahwe, kandi ngu ab’oruganda abarukwebembera baamufaahoga  muno. Ekindi akakyetegereza ngu ekitebe kya Ruhanga kisemeriire kukora ekirukukirayo kimu oburungi kusobora kuhikiiriza omulimo gwa Yahwe.

14. Mpindahinduka ki ey’ekitebe eyagumiire Vlado kugikorraho, kandi kiki ekyamukonyire?

¹⁴ Ow’oruganda Vlado, ow’aine emyaka 73 kandi omugurusi w’ekitebe omu Slovenia, kikamugumira muno ekitebe kye obukyateraniziibwe n’ekindi kandi Ekyombeko ky’Obukama nambere yasorrokaniraga obu kyakingirwe. Nagamba ati: “Ntetegereze ensonga habwaki Ekyombeko eky’Obukama ekisemiire muno nk’eki kyakingirwe. Kikansaaliza muno habwokuba nubwo tukaba twakaruga kukidaabiriza. Ndi mubaizi, kandi nubwo nkaba nakaruga kukora entebe hamu n’emeza ezimu empyaka. Ekindi, n’okuteraniza ebitebe kuketaagisa kukora empindahinduka nyingi ezaali zitanguhire hali itwe abatebezi abakuzire omu myaka.” Kiki ekyakonyire Vlado kusagika entekaniza egi? Nagamba ati: “Kuhondera empindahinduka ezikozerwe ekitebe kya Yahwe kikira kurugamu emigisa. Kitutekaniriza empindahinduka ezirukukiraho omu kasumi ak’omu maiso.” Nikikugumira kukorra ha mpindahinduka eziijaho habw’okuteraniza ekitebe, rundi empindahinduka omu bujunanizibwa? Kigumye ngu Yahwe nayetegereza enyehurra zaawe. Obwosagika empindahinduka nk’ezi kandi okaikara oli mwesigwa hali Yahwe hamu n’ekitebe kye ekyarukukozesa, naija kukuha emigisa.​—Zab. 18:25.

15. Nitusobora tuta kwikara nitwetegereza kurungi obututangatangana ebizibu kuruga omu kitebe?

¹⁵ Nk’oku tuliyo nitwirra haihi n’empero ey’ensi enu embi, nitunihira kutunga ebizibu kuruga omu kitebe. Ebizibu binu nibisobora kulenga obwesigwa bwaitu hali Yahwe. Nahabweki tusemeriire kwikara nitwetegereza kurungi. Obwoyehurra ngu otwaziibwe kubi Omukristaayo mugenzi wawe, otaahura enzigu. Obwotunga okuhanwa otateeka omutima ha kuswara, ikiriza obuhabuzi, kandi okole empindahinduka ezirukwetaagisibwa. Kandi ekitebe kya Yahwe obukiraakora empindahinduka ezirukukwataho iwe nk’omuntu ziikirize n’omutima gwawe gwona kandi oyorobere oburagirizi.

16. N’osobora ota kwikara n’oyesiga Yahwe hamu n’ekitebe kye?

¹⁶ N’osobora kwikara n’oyesiga Yahwe hamu n’ekitebe kye, obwesigwa bwawe obubulengwa. Baitu kusobora kukikora, noyetaaga kwikara noyetegereza kurungi, ekirukumanyisa, kwikara oteekaine, noteekereza kurungi, kandi n’okurora ensonga nk’oku Yahwe aziroramu. Cweramu kimu kwesomesa h’abantu ab’omu Baibuli abaasoboire kugumira ebizibu nibyo bimu kandi oyecumitirizeeho ebyokurorraho byabo. Saba Yahwe akukonyere. Otalengaho kwesoroora ha kitebe. Hanyuma n’obuharaabaho ki Sitaani tarukwija kusobora kutubaganiza hali Yahwe hamu n’ekitebe kye.​—Yak. 4:7.