1-2. Mulimo ki omurungi omugurusi ogu akora?

 OBU oraaba omazire akasumi n’oheereza nk’omuheereza, nosobora kuba okozere n’amaani kusobora kukurakuraniza emiringo erukwetagisa kusobora kufooka omugurusi. Wakugondeze kukora omulimo omurungi abagurusi ogu bakora?—1 Tim. 3:1.

² Omugurusi akora mirimo ki? Ayebembera omu kutebeza, akora n’amaani kugarramu ab’oruganda amaani n’okwegesa kandi ayombeka ekitebe kuraba omu bigambo bye n’ekyokurorraho kye. Egi niyo ensonga habwaki Baibuli eyeta abagurusi abarukukora n’amaani ebisembo omu bantu.—Bef. 4:8.

3. Ow’oruganda naasobora kukurakurana ata kufooka omugurusi? (1 Timoseo 3:1-7; Tito 1:5-9)

³ Nosobora ota kufooka omugurusi? Ebintu ebi osemeriire kuhikiriza kusobora kufooka mugurusi tibirukusisana n’ebi osemeriire kuhikiriza kutunga omulimo. Obwire oburukukira obwingi, omuntu obu aba naagonza kukuha omulimo, abanza kurora obu oraaba oine obukugu oburukwetaagisa. Kwahukanaho, obu oraaba nogonza kufooka omugurusi, tosemeriire kugarukira ha bukugu obw’okutebeza n’okwegesa . Osemeriire kuhikiriza ebirukubazibwaho omu 1 Timoseo 3:1-7 na Tito 1:5-9. (Soma.) Ekicweka kinu nikiija kubazaaho ebintu ebimu ebirukubazibwaho omu nkarra ezi: nitwija kubazaaho omulingo ow’oruganda asobora kutunga ibara erirungi omu bantu ab’aheeru hamu n’omu kitebe, omulingo asobora kuba nyineeka omurungi kandi ow’ayetekaniize kuheereza ekitebe.

KUKORA IBARA ERIRUNGI

4. Nikimanyisa ki “okutabaho ekyokuhanwa?”

⁴ Kusobora kufooka omugurusi, osemeriire ‘okutabaho ekyokuhanwa,’ ekirukumanyisa ngu abandi omu kitebe nibakubazaaho  kurungi habw’engeso zaawe enungi. Ekindi, osemeriire ‘kuba n’obazibwaho kurungi abo ab’aheeru.’ Abantu abatarukuheereza Yahwe nibasobora kubazaaho kubi enyikiriza zaawe baitu tibasemeriire kuba n’ensonga yoona ey’okukubazaaho kubi habw’okutaba mwesigwa rundi habw’engeso zaawe. (Dan. 6:4, 5) Wekaguze, ‘Nimbazibwaho kurungi omu kitebe n’aheeru y’ekitebe?’

5. Nosobora ota kwoleka ngu oli muntu ow’agonza oburungi?

⁵ Obu oraaba oli muntu ‘agonza oburungi,’ serra ebirungi omu bantu kandi obasiime habw’emiringo yabo enungi. Ekindi, kikusemeza kukorra abandi ebirungi, nobukyetaagisa kukora ebirukukiraho. (1 Bas. 2:8; rora “lover of goodness” study note on Tito 1:8.) Habwaki omulingo gunu mukuru muno hali abagurusi? Habw’okuba bakozesa kurungi obwire bwabo kugarramu amaani abandi omu kitebe n’okuhikiriza obujunanizibwa bwabo. (1 Pet. 5:1-3) N’obu kiraaba nukwo kiri, okusemererwa okubatunga omu kuheereza abandi kukirra hara okwefereza oku bakora.—Ebik. 20:35.

6. Miringo ki emu ei tusobora kwolekamu amakune? (Abaheburaniya 13:2, 16; Rora n’ekisisani.)

⁶ Oyoleka ngu ‘n’okunira abagenyi’ obu okorra abandi ebirungi otwaliiremu n’abo abatali banywani baawe nfenanfe. (1 Pet. 4:9) Katondogorozi emu eya Baibuli egamba eti: “Omuntu ow’amakune ayoleka embabazi abantu ab’atamanyire kandi kimusemeza kubaraaliza omu ka ye.” Wekaguze, ‘abantu abandi bammanyire nk’omuntu ow’ayoleka abandi embabazi omu kitebe?’ (Soma Abaheburaniya 13:​2, 16.) Omusaija ow’amakune ayoleka embabazi abantu boona otwaliiremu abanaku, ab’oruganda ababa babungiire ekitebe kuha embazo, hamu n’abandi abekamba kugarramu ab’oruganda na banyaanya itwe amaani nk’abaroleerezi b’ebicweka.—Kub. 18:2-8; Nfu. 3:27; Luk. 14:13, 14; Ebik. 16:15; Bar. 12:13.

7. Omugurusi ayoleka ata ngu ‘tarukugonza muno sente’?

⁷ ‘Atarukugonza muno sente.’ Kinu nikimanyisa ngu sente n’itungo tinibyo bisemeriire kuba bikuru muno hali iwe. K’obe oli muguuda rundi munaku, kuheereza Yahwe kisemeriire kuba nikyo kintu ekirukukirayo obukuru omu bwomeezi bwawe. (Mat. 6:33) Kozesa obwire bwawe, amaani gaawe hamu n’ebintu byawe kuramya Yahwe, kufaaho eka yaawe, n’okuheereza ekitebe. (Mat. 6:24; 1 Yoh. 2:​15-17) Wekaguze,  ‘Sente nzirora nta? Nimmarwa ebintu ebi nyine? Rundi, ninteeka omutima ha kukora sente n’okutunga ebintu ebindi bingi muno?’—1 Tim. 6:​6, 17-19.

8. Miringo ki emu ey’osobora kwoleka ngu oine engeso enungi kandi oli mwerinzi?

⁸ Obu oraaba oine ‘engeso enungi’ kandi oli ‘mwerinzi,’ nikimanyisa ngu oyoleka okwetegereza omu nyikara zoona omu bwomeezi bwawe. Kinu nikitwarramu kwetantara kunywa muno n’okulya muno, kutajwara n’okwekoraho omu mulingo ogutasemiire hamu n’okukora encwamu enungi obu kirukuhika ha kwesemeza. Tohondera enyetwaza y’abantu abatasemiire kandi abatarukuheereza Yahwe. (Luk. 21:34; Yak. 4:4) Oikara otekaine abandi n’obu bakwendereza. Tosemeriire ‘kuba mutamiizi’; rundi kuba muntu owarukumanywa nk’owarukunywa ekihinguraine. Wekaguze, omulingo nyetwazaamu gwoleka ngu nyine engeso enungi kandi ngu ndi mwerinzi?’

9. Kuba n’entekereza enungi n’okuba n’entekaniza enungi nikitwarramu ki?

⁹ Obu oba muntu owaine ‘enteekereza enungi,’ nikimanyisa ngu otekerezaaho emisingi ya Baibuli omu nyikara ezirukwahukana omu bwomeezi bwawe. N’obwegendereza otekerezaaho omulingo obuhabuzi bwa Baibuli burukukwataho enyikara yoona ey’orukuba orumu. Ekirugamu oba nenyetegereza ey’ehikire kandi okora encwamu enungi. Tokora encwamu nosigikirra ha bintu bike eby’omanyire, oihireho okigumya ngu omanyire buli kimu kyona ekirukwetaagisa. (Nfu. 18:13) Ekirugamu okora encwamu ez’amagezi ezirukwoleka entekereza ya Yahwe. Obu oraaba oli muntu owaine ‘enteekaniza enungi,’ nikimanyisa ngu otekaniza kurungi ebintu byawe kandi olinda obwire. Oba omanyirwe nk’omuntu omwesigwa kandi ow’ahondera oburagirizi. Emiringo enu niija kukuleetera kuba n’ibara erirungi. Hati leka tubazeeho ebirukwetaagisa ebirukubazibwaho omu Baibuli kusobora kuteekaho ekyokurorraho ekirungi nk’omutwe gw’eka.

KUTEEKAHO EKYOKURORRAHO EKIRUNGI NK’OMUTWE GW’EKA

10. Omusaija alema ata kurungi eka ye?

¹⁰ Obu oraaba oli nyineeka kandi noogonza kufooka omugurusi omu kitebe, eka yaawe esemeriire kuba n’ebazibwaho kurungi, nahabweki osemeriire kuba ‘noolema kurungi eka yaawe.’ Osemeriire kuba nomanywa nk’owarukugonza eka yaawe kandi ow’arukugifaaho. Kinu nikitwarramu kwebembera eka yaawe omu miringo yoona ey’okuramya. Habwaki kinu kikuru? Omukwenda Paulo akakaguza ati: “Baitu omuntu wena obwatamanya okulema enjuye wenka, aralindaga ata [ekitebe] kya Ruhanga?”—1 Tim. 3:5.

11-12. Engeso z’abaana b’ow’oruganda nizisobora zita kukwataho okukurakurana kwe? (Rora n’ekisisani.)

¹¹ Obu oraaba oli taata, osemeriire kuba ‘n’abaana abahulizi kandi abaine engeso enungi.’ Osemeriire kubeegesa n’okubatendeka omu mulingo ogw’okugonza. Ky’amananu ngu nk’abaana abandi boona, nibaija kwegondeza omu kuseka n’okuzaana. Baitu habw’okubatendeka kurungi, nibaija kuba bahulizi, abarukutamu abandi ekitiinisa, kandi abarukwetwaza kurungi. Ekindi, osemeriire kukora kyona ekirukusoboka kukonyera abaana baawe kuba n’enkoragana enungi na Yahwe, kuhondera emisingi ya Baibuli n’okukurakurana kuhika ha kubatizibwa.

¹² ‘Anyina abana abarukuikiriza, abatalegwa nkabagubiraro nobubakuba abobwereme.’ Kakuba omwana aba abatiziibwe rundi nakurakurana kuhika ha idaara ly’okubatizibwa baitu akakora ekibi eky’amaani, eki nikisobora kita kukwataho ise? Ise obu araaba aikaire atarukufaayo kumutendeka n’okumuhana, tasobora kuba ahikire kuheereza nk’omugurusi.—Rora Watchtower eya Okitobba 15, 1996, rup. 21, kac. 6-7.

 KUHEEREZA OMU KITEBE

13. Nosobora ota kwoleka ngu oli muntu ow’arukwoleka okwetegereza kandi ow’atarukwefaaho wenka?

¹³ Ab’oruganda abaine emiringo enungi ey’Ekikristaayo bakonyera ekitebe. Omusaija ‘ow’okwetegereza’ akurakuraniza obusinge. Obu oraaba nogonza kumanywa nk’omuntu ow’ayoleka okwetegereza, huliiriza abandi kandi olengeho kumanya omulingo barukwehurra. Ekyokurorraho, kakuba oba oli mugurusi kandi oli omurukurato rw’abagurusi kandi abarukukira obwingi bakaikiraniza ha ncwamu ey’erukuhikaana n’emisingi ya Baibuli, noija kusagika encwamu egi n’obu kiraaba ngu oine entekereza ey’erukwahukana? ‘Okutefaaho wenka’ nikimanyisa ngu torukwija kuhambiriza abandi kukora ebintu omu mulingo orukugonza. Oba omanyire ngu kikuru kuhuliiriza entekereza z’abandi. (Kub. 13:​8, 9; Nfu. 15:22) Toli muntu ‘arukukungana’ rundi ‘arukukwatwa bwangu ekiniga.’ Kinu nikimanyisa ngu toli muntu ow’atarukutamu abandi ekitiinisa rundi kukungana nabo. Oihireho obatwaza omu mulingo ogw’embabazi. Nk’omusaija ow’obusinge, okora kyona ekirukusoboka kuleetaho obusinge n’omu nyikara ezigumire. (Yak. 3:​17, 18) Ebigambo byawe eby’embabazi nibisobora kworobya enyetwaza y’abantu abandi otwaliremu n’abo abahakaniza enyikiriza zaawe.—Bac. 8:​1-3; Nfu. 20:3; 25:15; Mat. 5:​23, 24.

14. Nikimanyisa ki kutaba omuhinduki omuhyaka n’okuba mwesigwa?

¹⁴ Ow’oruganda ow’arukugonza kufooka mugurusi asemeriire kuba ‘atali muhinduki omuhyaka.’ N’obu kiraaba ngu tosemeriire kumara emyaka nyingi obatiziibwe, nikyetaagisa obwire kusobora kufooka Mukristaayo ow’akuzire omu by’omwoyo. Otakafookere mugurusi osemeriire kwoleka ngu nka Yesu, oli mwebundaazi kandi torukubiihirwa habw’okumara obwire bwingi otarukukuheebwa obujunanizibwa omu kitebe. (Mat. 20:23; Baf. 2:​5-8) Nosobora kwoleka ngu oli ‘mwesigwa’ kuraba omu kugumira hali Yahwe, kuhondera endengo ze ez’okuhikirra, hamu n’okuhondera oburagirizi obu atuha naakozesa ekitebe kye.—1 Tim. 4:15.

15. Nikyetagisa omugurusi kuba omuhi w’embazo omurungi muno? Soborra.

 ¹⁵ Ebyahandiikirwe byoleka kurungi ngu omuroleerezi asemeriire kuba ‘naasobora kwegesa.’ Baitu kinu nikimanyisa ngu asemeriire kuba ali muhi w’embazo omurungi muno? Nangwa. Abagurusi tibali boona ngu bahi b’embazo abarungi, baitu obu barukuba nibatebeza rundi babungiire ab’oruganda kubagarramu amaani, basemeriire kuba nibasobora kukozesa kurungi Baibuli kwegesa n’okugarramu amaani ab’oruganda na banyaanya itwe. (Rora “qualified to teach” study note on 1 Timoseo 3:2; lengesaniza na 1 Abakolinso 12:​28, 29 na Abefeso 4:11.) N’obu kiraaba nukwo kiri, osemeriire kugumizaamu n’okurakuraniza obukugu bwawe obw’okwegesa. Nosobora ota kuba omwegesa omurungi?

16. Nosobora ota kufooka omwegesa omurungi? (Rora n’ekisisani.)

¹⁶ ‘Agumya ekigambo ekyokwesiga.’ Kusobora kuba mwegesa omurungi, eby’orukwegesa n’obuhabuzi obu orukuha bisemeriire kusigikirra ha Kigambo kya Ruhanga. Kusobora kukora eki, osemeriire kuba oli musomi murungi wa Baibuli hamu n’ebitabu byaitu ebirukusigikirra ha Baibuli. (Nfu. 15:28; 16:23; rora “holding firmly to the faithful word” study note on Tito 1:9.) Obu oraaba noyesomesa, rora omulingo ebitabu byaitu bisoborra enkarra za Baibuli nukwo osobole kuzita omu nkora omu mulingo oguhikire. Obu oraaba noyegesa, lengaho kuhika ha mitima ey’abo abarukukuhuliiriza. Nosobora kwongera ha bukugu bwawe obw’okwegesa, kakuba osaba abagurusi abandi abamazire akasumi nibaheereza obuhabuzi kandi okabuta omu nkora. (1 Tim. 5:17) Abagurusi basemeriire kuba ‘nibasobora . . . kugarramu amaani’ ab’oruganda na banyaanya itwe; baitu obwire obumu basemeriire kuha ab’oruganda na banyaanya itwe obuhabuzi rundi ‘kubahana.’ Kandi ebintu binu byona abagurusi basemeriire kubikora omu mulingo ogw’embabazi. Kakuba oyoleka okugonza kandi okwegesa kwawe kukasigikirra ha Kigambo kya Ruhanga, noija kuba omwegesa omurungi habw’okuba noija kuba nohondera ekyokurorraho eky’Omwegesa Omukuru Yesu.—Mat. 11:​28-30; 2 Tim. 2:24.

 GUMIZAAMU N’OKURAKURANA

17. (a) Kiki ekisobora kukonyera abaheereza kugumizaamu nibakurakurana? (b) Kiki abagurusi eki basemeriire kwijuka obu barukuba nibekebiija ow’oruganda obu araaba asemeriire kukomwa kuheereza nk’omugurusi? (Rora akasanduuko “ Mwoleke Okwetegereza Obu Muraaba Nimwekebiija Abandi.”)

¹⁷ Hanyuma y’okurora ebintu ebirukwetaagisa kuheereza nk’omugurusi, abaheereza abamu nibasobora kwehurra ngu tibasobora kubihikiiriza. Baitu oijuke ngu Yahwe n’obu kyakuba ekitebe kye, tibarukukunihirramu kwoleka emiringo enu kikumi ha kikumi. (1 Pet. 2:21) Kandi omwoyo gwa Yahwe ogw’amaani nugwo gukonyera kukurakuraniza emiringo enu. (Baf. 2:13) Haroho omulingo gwona ogu wakugondeze kweyongera kukurakuraniza? Saba Yahwe akukonyere. Seruliiriza ha mulingo ogu, kandi osabe omu ha bagurusi kukukonyera kumanya nambere osemeriire kuhinduramu.

18. Abaheereza boona nibekambisibwa kukora ki?

¹⁸ Leka ab’oruganda boona otwaliiremu n’abo abarukuheereza nk’abagurusi tugumizeemu nitukurakuraniza emiringo ey’ebaziibwe omu kicweka kinu. (Baf. 3:16) Noheereza nk’omuheereza omu kitebe? Gumizaamu n’okurakurana! Saba Yahwe oyeyongere kuba w’omugaso omu kumuheereza n’okuheereza ab’oruganda na banyaanya itwe. (Is. 64:8) Yahwe naija kukuha emigisa habw’amaani ag’orukuteekamu kukurakurana kusobora kuheereza nk’omugurusi.